God-are Jögoru I'oho 2 CORINTHIANS 1
2 CORINTHIANS
1
Paul-hu Corinth ekaresia jejëmijade jöhoje.
O asëꞌe God-are ekaresiae Corinth amore raromarujoho God-ro nimamu Iesu Keriso-are apostle jevëꞌëro Paul naꞌo nosi öe Timothyꞌo noro niöꞌiro jemë jejëmiromo God-are aribövi Greece saꞌa ioroꞌiorore raromarujoho jemëꞌo jejëmijö.
No nague God nosi Vavuohuꞌo Bada Iesu Kerisoꞌo huë baeromo ajëmijego maro raromoꞌirarijego.
Paul-hu huë vavaeni baeromo barëjëꞌëro God rajahijade jöhoje.
Asëꞌe God hu mabëheje. Hu nosi Bada Iesu Keriso-are Börömeje o göho hesi Vavueje. Ëaho God Vavuoho hu mabëheje. Ëhesi bëhoho hu noni vavaenimo avohaje Vavuohoje. Hu sanuamuiromo ajamui avohaje A Börömohoje. Huro gövuaje no huë vavaeni bövi biseꞌo baejamu gövuëꞌiroho sanuamuego biririvavuajeje ëhuro huë vavaeni bövi biseꞌo baejëꞌe aribövioho noꞌo sanuëmijëꞌoho eni javuoröhego. Sanuëmego jabuꞌo birire baeröhego. Huhu no sanuamuijadëhi noꞌo ëhi ëꞌoromo a ioroꞌioroho sanuëmego mae jëvoröhego. Kerisohu baejade ëhi jiëꞌe huë vavaeni jovehu ruomanovoromo nosi örire rovajëhi ëhi Kerisohu nosi örire bojamuaje biriroho jovëro ruomanovajeje. Noehu huë vavaeni baejarue ë hesi bëhoho jemesi jöëni baejarueje ëhuro jemë biririvëvego maro vaꞌirarijego. O God-hu sanuamuego biriri baejarue ë hesi bëhoho gemuohoje. Jemesi jöëni baejarueje noehu baejarue ëhi jiëꞌe huë vavaeni baejëꞌiroho ëhuro biririvëvego baberumi riravoꞌirarijego. Röhu noro uvarueje: Noehu huë vavaeni baejarue gemuoho jemëꞌo baejarujëhi ëhi noehu biriri baejarue gemuoho jemëꞌo baejaruje hö uvoromo ëhuni uvarueje: Iae mae-ëjo. Jemë iae biririvoꞌarujëjo.
Röhu nasi ö muenoꞌe noehu Asia saꞌare raromoromo huë vavaeni baejare jöho no nague jemëro avoho gaꞌirarijego. Huë gage marijamuiromo ijoꞌaho rumorëjavuoromo uehoroho barëjavuamu uvareje: Noehu vuovavuo hesi höjo. Nosi herovoromo uvareje: Vuovavuoꞌiröhe jöho court-re majahuijamu hejanovëꞌe javuajëjo. Ëhi herovareje. Röhu ëhi herovare hesi bëhoho God-ro nimadeje noro uehorovoromo uvoröhego: Nosi sivuoho bogo eni javuoꞌi God-ro vuovëꞌe aribövioho ajëmego riꞌöꞌamajëro jiëꞌëro ëhuꞌëro hesi huro ajamuiꞌajëjo. 10 Sisë döro vuovavuoꞌi höjadoho God-ro ujuohavuoromo maro ramuadeje. God-hu mare ramuadoho uꞌemu sisëro javuëꞌoho maro ramuoꞌëꞌe. No hesi örire mae uehorovoromo uvarueje: Uꞌemu sisëro javuoꞌiramu röhu maho maro ramuoꞌajëjo. 11 Jemëro ajamuiromo nosi jöëni God uaꞌiramu huro iae ëhi ajamuiꞌëꞌe. Ae ahoꞌobëhe ëninamiꞌiramu nosi örire huë baejavuoromo ajamuiꞌëꞌe. Ëhuni ae ahoꞌobëhe nosi jöëni hesi örire mabëhe uaruomoꞌëꞌe.
Paul-hu Corinth amore vaꞌi uëromo röhu bogo vaꞌade ë hesi jö bëhi Paul-hu majëhijadohoje.
12 Ave jöho no uehorovoromo nimoroharueje. Herovoromo uvarueje: Iae mae-ëjo. God-ro ajamuego no bogo ma-döëremuoho muoho vaeꞌi nosi dë vövöbajoꞌo uhohuꞌo ma-vaꞌorahoro a jabesi örire röhu jemesi örirohuꞌo vaejëvarue höjo. Bogo aehu ëma uvaruoho: Simano maꞌe uehore hö uvaruoho baeꞌi aꞌi God-hu huë baejavuoromo bojamuaje darugoho ëho no baeromo muoho vaejarue höjo. 13 Ëhesi bëhoho jemëhu samaꞌe adahoromo mae hejaruje jöhemu no jajivarueje. 14 Jemëro nosi bëhoho ma-bisemu hejarujeje röhu na nege jemë he avohoromo uvoꞌirarijego: Bada Iesuare majaho rueꞌiramu Paul-mëhu nosi jöëni nimorohëꞌi uehorovoꞌiröhëhi noehu Paul-mesi jöëni ëhi nimorohëꞌi uehorovëꞌoho iae mae jioꞌaꞌajëjo.
15 Iae na mae uehorovoromo uvodeje: No ëhi mae garorovarue hö uvodohuni ëhuni uvodeje: Naro jemesi örire urimo öꞌejöjo ëhuro vae niöꞌi öꞌego huë mae baeꞌirarijego. 16 Urimo öꞌoromo jemesirire hiromo Macedonia saꞌare vaꞌejöjo. Macedonia vaꞌoromo vuono buꞌöromo jemesi örire röhu maho öꞌejöjo. Öꞌiramu jemëro bövie biseꞌe ajemiromo remöꞌöꞌiramu na mae vaꞌoromo Judea saꞌare hiꞌejöjo. 17 Na ëhi ëꞌiro uehorovodeje röhu bogo öꞌodeje. Ëhuni nani jemë ëma uvaruje: Nörö sareriꞌe aëro jiëꞌëro bogo rovade höjo. Nani ëhi uvaruje röhu na bogo ëhi jiëꞌe aho jeve. O naehu ëhi ëhi ëꞌirode muoho uehorovëꞌoho bogo nasi sinohemu uehorovoromo jöho huotohuotovoromo uëvajeje: Ioꞌajo. Iae na ëꞌejö uëvëꞌi uëvajeje: Bogajo. Na bogo ëꞌejöjo. Na bogo ëhioho jöho huotohuotovoromo jövajeje. 18 God-hu bogo uehore gö gö baeꞌi ma-gemu uehorovajëhi noꞌo jemë jö majëhijaruoho bogo uëvarueje: Ioꞌa uëvëꞌi boga uëvarueje. 19 Ëhesi bëhoho God-are Harihe Iesu Keriso-are jöho noro baeromo jemë majëhijareje naro Silas-ro Timothy-ro. Noehu jö majëhijare aho Keriso hu bogo uvëꞌeje: Ioꞌa uvëꞌi uvëꞌeje: Bogajo. Keriso bogo ëhioho uvëꞌeje. Aꞌi Kerisohu diehi ajamuiröhego God-hu uavadëhi huro ioꞌa gemu uvoromo ëhi ëhi ajamuibe rovëꞌeje. 20 Keriso bogo rovade majare God-ro mae uvobe rovadeje: Naro nasi aribövioho ëhi ëhi mae vaejëvoꞌejöjo. Mae vaejëvoꞌejö uvëꞌego Kerisoro uvadeje: Ioꞌa uvoromo God-hu uvade mu maho vae barëjëꞌeje. Ëhuni Keriso-are ihoro noro God-are örire uavarueje: Jaehu mu vaejahuoꞌi mae uvanëhi Kerisohu ëhi vaejahuadoho iae mae-ëjo. Iae mae-ë uavaruohuro ëhuro God-are ihoho börömeje. 21 Röhu no jemëꞌo gemu mae baejavuoromo Kerisoꞌo gemuore ioroꞌioremu bimuvavuoromo hesi mure bamavuade aho iae God-je. 22 Huro no hesinö ioroꞌioremu baejavuoromo hesi Aruꞌahoho nosi dë vövöbajoꞌere bojamuijëꞌeje noro uvoröhego: Hu aevoromo hesi Aruꞌahoho suvuore bojamuijëꞌëro ëhuꞌëro hesi suvuoro vituohuꞌo ijonö iae bojamuiꞌajëjo. God-ro ëhi ioroꞌioremu ajamuijëꞌeje. Ëhi jiëꞌëro naꞌo bogo jöho huotohuotovoromo jövajeje. Amo bogo ëhunioho öꞌi uëvodoho vuonugoꞌi hijodeje.
23 Aꞌi ave jöho God-ro geꞌego na mae jöve. Naehu Corinth amore öꞌiëꞌoromo vuonugode hesi bëhoho naro öꞌoromo iꞌue bojëmego baejöëni ëhuni bogo öꞌodeje. 24 Iae na iꞌu bojëmiꞌirode jöho uëve röhu nosi mu hesi bëhoho bogo masijoho riravoromo jemesi öriroho darugoꞌe jöhuremu bojëmiromo uëꞌiröhëro: Ëhi ëhi God mae uehorovohëjo. Aꞌi no jemëꞌo havoromo ajëmijarue ae javue jemë dë sasohëvonövoröhego ë hesi bëhoho jemë iae eni biririvoromo God mae uehorovarujego.