MONO' GODOLO GOSOHO' LUKAꞌ 1
IZESUꞌ KILISITOꞌNIMUꞌ GAMAZI LAMINEꞌ LUKAꞌ GIZINEꞌ
Lukaꞌ Gizineꞌ Luhuvo Nitekumuꞌ Gomuꞌ Gataaꞌ Gamazi
Mene buku neꞌmo nene Izesuꞌ Kilisitoꞌ monovo danavaꞌvemuꞌ lo sotoꞌ neive. Monoꞌ noso holo-ngedaaꞌ ive Zohaneꞌ sotoꞌ idotiꞌ apiꞌ ogo losa eiꞌ asiꞌve Izesuꞌ sotoꞌ ineꞌ monovomukisi lineꞌ. Izesuꞌ ogo molo ineꞌ initekumukisi idoꞌ lineꞌ initeꞌ vaikumukisi lo sotoꞌ neive. Idoꞌ Zuda ve nabalite Izesuꞌ monoꞌ apize ngimineꞌ meheꞌine imaniꞌ monovomukisi idoꞌ bililizave li engiꞌ ebeꞌningutiꞌ Loma veti ngamaniloꞌ gizebo ve ve nabalite aꞌninguꞌ nadi milahe nemukisi lo neive. Idoꞌ helosa nelotiꞌ gamene setohamo ogo vavo gohi otineꞌ monovomukisi lo sotoꞌ ogo idoꞌ gamene ma izipahala zuhola sotoꞌ o ngimingumukisi lo neive. Lumola nene Oꞌmosoꞌmo Okulumokuko gohi nado eleꞌmizo dizihe nemuꞌ losa osuꞌ lo neive.
Mataioꞌ ve Malekoꞌ ve Zohaneꞌ ve gizaniꞌ bukuuꞌ nomineꞌ gamazi mukiꞌ nene mene bukuuꞌ neive. Ma nene neꞌmino neive. Monoꞌ noso holo-ngedaaꞌ ive Zohaneꞌ sotoꞌ ineꞌ gamazi idoꞌ Izesuꞌ sotoꞌ ineꞌ monovo mukiꞌ idoꞌ sipisipi izeloꞌ gizebo velite Izesuꞌ izipeloꞌ neivo vi ningi-daniꞌ idoꞌ Samalia ve lamineliꞌmi aneza gamazi idoꞌ ve maliꞌmi gipele vo tolovo ingumuꞌ idoꞌ heneni vesi Lasalongumukisi idoꞌ heneni veꞌmo gala gele lamineꞌ amingumukisi nene lo neive.
Mene buku giziveliꞌmo nene Aposolo buku nesi gize neive. Aꞌmine buku setaꞌ gizinguꞌ nene gulive ma sainimi amineꞌ neineꞌza gamene galaꞌmudatiꞌ vomine aꞌmine buku setaꞌ nene Lukaꞌ gizineꞌ ve laniꞌ ve. Monoꞌ Godolo Gosohokuꞌ Lukaꞌ gulive nene gamene setohamovoꞌ lo neive. (Kolosa 4:14, Hilemoniꞌ 24: idoꞌ 2 Timoteoꞌ 4:11). Idoꞌ aꞌmine Pauloꞌ gizeꞌmo moningutiꞌ ningo nogiluneꞌ nene Lukaꞌ aza tota gono daaꞌ ive minaaniꞌ neive lo noningune. Lukaꞌ aza Pauloꞌ monoꞌ gamazi lo-ngimidaa makaꞌ vii idoꞌ Pauloꞌni luvono giti hulilisa nalaꞌ numunguꞌ lasi goniꞌve nigili-davo Lukaꞌ aza minidaa ote minineꞌ. Aposoloꞌ buku linge mala nene Lukaꞌ aza tiꞌ lo gize neive: Initeꞌ neꞌmine une idoꞌ ne ebeꞌ mala vune lo gize neineꞌ nenako laza aꞌmine gamenela nene Paulokisi makaꞌ monikesineꞌ neive lo ningo nogilune. Lukaꞌ aza Zuda ve minamineꞌ ve. Eveneꞌ mukiꞌ nete gilaniꞌ nene nGiliki ve minineꞌ ve li gilaniꞌ.
Eveneꞌ linge malite gilaniꞌ nene Adiokia ebekutiꞌ ave ve li gilaniꞌ. Idoꞌ eveneꞌ linge ma nete gilaniꞌ nene Hilipi ebekutiꞌ ave ve li gilaniꞌ. Aza nene Izesuꞌni ma ningamineꞌza Izesuꞌni ningave mukikisi gamazi laniꞌ ve. Lukaꞌ aza bukuꞌve nene eveneꞌ gulive Teohiloꞌ ve lo minineꞌ nene gizo hulo-dineꞌ. Lukaꞌ luhuvo niteꞌ gizingutiꞌ nene laza Teohiloꞌ nene guvelesi ve minaniꞌ neive lo noningune. Neꞌmine lo noninguneꞌza aza nene naniꞌmine ve minihe nemuꞌ nene ma gele osuꞌ lo gelamune. Laza nene mo tiꞌ lo ningo gele none. Lukaꞌ aza luhuvo niteꞌ Teohiloꞌni gizo hulo-dineꞌ nene eveneꞌ malitesi gatilizave lo gele mino gizo hulineꞌ ve.
Lukaꞌ luhuvo niteꞌ gizineꞌ nene nGiliki aleve Izesuꞌnimuꞌ ningi gililizangumuꞌ hize eleꞌ o-ngedelive lo gizineꞌ ve li eveneꞌ mukilite gilaniꞌ. Lukaꞌ gizineꞌ gamazi neꞌmo Izesuꞌ monovolo ma lelebizaaꞌ neive. Adoꞌ Izesuꞌ aza Oꞌmoso neineꞌza eveneꞌ gihile nesi loloꞌ ogo neineꞌ nene lelebizaaꞌ neive. Idoꞌ eveneꞌ ma eveneꞌ linge mukiꞌ nete engikumuꞌ gilavo haza niteꞌ nizanikisi idoꞌ eveneꞌ goloso nizanikisi nene Izesuꞌ lulo atoliꞌmine ogo ngeme neineꞌ nene lelebizaaꞌ neive. Adoꞌ eveneꞌ gohoꞌ gahaliꞌ nizahe veneꞌ nizahe idoꞌ izipe ngomo nizahe lihimeloꞌ ve nizahe aꞌneꞌmine evenekisi nene lulo atoliꞌmine ogo ngeme neineꞌ nene lelebizaaꞌ neive. Lukaꞌ aza eveneꞌ nete Izesuꞌ nene neꞌmine ve do nguꞌ izelesa aniꞌ ve li gililizave lo gelo luhuvo niteꞌ mene gizineꞌ ve.
1
Lukaꞌ Aza Teohiloꞌni Luhuvo Niteꞌ Gize Noemo Ganaꞌ Gatelive Lo Neꞌmi Monovo Lo-emo Gizineꞌ Gamazi
1-4 Eveneꞌ Naba Teohiloꞌ, Gaza Izesuꞌnimuꞌ li-gimaniꞌ gamazi nene mo laminetokovoꞌ li-nimikeve lo geleline lo luhuvo niteꞌ mene nogize-giduze. Ningezo. Ee, leliꞌ vovoteuꞌ sotoꞌ aniꞌ initeꞌ nene apiꞌ ogo sotoꞌ idotiꞌ ningave linge ma nene aꞌmine sotoꞌ ineꞌ monoꞌ gamaziꞌmi gonoloꞌ ve liliꞌ igi mini lelita li hulikevo eveneꞌ mukiꞌ nene aꞌmine li hulaniꞌ gamaziloꞌ nene eꞌmeti di lisiheꞌ igi luhuvo gizaniꞌ ve. Idoꞌ neꞌmine angumukisi idoꞌ aꞌmine Izesuꞌ gono do ogo molo minineꞌ initeꞌ mataꞌ apiꞌ ogo sotoꞌ oꞌmo oꞌmo vo miningumuꞌ nene naza aꞌmineꞌmi monovo danavaꞌve ngomoꞌ nabaꞌ nene viseꞌ ogo gelekaꞌ gelekaꞌ ogo gele osuꞌ luvoniꞌ nenako nemukisi nene nazasi aꞌmine sotoꞌ ineꞌ initeliꞌmi gamaziꞌve nene do lisiheꞌ ogo luhuvo gizeloniꞌ nene lamineꞌ oloseive losa geiꞌ nene nogize-giduve.
Zohaneꞌ Sotoꞌ Ilingumuꞌ Zakaliaꞌni Angeloliꞌmo Lo-imineꞌ Gamazi
Naza tiꞌ lo nolo-gimuve: Helodeꞌ aza Zudaia misubouꞌ guvelesi ve naba loloꞌ ogo minineꞌ gameneuꞌ nene evenetoꞌ medelo mino Oꞌmoso initeꞌ lehize-daaꞌ ive ma minineꞌ nene gulive Zakaliaꞌ ve. Aza nene evenetoꞌ medeli mini Oꞌmoso initeꞌ lehizi-daaꞌ ave Aloniꞌ aꞌvopilemoꞌ zuhoutiꞌ mino idoꞌ Oꞌmoso initeꞌ lehizi-daaꞌ gono senisi senisi igi daaꞌ aniꞌ mulise ma Abiaꞌ muliseutiꞌ minineꞌ ve. Idoꞌ veneꞌ ma do minineꞌ gulive Elisabeteꞌ nesi nene Aloniꞌ aꞌvopilemoꞌ zuhoutiꞌ minineꞌ ve. Ingine sitaꞌ nene Guvelesi veꞌmo louꞌ gamazi lo huko lineꞌ vaitoꞌ nene eꞌmeti mini gamaziꞌinesi nomineꞌ aleve mini Oꞌmosoꞌmi veleloꞌ nene eveneꞌ lisiheꞌ minasineꞌ ve. Eveneꞌ lisiheꞌ minasineꞌza Elisabeteꞌ nene gohuno lizo neivo ingine nene izipahaꞌinesi gidami mini setatoꞌ nene ozoho mili minasineꞌ ve.
Idoꞌ Zakaliaꞌ zuho muliselite Zelusalemi ebekuꞌ monoꞌ numuno nabauꞌ nene gono dalizadoꞌ vavo Zakaliaꞌ nene Oꞌmoso initeꞌ lehize-daaꞌ gono Oꞌmosoꞌmi veleloꞌ dokaꞌ dokaꞌ ogo neivo aꞌmine Zakaliaꞌ muliseutiꞌ nene kekeize lo minineꞌ monoꞌ numuno lulouꞌ dizo unuvo lamineꞌ ogaꞌ ineꞌ initeꞌ nene olokuꞌ gizo Oꞌmoso emelive ma di kegesilisa evenetoꞌ medeli mini Oꞌmoso initeꞌ lehizi-daaꞌ aveti monovoloꞌ eꞌmeti eveneꞌ maliꞌmi gulive di sotoꞌ igaꞌ zohikuꞌ zohiꞌ ikevo Zakaliaꞌ guliveꞌve sotoꞌ ogavo di kegesi-daniꞌ ve. 10 Di kegesi-dikevo unuvo lamineꞌ ogaꞌ ineꞌ initeꞌ olokuꞌ gizi Oꞌmoso imilizaniꞌ gamene ogavo eveneꞌ mukiꞌ nene monoꞌ numuno naba heta nene mulise mili mini Oꞌmosola li nizavo engitoꞌ medelo Zakaliaꞌ aza monoꞌ numuno kekeize lo mininguꞌ nene dizo aꞌmine unuvo lamineꞌ ogaꞌ ineꞌ initeꞌ nene gizo Oꞌmoso noimivo 11 Guvelesi veꞌmi angeloꞌ maliꞌmo sotoꞌ o emo unuvo lamineꞌ ogaꞌ ineꞌ initeꞌ gizaaꞌ aniꞌ holomo neꞌmi zamela ote minineꞌ. 12 Ote neivo Zakaliaꞌ ningosa upuhoꞌ ogo golise gelo minineꞌ ve. 13 Golise gilineꞌza angeloꞌ neꞌmo tiꞌ lo lo-imineꞌ: Zakaliazo, gaza golise gelamozo. Oꞌmosoꞌmo ezela lokaꞌ lokaꞌ naineꞌ initekumuꞌ nene mo gele gemave. Nemuꞌ elengaho Elisabeteꞌ nene gipa ma gedeleseize. Gulive nene Zohaneꞌ ve lo molalosane. 14 Idoꞌ gaza nene mulungauꞌ lamineꞌ goloso gelo golize izelesane. Idoꞌ eveneꞌ linge mukiꞌ nesi nene eiꞌ sotoꞌ ilingumuꞌ lamineꞌ gililisave. 15 Aza nene Guvelesi veꞌmo gilivo eze veleloꞌ nene eveneꞌ naba neꞌmine mineleseive. Aza nene vaini nososi mo namo sipaki ogaꞌ noso ato atoꞌ nesi nene mo namoloseive. Idoꞌ aza nene izelehi mulunouꞌ neivo minilidokisi nene Oꞌmosoꞌmi Sikalahuꞌ neꞌmo lulouꞌ minevo dovoꞌ ogo minivo Oꞌmosoꞌmi gono dalive lo eleꞌmize molaloseive. 16 Neꞌmine ogo aza neve Isilaeleꞌ aleve linge mukiꞌ nene aka golosoloꞌ nivangutiꞌ nene engiꞌ Guveꞌinesi ve Oꞌmosola do tineꞌ molo-ngedeleseive. 17 Idoꞌ aza nene gomuꞌ polohete Eliaꞌ eiꞌ amuzo idoꞌ emeni dameni neꞌmine do otuhosa Guvelesi ve nene gomuꞌ molo emo novo meꞌninge nete izipahaꞌine nene monovo do goloso goloso i-ngidamavo laminivoꞌ minilizave lo do hamoꞌ o-ngedo idoꞌ hokolizeꞌ igi bikiheti igaꞌ ave nene eveneꞌ lisiheꞌ laminelite gili daaꞌ naniꞌ monoꞌ nene lo-ngemavo gili dalisave. Neꞌmine ogo Guvelesi ve alingumuꞌ nene eveneꞌ ma ingine eze evenele zuho ma liliꞌ igi eꞌmetilizadoꞌ lisiheꞌ gehepeve i minilizave lo do lisiheꞌ o-ngedeleseive. Nemuꞌ aꞌmine gipa nene sotoꞌ ogavo gazasi eveneꞌ linge mukikisi longolize izilisave. 18 Angeloꞌ aza neꞌmine lavo Zakaliaꞌ tiꞌ lo longoꞌ o-dineꞌ: Nazasi eleꞌnahosi nene mo eleni vani molokusineꞌ nenako gipeꞌne ma gedelongumuꞌ nolo-nemaineꞌ nene mo laminetoꞌ lo-nemaneꞌ neive lo nado gelelove. 19 Neꞌmine lavo angeloꞌ aza tiꞌ lo lo-imineꞌ: Naza nene Oꞌmosoꞌmi veleloꞌ minaaꞌ nouvoniꞌ angeloꞌ nGabilieleꞌ ma ne nouve. Oꞌmoso asiꞌve nene geiꞌ gamazi lo-gemo idoꞌ gamazi lamineꞌ lo-gimuvoniꞌ nemukisi lo-gemelongumuꞌ nene nimiselavo nouve. 20 Nemuꞌ nene gelezo. Gaza neniꞌ gamazi luvoniꞌ gele eleꞌvoleꞌ amaneꞌ nemuꞌ nene gamazi lamo tihine hizo nanivo aꞌmine luvoniꞌ initekumuꞌ nene gameneꞌveloꞌ lisiheꞌ ogosa ogo gihile izeleseive. Idoꞌ neꞌmine ogavo gaza gohi gamazi lolosane.
21 Idoꞌ eveneꞌ nete monoꞌ numuno nabaꞌmi heta mini Zakaliaꞌ geto nonida lemo alihe li ezemuꞌ gizebo igi minaniꞌza angeloꞌ neꞌmo gamazi lo-emo minidiꞌmo nene gamene haꞌna mino lemo heta amivo nemuꞌ nene eveneꞌ ingine gaꞌine mukiꞌ gili minaniꞌ ve. 22 Neꞌmine igi nizavo Zakaliaꞌ aza heta lemo aniꞌza gamazi ngelo lamilineꞌ ogavo tihine hize mino eveneꞌ gamazi lo-ngemelesa nene anadunuꞌ avazahavoꞌ o-ngimineꞌ ve. Neꞌmine noo-ngimivo eveneꞌ nete aza nene monoꞌ numunguꞌ nene initeꞌ ma veleloꞌ o molo noloseive li gilaniꞌ. 23 Idoꞌ Zakaliaꞌ nene aꞌmine gonoꞌve nene do do vo neivo gono do do vilineꞌ gameneꞌve nene osuꞌ lavo Zelusalemi numuno ebeꞌ nene hulo numuꞌvela tineꞌ molo vineꞌ. 24-25 Idoꞌ nelotiꞌ alingeꞌ nene elenaho Elisabeteꞌ neve izipahala minavo tiꞌ lo lineꞌ: Idise naza izipahaꞌne minineꞌ nene Guvelesi veꞌmo neze ninge lamineꞌ do gohuno lizo minuvongumuꞌ eveneliti veꞌnidoꞌ novozo helo minaaꞌ uvoniꞌ nene gohi nenita novozo minamilive lo gelavo izipahaꞌne minineꞌ ve. Neꞌmine lo mine haleko neivo ikeꞌni faef (5) nene ogo vineꞌ ve.
Izesuꞌ Sotoꞌ Ilingumuꞌ Maliaꞌni Angeloliꞌmo Lo-imineꞌ Gamazi
26 Elisabeteꞌ nene izipahala minavo neivo ikeꞌni sigisi (6) neꞌmine ogo vavo Oꞌmoso neꞌmo angeloꞌ nGabilieleꞌni nene imiselavo nGalilaia misubouꞌ numuno ebeꞌ ma gulive Nasaletela lemo aniꞌ. 27 Aꞌmida nene alungo olihe veloꞌ vamineꞌ alu ma gulive Maliaꞌ nene Zuda veti guveꞌinesi ve naba Davidiꞌ aꞌvopilemoꞌ zuhoutiꞌ ve ma gulive Zoseheꞌni izeni imikaniꞌ alu neida lemo aniꞌ. 28 Angeloꞌ aza ogo aꞌmine alu Maliaꞌni nene meseꞌ aseka lo-do tiꞌ lo lo-imineꞌ: Guvelesi veꞌmo ninge lamineꞌ do hize eleꞌ o-gidivo naneꞌ veneꞌ gaza nabe. Guvelesi ve nene geikisi neive. 29 Neꞌmine lo lavo Maliaꞌ aza aꞌmine meseꞌ aseka lo-do lineꞌ gamazi nemuꞌ nene monovo nanitekumuꞌ lihe lo gopo gala gelo minineꞌ. 30 Neꞌmino neivo angeloꞌ aza tiꞌ lo lo-imineꞌ: Maliazo, gaza gehelele izamivoo. Oꞌmosoꞌmo geiꞌ nene ninge lamineꞌ dave. 31 Gaza gelezo. Gaza nene mo izipaha minavo gipe ma gedelesange. Guliveꞌve Izesuꞌ ve lo molalosane. 32 Aza nene eveneꞌ naba loloꞌ ogo mineleseive. Neꞌmine ogo neivo eikumuꞌ nene Oꞌmoso hozila miniveꞌmi gipele ve lavo mineleseive. Idoꞌ Guvelesi ve Oꞌmoso neꞌmo avoloho Davidiꞌ guvelesi ve naba loloꞌ ogo minineꞌ moꞌmosiꞌve nene emavo 33 Zakoboꞌ zuho Isilaeleꞌ aleveti Guveꞌinesi ve naba loloꞌ ogo engitoꞌ nene minevoꞌ minevoꞌ ogo gizebo o-ngedo neivo aꞌmine gizebo ogo mine do vilineꞌ nene osuꞌ lamoloseive. 34 Angeloꞌ aza neꞌmine lavo Maliaꞌ aza tiꞌ lo longoꞌ o-dineꞌ: Naza nene olihe vemohokisi bizo ongamusineꞌ nenako gaza laineꞌ gamazi nene nenita nado sotoꞌ ilive. 35 Neꞌmine lineꞌza angeloꞌ aza tiꞌ lo lo-imineꞌ: Oꞌmosoꞌmi Sikalahuꞌ nene geita ogo minavo Oꞌmoso hozila dizo minive neꞌmi amuzo neꞌmo asabuꞌ ize-gedavo neꞌmo nene izipaha mineleseive. Nemuꞌ nene aꞌmine izipahaka gedelineꞌ nene Oꞌmosoꞌmi gipele gehepeve ve lavo mineleseive. 36 Idoꞌ ma nene gelezo. Geze zuhoutiꞌ veneꞌ gohaho Elisabeteꞌ nene gohuno veneꞌ ve li-daaꞌ aniꞌza idise nene izipahala minavo gipe gatunosi neivo ikeꞌni sigisi (6) nene novive. 37 Idoꞌ neꞌmine noluvoniꞌ nene Oꞌmoso aza neꞌmine manaꞌmine initeꞌ ilineꞌ amuzoꞌve nene nomineꞌ nevoba aza olove lo lilineꞌ initeꞌ mukiꞌ nene ha ogakovoꞌ ilineꞌ nenako ha oloseive losa nemuꞌ noluze. Gaza gaka mukiꞌ gelamozo. 38 Neꞌmine lavo Maliaꞌ aza tiꞌ lo lineꞌ: Naza nene Guvelesi veꞌmi gelekeleꞌ alu nouvoniꞌ nenako nemuꞌ nene gaza laineꞌ neꞌmino sotoꞌ o-nidivoo. Neꞌmine lavo angeloꞌ aza Maliaꞌni hulo-do vineꞌ.
Maliaꞌ Aza Elisabeteꞌ Neida Vo Ninge-dineꞌ Gamazi
39 Idoꞌ angeloꞌ hulo-do vavo nelotiꞌ nene Maliaꞌ aza mine haꞌna amo Zudaia misubouꞌ golo mukiꞌ lo minida numuno ebeꞌ ma minida nene geto vo hetelineꞌ. 40 Aꞌmida nene Zakaliaꞌ numunguꞌ dizo elenaho Elisabeteꞌni nene meseꞌ aseka lo-dineꞌ. 41 Neꞌmino meseꞌ aseka nolo-divo Elisabeteꞌ aza nogilivo izipe neꞌmo mulunouko gabe kabeꞌ neivo Oꞌmosoꞌmi Sikalahuꞌ neꞌmo Elisabeteda mino hize eleꞌ o-divo 42 nolo nabautiꞌ gekeꞌ lo tiꞌ lo Maliaꞌni lo-dineꞌ: Oꞌmosoꞌmo geiꞌ nene veneꞌ mukiꞌ ngivileꞌ ogo ninge lamineꞌ do noꞌnohoꞌ ize-gedavo nane. Idoꞌ geiꞌ mulungauꞌ neineꞌ izipaha nesi nene noꞌnohoꞌ ize-davo neive. 43 Nemuꞌ nene Guveꞌnesi veꞌmi izeleho gaza nene neniꞌ haza veneꞌ nouvoda alinidoꞌ lisiheꞌ amaneꞌ nenako mo oganivo laniteꞌ nogiluve. 44 Gelezo. Gaza ogo hetelo meseꞌ aseka nolo-nedanivo nogiluvo gatuꞌneuꞌ izipe neꞌmo olize izo moiꞌ moiꞌ ogavosa nemuꞌ nene noluve. 45 Gaza Guvelesi veꞌmo lo-gimineꞌ gamazi nene gihile izeleseive lo gele eleꞌvoleꞌ aineꞌ nenako nemuꞌ Guvelesi veꞌmo noꞌnohoꞌ ize-gedavo golize izo minelineꞌ akaloꞌ mine molo nane.
Maliaꞌ Oꞌmoso Do Naba O-do Lineꞌ Nama
46 Elisabeteꞌ aza neꞌmine lavo Maliaꞌ aza nama gosohoꞌ bele molo tiꞌ lo lineꞌ:
Naza luꞌnedunuꞌ nene Guvelesi ve do naba noo-duve.
47 Idoꞌ luꞌne neꞌmo nene nuꞌ izaaꞌ ive Oꞌmosomuꞌ nene olize noizive.
48 Naza neꞌmine uvoniꞌ nene nanitekumuꞌ ve.
Oꞌmoso aza neꞌmo naza nene haza gelekeleꞌ aluvo lemo minuvoniꞌ nemuꞌ nene ningo gelo doꞌmo dize-nedo do lamineꞌ o-nedave.
49 Ee, amuzo malehe minive Oꞌmoso aza nene initeꞌ lamineꞌ goloso nenita o-nidineꞌ nene
eiꞌ emeni dameni atoliꞌmine goloso ogo lamineꞌ neivo opoꞌni noluve.
50 Idoꞌ ezemuꞌ lehelele izivo mino eꞌmeto nonive leliꞌ nene mulumote ningo hize eleꞌ o-ledo neineꞌ monovoꞌve nene
eveneꞌ sotoꞌ igi mini di vilizadasi nene ha mine do vo mineleseive.
51 Idoꞌ ve ma ingine amebe ve none li luꞌine gaꞌninguꞌ gili gavele ve gehesave nene
aza amuzolo atoliꞌmine ogo minineꞌ do sotoꞌ ogo do gopo o-ngedavo hutileꞌ igi vaniꞌ ve.
52 Idoꞌ guveꞌinesi naba minave nene eveneꞌ gizebo i-ngidi minaaꞌ aniꞌ moꞌmosiꞌnidotiꞌ nene ngehusoꞌ ogo do hulineꞌ gelavo guveꞌinesi ve nene gohi minamaaꞌ aniꞌ ve.
Idoꞌ haza ve limi minave nene aza lavo eveneꞌ dizi minave ve naba neꞌmine liliꞌ igaꞌ aniꞌ ve.
53 Idoꞌ gohoꞌ gahaliꞌ mini initekumuꞌ gaꞌna hili minave nene initeꞌ lamineꞌ vaiꞌ ngemavo di vaiꞌ li minaaꞌ aniꞌza
heneni ve minave nene initeꞌ ma ngemamo do hulo-ngedavo haza minaaꞌ aniꞌ ve.
54-55 Aza nene Abalahamukisi eiꞌ aꞌvopilemoꞌ zuho engiꞌ nesi mulumoꞌine ningo hize eleꞌ o-ngedeꞌmo vo mineloniꞌ nene
mo huko vamo ha minevoꞌ minevoꞌ ogovoꞌ mineleseive lo lo huko
avotemotine lo-ngimingumuꞌ nene gala molamivo ha gele mino
eze gelekeleꞌ o-daaꞌ unive Isilaeleꞌ zuho nene hize eleꞌ o-ledave.
Nemuꞌ nene naza ezemuꞌ nolize noizuve.
56 Maliaꞌ aza mo neꞌmine lo osuꞌ lo Elisabetekisi makaꞌ mino ikeꞌni sito hamo do hulosa numuꞌvela tineꞌ molo vineꞌ.
Monoꞌ Noso Holo-ngedaaꞌ Ive Zohaneꞌ Sotoꞌ Ingumuꞌ Luhuvo Gizineꞌ Gamazi
57 Idoꞌ Elisabeteꞌ aza izipahala gedelineꞌ gamene nene mo alitavo gipele gidineꞌ. 58 Neꞌmine ogavo nemuꞌ nene Guvelesi veꞌmo Elisabeteꞌni atoliꞌmine ogo mulumolo ningo nasahiliꞌ o-do hize eleꞌ o-dingumuꞌ nene eze zuho netesi idoꞌ oholomote zuho netesi nene gili ezesi inginesi ngolize makatoꞌ izaniꞌ. 59 Neꞌmine igi nizavo izipe nene sotoꞌ idotiꞌ gamene eiti (8) ogo vavo aꞌmine gameneuꞌ aꞌmine izipe nene Oꞌmosoꞌmi noso mili-di okoꞌno lolovo huki-dilisa igi guliveꞌve nene melehidoꞌ Zakaliaꞌ ve li milalisa aniꞌza 60 izeleho neꞌmo oꞌve lo-ngedo guliveꞌve nene Zohaneꞌ ve lo mineleseive lineꞌ. 61 Neꞌmine lavo ingine tiꞌ li li-imaniꞌ: Eꞌe, geze zuho mukikutiꞌ nene neꞌmine guliveꞌinesi minave hamokisi ma minamave. 62 Neꞌmine li aꞌinedunuꞌ avazaha igi melehine tiꞌ li longoꞌ i-daniꞌ: Gaza gulive nadive lo molo-delesa gele nane. 63 Neꞌmine li longoꞌ i-dikevo meleho aza luhuvo gizo lo-ngemelesa luhuvo gizelineꞌ initekumuꞌ anadunuꞌ avazaha ogo longoꞌ o-ngedavo ma di imikevo tiꞌ lo gizineꞌ: Guliveꞌve nene Zohaneꞌ ve lo mineleseive. Neꞌmine lo gizavo eveneꞌ ingine voꞌine vavo gopo gaꞌine gili minaniꞌ. 64 Neꞌmine igi nizavo Zakaliaꞌ aza gamazi lilineꞌ akaꞌve hize tile-davo minineꞌ initeꞌ nene osuꞌ lo-davo gohi tihine hizamo aꞌmidoꞌ liteꞌ lo gamazi apiꞌ ogo nolo Oꞌmoso opoꞌni lo minineꞌ. 65 Idoꞌ initeꞌ neꞌmine sotoꞌ ingumuꞌ nene aꞌmine ebekuꞌ miniꞌmi monave mukiꞌ nene gili ngehelele izivo nizavo aꞌmine sotoꞌ ineꞌ initeꞌ neꞌmi gamaziꞌve nene Zudaia misubouꞌ golola numuno ebeꞌ mukikuꞌ minave ingine nene li voleloꞌ meloꞌ igi minaniꞌ. 66 Neꞌmine igi mini aꞌmine gamazi gilave mukiꞌ ingine nene Guvelesi veꞌmi amuzo eita sotoꞌ ogo minineꞌ nemuꞌ nene gilaniꞌ nenako nemuꞌ aꞌmine gamazi nene di maduꞌninguꞌ mili mini tiꞌ li laniꞌ: Aꞌmine izipe nene sotoꞌ olosa neivosi idoꞌ sotoꞌ neivosi vote vineꞌ initeꞌ neꞌmine sotoꞌ ineꞌ nenako alingeꞌ naniꞌmine ve loloꞌ ogo mineꞌ nalivo. Mo eveneꞌ naba neꞌmine ma loloꞌ ilidoꞌ o noloseive li laniꞌ ve.
Zakaliaꞌ Aza Gipele Zohaneꞌ Alingeꞌ Ogo Molo Ilineꞌ Initekumuꞌ Lo sotoꞌ Ogo Oꞌmoso Opoꞌni Lo Nama Lineꞌ Gamazi
67 Idoꞌ Zohaneꞌ meleho Zakaliaꞌ aza nene Oꞌmosoꞌmi Sikalahuliꞌmo ogo hize eleꞌ o-divo Oꞌmosoꞌmi veletiꞌ gamazi tiꞌ lo lo sotoꞌ ogo nama lineꞌ:
68 Isilaeleꞌ aleveti Guvetesi ve Oꞌmoso nene do naba o-do opoꞌni lolone.
Aza nene ogo evenele zuho leliꞌ nene mulumote ningo goloso ogo minuningutiꞌ nene kuluhize-ledave.
69-70 Ee, Oꞌmosoꞌmi veletiꞌ gamazi li sotoꞌ igaꞌ ave polohete gozopoꞌ akaꞌmila minaniꞌ nete
Oꞌmosoꞌmo lo huko-lidineꞌ gamaziꞌve gozopoꞌ li sotoꞌ aniꞌ nene do gihile izo
gomuꞌ Oꞌmoso gelekeleꞌ o-do minive guvetesi ve Davidiꞌ aꞌvopilemoꞌ zuhoutiꞌ nene
amuzo malehe ve leliꞌ do luꞌ izelive nene mo do ote-dave.
71 Idoꞌ do ote-dineꞌ nene eveneꞌ ma lelikumuꞌ muso gaꞌine dizavo biluvaꞌ i-lidaaꞌ aveti aꞌninguꞌ minuningutiꞌ nene
kuluhize-ledo do luꞌ izelive losa do ote-dave.
72-73 Ee, neꞌmine ineꞌ nene gomuꞌ eiꞌ guliveꞌveloꞌ eleꞌvoleꞌ gamazi leliꞌ avotehine Abalahamuꞌni lo huko-dineꞌ mamuꞌ nene
gala gele mino aꞌmine gamazi leliꞌ Isilaeleꞌ aleveti avotemotinemuꞌ nene
lengiꞌ zuho mulumoꞌine ningo hize eleꞌ o-ngedeꞌmo vo minelesuve lo lo huko-ngidineꞌ nene
do gihile izelesa neꞌmine ineꞌ ve.
Idoꞌ aꞌmine gamazi lo huko linguꞌ nene neꞌmine olosa lineꞌ:
74-75 Aza nene leze biluvateliti aꞌningutiꞌ do kuluhize-ledavo
laza nene lehelele izamivo mino mene misubouko eze veleloꞌ vetesi mine do voloninguꞌ
laza nene monovo lisiheꞌ laminekovoꞌ ogo molo mino
ezemuꞌ gele lamineꞌ o mino opoꞌni lo mine do vo minelone.
Idoꞌ neꞌmine ineꞌ nemuꞌ nene Isilaeleꞌ aleveti Guvetesi ve Oꞌmoso nene do naba o-do opoꞌni lolone.
76-79 Neꞌmine lo Zakaliaꞌ aza gipele ngomo Zohaneꞌnimuꞌ nene tiꞌ loo imineꞌ molo lineꞌ:
Idoꞌ gipeꞌne gaza nene Guvelesi veꞌmi aka vele-delesa eze evenele tiꞌ lo lo sotoꞌ o ngemeꞌmo gomuꞌ molo-do volosane:
Leliꞌ Oꞌmosote aza nene lelikumuꞌ mulunouꞌ mulumo naba gilineꞌ nenako
nemuꞌ aza nene lihimete hulo-ledo do luꞌ izelineꞌ aka vele-ledelesa neive.
Ee, Oꞌmoso aza leliꞌ mulumote ningo Guvelesi ve imiselavo
aza Okulumokuko hozi minidotiꞌ nene lemo
leliꞌ luteuꞌ litiꞌmuso ize minivo mino helo vo tolovo oloneꞌ akaloꞌ mine molo minuniveti vovoteuꞌ mino
goꞌ lo labanaꞌ elaaꞌ neineꞌ neꞌmino luteuꞌ hize labanaꞌ ele-ledo
hongu lo mineloneꞌ akaloꞌ leleꞌmize molaloseive.
Idoꞌ gipeꞌne gaza eveneꞌ neꞌmine lo lo-ngemeꞌmo vo mino Guvelesi ve gomuꞌ molo-do akaꞌve vele-delineꞌ nenako
nemuꞌ nene geikumuꞌ evenelite Okulumokuꞌ atoliꞌmine ogo dizo miniveꞌmi polohete ve li
li-gidaaꞌ ilisave lo lo-imineꞌ.
80 Idoꞌ nelotiꞌ aꞌmine izipe Zohaneꞌ nene naba oꞌmo vo mino gala gele ngenga lo minineꞌza eze gono dalineꞌ gamene Oꞌmosoꞌmo molo-dineꞌ nene olihe amivo Isilaeleꞌ aleveti veꞌnidoꞌ nene sotoꞌ amo ebeꞌ hadive gokoꞌ lo minaaꞌ idaavoꞌ nene ongo mono minineꞌ ve.