MONO' GODOLO GOSOHO' HEBILAIOꞌ 1
ZUDA VETI GULIVEꞌINE GOHI MA HEBILAIOꞌ ALEVE IZESUꞌ ZUHO MINANIꞌ NETI LUHUVO NITEꞌINE VE
Hebilaioꞌ Ve Ma Izesuꞌ Evenele Zuho Minaniꞌ Neti Luhuvo Niteꞌinemuꞌ Gomuꞌ Gataaꞌ Gamazi
Mene luhuvo niteꞌ gizive aꞌmidoꞌ guliveꞌve gizamineꞌ nenako neꞌmo nene evenelite ve neꞌmo gizineꞌ noloseive li gilaniꞌ nene eveneꞌ atoꞌ atokumuꞌ gilaaꞌ aniꞌ ve. Adoꞌ malite Banabasiꞌ gizineꞌ noloseive lavo malite nene Izesuꞌ evenele zuho Loma ebekuꞌ minaveliti gizebo veꞌine ganaꞌ di oti-ngidangutiꞌ maliꞌmo gulive Kelemedoꞌ ve lo minineꞌ neꞌmo gizineꞌ noloseive lavo idoꞌ malite Lukaꞌ gizineꞌ noloseive laaꞌ aniꞌ ve. Idoꞌ eveneꞌ mukiꞌ nene aposoloꞌ Pauloꞌ gizineꞌ noloseive li gilaaꞌ aniꞌ ve. Matini Lutaꞌ aza Apoloꞌ gizineꞌ noloseive lo gilineꞌ. Nemuꞌ nene laza aꞌmine luhuvo niteꞌ nene zaho gizihe nemuꞌ gele guno amoloneꞌ o neineꞌ nene mo sotoꞌ o neive. Idoꞌ aꞌmine luhuvo niteꞌ nene zamotinemuꞌ gehepeve gizineꞌ neve nemukisi nene mo gele lamineꞌ amune. Hebilaioꞌ Veliti luhuvo niteꞌine ve lo laaꞌ noune. Idoꞌ aꞌmine gulive Hebilaioꞌ nene Zuda vemuꞌ guliveꞌine gohi ma ne neive. Aꞌmine luhuvo nitekuꞌ gize-ngidineꞌ gamazilotiꞌ nene tiꞌ lo gele none: Gizive aza gopo gizamo Zuda ve linge ebeꞌ mautiꞌ ve minave nene gize-ngidineꞌ ve lo gele none. Aꞌmine Zuda ve ingine ingi monaaꞌ aniꞌ ebeliꞌmi gulive nene gizamineꞌza nGiliki gamazi laaꞌ aniꞌ nenako nemuꞌ aꞌmine ebeꞌ nene Zuda veliti misuboꞌine heta minineꞌ noloseive. Aꞌmine aleve ingine gozopotiꞌ Izesuꞌ evenele zuho minaniꞌ ve lo mene luhuvo niteliꞌmo nolo-limive. Izesuꞌ evenele zuho minangumuꞌ di goloso palasa i-ngidaniꞌza ingine Izesuꞌni huli eze zuho nomune lamaaꞌ aniꞌ ve. Neꞌmine aniꞌza aꞌmine luhuvo niteꞌ gizineꞌ gameneuꞌ ingine geni ngebelavo Izesuꞌ evenele zuho minadotiꞌ huli gohi Zuda monokuko tineꞌ mili vilisa gaꞌine gilaniꞌ gilineꞌ. Laza giluneꞌ nene Zuda ve linge malite tiꞌ li goꞌine izangumuꞌ Izesuꞌni huli vilisa aniꞌ noloseive lo gele none: Ve naba Moseꞌ neꞌmo Oꞌmosolatiꞌ daniꞌ monoꞌ adoꞌ Oꞌmosoꞌmo ngimiselavo angelolite igi li ngoloꞌ laniꞌ monoꞌ nene huli monoꞌ adoꞌ monoꞌ numuꞌve nomineꞌ idoꞌ engitoꞌ medeli mini Oꞌmoso initeꞌ lehizi-daaꞌ aveꞌine nizamaniꞌ idoꞌ initeꞌ olokuꞌ gizi Oꞌmoso imaaꞌ monovoꞌine nomineꞌ monoꞌ nene eꞌmetaniꞌ. Idoꞌ gizebo veꞌine naba nene adoꞌ lihimeloꞌ ve goloso lohotoꞌ zaloꞌ bili hilave ne neive li li-ngidaaꞌ aniꞌ noloseive.
Aꞌmine luhuvo niteꞌ giziveꞌmo lo-ngimineꞌ gamazi malotiꞌ nene tiꞌ lo gele none: Eveneꞌ malite neꞌmine li goꞌine izi nilizahe izami nilizahe nesi nene ingine engiꞌ gaꞌninguꞌ neꞌmine li gilaniꞌ noloseive lo gele none. Idoꞌ neꞌmine lo gele noneꞌ nene aza tiꞌ lo lo-ngimidotiꞌ nene gele none: Laza Izesuꞌ evenele zuho nete aꞌmine Zuda velite di nizaniꞌ initeꞌ nene ivileꞌ ivosa do none. Izesuꞌ aza Oꞌmosoꞌmi gipele mino idoꞌ eiꞌ gidini gehepeve neineꞌ nene ngelebizineꞌ ve. Ha Oꞌmosoꞌmi gonouꞌ ve adoꞌ angeloꞌ nesi idoꞌ Moseꞌine nesi nene ngivileꞌ ogosa naba gehepeve neive. Idoꞌ Kilisitoꞌ aza evenetoꞌ medelo mino Oꞌmoso initeꞌ lehize-daaꞌ ivesi mino Aloniꞌ aꞌvopilemoꞌ zuholite evenetoꞌ medeli mini Oꞌmoso initeꞌ lehizi-daaꞌ aveliti zuhoutiꞌ minamineꞌza engiꞌ ngivileꞌ ogo Oꞌmoso initeꞌ lehize-daaꞌ ive lamineꞌ minineꞌ. Neꞌmine ogo aza Oꞌmoso initeꞌ lehize-dineꞌ nene engiꞌ lehizi-daaꞌ aniꞌza aꞌmine neꞌmo lihimeꞌine mudise ngelo do hulamilidoꞌ ogavo nemuꞌ nene gohi lehizi-di gohi lehizi-di igaꞌ aniꞌ ve. Neꞌmine igaꞌ aniꞌza Kilisitoꞌ aza eiꞌ okoꞌno hulo Oꞌmoso lehize-dineꞌ neꞌmo mudise lihimete vaiꞌ do hulo-ledelidoꞌ gehepeve minineꞌ nenako aꞌmine okoꞌno nene gohi hulo lehize-delidoꞌ minamineꞌ ve. Idoꞌ Oꞌmososi Zuda vesi bizi minilizaniꞌ aka nene Oꞌmosoꞌmo Moseꞌni elebizavo Moseꞌ do sotoꞌ o-ngidineꞌ nene minevoꞌ minevoꞌ ogo minamineꞌza Oꞌmososi bizo mineloneꞌ aka Kilisitoꞌ do sotoꞌ o-lidineꞌ nene minevoꞌ minevoꞌ ilineꞌ aka mino aꞌmine akamuꞌ Oꞌmosoꞌmo lo huko-lidineꞌ gamazi neꞌmo nene Moseꞌ do sotoꞌ ineꞌ akaliꞌmi gamazi nene ivileꞌ ogo lamineꞌ neive. Idoꞌ Zuda veliti monoꞌ numuno naba nene ha Oꞌmoso opoꞌni laaꞌ numuno gehepeve adoꞌ Okulumoꞌ neꞌmi avazahavoꞌ ne neive. Idoꞌ aꞌmine Zuda velite monoꞌ numunguꞌ nene haza evenelite Oꞌmosoꞌmi moꞌmosiꞌve minidaa nene dizamilizave li li hukaniꞌ ve. Ne neineꞌza Kilisitoꞌ hilidiꞌmo nene Oꞌmoso neidoꞌ gehepeve Okulumokuko voloningumuꞌ aka vele-ledave. Neꞌmino neineꞌ nenako nemuꞌ nene lingine Kilisitoꞌnidoꞌ gili eleꞌvoleꞌ igaꞌ nanitine nene hulami ezeloꞌ gili eleꞌvoleꞌ igivoꞌ minilo lo mene luhuvo niteꞌ giziveꞌmo lineꞌ. Neꞌmine lo Oꞌmosomuꞌ gele eleꞌvoleꞌ ogaliꞌmi monovo ngelebizelesa eveneꞌ atoꞌ ato mukiꞌ Oꞌmosomuꞌ gili eleꞌvoleꞌ adotiꞌ igi mili aniꞌ initeꞌ mukikumuꞌ nene lo-ngimineꞌ. Nemuꞌ Izesuꞌ ineꞌ initekumuꞌ gatine gilivoꞌ mini eze evenele zuho liliꞌ igi minangutiꞌ nene huli heta limi vamilo lineꞌ. Mulumo geni daaꞌ nouneꞌ nene Oꞌmosoꞌmo eveneꞌ lisiheꞌ lamineꞌ minilizave lo do lisiheꞌ o-ledaaꞌ neineꞌ aka ne neive. Zou lo mino aꞌmine mulumo geniuꞌ vo holalonidiꞌmo gihileꞌve nene minevoꞌ alevote vo lamineꞌ ilineꞌ ne neive. Neꞌmine lo mine lamineꞌ ilizaniꞌ akamuꞌ gamazi liꞌnibe liꞌnibe vaiꞌ lo-ngimineꞌ. Adoꞌ lengikuꞌ honguvoꞌ minivo minilo idoꞌ ge luka neme ne luꞌne geme li minilo lo nevoꞌmine gamazi vaiꞌ lo-ngimineꞌ. Izesuꞌ aza Zelusalemi ebeꞌ heta hilineꞌ nemuꞌ lo gaꞌine ogo inginesi nene Zuda velite ingi minaniꞌ ebeꞌ neꞌmi heta vi gomuꞌ Izesuꞌni ovozo monovo i-dikevo daniꞌ neꞌmini inginesi dalizave. Asiꞌvemukisi idoꞌ eikisi makaꞌ minavemukisi Oꞌmosola lilizave lo lo-ngedo Oꞌmosola lo tiꞌ lo gizineꞌ: Eiꞌ Oꞌmosoꞌmo gilidokovoꞌ ilizangisi dalizadoꞌ o minineꞌ initeꞌ mukiꞌ nene Oꞌmosoꞌmo lehize-ngedelive lo Oꞌmosola lo luhuvo nitekuꞌ gizineꞌ. Neꞌmine ogo Timoteoꞌ nalaꞌ numunguꞌ minidotiꞌ nene imisele hulaniꞌ gamazi lo-ngemo noꞌnohoꞌ gamazitunuꞌ luhuvo niteꞌve nene gize osuꞌ lineꞌ. Aꞌmine luhuvo nitekuꞌ nene Kilisitoꞌni meheꞌine imi huli-di vaaꞌ naveloꞌ sotoꞌ o-ngedelineꞌ initekumuꞌ hungoꞌ vaiꞌ ngemo Kilisitoꞌnimuꞌ gili eleꞌvoleꞌ aniꞌ nene hulikelizave lo gamene vaiꞌ lo-ngidineꞌ.
1
Oꞌmosoꞌmo Gipeleine Gamazi Do Vaꞌvaꞌ O-davo Gamaziꞌve Lamineꞌ Lo-limineꞌ
Gozopoꞌ nene Oꞌmosoꞌmo gamaziꞌve avotemotine lo-ngemelesa nene ato atoꞌ gameneuꞌ monovo do ato atoꞌ ogo polohetela molavo ingine avotemotine li-ngimi ngimiꞌ iꞌmi igaꞌ aniꞌ ve. Ne neiha gamene alingeꞌ idise mene noneꞌ gamenela nene Oꞌmosoꞌmo gamaziꞌve nene leliꞌ lo-lemelesa eiꞌ gipele neve imiselavo ogo lo-limineꞌ ve. Aꞌmine gipele nene initeꞌ mataliti meꞌnibo minelive lo eleꞌmize molo eiꞌ gipeleloꞌ aꞌmine initeꞌ mataꞌ mukiꞌ nene do sotoꞌ ineꞌ ve. Aꞌmine gipele neve Oꞌmosoꞌmi monovo danavaꞌve atoliꞌmine goloso ogo lamineꞌ neineꞌ neꞌmi gihileꞌve gehepeve mino Oꞌmosoꞌmi emeni dameni neꞌmidoꞌ lisiheꞌ gehepeve o minive ne neive. Nemuꞌ aꞌmine gipele neꞌmo eiꞌ amuzoꞌveloꞌ molo gele mino laaꞌ neineꞌ gamazi neꞌmo nene initeꞌ mataꞌ mukiꞌ nene hize eleꞌ ivo laminekovoꞌ minaaꞌ neive. Idoꞌ aza nene goloso initete apase-ledaaꞌ akaꞌve vele osuꞌ lo-ledo veleta ve Guvelesi ve naba eitotiꞌ lemo minive nenako ana hulaaꞌ ida minineꞌ ve. Mino Oꞌmosoꞌmi gipele ve li li-daniꞌ guliveꞌve neꞌmo Oꞌmoso gelekeleꞌ i-di gonoꞌve di-daaꞌ ave angeloliti guliveꞌine nene ivileꞌ ogo mino aꞌmine votigileloꞌ lisiheꞌ ogo ngivileꞌ goloso ogo dizosa neive.
Oꞌmosoꞌmi Gipeleꞌmo Angeloꞌ Mukiꞌ nGivileꞌ Ogo Osuꞌ Lo Neingumuꞌ Lineꞌ Gamazi
Ee, Oꞌmosoꞌmo gipelemuꞌ lineꞌ gamazi nene angeloꞌ hamokumukisi ma lo-ngedamineꞌ nenako neꞌmo nene aza angeloꞌ ngivileꞌ ogo dizosa neive. Oꞌmosoꞌmo ezemuꞌ tiꞌ lo lineꞌ monoꞌ godolouꞌ gizi nizaniꞌ ma neive:
Idise naza geiꞌ maho loloꞌ ogo
neniꞌ gipeꞌne geiꞌ nene nane lo do ote-giduvoniꞌ ve.
Idoꞌ ma lineꞌ gizi nizaniꞌ ma neive:
Naza nene eiꞌ giduve melehine minekuvo
Eze nene neniꞌ gipeꞌne minelive.
Idoꞌ Oꞌmosoꞌmo ganaꞌ gipele nene misubouko imiselelesa gohi lineꞌ gamazi ma tiꞌ li gizi nizaniꞌ ve:
Oꞌmosoꞌmi angeloꞌ mukiꞌ ingine gubiꞌ izi imi opoꞌni lilizave.
Idoꞌ angeloꞌve ingine gelekeleꞌ i-di minaaꞌ avemuꞌ nene Oꞌmosoꞌmo gamazi tiꞌ lo lineꞌ luhuvo gizi nizaniꞌ ma neive:
Oꞌmosoꞌmo lavo
eiꞌ angeloꞌve nene hepeꞌ ngemeni dameni di otuhaaꞌ nave.
Idoꞌ lavo
aꞌmine gelekeleꞌ i-daaꞌ ave nene
oloꞌ gulumo neꞌmine ngemeni dameni di otuhaaꞌ nave.
Neꞌmine o neineꞌza gipelemuꞌ neve monoꞌ godolouꞌ tiꞌ lo lineꞌ:
Oꞌmosoo, gaza gizebo ogaꞌ moꞌmosikauꞌ gizebo ogo minelineꞌ nene
huko vamo minevoꞌ minevoꞌ ogo mineleseive.
Mineleseinako Guvekasi ve loloꞌ ogo minelineꞌ neꞌmi monovo nene
monovo do lisiheꞌ ogaꞌ monovo nene mineleseive.
Gaza nene monovo lisiheꞌ laminetokovoꞌ luka molo mino
goloso initeꞌ daaꞌ monovomuꞌ goseleꞌ gebelavo mehenga emaaꞌ nane.
Neꞌmine ogaꞌ naneꞌ nenako
Oꞌmoso geiꞌ Oꞌmosoka neꞌmo eveneka ngivileꞌ ogo gaza golize izo mineline lo
aꞌmine moꞌmositoꞌ nene geleꞌmize molave.
10 Idoꞌ ma nene Oꞌmosoꞌmo gipelemuꞌ Guvekasi ve lo-do tiꞌ lo lo neineꞌ ma neive:
Guvekasi ve, gaza ganaꞌ nene me misubo do sotoꞌ molanivo
amuzo molo ha neive.
Idoꞌ Okulumoꞌ nesi geiꞌ angadunuꞌ loloꞌ aineꞌ ve.
11 Ne neiha aꞌmine initeꞌ nene vi osuꞌ lilisasineꞌza
gaza nene minevoꞌ minevoꞌ ogo haza minaaꞌ nane.
Idoꞌ okulumoꞌ misubo nene eveneliti okoꞌnidoꞌ initeꞌ hulupovo ili
goloso igaꞌ naniꞌ neꞌmine ilisasive.
12 Idoꞌ aꞌmine okulumoꞌ misubo nene litehe initeꞌ di gangi milaniꞌ maꞌmino
gango moloko gosohoꞌ ha do sotoꞌ olosaba gaza neve ha minevoꞌ minevoꞌ ogo hazavoꞌ nanivo
kilisimasi nene ogo vokaꞌ vokaꞌ ogo minelineꞌ nene osuꞌ lamoloseive.
13 Idoꞌ gipelemuꞌ tiꞌ lo lineꞌ gamazi neꞌmino nene angeloꞌ hamokumukisi lo-ngemesaꞌmive:
Nezelotiꞌ geiꞌ nene nange. Aꞌne hulaaꞌ uvoda nene minezo.
Mine do vo nanivo biluvaka nete gelekeleꞌ i-gidi minilizave lo
gizengauꞌ doꞌmo leme-ngedelesuve.
14 Neꞌmine ma lo-ngedesaꞌmineꞌ nenako angeloꞌ ingine gipele neꞌminisa dizi minami ha Okulumoꞌ ngemeni damenisi Oꞌmosoꞌmi gelekeleꞌ veꞌve minikevo Oꞌmosoꞌmo do luꞌ izelesa leleꞌmize molave leliꞌ nene hize eleꞌ i-lidilizave lo ngimiselaaꞌ neive.