Fut kale Fol em
Emisik Fut Timoti
elo Dabalalewse Fut kale.
1
Ku kilila! Sunbin-Got e kawin dim kale em kawtiw num kuankemin deiw bul gewsi belei, okileweko, akalem
mit finik so deiw kel mo koyemse Sunbin-Got beso, Kulais Yesus kunum waneng nulo kalaing kuw keyemeko,
Sunbin-Got em ding fenomin ibolow duyembe kunum beso, yelim bi Fol nelo gaanemeko, weng kitil weng mak
bokonemomeliw: “Ku num kalan kunum keyemew kai!”, nangsiliw kunum kebi te.
Aatim Sunbin-Got so, nukalem Kamok Fian Kulais Yesus so, yelim bi kulo ibolow folok so, ibolow kinkin
so, ibolow menew so be fein kukukemkabiliw tako!-
1:1-2
Kalan Kunum 16:1-3; Taitus 1:4
Kilelbi Bin em Weng te.
3 Sua e, nem Efesus abiw mutuk fian kolewko, Masedonia aneng fian elo unomin ding dim bakate, ne kulo kitil
weng mak bokokemomeli: “Ku Efesus abiw mutuk fian ka bomelewi, mali kawtiw im dolon banim keko, dasuw
weng kukuyemkabiliw kawtiw im weng ‘Yu kimi angeko, kolina!’, yangbolewka!”, kangsi te.
4 Nimtew angom? Kawtiw bi ikalem ibolow fukunin kuw gelewsomi, sua sua em kanese kunum waneng nu akokow
so kebuluw em sang so, awalik kumel im muluwel dow em telbi telbi em sang tiaktiak so, alik beem sang
bete kuw kitil kuw aluwko, beem ibolow kuw fukuneko, mali ilo kukuyemkabiliw kasike. Kate, sakok sang
be mali kunum waneng im ibolow fukunin e silimoyemeko, teifulu koyemei, im fein ibolow e kitil keyeminba
kelei, im Sunbin-Got em finik so deiw kakamin akal kilele dokoyeminba kekabe te.-
1:4
1 Timoti 4:7; Taitus 1:14
5 Kate, ku kilele kilila! Mali kawtiw ilo fein kukuyemin em aluwbamin em dem e kanekote:
Mak e, sen so banim keko, ibolow mutuk fian dulew dulew beem kukuw e fian kemin e,
mak e, sen so banim keko, Sunbin-Got so ibolow ki makmak kebin beem kukuw e fian kemin e,
mak e, fein ibolow keko, funum fukunin mak banim kebin gelewemin beem kukuw e fian kemin ete kale.
6 Kate, mali kanebiliw kawtiw bi kilele dem so kukuyemin deiw be kolewsomi, sakok kukuyemin weng beem deiw
ete kuw gelewkabiliw te.
7 Gelewko, ibolow fukunomeliw: “Nu kawtiw mutuk im kiin dim e sawa weng kale kukuyemuma!”, angakabiliw
kate, ikalem ibolow fukunin so, mali ilo “Be atin kuw fein weng te!”, angeko, bakayembiliw kukuyemin
beso, alew beem mongom e i atin kuw akokow kebomeliw ete kale.
8 Nakunum o! Nu Sunbin-Got em kukuyemin sawa weng e teing bokoko, beem mongom e kilele atemeko, aluw tewe,
kukuyemin sawa be dem ken ati kuw gilaloke te.-
1:8
Ulom 7:12,16
9 Feinka! Sunbin-Got e akalem kukuyemin sawa be kiol kuw kukuw so kunum waneng im dulum dukulinba kese
kate, ibolow sili sili nam kekabiliw kawtiw im dim ete dukuse te. Sili sili kukuw gelewkabiliw kawtiw
biim kukuw e kanekote:
Sawa weng elo sakok kemin e,
sakalaw keko, weng bo bo kemin e,
“Sunbin-Got e banim te.”, angeko, beem deiw kakamin e,
sili sili nam kemin e,
Sunbin-Got em eisneng angomi, “Sak kawtiw im dulum ayem te!”, angbin eisneng mak “Banim te!”, angeko,
elo sakok kemin e,
auk so alew so ilo yemin e,
kawtiw yemin e,
kunum ikalem osow kemin e,
mali kawtiw ilo yakut keko, wesomi, im dulum on kisol kulamin e,
dasuw kemin e,
fawtuk ayem weng okiyem kemin e,
mali kukuw makso, fein kiol kukuyemin beem maka kelewbin em kukuw bete kale.
11 Wa kukuw be dawsulkabuluw Sunbin-Got em auk so kitil so Weng Kal Ken Ati be e nelo dunemeko, “Kilele
aluwko, bakayem tem bakayem tem de una!”, nangse Weng beelo maka kelewkabe te.
Fol em Kanese Sang te.
12 Ne nukalem Kamok Fian Kulais Yesus elo “Weso! Seyo!”, dangbi te. Nimtew angom? E nelo diw netemeko, “Fein
kukuw so kunum kute te!”, nangeko, wiin so kitil so dunemsomi, akalem aluwbamin e nem teing dim elo dunemse
kasike.-
1:12
Kalan Kunum 9:15; 1 Kolin 15:9-10; Galesia 1:15-16
13 Feinka! Sua e, ne Sunbin-Got elo weng milewsomi, akalem angin ilo yen feiwsomi, silikmoyem keyemali kunum
kebi kate, ne nem kanebi beem mongom ete akokow kebomi, Yesus Kulais beelo ibolow “Fein!”, danginba kunum
kekabi kasike, Sunbin-Got e nelo kinkin ibolow kenemse te.-
1:13
Kalan Kunum 8:3; 9:1-5
14 Kenemei, nukalem Kamok Fian em ibolow folok e fian kuw keko, nem mutuk kel Kulais Yesus elo fein ibolow
so, eso mali kawtiw iso ibolow dulew dulew kukuw so, alew kukuw be nem dim atin kuw weneko, gaktak bakilewse
te.
15 Fein! Sua e, nem sili sili nam kukuw e atin kuw fian kelei, ne wa kawtiw im kak kunum atew kebisi te.
Kate, mali im angbiliw weng kale nem dim e atin kuw fein kele kasike, alik nu elo kilele aluwboluwka!
I bokolomeliw: “Kulais Yesus e kawin kaleelo teleko, sili sili nam deiw gelewkabuluw kunum waneng num
kuankemin deiw bul gewsi belei, okileweko, Sunbin-Got em mit finik so deiw kel mo koyemomin telse te.”,
angbiliw te.-
1:15
Iluk 19:10
16 Angakabiliw weng be nem dulum akati fein dem gilase te. Gilalei, ne kunum waneng Yesus elo “Fein!”, dangeko,
sunsun finik so bin kulabiliw kunum waneng im yamtolo unemin kunum kebi te. Nimtew angom? I nem sili
sili nam kukuw gelewsi be fein atemeko, “Kulais Yesus e mamtel kunum beelo kinkin ibolow fian mak dulewse
te!”, angeko, ikalem dim ikati kalaing kuw keko, ibolow menew kuw kulukabiliw kasike.
Sunbin-Got makmak be kawtiw nu kiin so ateminba kekabuluw Sunbin-Got diwkuw diwkuw kuaninba kesomi, alakabe
te.
Nu elo Dawsulko, diwkuw diwkuw em wiin daolewuma! Feinka!
Iti Kilelbi Bin em Weng Mak so te.
18-19 Timoti, nakalem min kutaka! Sua e, mali Sunbin-Got em bontem dim bakamin kunum mak em bokokemsiliw weng
em ki weng kame akati ne kulo iti bakakembi te. Ku fein kiol kukuyemin be on balam atew minggiko, kitil
mosomi, fein ibolow kebomi, sen so banim keko, Sunbin-Got so ibolow ki makmak kelomelew kano, mali im
dasuw kukuyembiliw weng be de mit da koyemolewka! Kate ku kilelbi bolewka! Mali kawtiw i sen so banim
keko, Sunbin-Got so ibolow ki makmak kemin em kukuw kolewsiliw kasike, im fein ibolow akati ok sen dem
so kuminko, kawtol kekabe emdiw kawtolse te.
20 Ku Kimeneus so Aleksandel so aso im kanesiliw be ibolow fukuna! Aso i beemdiw kesomi, Sunbin-Got elo
weng milewsiliw angomi, ne ilo Seten-Ataanim em teing dim da koyemsi kasike, im kulusiliw ilum be ilo
kilele kukuyemei, i Sunbin-Got elo iti nam weng milewiw te.-
1:20
1 Kolin 5:5; 2 Timoti 4:14-15