11
Babiroonnia máqusasaa kísaaqa máaqa usakóo úfafa.
Indaarú nammári taikóo kámuqoo aiqáma maqásaa qáraasa moodáa úfa faqáasa máridaqa moodáa úfa kaí qímariqau. Aiqáma áinainara moodáa áuqu kaí rée maríqau. Misá súani óosana qáannai óonuree anirée iqá níniufaqa Babiroonia áfaasa paqúrimmasee miqóo máriqau.
Misá miqóo máridaqa maaqí qímasee narí qímami narí qímami qídaqa qiqau. Ánifaqa ínnisáimbaqa maqá qumáreeqa atakúseeqa idára sáananoo afeekaikámma fínaqa minánnai máaqa usakáa. Maasá miqímmáseeqa áaku aakummáséeqa koorootáqa miná apootaanakí akusáananoo atukaráani. Miqi qímaseeqa maqee ínnisaimbaqa fúka maqúsa indufúsee kísaaqa máaqa áuqiqa óoru fíinaqa innaarúna amana káì óoruraanaura. Miqímmasee maasa dúqu faqáasa moodáanaki máridaqa sía aiqáma máqa máaqaki dáraanianaura. Miqí qímaseeqa doo miqímmiqau.
Mi maqusána áuquseeqa kísaaqa máaqa faqa usakásoofanóo Karaambáiqa qumu níndafeenoo maaqí qinau. Maqeé maasáuqa moodáa máqannaasa máridaqa moodáa ufa qídaqa. Misá nárì áuqararee qiá áinainna óosana áraidaqa. Qúsasaa misá nárì nídimari ainainná áuqeefaranoo. Dóo ánifaqa ínni sáimbaqa óoquree misá ufa fúrufaramma nímaqasaanaqa sía narí ufa narí ufa íriaqa.
Ánutufa miqí qímasee misá ufa fúrufaramma nímaqasoofaqá misá mi maqusána áuquanee quná minníseeqa maqa máaqaki daráaniqau. Mi maqusána áuqu Babiroonnia fée qímariqau. Miqóo karaambáiqa fánnoo misá ufa furufarammá nímaqóonara miqí qímasee áuqu raqau. Miqóo máruna Karaambáiqa fúrufáramma nímaqasoofaqa aiqáma máqa máaqaki daráaniqau.
Seemmana áiku ásauku núqu.
(1 Stori 1:24-27)
10 Séemmana saaqari kambíqoosa maaqímmiqa máriqau. Nammári áufirafa taiká fufanoo miqóoqari qaara aukuana áiqarama fufanoo Seemmafa 100 aukuana maraséenoo akoonaiqí Arafasadana máqanau. 11 Arafasadana máqooqooqari Séemafa 500 aukuana márinoo akoonaiqí mánaaqa moómoo máqanau.
12 Arafasadafa 35 áukuana maraséenoo narí faiqì Seeraana máqanau. 13 Seeraana máqooqooqari Arafasadafa 403 áukuana maraséenoo akoonaíqi mánaaqa moómoo máqanau.
14 Seeraafa 30 áukuana maraséenoo narí faiqì Eebeerana máqanau. 15 Eebeerana máqooqooqari Seeraafa 403 áukuana maraséenoo akoonaiqí mánaaqa moómoo máqanau.
16 Eebeerafa 34 áukuana maraséenoo narí faiqì Peereekana máqanau. 17 Peereekana máqooqooqari Eebeerafa 430 áukuana maraséenoo akoonaiqí mánaaqa moómoo máqanau.
18 Peereekafa 30 áukuana maraséenoo narí faiqì Réeuna máqanau. 19 Réeuna máqooqooqari Peereekafa 209 áukuana maraséenoo akoonaiqí mánaaqa moómoo máqanau.
20 Réeufa 32 áukuana maraséenoo narí faiqì Seerukana máqanau. 21 Seerukana máqooqooqari Réeufa 207 áukuana maraséenoo akoonaiqí mánaaqa moómoo máqanau.
22 Seerukafa 30 áukuana maraséenoo narí faiqì Náqoorana máqanau. 23 Náqoorana máqooqooqari Seerukafa 200 áukuana maraséenoo akoonaiqí mánaaqa moómoo máqanau.
24 Náqoorafa 29 áukuana maraséenoo narí faiqì Teeraana máqanau. 25 Teeraana máqooqooqari Náqoorafa 119 áukuana maraseenoo akoonaíqi mánaaqa moómoo máqanau.
26 Teeraafa 70 áukuana maraséenoo Abarammana fáqa Náqoorana fáqa Qarana fáqa máqanau.
Teeraana áiku ásauku núqu.
27 Teeraana faiqi námu mi oosanáusa maaqímmiqa máriqau. Teeraafa Abarammana fáqa Naqoorana fáqa Qarana fáqa níkoofa márinau. Qaranafa Róotana ákoofa márinau. 28 Qaranafa Babiroonia máqa máaqaki narí maqúsa Uraa máqusaki miná akoofa faqa káqi márufanoo kúqinau. 29 Abarammafa Sarai námmarina máranau. Náqoorafa Mirakaa námmarina máranau. Mirikaa námmarifa Qarana áraamuna máranau. Qaranafa Isakana akoofa márinau. 30 Sarai námmarifa sía faiqì máqóofa áafa ánaasee márinau.
31 Teeraafa narí ámaaku Abarammana faqa Qarana ámaaku narí ánaiqi Róotana faqa Abarammana ánaaqa narí ánaakuqu Sarai námmarina fáqa Babiroonia máqa máaqaki Uraa máqusaindari nífiqeenoo Kannaana máqa máaqai fiqau. Teeraafa narí áiku ásauku faqa Kannaana máqa máaqai fuanée qímasee Qarana áuqu amarána máqusai óonu aaná kasaaqai máriqau.
32 Miqoo máriiufanoo Teeraafa miqóo kúqinau. Teeraana áukuana aiqáma moodáanaki 205 maraséenoo kúqinau.