God-are Jögoru I'oho COLOSSIANS 1
COLOSSIANS
1
Paul-hu Colossae ekaresia jejëmijade jöhoje.
1-2 O asëꞌe God-are aribövi Colossae amore raromarujohumë biririvoromo Keriso uehorovaruje ö muenoꞌe jëve huꞌo gemuore bimuvorovëꞌëro. God-ro nimamu Iesu Keriso-are apostle jevëꞌëro Paul naꞌo nosi öho Timothyꞌo noro jemesi örire jejëmijö. No nague God nosi Vavuohuro huë baeromo ajëmijego maro raromoꞌirarijego.
Paul-hu Colossae ekaresia jabesi jöëni uehorovoromo God rajahiromo ëninamade jöhoje.
Jemëni uehorovoromo pari vaejëꞌiroho noro God nosi Bada Iesu Keriso-are Vavu hesi örire huë mae uavarueje. Rabëni hesi bëhoho iae no hejareje uvavamu: Colossae aribövioho jemëro Iesu Keriso mae uehorovëꞌi God-are aribövie ahoꞌobëhe huë baejëvaruje höjo. Jemë ëhi ëꞌaruje hesi bëhoho jemëro uvarujeje: Huë mae baeꞌiröhe ajoho öꞌidöre rune vaejahuëꞌe höromo raromoromo muebejarujeje ijonö birohoꞌirarijëro. Ëhi mae birohoꞌirarije jöho mamiꞌe aehu Keriso-are jö ma hesi bëhi mae majëhijarevare evare jemë hejarijeje. Jemesirire jiajëhi ëhi saꞌae ahoꞌobëhe maja rojomajire bevaꞌajire ë jö maho majëhijego ae ahoꞌobëhe ejahuobe marëbe vaꞌajeje. Ëhi jiëꞌe mu maho jemesirirohuꞌo rumorovëꞌeje. Jemëhu jö heromo God-are huë ma baeromo hesi bëhi avoho hejarije majare evare aevadeje. Epaphras-ro ë jö maho aevoꞌi jemë majëhijadeje. Epaphras noro uehorovarue aëro jiëꞌëro noꞌo bimuvoromo Badare muoho vaejahajeje. Huro noꞌo röromo jemesirire muoho biririvoromo ajëmijajeje. Huro uövuadeje: God-are Aruꞌahëro jemesi dë vövöbajoꞌoho huotovëhëꞌëro ae huë baejëvo avoharuje höjo. Jemesi jöho ëhi majahuijamu hejareje.
Iae ëhuni jemesi jö hejarevare evare no aevoromo jemëni God-are örire uehorovobe rovaroho jaruvoho ëhi gemuoho ëꞌobe vaꞌarueje. Ëhi ëꞌobe vaꞌoromo noro God uavarueje huro jemë avohëvego hesi Aruꞌahehu simano ma bojamuijaje ëhi jiëꞌe simanoho jemëꞌo mabëhe baeromo mue ahoꞌobëhe avoho garomo ëhuro ga barëꞌirarijego God-hu diehi nimajoho. 10 Ëhuro huhu nimajëhi jemëro ëhi vaejego Badaro jemë gëromo vuëvo avohoꞌiröhego. O jemë mu mae bövie biseꞌe vaeromo God bisemu gavarujoho gabe vaꞌojuvo ijonö ga avohoꞌirarijego. 11 Röhu God-hu aji mare hiromo bojamuijaje biriroho ëho jemëro bövi mae bae avohoromo ëhuro huë mae huë sisë rabe rovego nimorohëꞌi biririvoromo mae riravoꞌirarijego. 12 Mae riravoromo Vavuoho huë mae uaꞌirarijego rabëni huro jemë avohëvamu hesi ariböviehu ajiꞌe öri ariꞌere vaꞌo raromoromo mae baejaruëhi ëho jemëꞌo baeꞌirarijoho eni jëvëꞌëro jiëꞌëro. Iae ëhuni no God ua gavarueje.
Keriso ahoꞌobëhe iosiramuiꞌamaje a hesi aharire javuaje jöhoje.
13 Iae mae. God-ro no ajamuiromo ramoramo hesi vöröre raromaroho jiovahuoromo rinaguoromo hesi Harihu mabëhi hesi aharire ramuëꞌeje. 14 Ramuëꞌego hesi Harihohuro iꞌuꞌe mu sisëho tugohahuoꞌi hesi sasohëꞌe mu maho jiovahuoromo sisëho muꞌuvahuadeje.
15 Sisë muꞌuvahuade aho Keriso God bogo gavarue a jiajëhi hu ëhi jiëꞌëro no hu garomo uvarueje: God ëhi höjo. Hu Murioho jiëꞌëro God-hu bamade bövioho biseꞌoho iosiramuiꞌamoromo hu simanohoje. 16 Ëhesi bëhoho God-ro Keriso uavamu huro bövioho biseꞌoho avohoꞌamadeje. Öꞌidöre jiajohuꞌo saꞌare jiajohuꞌo nunehu gaꞌamaruohuꞌo bogo gaꞌamaruohuꞌo simano vaeruomaje aruꞌaho masijohuꞌo vörö baeruomaje aruꞌaho masijohuꞌo ahoꞌobëhe God-ro uavamu avohoꞌamo barëjadeje hesi muebeꞌamoröhëni. 17 Bövi biseꞌo bogo bamadevaroho Keriso hu urimo jiadeje. Huro ahoꞌobëhe mueberomo maꞌeno titimajeje. 18 Hu ekaresia nosi simanohoje no ma-hesi övo duruajoꞌe javuëꞌëro. Hu ekaresia nosi bëhohoje. Hu aevoꞌi guomoromo riꞌöjadeje ëhuro ahoꞌobëhe iosiramuiꞌamoromo huro urimo nuniroho jioröhëni. 19 God-ro nimamu Kerisoro hesiro daruge uehore bövie biseꞌe bae barëjëꞌeje. 20 God-ro ëhi nimëꞌëro uvadeje: Na negajëjo Kerisoro ahoꞌobëhe nasinö sö rovego naꞌo huë mae jioruomoröhego. Kerisoro korosire iromoromo köe rueromo guomego ëhuro God naro buore vaeromo bövie biseꞌe saꞌare o öꞌidöre jioꞌamajoho avohoꞌamego naꞌo huë mae garorovëꞌi raromoröhego. Na ëhi negajëjo.
21 Röhu urimoho jemëro sisëꞌi uehorovoromo sisë vaejamu mue gö jëvëꞌëro God-ariroho hahagu tariöꞌörovëꞌe jëvanovoromo God nu huodivaruje aribövie jëvadeje. 22 Jaruvoho bogo God nu huodivaruje aribövioho jëvoꞌi aꞌi God-ro hesi Harihoho nugöꞌöjamu sino hahoꞌe jioromo guomamu ëhuro God-ro jemë buore vaejëvoromo agane vaejëvadeje ëhuro jemë övövo rumoꞌe jö sisë rumoꞌe jëvoꞌi ma-maemu jëvego vaꞌo hesi nunire mae riravoꞌirarijego. 23 Hesi nunire ëhi mae riravoꞌi nëgëꞌoho mae uehorovaruje jöho ëhuremu biririvoromo uehorovore. Urimo ë jö maho heromo uvarijeje: Uꞌemu Godꞌo gemu mae raromoꞌejarëjamu huë mae jëvobe rovadeje. Ëhi uehorovobe rovarijoho nadi vuonugore. Ëjö maho saꞌae ahoꞌobëhe maja rojomajire bevaꞌajire aëro majëhibe jijiho barëjëꞌejö. Röhu ë jö hesi muoho naro vaejajeje.
Paul-hu ekaresia ajëminövade jöhoje.
24 Naro jemë ajëmiꞌirodëni viꞌehi huë vavaeni bövi biseꞌo baebe rovodoho huë mae jeve. Noehu Kerisoꞌo röromo baeꞌiröhe viꞌehoho ëho naro ajamiromo nasi sinore baeꞌi hirohajeje hesi sino hahoꞌoho naehu uëvaje hesi bëhoho hesi ekaresiaho mae jëvoröhego. 25 Ekaresiae jemë mae jëvoröhego God-ro ekaresia ajëmiꞌirode muoho nasi örire bojemijëꞌeje. Bojemiromo uevëꞌeje naro hesi jöho majëhi barëꞌirodego. 26 Majëhiꞌirode jöho urimo God-ro ae ahoꞌobëhe subivëhobe rovadoho jaruvoho hesi aribövioho röjahuijëꞌeje garöhego. 27 Ëjö urimo subivahuadoho God-ro hesi aribövioho röjahuiꞌi nimadeje noro garomo uvoröhego: Ëjöho aji mabëhe jiëꞌëro saꞌa gö gö raje ahoꞌobëhe hebe vaꞌoromo ma-mabëhe raromoruomoꞌajëjo. Ëjö hesi bëhoho Keriso jemëꞌo jie. Keriso jemëꞌo jiëꞌëro ëhuꞌëro uvarujeje: Uꞌemu hesi aji mare ajio raromoꞌejarëjo. Jöho ëhije. 28 Ëhuꞌëro jiëꞌëro Keriso-are jöho ae ahoꞌo majëhijarueje. Majëhiromo simane ma-mae uehorovoromo ae ahoꞌobëhe röjëhibe jijiharueje jö bëhoho heromo avoꞌavoho uehorovoruomoröhego. Avoꞌavoho uehorovobe vaꞌoromo ëhuro ae gemu gemu ahoꞌobëhe Keriso-are ae gemuoho jioromo a duvahonöꞌe God-are nunire riravoröhego. 29 Ëhi mae riravoröhego ëhuni naro Keriso-are darugo bövi maho baeromo biririvoromo mu börömo böröme vaemu vaeromo hesi jöho röjëhijajeje.