A Nitana Vure E Mateo 7
7
Naha Ni Pelekado a Viri
(Lukas 6:37-38,41-42)
* Rom 2:1; 1Ko 4:5; Iak 4:11-12 “Naha ni pelekado a viri, lakea e Bakovi Dagi i uka ma ge pelekado mua. * Mrk 4:24Bara i pelekado mua ge manga a hini mu pelekado e huriki ranga. A naro mu rata virihi e huriki ranga, a Vure tara bara i rata virihi mua vona. I navai o masia a muku na matane turamu, pali o mata kepa vona a bokona kai i koro na matamu ke? Go taki navia e turamu, ‘Ga kuri tala a muku na matamu,’ pali a matamu i vona a bokona kai dagi? Ioe a bakovi na taminga! O bole tala taro a bokona kai na matamu, muri bara o matai kamumu, o kuri tala a muku na matane turamu.
“Naha ni habi na ligo a maki na Vure, bara i kara mate ioe. Naha ni vuroki lakea na boro a kepe ne mua, bara i paha loi.
Mu Nana, Mu Matakana, Mu Tutulidi
(Lukas 11:9-13)
* Mrk 11:24; Ion 14:13; 15:7; 16:23-24 “Mu nana a maki mu ngaru, lakea a Vure bara i habi ne mua. Mu matakana a maki mu ngaru, lakea a Vure bara i kori mua mu gu bole. Mu tutulidi, a Vure bara i talea a logo, bara mu dili. * 1Ion 3:22; 5:14-15Mu rata mavonga, a vuhuna e huriki ri nana a maki, bara ri bole visi. E huriki ri matakana a maki, bara ri matavisi. E huriki ri tutulidi, bara ri dili visi.
“E rei ne mua, ge ngaru a bret e tuna, ge habi a kedo vona? 10 O ge ngaru a manu e tuna, ge habi a mata vona? 11  * Iak 1:17 Mua e huriki a bakovi hale, pali mu matakari kamumu e huriki e tune mua. E Tamane mua meli na hunu i kamumu liu. Pali i navai mu luhoia i uka ma ge habi a maki kamumu ne huriki ri nanea? 12  * Mat 22:39-40; Luk 6:31; Rom 13:8-10 I mavonga, a ra naro mu ngaru e huriki ri gi rata virihi mua vona, mua ranga mu rata. A ngava iea kunana ia a vuhuna a vinara ne Moses, a nitane huriki a propet.
A Logo Kiroko, a Logo Dagi
(Lukas 13:24)
13 “Mu dili na logo bala holo, a vuhuna a dala na vuranga i bola, a logo vona i ngavaka. 14 Pali a dala na nimahuri vakaroro i kiroko, a logo vona i bala holo. E huriki ala popote kunana bara ri matavisia.
A Kanena Kai
(Lukas 6:43-44; 13:25-27)
15  * Mat 24:24; Apo 20:29; 2Pe 2:1 “Mu matadoko vona e huriki a nitamina propet. Ri tamilalu ni rata a rabu kamumu, pali ri ngaru ni ratapile mua. Ri manga a kaugara i tamilalu ni made madoru, ge lakavu a sipsip. 16  * Gal 5:19-22; Iak 3:12Mu matai a rabune ria, bara mu matakilala ria. I uka ma si pasi a vuana vao na barakau. I uka ma si gi pasi a kanena kulu na ngatavinekou. 17-18 A kai kamumu i uka ma ge vakabele a kanena ge hale. Bara i vakabele kunana a kanena i kamumu. A kai hale i uka ma ge vakabele a kanena ge kamumu. Bara i vakabele kunana a kanena i hale. 19  * Mat 3:10; Luk 3:9; Ion 15:6A kai lobo i uka ma ri vakabele a kanena i kamumu, bara ni tolo vuroki, ni voro rike na kanono. 20  * Mat 12:33I mavonga kunana, mu matai a rabune huriki a nitamina propet, bara mu matakilala ria. 21  * Luk 6:46; Iak 1:25Naha ni luhoi e huriki lobo ri gale iau e ‘Bakovi Dagi, Bakovi Dagi’ ri gi dili na harikianga na hunu. E huriki bara ri dili, re huriki ri ramai a ningaru ne Tata na hunu. 22 Na nilobona parava e huriki ala kupo bara ri taki iau, ri ta maea, ‘Bakovi Dagi, Bakovi Dagi, mi rata na ramu a nita propet. Mi lili tala e huriki a hanitu na ramu. Mi rata a maka nivakasiri i kupo.’ 23  * Sng 6:8; 2Tim 2:19Pali iau ga ta kavakava ne ria, ga ta maea, ‘I uka ma lohoka ne mua. Mu malele ha nau, mua e huriki a mari ni putu puru a vinara.’
Ni Hae a Roho
(Lukas 6:47-49)
24 “E huriki ri longo a nitagu, ri longototo, ri manga a bakovi i tahoka a niluhoi kamumu, i hae a roho vona langa na kedo. 25 Muri a vala i boru, i tua a meka. A vilu i pori, i pulua a roho. Pali i uka ma i mapuka, a vuhuna a butuna i pesi langa na kedo.
26 “Pali a viri i longo a ngavagu, pali i longotaro, i manga a bakovi i uka niluhoi kamumu. I hae langa na hire a roho vona. 27 Muri i boru a vala, i tua a meka. A vilu i pori, i pulua a ruma, lakea i mapuka, i tangi pahumu puru.”
28 E Isu i ta lobo, lakea e huriki ri turutu vona a nivara vona, 29  * Mrk 1:22; Luk 4:32a vuhuna i uka ma i vara manga e huriki a mari na vinara na lotu. I vara manga a bakovi i tahoka a nitora.

*7:1: Rom 2:1; 1Ko 4:5; Iak 4:11-12

*7:2: Mrk 4:24

*7:7: Mrk 11:24; Ion 14:13; 15:7; 16:23-24

*7:8: 1Ion 3:22; 5:14-15

*7:11: Iak 1:17

*7:12: Mat 22:39-40; Luk 6:31; Rom 13:8-10

*7:15: Mat 24:24; Apo 20:29; 2Pe 2:1

*7:16: Gal 5:19-22; Iak 3:12

*7:19: Mat 3:10; Luk 3:9; Ion 15:6

*7:20: Mat 12:33

*7:21: Luk 6:46; Iak 1:25

*7:23: Sng 6:8; 2Tim 2:19

*7:29: Mrk 1:22; Luk 4:32