AꞌALO LAIXE NOXOU IESU KALISITO ANE
MATAIO
MUKAUKAVUNU
Vaikala lamana
Aꞌalo laixe e Mataio mukakavunu ꞌo ne anu muaꞌaloxu aꞌalo laixe sou Iesu lexe Anu itema nesi ane Lataua musakiinu vaikalasou tei lexe Anu uneꞌe sou upamaulineꞌi ta mitema. Noxousi la sou Lataua mumomosou vaikala noxou e musakiinu noxiꞌa ta mitema tatei e iloꞌa oponeꞌi vilesisi no anu. Aꞌalo laixe ane ꞌo ne ta Iutaia e Iesu mupaa noxiꞌa mo iloꞌa mixolusi naꞌa uasi. Aꞌalo laixe ane ꞌo ne anu noxiꞌa ta mitema no xalexalee tuatuala ukalusi kalumo.
No anu aꞌalo noxou Mataio la muaꞌalo laixe manina. Xo anu musokou aꞌalo noxou no mine Iesu nenu mivoꞌonu xe mukalu, la muaꞌaloxu Iesu no mine Ioanesi muꞌulusou xe mukalu la mulai no anu tovotovo. Xe mukalu la muaꞌaloxu Iesu no mine musokou xaixai noxou sou muaꞌaloxu aꞌalo laixe mo mulosiꞌa ta mitema lavulavu no anu vaikala noxou Lataua xe mupamaulineꞌi ta mitema ane pipiena iouiou muꞌoxoneꞌi. Anu musokou xaixai noxou ne Xalilaia, xe mukala la muaꞌaloxu muamuaꞌi noxou sou mulai ne Ielusalemu. Xe muaꞌaloxu mii maꞌia Iesu muꞌoxonu no anu voxo kalukaluxusou mulai muxali no mine mivau mo mililixu teitexi no ovu valautu xe tulu noxou.
Aꞌalo laixe noxou Mataio ꞌo ne, anu mulosinge lamana lexe Iesu anu Tisa tila vile, mo Anu munoꞌu xavi sou uvulaxu lapuloto noxou Lataua laaxu laixe, xe muaꞌaloxu saxisaxilaꞌu noxou Lataua. No nano no anu lavuku noxou Mataio ꞌo, la mumilaꞌa aꞌalo noxou muxali laꞌoluxu taꞌuve.
(1) Aꞌalo noxou Iesu teitexi no laxaꞌilu e Iesu muvivikala no anu ꞌiliꞌilixo ilou xaixai mo ꞌiliꞌilixo maꞌia ta mitema iꞌoxonu la ixalisou mauli no anu iliꞌi teitexi no opo loxotolo. (Mautunu 5-7) (2) Ta tameisou muaꞌaloxu Iesu sou mupelaꞌa ta molomolo noxou no anu xaixai noxiꞌa, xe mii maꞌia iꞌoxonu no mine ilai iaꞌaloxu aꞌalo laixe ulai noxiꞌa moseꞌi. (Mautunu 10) (3) Tatalusou, la muaꞌaloxu vaikala latilovo sou saxisaxilaꞌu noxou Lataua teitexi no opo loxotolo. (Mautunu 13) (4) Tamiꞌasou ne muaꞌaloxu Iesu mululusou lamana xaixai sou molomolo noxou Iesu, xe uxaxaisou a loxovaa. (Mautunu 18) (5) Xe taꞌuvesou la aꞌalosou Iesu muaꞌalo no anu mii maꞌia uxali no anu voxo kaluxusou xe mii maꞌia ane uxali iliꞌi no anu saxisaxilaꞌu noxou Lataua teitexi no opo loxototo. (Mautunu 24-25)
Aꞌalo muai no nano aloxo ꞌo
Nana sou Iesu xe aꞌalosou Iesu Kalisito nenu mivoꞌonu 1:1–2:23
Aꞌalosou xaixai noxou Ioanesi itema sou uꞌulosiꞌa ta mitema 3:1-12
Iesu muꞌulo xe mukalu la Satani mutovonu 3:13–4:11
Xaixai noxou Iesu ne Xalilaia 4:12–18:35
Iesu mulutu ne Xalilaia sou mulai ne Ielusalemu 19:1–20:34
Voxo kalukaluxusou noxou Iesu xe mii maꞌia muxali no ale ne Ielusalemu 21:1–27:66
Iesu mutulu no anu soli xe mupalapalaꞌa 28:1-20
1
Nana sou Iesu
(Luk 3:23-38)
* Tav 22:18; 1Aꞌa 17:11Vaikala ane ne anu siꞌa Iesu Kalisito tamutuꞌovuxu. Iesu ne Anu noxou Deviti ꞌilusunu, xe Deviti ne anu Avalaamu ꞌilusunu. Xe Avalaamu ꞌolu ane Aisaki, xe Aisaki ꞌolu ane Iakovo, xe Iakovo ꞌolu ane Iuta iloꞌa ta vimovimou, * Tav 38:29-30; Rut 4:18-22xe Iuta ta ꞌolu ane Peresi ilou Sela, neniꞌa ne Tamari, xe Peresi ꞌolu ane Esuloni xe Esuloni ꞌolu ane Ramu, xe Ramu ꞌolu ane Aminadavu, xe Aminadavu ꞌolu ane Nasoni, xe Nasoni ꞌolu ane Solomoni, * Rut 4:13-17xe Solomoni ꞌolu ane Boasi xe nenu ane Reebu xe Boasi ꞌolu ane Oveti, xe nenu ane Rutu, xe Oveti ꞌolu ane Iesi xe Iesi ne momu ane Tatananu tuala Deviti. * 2Sa 12:24Xe Tatananu tuala Deviti ne ꞌolu ane Solomoni, Solomoni nenu ne tei la Ulia semau, xe Solomoni ꞌolu ane Rovoamu la Rovoamu ꞌolu ane Avia, Avia ꞌolu ane Asa. Xe Asa ꞌolu ane Iosaveti, xe Iosaveti ne ꞌolu Iolamu, xe Iolamu ꞌolu ane Usia, xe Usia ne ꞌolu ane Iotamu, xe Iotamu ꞌolu ane Axasi, xe Axasi ꞌolu ane Esekia. 10 Xe Esekia ꞌolu ane Manase, xe Manase ꞌolu ane Amoni, xe Amoni ꞌolu ane Iosia, 11  * 2Ta 22:1–24:20; 2Aꞌa 36:10; Iel 27:20Xe Iosia ꞌolu ane Ekonia, xe Ekonia iloꞌa ta vimovimou. No voxo ane ne aneꞌi milai mixolu no paxa no tani sou navunavu no tuala tila ne Vaviloni.
12  * Esi 3:2Iliꞌi no voxo ane ta Isilaeli milai mixolu no tani sou navunavu ne Vaviloni, la Ekonia ꞌolu ane Salatieli xe Salatieli ꞌolu ane Seluvaveli. 13 Xe Seluvaveli ꞌolu ane Aviuti, xe Aviuti ne ꞌolu ane Eliakimu, xe Eliakimu ꞌolu ane Asolu, 14 xe Asolu ꞌolu ane Sadoku, xe Sadoku ne ꞌolu ane Akimu la Akimu ꞌolu ane Eliutu, 15 xe Eliutu ꞌolu ane Eliasa xe Eliasa ꞌolu ane Matani, ia Matani ne ꞌolu ane Iakovo, 16 Xe Iakovo ne ꞌolu ane Iosepu, xe Iosepu anu Malia mulue, la sou Malia mivoꞌonu Iesu la aneꞌi mimoxoꞌu lexe anu Kalisito.
17 La sou Avalaamu ta ꞌilusulusunu musoko noxou anu Avalaamu muneꞌe muxali noxou Deviti la aneꞌi mixali loxo mavulovexa mo mulelia tamiꞌa, mo musoko noxou Deviti mune muxali no voxo aneꞌi milai mixolu no paxa no tani sou navunavu no tuala tila ne Vaviloni anu mavulovexa mo mulelia tamiꞌa. Xe musoko no voxo ane aneꞌi milai mixolu no tanisou navunavu ne Vaviloni muneꞌe muxali no voxo e Kalisito muxali ne la muxali loxo mavulovexa mo mulelia tamiꞌa.
Malia Mivoꞌonu Iesu
(Luk 2:1-7)
18  * Luk 1:27, 35Aꞌalosou Iesu kalisito muxali aloxo. Nenu Malia aneꞌi misosovosie mukalu sou iuluxu Iosepu ia ilou ixolu ipita uao, ia aneꞌi mimaisie lexe ane opoone. Keakea ane ne no anu xavi noxou Uleenu Tavuna la mumulaxu no nano no opoone. 19 Mulue Iosepu anu itema mulapu, anu mulomu lexe Malia opoone la anu lexe usuane ia anu umasaxa lexe upamaela ne Malia no ieꞌi ta mitema uasi, la sou anu umasaxa lexe usuꞌane seꞌisisi. 20 Iosepu uxoo uxavuxavutala la muai pipiena lexe angelo noxou tila muxali noxou la sou muvikalanu aloxo ꞌo. “Iosepu, nini Deviti ꞌilusunu, naꞌume mamu nanoꞌe Malia loxo semameni. Nalomu! Molomolo ane muxolu no opoone ne muxali no anu xavi noxou Ulee Tavunasi. 21  * Luk 1:31; 2:21Ane ivoꞌonu ꞌilie mulu, la nalemolu ualasou lexe Iesu xo Anu sou uxexeenu ꞌiliꞌilixo masua noxiꞌa ta mitema mo ulivunoxaꞌa.” 22 Mimii tavuꞌalo ꞌo, muxali sou umomosou vaikala vile tila muꞌoxonu no anaxaꞌa ta mitemasou palomatana. 23  * Ais 7:14Muvikala aloxo ꞌo. “Nalomu, sema vile ilou mulu iai ipita uao, ia ane opoone la ivoꞌonu molomolo mulu vile la ngingi ngamoxoꞌu ualasou lexe Enmanueli.” (Uala ne laaxu lexe Lataua uxolu nonginge.) 24 No voxo ane Iosepu mutulu la anu mulai muꞌoxonu aloxo angelo noxou Tila muvikala nuxu lexe anu unoꞌe semau. 25  * Luk 2:21Ia ilou iai uasi, mulai muxali no voxo e Malia mivoꞌonu ꞌilie no anu, la sou mumoxoꞌu ualasou lexe Iesu.

*1:1: Tav 22:18; 1Aꞌa 17:11

*1:3: Tav 38:29-30; Rut 4:18-22

*1:5: Rut 4:13-17

*1:6: 2Sa 12:24

*1:11: 2Ta 22:1–24:20; 2Aꞌa 36:10; Iel 27:20

*1:12: Esi 3:2

*1:18: Luk 1:27, 35

*1:21: Luk 1:31; 2:21

*1:23: Ais 7:14

*1:25: Luk 2:21