KAUKAVU VILE ANE
IOANESI
MUKAUKAVU MULAI NOXIꞌA TA MITEMA NOXOU LATAUA VAIKALA SOU MAULI
Vaikala lamana
Uoli voloxu noxou Ioanesi ane mukaukavunu tei ꞌo ne tavaꞌu ta tamei. Anu umasaxa lexe usuꞌulineꞌi ta mitema sou iloꞌa Lataua ilou ꞌOlu Iesu Kalisito ixolu ipita utotomu. Xe mupeletotosiꞌa lexe ilaxaineꞌi noxiꞌa ta tisa kalakalavoi. Xo maasi la iꞌoxonu loloxaꞌa la ilai vaꞌaxu noxou Lataua. Ta tisa kalakalavoi iꞌoxo lexe mimii no lialia ꞌo ne, anu masua. Mo Iesu anu Lataua ꞌOlu kalumo. Xo Anu muneꞌe muxolu no lialia ꞌo la muxali itema loxo nenge ta mitema ꞌo si, mo muꞌoxonu ꞌiliꞌilixo loxo nenge ta mitema no lia ꞌo taꞌoxoꞌoxonu ꞌo. Aneꞌi mivikala aloxo ꞌo lexe itema vile umasaxa ilou Lataua ixolu, la anu laixe lexe anu uxavutalanu mimii no lialia ꞌo uasi. ꞌIlixo lailaixe xe ꞌilixo sou tamasaxaiꞌa ta menexinge ne anu mii sou lialia ꞌo uasi. La sou ngaxavutala sou ngamulinu ꞌiliꞌilixo ane ne.
Ioanesi muvikala lamana lexe, ilomuxaꞌa sou imulinu lavulavu ane ne uasi. Anu muvikala lexe Iesu anu muxali itema maninasou. La sou ta mitema e mimuxaxu taneꞌi noxou Iesu ne imasaxau Lataua xe imasaxaiꞌa ngatongatoꞌo.
Aꞌalo muai no nano aloxo ꞌo
Vaikala lamana 1:1-4
ꞌIliꞌilixo sou lamana xe isivoxo 1:5–2:27
Lataua ta ꞌolu xe Satani ta ꞌolu 2:28–4:6
Tamulinu ꞌilixo noxou Lataua 4:7–5:12
Vaikala kaluxusou 5:13-21
1
* Ioa 1:1Mii ane muxolu tatei no mine Lataua ukoinu mimii uao ne, nexi telomusou mo temaisou no iexi mo temaisou laixe manina mo tekasou. Anu vaikala sou mauli ane nexi taaꞌaloxu ꞌo.
* Ioa 1:14Mauli ane ne muxali, la nexi temaisou. La sou nexi tavikala lamana no anu ꞌo, xe taaꞌaloxu mauli ane ukalu uasi ulai noxinge. Mauli ane kaluxu uasi ne, Anu ilou Momu Lataua mixolu mipita, ia Anu muxali noxixe. Tavaꞌu xo nexi taaꞌalomengixu mii ane nexi temaisou mo telomusou ne, nexi temasaxa lexe nenge nengeꞌa taxali vilesisi. Taxali vilesisi, la nenge tapita noxou Maminge ilou ꞌOlu, Iesu Kalisito. * Ioa 16:24Nexi tekaukavunu vaivaikala ane ꞌo, sou lexe nenge taxali vilesisi, la nexi taꞌosa manina.
Tamulimulinu ꞌIlixo sou Lamana
* 1Ti 6:16; Iak 1:17Lataua anu lamana, ia ꞌilixo sou isivoxo vile uxolu noxou uasisi manina. Anu aꞌalo ane ne, nexi telo-musou noxou Iesu Kalisito, la sou nexi taaꞌalomengixu. * 1Ioa 2:4Lexe nenge tavikala lamana lexe nenge noxou Lataua texali vilesisi, ia nenge tamuli-mulinu ꞌiliꞌilixo sou isivoxo, la nenge tekalavoi mo tamulinu vaikala manina noxou Lataua uasi. Ia lexe nenge tamulimulinu ꞌiliꞌilixo sou lamana loxo anu umulimulinu, la nenge nengeꞌa taxolu tapita mo sialuxu ꞌOlu Iesu munixisinge la sou nenge noxou Lataua taxali laixe no anu ꞌilixo masumasua ukalusi.
* Lex 32:5; Xav 28:13Lexe nenge tavikala lexe nenge taꞌoxonu ꞌilixo vile masua uasi, la nenge xavutalamenge ukalavoinenge, mo vaikala manina noxou Lataua uxolu noxinge uasi. Ia lexe nenge tapalaꞌalixu ꞌiliꞌilixo masumasua noxinge, la Lataua uxiu tumalouu ꞌiliꞌilixo ne, mo ukalipalanenge no anu ꞌiliꞌilixo masumasua, xo Lataua uvikala lexe uꞌoxonu mii maꞌia, la umulinu vaikala noxou, la uꞌoxonu mii laixesi. 10 Lexe nenge tavikala lexe nenge taꞌoxonu ꞌiliꞌilixo masumasua uasi, la nenge tavikala lexe Lataua anu itema sou kalavoi. Mo vaikala manina noxou Lataua uxolu no nano no maulinenge uasi.

*1:1: Ioa 1:1

*1:2: Ioa 1:14

*1:4: Ioa 16:24

*1:5: 1Ti 6:16; Iak 1:17

*1:6: 1Ioa 2:4

*1:8: Lex 32:5; Xav 28:13