KAUKAVU TAMEISOU ANE
IOANESI
MUKAUKAVU MULAI NOXIE SEMA VILE
Vaikala lamana
Uoli voloxu ane ꞌo ne, tila vile no anu lalotu mukaukavunu mulai noxie sema vile e anu mumasaxaie mulolutu iloꞌa ta ꞌilie. Ta mitema tavuꞌalo miꞌoxo lexe vaikala ne laaxu lexe ta temanu lalotu no anu taasou lalotu vile. Anu muvikalaneꞌi lexe imasaxaiꞌa ngatongatoꞌo xe ilaxaineꞌi noxiꞌa ta mitema sou kalakalavoi no anu kalakalavoi noxiꞌa.
Aꞌalo muai no nano aloxo ꞌo
Vaikala lamana 1-3
Tamulinu ꞌilixo sou tamasaxainge maninasou 4-6
Ngalaxaꞌingengi noxiꞌa ta mitema sou kalakalavoi 7-11
Vaikala kaluxusou 12-13
1
1-2 Eni atatila. Akaukavunu vaivaikala ane ꞌo ulai noxine nini sema ngongiꞌa ta ꞌiline e Lataua musosovosine. Tavaꞌu xo vaikala manina noxou Lataua mumauli noxinge mo muxolu noxinge no voxovoxo utotomu, la sou eni eꞌosa manina. Ia enisisi aꞌosa uasi, aneꞌi ane milavusou vaikala manina noxou Lataua kalumo miꞌosasinge.
Nenge telavusou vaikala manina noxou Lataua mo temasaxainge ngatongatoꞌo, la sou eni emasaxa lexe alauna mo tanutanuxu mo opo seꞌisisi noxou Lataua Maminge ilou ꞌOlu Iesu Kalisito uxolu noxinge.
* 3Ioa 1:3Eni emaisiꞌa ta ꞌiline seꞌi mimulinu vaikala manina noxou Lataua loxo anu Maminge muvikala pekiaꞌu lexe nenge tamulinu. Eni emaisiꞌa aloxo ne, la sou eꞌosa manina misevile. * 1Ioa 2:7La sou vaimomo ꞌo, eni akaukavunu lapuloto vile alavua noxine nini sema uasi. Ia ekaukavunu lapuloto e Lataua mulosinge tei no mine nenge temuxaxu tanenge noxou Iesu. Lapuloto ne muvikala pekiaꞌu lexe tamasaxainge ngatongatoꞌo. Tamasaxainge ngatongatoꞌo, la nenge tamulimulinu lapulapuloto noxou. Aloxo ngingi ngelomusou tei lexe Lataua muvikala pekiaꞌu lexe ngingi ngemulinu ꞌilixo sou ngamasaxaiꞌa ta mitema.
* 1Ioa 4:1-3Ngingi ngamulinu lapuloto noxou Lataua lexe ngamasaxainge ngatongatoꞌo, xo ta mitema tavuꞌalo ilavusou ikalavoineꞌi ta mitema a milaa miluꞌe no lia ꞌo mukalu. No anu vaivaikala noxiꞌa, la ivikala lexe Iesu Kalisito anu uxali itema manina uasi. Ta mitema e ivikala aloxo ne ne, aneꞌi ikalavoineꞌi ta mitema xo aneꞌi ta ulua Kalisito. La sou ngasaxilaꞌinge laixe noxiꞌa, loxo ꞌo io ngaxovulaunu lakolisou xaixai laixe e ngeꞌoxonu no lia ꞌo uasi. Ia nganoꞌu lakolisou umomomo no anu xaixai e ngeꞌoxonu. ꞌEi ane upolopepeenu mii ane Kalisito mulosiengexu mo utetelisou uasi, la Lataua uxolu noxou uasi. Ia ꞌei ane utetelisou mii ane ne, la Maminge ilou ꞌOlu ixolu noxou. 10 Xe lexe itema vile uneꞌe no tani noxine, ia uneꞌenu mii ane Kalisito ulosiengixu uasi, la naꞌosasou mo naꞌavalou ulai no tani noxine uasi. 11 Ia ꞌei ane uꞌosasou mo uꞌavalou ulai no tani noxou, la anu uꞌoxonu ꞌiliꞌilixo masua loxo anu uꞌoxoꞌoxonu ne.
12 Eni vaivaikala tavuꞌalo lexe akaukavumengixu a uxolu. Ia eni amasaxa lexe akaukavunu no anu suꞌi uasi. Emasaxa lexe alai noxinge mo nengeꞌa taxolu tapita sou tavivikala. Lexe nengeꞌa taxolu tapita, la nenge taꞌosa manina.
13 Vaivaikala noxilo asenesi. Ia vivine ane ꞌo Lataua musosovosie ta ꞌilie misovanu aso laixe ulai noxinge.

*1:4: 3Ioa 1:3

*1:5: 1Ioa 2:7

*1:7: 1Ioa 4:1-3