AꞌALO LAIXE NOXOU IESU KALISITO ANE
IOANESI
MUKAUKAVUNU
Vaikala lamana
No nano no anu lavuku noxou Ioanesi la anu mupaꞌalixu Iesu lamana lexe Iesu ne “Anu vaikala noxou Lataua,” e muxali itema la muneꞌe muxolu no tainenge. Ioanesi mukaukavunu aꞌalo laixe noxou Iesu ꞌo, xo umasaxa lexe ta mitema iitisou la imuxaxu taneꞌi noxou Iesu lexe Anu Lataua ꞌOlu mo ilavusou lexe Anu itema nesi ane Lataua musakiinu vaikalasou tei lexe upalusou uneꞌe sou ulivulixaꞌa ta mitema xe no mine aneꞌi imuxaxu taneꞌi noxou la sou inoꞌu mauli ane kaluxu uasi (20:31).
Tei la Ioanesi muaꞌaloxu Iesu lamana lexe, “Iesu anu vaikala noxou Lataua e muxolu tei.” Xe iliꞌi la anu muaꞌaloxu sosovo moseꞌi Iesu muꞌoxonu, mo sou nenge talavusou lexe anu Iesusi ane Lataua musakiinu vaikalasou tei lexe uneꞌe sou ulivulixaꞌa ta mitema xe talavusou laixe lexe anu Lataua ꞌOlu. Mo Ioanesi mulamanalixu sosovo e Iesu muꞌoxonu laaxu, mo muaꞌaloxaꞌa ta mitema moseꞌi mimuxaxu taneꞌi noxou Iesu la mimulinu, ia leviani mixilili la muxaxu taneꞌi uasi. No anu mautunu 13-17, la Ioanesi muaꞌaloxu mii maꞌia muxali no ꞌolovoxo e mineꞌe mitetelisou Iesu. Mo muaꞌaloxu Iesu iloꞌa ta molomolo noxou mixolu mipita sou mupeletotosiꞌa mo mupatetelineꞌi mo mukilakasiꞌa xe mulalaxineꞌi. No anu aꞌalo kaluxusou noxou Ioanesi la anu muaꞌaloxu Iesu no mine mineꞌe mitetelisou la minoꞌu mulai sou mitulusou no anu vaivaikala mo mivau xe mivau mukalu lamililixu teitexi no ovu valautu. Xe muaꞌaloxu Iesu no mine musoli xe mutulu la mupalaꞌa noxiꞌa ta molomolo noxou.
No anu mautunu 8:1-11, la muaꞌaloxe sema e miꞌoxonu ꞌilixo sou voteꞌi la ta mitema mitetelisie mineꞌene noxou Iesu. Aꞌalo ane ne mimuxaxu sosovo moseꞌi no anu, xo no mine mipitanu aꞌalo sou muxali lavuku xe aneꞌi ane mixiunu vaikala ꞌo tatei la mixexeenu muai vaꞌaxu ia iꞌunanu no anu aꞌalo uasi, ia leviani mikaukavu muꞌuna loxo aꞌalo vile.
Mii vile tamaisou Ioanesi muvivikala tavuꞌalo no anu ane mauli ane tanoꞌu noxou Iesu Kalisito no voxovoxo utotomu. Mauli ane ne ta mitema isoko sou inoꞌu vaimomo ꞌo mo iliꞌi noxiꞌa aneꞌi ane imuxaxu taneꞌi noxou Iesu lexe Anu vaikala manina, mo tavaꞌu mauli xe xavi. Mii tatila manina Ioanesi muvikala no anu ane mimii e sou usuꞌulinu ta mitema maulixaꞌa no voxovoxo loxo lexa, veleti, telu, itema sou usaxilaꞌa ta sipsip iloꞌa ta sipsipiou xe ovu uaini ilou uaini tematemanu. Mimii ane ne Iesu muvikala tovolaꞌisi no anu. Ia anu maninasou, la Anu muꞌoxonu vaikala tovolaꞌi sou mauli no anu ulenenge.
Aꞌalo muai no nano aloxo ꞌo
Vaikala anu muxali itema 1:1-18
Iesu musokou xaixai noxou 1:19-51
Iesu muxalixu lamana xaixai noxou 2:1–11
Voxo kalukaluxusou no ale xe no nano ne Ielusalemu 12:1-19
Iesu mutulu xe mupalaꞌa noxiꞌa ta molomolo noxou 20:1-29
Tavaꞌu lavuku ane ꞌo aloxo ꞌo 20:30-31
Iesu mupalaꞌa alaxu vile la noxiꞌa ta molomolo noxou 21:1-25
1
Vaikala Anu Muxali Itema
1-2  * Ioa 17:5; 1Ioa 1:1-2; Pal 19:13Tatei manina no mine Lataua ukoinu mii uao, la vaikala anu muxolu. Anu ilou Lataua mixolu. Mo anu vaikala ne, Anu Latauasi. * 1Ko 8:6; Kol 1:16-17; Eva 1:2Mimii latala mukalusi ne, muxali no anu vaikala nesi, io mii vile uxali no anu voteꞌi vile la uasi. * Ioa 5:26Mauli muxolu no Anu mo mauli ane ne, Anu ulosiꞌa ta mitema lamana. * Ioa 3:19Lamana uiei no nano no isivoxo, ia isivoxo utaloxolixu uasi.
* Mat 3:1; Luk 1:13-17, 76Lataua mupalusou itema vile muneꞌe, ualasou lexe Ioanesi. Anu muneꞌe sou uaꞌalo xe uvikala lamana no anu lamana ne. Mo sou ta mitema latala ilomusou, la imulaxu taneꞌi no Anu. Anu ane muneꞌe ne, anu lamana uasi, ia anu muneꞌe sou uaꞌaloxu lamana nesi. * Ioa 8:12Lamana maninasou e ulosiꞌa ta mitema latala lamana ne, Anu a uneneꞌe uluꞌe no lia ꞌo. 10 Anu muxolu no lia ꞌo mo mimii latala no lia ꞌo ne, muxali noxousi. Ia ta mitema no lia ꞌo itongonu uasi. 11 Muneꞌe no tualasou manina, la ta tema tualasou mipianu. 12 Ia, aneꞌi ane ipianu uasi, imulaxu taneꞌi no anu ualasou, la Lataua umoxoꞌa lexe aneꞌi Lataua ta ꞌolu. 13  * Ioa 2:11; 3:3-6; 1Pi 1:23Aneꞌi ixali no anu masaxa noxou Lataua, ia no anu voteꞌi sou taulaꞌi mo xavutala noxou itema vile mo masaxa noxou itema vile uasi. Aneꞌi ixali no anu masaxa noxou Latauasi.
14  * Pil 2:7Ioxe, Lataua mupalusou vaikala ane ne muneꞌe no lia ꞌo, la Anu muxali itema mo muxolu no taiinenge. Mo, nenge temaisou xavi noxou ꞌOlu vilesisi molu noxou Momu ne. Itema ane ne, Anu itema sou alauna mo Anu uvikala la uvikala maninasi. 15 La sou Ioanesi muꞌava mulai noxiꞌa ta mitema sou uvikala lamana aloxo ꞌo, “Eni eaꞌalomengixu itema ano ꞌo tei lexe itema ane uxali iliꞌi noxilo ne, Anu tila noxilo xo Anu muxolu tei.” 16 Anu muꞌanaꞌana no anu alauna manina, la sou Anu muꞌitalonu alauna noxou muneꞌe noxinge utotomu. 17  * Mul 34:28; Rom 6:14Xo Lataua mulosou Mosesi lapuloto noxou, ia alauna mo vaikala manina noxou Lataua ne, muxali manina noxou Iesu Kalisito. 18  * Mul 33:20; Ioa 6:46; 1Ti 6:16Itema vile umaisou Lataua iou uasi. Ia itema vilesisi Anu muxolu noxou Momu paꞌumolu nesi, mupalaꞌalixu Momu noxiꞌa ta mitema. Anu Lataua ꞌOlu mo Anu Lataua kalumo.
Ioanesi Anu Itema sou Uꞌulosiꞌa ta Mitema Muaꞌaloxu Vaikala Manina
(Mat 3:1-12; Mak 1:1-8; Luk 3:15-17)
19 Ioxe, iliꞌi la ta tatila noxiꞌa ta Iutaia ne Ielusalemu mipalusiꞌa ta mitema sou iꞌelaxaꞌa ta sipsip iloꞌa ta Levi mineꞌe mitaliꞌisou Ioanesi lexe anu ꞌenaꞌei. 20 Anu utalumeiou vaikala vile uasi, anu muvikalaneꞌi lamana aloxo ꞌo, “Eni Kalisito uasi.” 21  * Lap 18:15, 18; Mat 11:14La sou aneꞌi mitaliꞌisou la, “Ia nini ꞌenaꞌei manina? Nini Eliasi?” Anu mukolineꞌi aloxo ꞌo, “Uasi.” La aneꞌi mitaliꞌisou la, “Nini itema sou palomatana e miaꞌaloxene tatei ano?” Anu muvikalaneꞌi lexe, “Eni uasi.” 22 La sou aneꞌi mitaliꞌisou la lexe, “Ia nini ꞌenaꞌei manina? Navikalanexi lamana mo sou nexi talivu la talai tavikalaneꞌi aneꞌi ane mipalusixe teneꞌe ꞌo lexe nini ꞌenaꞌei manina.” 23  * Ais 40:3Anu mukolineꞌi, la muvikala loxo Aisaia e itema sou palomatana mulemolu tatei aloxo ꞌo, “Eni loxo itema vile uꞌavaꞌava no xalee lia vitanisi. Anu uꞌava aloxo ꞌo, ‘Ngamomosou voteꞌisou IAUE.’ ” 24 Ta Palisaio seꞌi mitutulu no taiineꞌi ta mitema ne, 25 mitaliꞌisou aloxo ꞌo, “Nini nevikala lexe nini Kalisito xe nini Eliasi mo itema sou palomatana ane ne uasi. Ia tavaꞌu loxovaa la nini naꞌulosiꞌa ta mitema ꞌo?” 26 La Ioanesi mukolineꞌi aloxo ꞌo, “Eni aꞌulosiꞌa ta mitema no anu lexasi. Ia itema vile a ututulu no taiingengi ne, ia ngingi ngalavusou uasi. 27  * Ioa 1:15Anu itema ane uneꞌe iliꞌi noxilo ne, eni amomomo sou alulusou lamotasou siovexu tavaꞌu uasi, xo Anu mutila musuku.” 28 Tei la Ioanesi muꞌuloꞌulosiꞌa ta mitema no xalee vile no tuala ne Vetania no xaleenu lexa Ioridani. Ia anu musuku muneꞌe ne Vetania la mimii ane ne, muxali ane.
Iesu Anu Sipsip ꞌOlu Noxou Lataua
29  * Ais 53:6-7; 1Pi 1:18-19No voxo vile iliꞌi, la Ioanesi mumaisou Iesu mumuamuaꞌi muneꞌe noxou, la muvikalaneꞌi aloxo ꞌo, “Ngamaisou ane! Anu Sipsip ꞌOlu noxou Lataua e uneꞌe sou ulivulixaꞌa ta mitema ineꞌe ꞌalai noxou Lataua xo aneꞌi mixolu vaꞌaxu! 30  * Ioa 1:15Itema e eni elemolu tei lexe, ‘Anu uneꞌe iliꞌi noxilo ne, Anu mutila musuku noxilo. Xo Anu muxolu tei.’ Anu ano. 31 Eni kalumo alavusou itema ane ne uasi. Ia eni eneꞌe sou aꞌulosiꞌa ta Isilaeli no anu lexa sou aneꞌi ilavusou lexe itema ane ne Anu ꞌenaꞌei.” 32  * Mat 3:16La sou Ioanesi muvikala lamana aloxo ꞌo, “Eni emaisou Uleenu Tavuna molu no opo loxotolo muluꞌe loxo kuau vile la muxolu noxou. 33 Eni kalumo alavusou itema ane ne uasi. Ia anu ane mupalusilo sou aꞌulosiꞌa ta mitema no anu lexa muvikalaleli lexe, ‘Namaisou itema ane Uleenu Tavuna muluꞌe muxolu noxou, la Anu ane sou uꞌulosiꞌa ta mitema no anu Uleenu Tavuna ane.’ 34  * Mat 3:17Eni emaisou, la sou eni apalaꞌalixu lexe Anu Lataua ꞌOlu.”
Tatalu Mixali ta Molomolou Iesu
35 No voxo vile iliꞌi, la Ioanesi iloꞌa ta molomolou ta tamei itutulu, 36  * Ioa 1:29ia anu iou mulai la mumaisou Iesu umuamuaꞌi ulalai. La sou muvikalaneꞌi aloxo ꞌo, “Ngamaisou Sipsip ꞌOlu noxou Lataua! Anu ane!” 37 Aneꞌi ilou milomusou aloxo ne, la aneꞌi ilou miavuti sou mimulinu Iesu. 38 Iesu iou mulivu la mumaisiꞌa ilou a imulinu ineneꞌe, la sou mutaliꞌisiꞌa ilou aloxo ꞌo, “Ngongou ngemasaxau maꞌi?” La aneꞌi mivikalanu lexe, “Rabi (vaikala ane ne, laaxu lexe anu itema sou ulosiꞌa ta mitema lavulavu.) Nini nexoxolu no tani anevaa?” 39 Iesu mukolineꞌi ilou aloxo ꞌo, “Nganeꞌe mo ngamaisou.” La sou Anu muoleneꞌi sou milai mimaisou tani e Anu muxolu no anu. Mixali no tani, la aso iou tamiꞌa no ꞌoloꞌolovoxo. No voxo ane ne, la aneꞌi iloꞌa mixolu. 40  * Mat 4:18-20Vile noxiꞌa e mulomusou vaikala noxou Ioanesi la mumulinu Iesu ne, ualasou lexe Andeleasi, anu Saimoni Pita vimou. 41 Anu mulutu la anu uꞌoxonu mii vile uasi, anu muavuti la mulai mukamulinu vimou Saimoni sou muvikalanu lexe nexi texalisou Mesaia (Anu Kalisito). 42  * Mat 16:18La sou anu muolenu Saimoni sou mulai noxou Iesu. Iesu mumaisou la muvikalanu aloxo ꞌo, “Saimoni. Nini Ioanesi ꞌolu. Vaimomo ꞌo, la eni amoxoꞌine lexe nini Kepasi (uala ane ne, ixiunu la uxali lexe Pita).”
Iesu Muꞌavaliꞌa Pilipi Ilou Natanaeli
43 No voxo vile iliꞌi, la Iesu muavuti sou ulai ne Xalilaia, la Anu muxalisou Pilipi. Mumaisou Pilipi la muvikalanu aloxo ꞌo, “Naneꞌe mo namulileli.” 44 Pilipi iloꞌa Andeleasi ilou Pita tualasiꞌa vilesisi ne Vetesaida. 45  * Lap 18:18; Ais 7:14; 9:6; Iel 23:5; Ese 34:23Pilipi mulutu mulai la muxalisou Natanaeli la muvikalanu aloxo ꞌo, “Nexi texalisou itema ane Mosesi muaꞌaloxu no nano no lavuku sou lapuloto mo ta mitema sou palomatana miaꞌaloxu no anu lavuku noxiꞌa kalumo. Anu Iesu, Iosepu ꞌolu. Anu sou tuala ne Nasaleti.” 46 Natanaeli muavuti la muvikalanu lexe, “Loxovaa mii vile laixe uxali no tuala ne Nasaleti? Uasisi manina.” Ia Pilipi muvikalanu aloxo ꞌo, “Naneꞌe mo mene namaisou.” 47 Iesu mumaisou Natanaeli uneneꞌe la muvikalaneꞌi lexe, “Ngamaisou! Itema ne, anusie Isilaeli manina. Anu ulavusou ukalavoi uasi.” 48 La sou Natanaeli muavuti la mutaliꞌisou Iesu aloxo ꞌo, “Nini nelavusilo a loxovaa?” La sou Iesu mukolinu aloxo ꞌo, “No mine Pilipi uꞌavaline uao, la eni emaisine nexoxolu no ovu lovo tavaꞌu.” 49  * Mat 14:33; 16:16; Mak 3:11Natanaeli mupalaꞌalixu lexe, “Rabi. Nini Lataua ꞌOlu mo nini tatananu tuala tila ne Isilaeli.” 50 La Iesu mukolinu vaikala noxou aloxo ꞌo, “Nini nemulaxu taneni noxilo xo eni emaisine nexoxolu no ovu lovo tavaꞌu. Ia mii ane eni emaisine ne, anu mii kituꞌasi. Io iliꞌi la sou nini namaisou xaixai noxilo seꞌi ta tatila. 51  * Tav 28:12Eni avikalangengi manina musuku. Iliꞌi la ngamaisou opo loxotolo ukisi la ngamaisiꞌa ta angelo noxou Lataua iluluꞌe noxou Itema ꞌOlu xe itetelai.”

*1:1-2: Ioa 17:5; 1Ioa 1:1-2; Pal 19:13

*1:3: 1Ko 8:6; Kol 1:16-17; Eva 1:2

*1:4: Ioa 5:26

*1:5: Ioa 3:19

*1:6: Mat 3:1; Luk 1:13-17, 76

*1:9: Ioa 8:12

*1:13: Ioa 2:11; 3:3-6; 1Pi 1:23

*1:14: Pil 2:7

*1:17: Mul 34:28; Rom 6:14

*1:18: Mul 33:20; Ioa 6:46; 1Ti 6:16

*1:21: Lap 18:15, 18; Mat 11:14

*1:23: Ais 40:3

*1:27: Ioa 1:15

*1:29: Ais 53:6-7; 1Pi 1:18-19

*1:30: Ioa 1:15

*1:32: Mat 3:16

*1:34: Mat 3:17

*1:36: Ioa 1:29

*1:40: Mat 4:18-20

*1:42: Mat 16:18

*1:45: Lap 18:18; Ais 7:14; 9:6; Iel 23:5; Ese 34:23

*1:49: Mat 14:33; 16:16; Mak 3:11

*1:51: Tav 28:12