Sunbin-Got em Kitakamin Weng 1 Tesalonaika 1
Fut kale Fol em
Emisik Fut Tesalonaika
Abiw Mutuk Fian em Sios Kawtiw ilo Dabalayemse Fut kale.
1
Fol o, Sailas o, Timoti o, alemsal nu Tesalonaika abiw mutuk fian em sios kunum waneng Sunbin-Got Aatim so, Kamok Fian Yesus Kulais so fewtokoko, alakabiliw kunum waneng yulo “Yukal biliw yako!”, yanguw te. Sunbin-Got em ibolow folok so, menew ibolow so, alik alik be yu so boke te!* Kalan Kunum 17:1-9
Im Fein Ibolow Ken Ati em Weng te.
2-3 Num Sunbin-Got eso weng bakabuluw ding dim bakate, nu alik alik yom ibolow fukuneko, yom Yesus elo “Fein!”, dangakabiliw ibolow em fein dem gilakabe kukuw so, yom mali ilo ibolow fian kelew kelew aluwbamin fian beso, yom kalfongeko, kalaing kuw kesomi, Kamok Fian Yesus Kulais em ding feneko, alakabiliw kukuw beso, alik alik kukuw ken beem dulum elote Aatim num Sunbin-Got elo diwkuw diwkuw “Weso! Seyo!”, dangakabuluw te.* 1 Kolin 13:13; Kolosi 1:4-6 Dangeko, fein kal keluwete: Sunbin-Got e nakunum kumel yulo ibolow fian duyemsomi, yulo akalem wiin so amkoko, kuluse te. Nimtew angom? Yom Sunbin-Got em Weng Kal Ken Ati beem kilisiliw ding dim kabalak e, yu fein kiliko, atemiwete: Num yangkabuluw weng be sak weng kuw bate! Kate, weng be kitil so, auk so, weng kesomi, Sunbin-Finik e auk so, kitil so, eisneng mak weng beso amkoko, kolei, yukalem ibolow fukunin be weng beso fewtokoko, fatmolei, nu atemsuluw kasike. Atemsomeluwi, yu nukalem yulo dokoyemkabuluw kukuw bakati kilele atemeko, kal kesiliw te.* 1 Kolin 2:4-5
Keko beli, nuso, Kamok Fian eso, alik alik nu yom yamtolo unemin kunum kekabuluw kasike, maka im yulo ilum sakik duyembiliw ding dim bakate, Sunbin-Finik e yulo kakat duyembelei, yukati numdiw keko, Sunbin-Got em fein weng be kilele aluwkabiliw te.* Kalan Kunum 17:5-9 Aluwkabiliw kasike, yukati Masedonia aneng fian so, Akaia aneng fian so, mali ka biliw Yesus em kunum waneng alik alik im yomisik yamtolo unemin kunum waneng kekabiliw te. Feinka! Kamok Fian em weng be yom dim talfutsomi, Masedonia aneng so, Akaia aneng so, aneng biim abiw abiw angom kalo uneko, alik alik i yom Sunbin-Got elo “Fein!”, dangakabiliw ibolow be fein atin kuw kal kebiliw te. Kaneko kasike, nu yulo beem dulum elote weng makso nam bokoyembuw te. Nimtew angom? Ikalem ete kuw yom nulo kukuyemkameliw kukuw ken beem sang be de anung anung kebomi, bokolew bokolew kekabiliw kasike. Weng sang be kanekote: Nukalem yom fukun mewso talsuluw ding dim bakate, yu nulo kalfongyemeko, dokoyemsomi, num yulo yangenaluw weng be fein kili aluweko, yukalem dasuw-got ilo ibiku koyemeko, sunsun finik so bin fein Sunbin-Got em mit teleko, em weng afak kunum waneng ke alakabiliw bakate. 10 Alakabiliw kasike kame, yu akalem Sunbin-Min beem abiil tikin elote toloke ding dim fenkabiliw te. Feinka! Sunbin-Min Yesus be num Sunbin-Got em kawtiw alik alik nulo kaisuw keyemomin deiw be bul gewsi belei, okileweko, kasi kolewse te.

*1:1: Kalan Kunum 17:1-9

*1:2-3: 1 Kolin 13:13; Kolosi 1:4-6

*1:5: 1 Kolin 2:4-5

*1:6: Kalan Kunum 17:5-9