MONO' GODOLO GOSOHO' LEVELESENI 1
ALINGEꞌ SOTOꞌ ILINEꞌ INITEꞌ ZOHANEꞌNI IZESUꞌ ELEBIZINGUMUꞌ GIZINEꞌ LUHUVO NITEꞌ NENE LEVELESENI VE LAAꞌ NAVE
Leveleseni Bukumuꞌ Gomuꞌ Gataaꞌ Gamazi
Mene buku gizive neꞌmo Zohaneꞌ gizuve lo gizineꞌ ve. Idoꞌ Zuda veutiꞌ nene vemohoꞌ linge mukiꞌ guliveꞌine Zohaneꞌ ve lo minineꞌ ve. Ne neiha ganakutiꞌ nene evenelite tiꞌ li liꞌmi aniꞌ ve: Leveleseni buku nene aposoloꞌ Zohaneꞌ gizineꞌ ve laniꞌ. Eze monovoꞌvemuꞌ nene Mataioꞌ ve Malekoꞌ ve Lukaꞌ ve Zohaneꞌ ve gizaniꞌ buku setaꞌve setaꞌveukisi idoꞌ Aposoloꞌ bukuukisi nene gatelesane. Idoꞌ aza Izesuꞌ gamaziꞌve laminekumuꞌ gizineꞌ bukumuꞌ gomuꞌ gataaꞌ gamazi gizuningukisi nene eiꞌ monovomuꞌ gatelesane. Idoꞌ Zohaneꞌ aza vani molo Izesuꞌ evenele mulise Loma vete gizebo aniꞌ polovinisi Asia ve languꞌ Eheso ebekuꞌ miniꞌmi monaveliti gizebo veꞌine neivo aza Kilisitoꞌnidoꞌ monoꞌ lilizave lo eveneꞌ apize ngemaaꞌ ingumuꞌ nene Loma ve nete analoꞌ di aꞌmine ebeꞌ avita minineꞌ ailani ma galapuso numuno neꞌmine minidaa imiselaniꞌ. Aꞌmine ailani galapuso numuno neꞌmine minineꞌ neꞌmi gulive nene Patimosi ve laaꞌ aniꞌ. Aꞌmine Patimosila ha neivo Izesuꞌ Kilisitoꞌ aza angeloꞌve eletavo lemo ogo vamuꞌ elebizineꞌ. Aꞌmine vamuꞌ nene Izesuꞌ aza eiꞌ gonouꞌ ve ngelebizelive lo Oꞌmosoꞌmo imineꞌ ve. Aꞌmine vamuꞌ nene alingeꞌ sotoꞌ ilineꞌ initekumuꞌ ve. Zohaneꞌ aza aꞌmine ningineꞌ initeꞌ nene bukuuꞌ gizineꞌ. Leveleseni buku ve laaꞌ nouneꞌ ne neive. Aꞌmine vamuꞌ ningineꞌ gameneuꞌ nene Loma ve nete Izesuꞌ evenele zuho nene goboni mili-ngidi di goloso i-ngidi minaniꞌ ve. Aꞌmine buku nene Izesuꞌ evenele zuho ingine aꞌmine mulumo geniukisi amuzo mili minilizangumuꞌ hize eleꞌ o-ngedelesamuꞌ minineꞌ ve. Kilisitoꞌ aza Satanisi idoꞌ biluvaꞌve mukikisi ngivileꞌ ogo ezemuꞌ gili eleꞌvoleꞌ aniꞌine hulamave nene Okulumoꞌ gosohokisi misubo gosohokisi lehize-ngedelingumuꞌ nene ngelebizelesamuꞌ minineꞌ ve. Zohaneꞌ ningineꞌ initeꞌ neꞌmi monovo nene Izesuꞌ evenele zuho aꞌmine gameneuꞌ minaniꞌ nete ha gililizadoꞌ o minineꞌza eveneꞌ ma nete ngeli gilamilizadoꞌ o minineꞌ. Idise gamenela eveneꞌ ingine aꞌmine Zohaneꞌ ningineꞌ initeliꞌmi monovo nene neꞌmino noloseive li gaꞌine atoꞌ atoꞌ gilaaꞌ nave. Aꞌmine Zohaneꞌ ningineꞌ initeꞌ mukiꞌ nene aꞌmine gameneuꞌ gihile izineꞌ noloseive li eveneꞌ linge nete gilaaꞌ nave. Idoꞌ linge ma nete tiꞌ li gilaaꞌ nave: Aꞌmine Zohaneꞌ minineꞌ gamenelotiꞌ apiꞌ ogo gihile izeꞌmo nanako mo gihile izeꞌmo ogovoꞌ neivo Guvelesi ve aloseive. Idoꞌ ma nete gilaniꞌ nene aꞌmine Zohaneꞌ ningineꞌ initeꞌ mukiꞌ nene olihe apiꞌ igi sotoꞌ ami alingetavoꞌ sotoꞌ ilisave li gilaaꞌ nave. Ingine gilaniꞌ nene Guvelesi ve alineꞌ gamene gehepevelokovoꞌ aꞌmine initeꞌ vaiꞌ nene sotoꞌ oloseive li gilaaꞌ nave.
Idoꞌ Zohaneꞌ aza aꞌmine buku mene gizineꞌ nene Asia polovinisiuꞌ tauni seveniꞌauꞌ Izesuꞌ evenele zuho mulise minaniꞌ engikumuꞌ nogizuve lo gizineꞌ ve. Aꞌminguꞌ nene aꞌmine buku gizineꞌ akamukisi idoꞌ Guvelesi ve Izesuꞌ aza labanaꞌve nabasi mino sotoꞌ o-davo ningingumukisi lo ngoloꞌ lo gizineꞌ. Idoꞌ aꞌmine Izesuꞌ evenele zuho mulise seveniꞌa hamoꞌ hamokumuꞌ nene Guvelesi veꞌmo lo-ngidineꞌ gamazi nene luhuvo niteꞌ hamoꞌ hamokuꞌ gize-ngidineꞌ. Luhuvo niteꞌ hamoꞌ hamokuꞌ nene aꞌmine muliseꞌmi angeloꞌve nene nohulo-duve lo gizineꞌ. Idoꞌ eveneꞌ mukiꞌ nete gilaniꞌ nene aꞌmine angeloꞌve lineꞌ nene luhuvo nitetoꞌ gizebo igaꞌ ave seketeli mamuꞌ lineꞌ noloseive li gilaaꞌ nave. Idoꞌ luhuvo niteꞌ hamo hamokuꞌ aꞌmine luhuvo niteꞌ dalizaniꞌ mulise nete monovo lamineꞌ igaꞌ angumuꞌ nene Guvelesi veꞌmo ngopoꞌni lo idoꞌ monovo goloso igaꞌ angumuꞌ nene ngelemo gamaziꞌve lo osuꞌ lolosa eveneꞌ goloso hungoꞌ ngemo Satani ivileꞌ igi minilizavemuꞌ meni neꞌmine ngemelove lo lo huko-ngidineꞌ.
Aꞌmine luhuvo niteꞌ gize osuꞌ lo nelotiꞌ nene Zohaneꞌ aza vamuꞌ ningineꞌ nene neꞌminosa ninguve lo gizineꞌ. Aꞌminemuꞌ apiꞌ ogo lo-ngemo Oꞌmosoꞌmo asi lo-do Okulumokuko eleꞌmizo dizingumuꞌ lo-ngemo aꞌmida ningineꞌ initekumuꞌ lo-ngimineꞌ. Nelotiꞌ nene vamuꞌ vaiꞌ ningineꞌ izeꞌ mili setihami igi minangutiꞌ ningekaꞌ ningekaꞌ ineꞌ initekumuꞌ lo-ngimineꞌ. Idoꞌ izeꞌ mili setihami igi minangutiꞌ naba vanu ningineꞌ nene Guvelesi ve Izesuꞌ nene sipisipi angale neꞌmine gele mino luhuvo gizikadoꞌ nalaꞌ seveni izikaniꞌ nene siꞌzekaꞌ siꞌzekaꞌ neivo ninge minineꞌ. Aꞌmine sipisipi angaleꞌ aza nalaꞌ hamoꞌ hamoꞌ huko siꞌzavo Okulumokuꞌ nehe misubouꞌ nehe initeꞌ ma sotoꞌ ogavo ningo aꞌmine initekumuꞌ nene mene bukuuꞌ gizineꞌ. Idoꞌ aꞌmine izeꞌ mili setihami minangutiꞌ naba tuuꞌ ningineꞌ nene angeloꞌ seveniꞌate pikuli di minaniꞌ nene ningineꞌ. Aꞌmine angeloꞌ hamo hamoꞌ nete pikuliꞌine hubu likaꞌ likaꞌ navo initeꞌ sotoꞌ ikaꞌ ikaꞌ aniꞌ ningo aꞌmine initekumukisi nene mene bukuuꞌ gizineꞌ. Idoꞌ izeꞌ mili setihami minangutiꞌ naba tiliuꞌ ningineꞌ nene gohi angeloꞌ seveniꞌa malite Oꞌmosoꞌmi izeboloꞌ minineꞌ lapese seveniꞌa di minaniꞌ nene tululu li misubouko hulikaꞌ hulikaꞌ navo ningineꞌ. Idoꞌ angeloꞌ hamo hamoꞌ lapesiꞌine di tululu likaꞌ likaꞌ navo misuboloꞌ initeꞌ do goloso ilineꞌ initeꞌ ma sotoꞌ ogavo ningo nemukisi bukuuꞌ gizineꞌ. Monoꞌ monovo gilaaꞌ ave linge nete tiꞌ li gilaniꞌ ve: Aꞌmine vamuꞌ setohamo nete nene hamoꞌ nitekumuꞌ aka atoꞌ atotoꞌ di mili di sotoꞌ ave li gilaniꞌ.
Nelotiꞌ nene Zohaneꞌ aza vamuꞌ linge gohi ma ningineꞌ. Aꞌminguꞌ nene Guvelesi veꞌmo biluvaꞌve mukiꞌ nene ngivileꞌ ogo osuꞌ lo lihime nongimivo ningineꞌ. Nelotiꞌ nene Okulumoꞌ gosohokisi idoꞌ misubo gosohokisi ningingumuꞌ lo-ngemo siti lamineꞌ gehepeve Oꞌmosoꞌmo eze evenele adoꞌ engiꞌ guliveꞌine eiꞌ bukuꞌveuꞌ gize neineꞌ aleve engikumuꞌ do vaꞌvaꞌ o neingumuꞌ nene lo sotoꞌ ogo lo-ngimineꞌ. Eveneꞌ ma guliveꞌine aꞌmine bukuuꞌ minamilineꞌ nene Oꞌmosoꞌmo aꞌmine sitiuꞌ dizilizangumuꞌ gele-ngemamoloseive lineꞌ.
Neꞌmine lo aꞌmine vamuꞌ elebizineꞌ angeloꞌ neꞌmo Zohaneꞌ aza ningineꞌ initeꞌ nene do haleko oꞌove lo-ngedamivo eveneꞌ mukiꞌ ingine bukuuꞌ gizineꞌ gamazi ha gatilisave lineꞌ. Nelotiꞌ nene Guvelesi veꞌmo geto ogo eveneꞌ mukiꞌ igi mili minaniꞌ initekumuꞌ meni ngemelesuve lo lineꞌ gamazi gizineꞌ. Neꞌmine lingumuꞌ gizo Guvelesi ve nene mo laminetoꞌ alive loo ezela lo noꞌnohoꞌ gamazidunuꞌ bukuꞌve nene gize osuꞌ lineꞌ ve.
1
Luhuvo Niteꞌ Meꞌmi Monovo Gizosa Noꞌnohoꞌ Gamazi Gizineꞌ Gamazi
Gizeloniꞌ gamazi mene Oꞌmosoꞌmo Izesu Kilisitoꞌni lo sotoꞌ ogo elebizineꞌ initekumuꞌ nene gizelouve. Aꞌmine initeꞌ elebizineꞌ nene geto sotoꞌ ilidoꞌ o minineꞌ initekumuꞌ mene eze gonoloꞌ ve ngelebizelive lo Oꞌmosoꞌmo elebizineꞌ ve. Neꞌmine ogavo aza leliꞌ gililizave losa gonoloꞌ ve neniꞌ Zohaneꞌni nelebizelesa angeloꞌve nenitoꞌ imiselo aꞌmine gamazi nene do sotoꞌ o-nidineꞌ ve. Idoꞌ aꞌmine do sotoꞌ o-nidineꞌ initeꞌ mukiꞌ ninguvoniꞌ nene naza lo sotoꞌ ogo aꞌmine Oꞌmosoꞌmi gamazi Izesu Kilisitoꞌ hize eleꞌ ogo lo sotoꞌ idoꞌ nene naza hize eleꞌ ogosa nogizuve. Aꞌmine initeꞌ sotoꞌ ilineꞌ gamene nene mo alite neineꞌ nenako nemuꞌ nene eveneꞌ ma aꞌmine Oꞌmosoꞌmi veletiꞌ gamazi gizuvoniꞌ mene gati ma li-ngimilizave nesi idoꞌ gati li-ngimikevo gilisa aꞌminguꞌ gizuvoniꞌ gamaziloꞌ eꞌmeti gili dalizave nesi nene Oꞌmosoꞌmo noꞌnohoꞌ ize-ngedelineꞌ nenako nemuꞌ nene ngolize izilizaniꞌ akaloꞌ mini milalisave.
4-5 Zohaneꞌ naza Asia misubouꞌ miniꞌmi monaniꞌ monoꞌ mulise seveni lengiꞌ nene luhuvo niteꞌ mene nogize-lengedo tiꞌ lo noluve: Idise mino gomukutiꞌ mino mine do dizeꞌmo alive ezelatikisi idoꞌ aza gizebo o-ledo minaaꞌ neineꞌ moꞌmosiꞌveꞌmi velela minaaꞌ naniꞌ Sikalahuꞌ seveni engitatikisi idoꞌ Izesu Kilisitoꞌ adoꞌ Oꞌmosoꞌmi gamazi lamineꞌ lo sotoꞌ o-ledaaꞌ ive ezeloꞌ gele medelelonidoꞌ o minive gomuꞌ molo-ledo hilingutiꞌ oto minive idoꞌ misubouꞌ misubouꞌ miniꞌmi monaniꞌ guveꞌinesi ve naba mukiꞌ engiꞌ guveꞌinesi ve naba minive ezelatikisi nene adoꞌ nasahiliꞌ ogaꞌ monovosi idoꞌ hongu lo lamino minaaꞌ monovosi nene lengita minivo.
Adoꞌ luloꞌve leme neive neꞌmo nene eiꞌ vaniseꞌve hulo hilidotiꞌ nene lihimete apase-ledo eiꞌ gizebouꞌ leleꞌmize molo moꞌmosite naba lemosa eiꞌ Oꞌmosoꞌve adoꞌ eiꞌ melehinemuꞌ opoꞌni lo initeꞌ lehize-daaꞌ olonive loloꞌ o-lidive eita nene guvele minivo gizebo o-ledelineꞌ amuzoꞌve nene minevoꞌ minevoꞌ ogo mine do dizo minelive. Mo neꞌmino miniliho.
Me gililo. Limuso avileloꞌ nene alosa neive.
Idoꞌ alineꞌ nene eveneꞌ mukiꞌ nete veꞌinedunuꞌ ningilisave.
Adoꞌ bilii losonouꞌ hizi ngolosave inginesi nene ningilisave.
Idoꞌ misubouꞌ misubouꞌ miniꞌmi monaniꞌ eveneꞌ zuho ato atoꞌ mukiꞌ ingine
eikumuꞌ nene agae agae li ive nama igi minilisave.
Neve nene mo lamineꞌ ve. Mo neꞌmino sotoꞌ iliho.
Guvelesi ve Oꞌmoso adoꞌ initeꞌ mukitoꞌ gizebo ve minaaꞌ amuzoꞌvesi minive idise mino gomukutiꞌ mino mine do dizeꞌmo alive neꞌmo nene tiꞌ lo nolive: Neniꞌ nene initeꞌ mataꞌ mukiꞌ minamanguꞌ gomuꞌ molo mino alingeꞌ ma osuꞌ lilizaniꞌ nene naza ha minevoꞌ minevoꞌ ogo minelove nene nouve.
Kilisitoꞌ Atoꞌ Okoꞌnosi Mino Zohaneꞌni Sotoꞌ O Emo Emeni Dameniꞌvemuꞌ Lo-emosa Ningelineꞌ Initeꞌ Bukuuꞌ Gizezo Lo Lo-imineꞌ Initekumuꞌ Gizineꞌ Gamazi
Lengiꞌ zuho lengikisi makaꞌ Izesuda giꞌmize mino eiꞌ gizebouꞌ vo holo nonivo goboni mili-lidanguꞌ mino mulumo geni ha eleꞌvoleꞌ ogo geheꞌmo vo minaaꞌ nounive Zohaneꞌ naza Oꞌmosoꞌmi gamazi lo sotoꞌ ogo Izesuꞌ gamazi hize eleꞌ ogo lo sotoꞌ ogo minuvongumuꞌ nene lihime nimi ailani ma Patimosi ve laaꞌ anguꞌ nene mineline li nimiseli hulikevo vo minuvoniꞌ ve. 10 Aꞌmida minuvonguꞌ nene Guvelesi veꞌmi gamene ve lo holiseꞌ minaaꞌ nouneꞌ gamene mauꞌ nene Oꞌmosoꞌmi Sikalahuꞌ neꞌmo zatuhoꞌ o-nidivo nouvo meheꞌnelatiꞌ pikuli nolo molaaꞌ neineꞌ neꞌmino nolo nabautiꞌ sotoꞌ ineꞌ nene gamazi 11 tiꞌ lo lineꞌ giluve: Gaza ningelineꞌ initeꞌ meve nene bukuuꞌ gizosa Izesuꞌ evenele mulise seveni adoꞌ Eheso numuno ebetamukisi idoꞌ Similina numuno ebetamukisi idoꞌ Pelegamoni numuno ebetamukisi idoꞌ Tiatila numuno ebetamukisi idoꞌ Saladisi numuno ebetamukisi idoꞌ Hiladelehia numuno ebetamukisi idoꞌ Laodikia numuno ebetamukisi nene gizo hulo-ngedezo.
12 Neꞌmine lavo naza aꞌmine neꞌmine nolo molo gamazi lo-nimive nene ningelesa mine velepeꞌ izuvoniꞌ ve. Neꞌmine ogo ninguvoniꞌ nene ngolidunuꞌ liliꞌ aniꞌ lamu seveni nene ningo 13 aꞌmine lamu neti vovoꞌninguꞌ nene eveneꞌ okoꞌnosi minive ma ninguve. Aꞌmine veꞌmi geneganaꞌve nene haꞌna haꞌna gizeneloꞌ leme pele minineꞌ nene ngolo mino losonoloꞌ nene ngolidunuꞌ liliꞌ aniꞌ initeꞌ leti neꞌmine izekineꞌ minineꞌ ve. 14 Idoꞌ godolo zopovo nene mokonoꞌ hego gehepeve elo minavo vele gulo nesi nene oloꞌ gulumo neꞌminosa minineꞌ ve. 15 Gizeneꞌve nene ngoli gele vineꞌ initeꞌ olokuꞌ gizi di lamineꞌ ikevo veꞌne veꞌne elo minaaꞌ neineꞌ neꞌmino veꞌne veꞌne elo minineꞌ ve. Idoꞌ noloꞌve nene noso nabaꞌmi gugu neꞌminosa minineꞌ ve. 16 Idoꞌ ana zamela nene sonohiꞌ seveni neꞌmine do minineꞌ ve. Idoꞌ veleutiꞌ nene bainati miteꞌ velela geꞌno mehenela geꞌno gohe goloso minineꞌ nene omo hetele minivo golo vele nene hoꞌ amuzo molo silingengeꞌne hulaaꞌ neineꞌ neꞌmine labanaꞌ nene sotoꞌ ogo minineꞌ ve.
17 Neꞌmine ogo neivo naza ningo gizeneuꞌ lemo pouꞌ lo ongo hiluve neꞌmine gelo minuvoniꞌ ve. Neꞌmine ogo nouvo ana zame nedunuꞌ nene okoꞌneloꞌ nodo gelo tiꞌ lo lineꞌ ve: Gaza golise gelamozo. Naza nene initeꞌ mataꞌ mukiꞌ minamanguꞌ ganaꞌ minuve alingeꞌ osuꞌ ma lilizanguꞌ nesi nene ha minevoꞌ minevoꞌ ogo minelove nene nouve. 18 Minevoꞌ minevoꞌ ogaꞌ nemeni damenisi nene nouve. Gomuꞌ nene naza hiluvoniꞌza aizo, idise nene naza gohi veꞌne gizo minevoꞌ minevoꞌ ogovoꞌ nouve. Idoꞌ neniꞌ neve nene hili vilizangumuꞌ akahe siꞌzaaꞌ kiiꞌ nesi idoꞌ hilisa minaniꞌ ebekutiꞌ oti vilizangumuꞌ akahe siꞌzaaꞌ kiiꞌ nesi nene nenikovoꞌ do nouve. 19 Nemuꞌ nene gaza neꞌmine olosane. Gaza idise sotoꞌ o neineꞌ initekisi idoꞌ alingeꞌ sotoꞌ olosa neineꞌ initekisi nene ningelesange. Aꞌmine initeꞌ nene ningosa luhuvo gizezo. 20 Sunoꞌ minineꞌ initeꞌ adoꞌ aꞌne zamela nene sonohiꞌ seveni do nouvo ningaineꞌ neꞌmi monovo nesi idoꞌ ngolidunuꞌ liliꞌ aniꞌ lamu seveni minineꞌ neꞌmi monovo nesi nene neꞌmino neive: Aꞌmine sonohiꞌ seveni nene eveneꞌne mulise seveni neti angeloꞌnidoꞌ nene medeli avazaha neꞌmine nene nizave. Idoꞌ aꞌmine lamu seveni nene aꞌmine eveneꞌne mulise seveniloꞌ nene medeli avazaha neꞌmine nene nizave.