UOLI VOLOXU VILE ANE PAULO MUKAUKAVU MULAI NOXIꞌA
TA TESALONIKA
Vaikala lamana
Tuala tila ne Tesalonika ne anu tuala tila sou xalee lia tila ne Makedonia. No voxo mine Paulo mulutu ne Pilipai la anu mulai musokou lalotu ane no tuala tila ne. (Aposeli 17:1-9) No mine Paulo mulai muaꞌaloxu aꞌalo laixe sou Iesu Kalisito ne la ta mitema tavuꞌalo mimulinu vaikala noxou la mixali ta mitema noxou Kalisito. Ia no mine ta Iutaia mimaisou aloxo ne la oponeꞌi masuau Paulo, la mikusau ne Tesalonika.
Ioxe iliꞌi no mine anu mulai muxolu ne Kolinito, la vaitamiou Timoti muneꞌe muaꞌalou sou mimii e muxali ne Tesalonika ne. Xe anu muavuti la ilou Timoti mikaukavu uoli voloxu mulai noxiꞌa sou uꞌoxonu xavutalaiꞌa pekiaꞌu. Mo muvikala laixe noxiꞌa sou mulomusiꞌa lexe aneꞌi mimuxaxu taneꞌi pekiaꞌu noxou Iesu xe ꞌiliꞌilixo lailaixe miꞌoxonu sou mimasaxaiꞌa ngatongatoꞌo. Mo muvikalaneꞌi lexe imulinu ꞌilixo e aneꞌi miꞌoxoꞌoxonu no mine aneꞌi iloꞌa mixoxolu tei la aneꞌi miꞌoxoꞌoxonu. Xe ta temanu lalotu moseꞌi male ilamana laixe uasi, la miꞌoxonu talitaliꞌi moseꞌi la sou Paulo mukolinu talitaliꞌi noxiꞌa ne. Taliꞌi noxiꞌa ne lexe no mine Kalisito ulivu uneꞌe, la Anu ulivu uneꞌe a loxovaa? Mo ta mitema e mimuxaxu taneꞌi ia misoisoli tei no mine Kalisito ulivu uneꞌe uao ꞌo, loxova, no mine Anu ulivu uneꞌe la aneꞌi inoꞌu mauli kaluxu uasi kalumo? Xe Anu ulivu uneꞌe no anu voxo maꞌia manina? Paulo mukolinu talitaliꞌi noxiꞌa la muvikalaneꞌi lexe imulimulinu ꞌiliꞌilixo lailaixesi mo ixaxai tasiausi xe ixolu seꞌisisi mo ilalaxineꞌi sou ixomaiou voxo mine Kalisito ulivu uneꞌe.
Aꞌalo muai no nano aloxo ꞌo
Vaikala sou ꞌosaꞌila 1
Paulo mulamanalixaꞌa ta Tesalonika no anu xaixai noxiꞌa 2-3
Mauli ane Lataua uꞌosasou 4:1–5:22
Vaikala kaluxusou ilou lakilaka xe vaikala sou sexela 5:23-28
1
* Apo 17:1-9Eni Paulo, nexi noxiꞌa Sailasi ilou Timoti tekaukavunu vaikala ane ꞌo mulai noxinge ngingi ta mitemau Lataua ne Tesalonika e ngingi ngongiꞌa Lataua Maminge mo Tila Iesu Kalisito ngepita vilesisi.
Nexi talinga lexe alauna mo opo seꞌisisi noxou Lataua umomomo sou uxolu noxinge.
Aneꞌi Milemo Laixe sou Xaixai Noxiꞌa ta Tesalonika
Nexi taxavutalangengi ngingi latala mo talemo laixe musuku ulai noxou Lataua no voxovoxo utotomu no ꞌa lakilaka noxixe. * 1Ko 13:13; Kol 1:4-6Mo nexi taxavutalangengi utotomu no iou Lataua Maminge no anu ꞌiliꞌilixo laixe e ngingi ngemuxaxu tangengi noxou la sou ngeꞌoxonu, mo xaixai toxoxaꞌa e ngingi tangengixaꞌa ta mitema la sou ngeꞌoxonu sou ngesuꞌulineꞌi. Xe taxavutalanu tulungenge pekiaꞌu no anu tuꞌutuꞌumaxu xo ngaꞌosasou ngaloopala Tilasinge Iesu Kalisito mine ulivu uneꞌe.
Ngingi ngeꞌoxo ꞌilixo aloxo ne, xo ngingi ta vivixe e Lataua tanunenge misevile. Nexi telavu lexe anu musosovosinge lexe ngingi ta naꞌu. * 1Ko 2:4-5Xo nexi teaꞌalomengixu aꞌalo laixe noxou Iesu, la tavikalangengixu no anu ananexesi uasi. Ia tevikalangengixu no anu xavi mo no anu Uleenu Tavuna, la ngelavu lexe temulaxu tanexi pekiaꞌu no anu ane. Mo ngingi ngelavusou ꞌiliꞌilixo e nexi teꞌoxonu sou usuꞌulingengi no anu voxo ane nexi texolu noxinge ne. * Apo 17:5-9No voxo ane ngingi ngeꞌosasou vaikala noxou Lataua sou ngenoꞌu xo Uleenu Tavuna muxaxai noxinge, no mine ngingi ngexalisou tuꞌutuꞌumaxu tavuꞌalo ne. La ngingi ngemulimulinu ꞌiliꞌilixo noxixe mo noxou Tilasinge. La sou ngingi ngemaxaꞌu ꞌiliꞌilixo laixe sou ta mitema latala ane imuxamuxaxu taneꞌi noxou Iesu no xalee lia tila ne Makedonia mo ne Akaia imaisou la imulinu. Xe vaikala noxou Tila e ngingi ngeaꞌaloxu ne, ulai noxiꞌa ta mitema ne Makedonia xe ne Akaiasi uasi, mulai noxiꞌa ta mitema no tuatuala ukalusi loxo xalamo tamaxu ulai noxiꞌa ta mitema. Mo aneꞌi milomusou aꞌalosinge lexe ngingi ngamuxamuxaxu tangengi noxou Lataua. La sou nexi umomomosou tavikalaneꞌi no ꞌa vaikala vile la uasi. Xo ta mitema meꞌa iaꞌalongenge sou mimii ane muxali no mine nexi teneꞌe noxinge la ngeꞌosasixe. Mo miaꞌalongenge lexe ngingi ngeꞌumeꞌa ta lataua sou kalakalavoi mo ngelivu ngeneꞌe noxou Lataua maninasou umauli utotomu sou lexe ngingi ngaxaxai noxou, 10 mo ngingi ngaxomaiou ꞌOlu Iesu ane musoli ia Lataua mutulusou xe iliꞌi la molu no opo loxotolo uluꞌe mo upamaulinenge no anu laꞌia noxou Lataua e uneneꞌe.

*1:1: Apo 17:1-9

*1:3: 1Ko 13:13; Kol 1:4-6

*1:5: 1Ko 2:4-5

*1:6: Apo 17:5-9