UOLI VOLOXU ANE PAULO MUKAUKAVU MULAI NOXIꞌA
TA XALATIA
Vaikala lamana
No nano no anu uoli voloxu noxou Paulo mulai noxiꞌa ta Xalatia ꞌo, la anu muvivikala no anu tuꞌtuꞌumaxu e muxali noxiꞌa ta Xalatia no mine aneꞌi ta mitema ane ta Iutaia uasi milomusou aꞌalo laixe la mimuxaxu taneꞌi noxou Iesu Kalisito. Xo tei la aneꞌi ta Iutaia maninasousi mimulinu Iesu. Ia no mine Paulo muneꞌe muaꞌaloxu aꞌalo laixe sou Iesu Kalisito, la aneꞌi ta mitema ane ta Iutaia uasi mixali ta molomolo noxou Iesu. La sou aneꞌi ta Iutaia maninasou miꞌoxo lexe anu laixe sou ta mitema ane ta Iutaia uasi ne imulinu lapuloto noxou Mosesi loxo aneꞌi ta Iutaia mimulinu, la sou aneꞌi ixali ta mitema noxou Iesu. La sou Paulo muavuti la muvikalaneꞌi lamana lexe no anu ꞌilixo sou imulinu lapuloto laixe la ixali ta mitema mulapu uasi. Anu muvikalaneꞌi lexe ta mitema ixali ta mitema mulapu no iou Lataua no anu voteꞌi sou imuxaxu taneꞌi noxou Iesusi.
Xo ta Iutaia moseꞌi milutu milai no xalee lia tila ne Xalatia la mivikalaneꞌi ta mitema e mixali ta mitema noxou Iesu ne lexe aneꞌi imulinu lapluloto noxou Mosesi. No mine Paulo mulomusou aloxo ne la sou mukaukavu uoli voloxu ꞌo, sou muxamuxaxu taneꞌi xe mumomosou ꞌilixo noxiꞌa e ta mitema ne misusunoxu no anu lavulavu kalakalavoi noxiꞌa ne. Paulo musokou la muꞌoxo latolo sou xaixai noxou, la muvikala lexe xaixai noxilo ꞌo ne, Lataua molu musosovosilo. Mo muvikala lexe eni amulinu masaxa noxilo xe itema vile upalusilo sou aꞌoxonu xaixai ane ꞌo uasi. Lataua molu muꞌavalilo sou exali aposeli, mo mulosilo xaixai ane ꞌo sou alai aꞌaloxu aꞌalo laixe sou Iesu Kalisito ulai noxiꞌa ta mitema ane imuxaxu taneꞌi noxou Iesu Kalisito, la aneꞌi ixali ta mitema mulapu no iou Lataua.
Paulo mukalusou vaivaikala noxou aloxo ꞌo, no mine nenge tamuxaxu tanenge noxou Kalisito, la Uleenu Tavuna ulaxunenge no anu ꞌilixo sou tamasaxaiꞌa ta menexinge. No anu muxamuxaxu tanenge nesi la sou anu uxalixu neneꞌaxu ane sou tamsasaxaiꞌa ta menexinge.
Aꞌalo muai no nano aloxo ꞌo
Vaikala lamana 1:1-10
Paulo mulamanalixu xaixai noxou loxo aposeli xe ꞌilixo sou muxamuxaxu tanenge 1:11–2:21
ꞌIlixo sou tamulinu lapuloto la taxali itema mulapu uasi no anu ꞌilixo sou tamuxaxu tanenge noxou Iesusi 3:1–4:31
Noxou Kalisitosi la nenge taxali telapu 5:1–6:10
No anu soli noxou Iesu la nenge taxali alavua, ia no anu ꞌilixo sou xooxoo ungasinge uasi 6:11-18
1
Eni aposeli Paulo. Ta mitema ipalusilo mo itema vile ulosilo xaixai ane ꞌo uasi. Ia Iesu Kalisito mulosilo xaixai ane ꞌo xe Momu Lataua e mutulusou no anu soli. Nexi noxiꞌa ta vivilo noxou Iesu e texoxolu ꞌo tekaukavunu uoli voloxo ane ꞌo ulai noxinge ta temanu lalotu ukalusi no xalee lia tila ne Xalatia. Nexi takilaka lexe alauna mo opo seꞌisisi noxou Maminge Lataua mo Tila Iesu Kalisito uxolu noxinge. * Xal 2:20Anu Kalisito mumulinu masaxa noxou Lataua Maminge la muitalonu maulixu sou muxexeenu susu noxinge. Anu muꞌoxonu aloxo ne, la sou musuꞌulinenge sou muxexenenge no anu mauli masumasua sou lialia vaimomo ꞌo. Anu aloxo ne la sou laixe lexe nenge taꞌitinu Lataua ualasou utotomu mo kaluxu uasi. Manina.
Aꞌalo Laixe Vilesisi
Eni ekuluke manina no anu ꞌilixo ngingi ngeꞌoxonu ne. Xo no anu alauna noxou Kalisito la Lataua muꞌavalinge sou ngexali ta mitema noxou, ia ngepalea alaxu vilesisi ngeꞌume la ngelai ngemulinu aꞌalo vilemo ane mupolo vaꞌaxu manina no anu aꞌalo laixe. * Apo 15:1, 24Ta mitema moseꞌi no taingengi itovonu sou ixovulaulaulingenge la ixiuxiunu aꞌalo laixe sou Kalisito ne. Ia aꞌalo laixe sou Kalisito ne anu vilesisi mo uxiuxiu uasi. Mo aꞌalo vile la uasisi manina. * 1Ko 16:22Aꞌalo laixe ne, nexi teaꞌalomengixu tei. Ia lexe nexi, uasi la angelo vile molu teitexi no opo loxotolo uluꞌe uaꞌalomengi no anu aꞌalo iouvilemo loxo ane nexi teaꞌalomengixu tei ne, la itema ane loxo ne, anu uulua no navu kaluxu uasi.
Nexi tevikalangengixu tei mo vaimomo ꞌo eni avikalangengixu la. Ia lexe evile uaꞌalomengi no anu aꞌalo laixe iouvilemo no anu ane ngingi ngenoꞌu tei, la anu laixe lexe itema ne uulua no navu kaluxu uasi. 10  * 1Te 2:4Mo vaimomo ꞌo ngingi ngexavutala a loxovaa. No anu vaivaikala noxilo ꞌo? Eni aꞌoxonu sou ta mitema iꞌosasilo no anu, uasi ia eni aꞌoxonu sou Lataua uꞌosasilo. Lexe eni aꞌoxonusi sou ta mitema iꞌosasilo no anu la eni amitema sou xaixai noxou Kalisito uasi.
Aꞌalo sou Paulo Mine Lataua Muꞌavalou
11  * Mat 16:17Ta vivilo, eni emasaxa lexe ngingi ngalavusou laixe lexe aꞌalo laixe e eni eaꞌaloxu noxinge tei ne, itema vile ukoinu vitanisi uasi. 12 Mo itema vile ulosilo mo itema vile ulosielixu uasi. Ia Iesu Kalisito molu mupalaꞌalixu lamana noxilo.
13  * Apo 8:3Ngingi ngelomusou aꞌalosou mimii eni eꞌoxoꞌoxonu tei no mine emulimulinu ꞌiliꞌilixo sou lalotu noxiꞌa ta Iutaia, la eꞌoxoo masuaneꞌi ta mitema noxou Lataua manina xe etovo sou lexe amamulonu lalotu ne ukalusi. 14  * Apo 22:3Xo eni taleli utulu pekiaꞌu manina sou amulimulinu ꞌiliꞌilixo noxiꞌa ta ꞌiluꞌilusunexi. No anu ꞌilixo ane ne la eni eꞌoxoleli euliuli noxiꞌa ta maulu ta Iutaia ane lasililinexe vilesisi. 15  * Ais 49:1; Xal 2:7Ia no mine atie ivoꞌoleli uao, la Lataua musosovosilo xe no anu alauna noxou la muꞌavalilo. Eni exolu mulai muxali no anu voxo anu molu musosovosou la sou, 16 Anu mupalaꞌalixu ꞌOlu lamana noxilo. Anu muꞌoxonu aloxo ne mo sou eni amomomo sou aꞌaloxu aꞌalo laixe sou ꞌOlu ulai noxiꞌa ta mitema aneꞌi ane ta Iutaia uasi. No mine Anu mupalaꞌalixu ne, la ataliꞌisou itema vile uasi. 17 Mo atelai ne Ielusalemu sou amaisiꞌa aneꞌi ane mixali ta aposeli tei noxilo uasi. Ia eni elutu alaxu vilesisi ꞌo la elai exolu no xalee lia vitanisi ne Alevia. Xe iliꞌi la sou elivu eneꞌe no tuala tila ne Temasukasi. 18  * Apo 9:26-27Xe tauu leleꞌe tatalu mukalu, la sou eni etelai ne Ielusalemu sou enoꞌu lavulavu seꞌi noxou Pita. La nexi noxou texolu ne voxo mavulovexa mo muluꞌe lia taꞌuve (15). 19 No voxo mine eni elai exolu ne la amaisiꞌa ta aposeli moseꞌi uasi, ia emaisou Iakovo e Tila vimou kokope. 20 Vaivaikala noxilo e akaukavunu ulai noxinge ꞌo ne akalavoi uasi, evikala manina no iou Lataua. 21  * Apo 9:30Xe iliꞌi la exixaoxao no xalee lia tila ne Silia xe ne Kilikia. 22 Ia ta mitema noxou Kalisito mixolu no ꞌa ta taasou lalotu no xalee lia tila ne Iutaia ne imaisou ieli tei uasi. 23 Aneꞌi milomusou aꞌalosilosi lexe, “Itema e tei la muꞌoxo masuanenge, anu a vaimomo ꞌo muxiu mo uaꞌaloxo aꞌalo laixe no anu ꞌilixo sou muxamuxaxu tanenge e tei la muꞌoxoo masuanu.” 24 Aneꞌi milomusou aꞌalosilo aloxo ne, la miꞌitinu Lataua ualasou.

*1:4: Xal 2:20

*1:7: Apo 15:1, 24

*1:8: 1Ko 16:22

*1:10: 1Te 2:4

*1:11: Mat 16:17

*1:13: Apo 8:3

*1:14: Apo 22:3

*1:15: Ais 49:1; Xal 2:7

*1:18: Apo 9:26-27

*1:21: Apo 9:30