Basef Buꞌwafi Godi 2 Tesalonaikai 1
Basef Ifimba Pol Nandaꞌef Fagiꞌ Fagafeꞌma Tesalonaikai
Basef bandafi Pol nagiꞌ nandaꞌef fagafeꞌma esis Tesalonaikai
1:1-2 Pol naꞌi basef buꞌwafima God noloma Jisas Krais mogatopalopas
1:3-12 Pol nanifela Goda esis nandabetenas
2:1-17 Aman nogosombala basef Godii aꞌ nifiꞌi
3:1-15 Esis Kristen ina sope dowaf, owaꞌi. Sondaꞌ maola sotopalopa esis atis sogaloma anis daias wapani
3:16-18 Basef akutaifi
1
Aeꞌ Pol aloma Sailasi Timoti wape naꞌaꞌe. Eaꞌ andaꞌ basef ifimba fafeꞌmago ipaꞌ Kristen pagape wambel Tesalonaikai. Ipaꞌ pape paloma God ahamapa apeꞌinai naloma Dembinai Jisas Krais. Ipaꞌ Kristen pape palomam eaꞌ amamipai siꞌipa.* Ro 1:7; 1 Te 1:1
Aeꞌ aꞌi ahamapa God noloma Dembinai Jisas Krais motopalopepa dowaf mowaꞌ banagaipa eaꞌ mope molomepago meseꞌepago opalef awanilifi.* 1 Te 1:2-3; 2 Te 2:13
Pol nanifela God
Ipaꞌ Kristen alipipai afaꞌipai, afaꞌ waꞌi andeandeꞌma dondol waganifela Goda ipaꞌ. Waf afambai usiꞌifi. Deiꞌ main, hapif ipeꞌini nataga banagen aꞌowaꞌ eaꞌ ipaꞌ hipai atona atin ukup pindaima atin. Eaꞌ waf afamba fetaga fendafeꞌ luꞌuf aꞌowaꞌ.* 2 Ko 7:4; 1 Te 2:19; Re 1:9 Waf afamba atef deiꞌ afaꞌ wasaꞌma agof ipeꞌigufi laꞌafena amam nematawa Kristen. Waꞌias naꞌamba waꞌi esis Tesalonaika sofaꞌ nimanimi maloma akafimi hiami, apaꞌ owaꞌ, sahapifa Jisas salutu banages.* Fl 1:28
Anaf God nowaloga apaꞌ ma waf buꞌwafi
Waf afamba ipeꞌifi buꞌwafi, God nihimbaꞌmafa naꞌamba. Anen nawalogapa ma waf ananifi usiꞌifi atef. Nandaꞌas naꞌamba ma nigaꞌi ipaꞌ buꞌupai ma pigawis anamba anen nagalaꞌambemagoma. Deiꞌ ipaꞌ pefaꞌ nimanimi maloma akafimi hiami. God atiasi nondaꞌepa beꞌepa ma pegape anamba nagalaꞌambemagoma.* Ro 12:19; Re 18:6-7 Anaf God nondaꞌ waf usiꞌifi naꞌamba. Nogwamasa nimanimi esis sandaꞌmepam ipeꞌi.* Mt 25:31; 1 Te 3:13, 4:16 Anen naꞌi notagwaha nimanimi amamba deiꞌ ipaꞌ pegefaꞌami eaꞌ notagwaha nimanimi afaꞌimi nondaꞌapa mopoma nomaꞌw andeandeꞌ. Nondaꞌam nemaf afamba Dembinai Jisas nokwaha heven nogataga alihina nogalomai nif luꞌwami feloma ensel amamba banagami.* Sam 79:6; Ais 66:15; Ro 2:8; 1 Pi 4:17 Nemaf afamba God nohambombaga esis isimba sogololama anini soloma isimba owaꞌ sigaila basef buꞌwafi Dembinai apeꞌinai Jisasia.* Ais 2:10,19,21 Epes isimba atiasi sofaꞌ akafimi awami naꞌamba. God nohambombagas lifilafi atapis. Eaꞌ sope laogona nogohnaep Dembinaii, mogogalaꞌi moloma banagami ananimi.* Kl 3:4; 1 Te 3:13 10 Nemaf afamba atiasi Dembinai notanimai nifiꞌi ma amam nematawa hililiꞌi ananisi sogasaꞌma agol ananigili goloma mogogalaꞌi ananimi, eaꞌ amam nematawa sagahapifana sonohasa anen sogasaꞌma agol ananigili. Nemaf afamba ipaꞌ wapani pendaꞌas naꞌamba atin. Deiꞌ main, afaꞌ wawalapa basef Godi laꞌafena ipaꞌ eaꞌ pahapifa basef ifimba endilisi.* Kl 1:9; 1 Te 1:2-3
Pol nandabetena God nogowaꞌ banaga esis Tesalonaika
11 Afaꞌ ukup pandandaꞌma isimba eaꞌ dondol wandabetena God apeꞌinai ma nogatopalopepa. Afaꞌ ogawa God nofalepa eaꞌ wandabetena anen nondaꞌepa laꞌifipa endilisi siꞌi anen nofalepa pendaꞌas. Afaꞌ wandabetena God nowaꞌ banagaipa ma pendaꞌ waf afamba buꞌwafi hiafi paꞌi pindaꞌafi, eaꞌ pendandaꞌ maola pahapifa Krais pandaꞌani.* Ais 24:15; Mal 1:11 12 Afaꞌ wandabetena ipaꞌ ma atiasi pegasaꞌma agol Dembinai apeꞌinai Jisasi ma nondaꞌas naꞌamba atin nogasaꞌma agof ipeꞌigufi. Amamba motagama God apeꞌinai naloma Dembinai Jisas Krais mogatopalopepa dowaf mogowaꞌ banagaipa.

*1:1: Ro 1:7; 1 Te 1:1

*1:2: 1 Te 1:2-3; 2 Te 2:13

*1:3: 2 Ko 7:4; 1 Te 2:19; Re 1:9

*1:4: Fl 1:28

*1:5: Ro 12:19; Re 18:6-7

*1:6: Mt 25:31; 1 Te 3:13, 4:16

*1:7: Sam 79:6; Ais 66:15; Ro 2:8; 1 Pi 4:17

*1:8: Ais 2:10,19,21

*1:9: Kl 3:4; 1 Te 3:13

*1:10: Kl 1:9; 1 Te 1:2-3

*1:11: Ais 24:15; Mal 1:11