YUDAAC KIBI
1
1 Ni Yuda, Yesu Kristoac wanacngic nga Yakoboac munea. Anutu Manggacngo ngicngac kpacngunuma heresongogoc
hoangngunuande, ngeni seria nanggecdeac Yesu Kristongo garengngunuma kecde, ngenearu kibi yomoc hade.
2 Anutuac wosoefac nga ruae amma heresongogoc kekec imocngo ngenearu sahema kembeso.
3-4 Songo tosofocna, Anutungo nenahafoc komoc kpenideac mengerenunuec, imocac yoac kibiu ohongemmebadeac
efaiyombonggeai. Nga yoac imoc wama ngic goa botucnginau sufu sufuu bic eregec kecdaengoc, yeneac amma
yoac mong ohobeso negenduae. Imoc yofi, ngeni sing dafi Anutu negensinggegecdeac yeng warac nenang kpetiac
areng nemmedarec, imocac dzikac seriangoc kpebisia amma ngeni imoc mi wagecdeac gorongina kpeduae.
Ngic imoc yeneac negemma warac mitikibiu yofi oho ohoya fede, “Anutungo fakangina isinggema desiu kopocsicac
turunga fingecyemmeude.” Yeneng bangecac faka hoanggema Anutuninaac danggunuc nga wosoefac faka mereng
kpereng dema sebinginaac negensongo amma manganaac kpae mong mi heiandae. Nga yeni Kunennina nga Kebunina
Yesu Kristoac negenggec mamea anu busic kpeandae.
5 Anu ngeni yomoc bic negenggec nga monggoc heigboringemmebadeac negenduae. Kebungo hanahema ngicngacfora
Aigita bangecac ebicfunac mesiyunuu hagec amma ngade ngicngac mi negensinggegec, yeni kpebucyunuu homedacgec.
6 Nga angero goa yeni kuneng tatacngina imocac negenggec engena mi anu amayombongngina wama magec. Magec
Anutungo seng seria wisic wisickea kpac, imocngo witicyunuma kundung seria manau faiyunuu desi desi nasotoaac
tomai kecdae.
7 Yeneng warac Sodong nga Gomora ngicngac amma guruama yereac wegenacfu tackenec, yeneng faka angandae,
ifi isoc anggec. Yeni kaisero amma sebinginaac songo sicsauc modacgec.*Fingec fingec 18:16—19:29; Sesememe 18:22-23; Roma 1:24-28. Sodong nga Gomora ngicngac, yeni gerecfu yonohoec, yeneng gerec wisic wisickea kpac imocac ongea andae
amma ihai yaguc kecma kopocsicnginaac turung mekecdaengoc.
8 Amma gaukpefing sicsauc deandae, yeni imoc negemmaguc sebingina sifu memanganegec wonongagoc angande.
Yeni kuc engena hania hania, imoc ubango wama asu engena kecdacdae, yeni eyemmema desusuic angande.
9 Nga Mikae ye angero yeneac enara mong kecde, yeng mangana minginagoc Moseac farenggac amma ewema yoacngira
engemmama anec. Anu ye kengec amma mangana mingina emmima desusuic ammima ebicfu faibesonga yoac mong
mi deec, kpac. Ye yofisac deec, “Kebungo geac yoac desibeso.”
10 Anu ngic deduaemoc, yeni yamberec isoc negen negengngina kpac kecma wiac monggac hania mi negendae. Yeneng
asu engena siricngina mi negentegecma eyemmema desusuic angandae. Amma wiac ubasebinginau negendae, imoc
modacma yenaoc memanganeemegecde.
11 Yeni Kainggac sing modacma hiedzongina fingerudeac Bireanggac sicsauc faka imocngo wangecyunuu yeni sing
imoc bic kenggec. Amma Korango yoackpekpe anec, ifi isoc yeni bic yoackpekpe anggec, imocngo ebiriangoc
memanganeyunuec. Imocac yeni sowecnginagoc.
12 Ngeni yaka songogoc urecfu neandae, yeni botucnginau seuc heima gamengina kpac, yenaoc garengemegecde.
Amma yeni wenacac hoeng kiaya kpac firangngo fifirangyunu kengandae, ifi isoc andae. Amma yeni ic goa
foranasou fora kpac imoc kpefuckema ukugecde, ifi isoc andae. Ngic imoc yeni homec yohockang bic homegec.
13 Nga tembong kuneng kpema sofororoc seuhagoc mehaande, yeni ifi isoc gamengina ifi kpakegecde. Yeni asomeng
sing segedae, ifi isoc kecdae. Nga yeneac ama kundung dzapac wisic wisickea kpac faifaia fede.
14 Anu Enoko ye Adanggac fingecsahe yenearunac andenga sewennu fingerec, yeng yeneac profeteyoac yofi deec,
“Henggec, Anutungo kpetiac arengfora teng tauseng nga dafiguc meyunuu hama
15 ngicngac sasawa angammenginaac sirihau isingyunuma desiyunuude. Nga ngicngac sasawa bangecac faka hania
hania mekecma kopocsic meficgema Anutuaru ngabayoac dema yoac kpekpe kecgec, yeni imocac turunga megecde.ӠYoac imoc 1 Enoko 1:9 imohacnac. Kibi imoc mitikibiu mi fede.16 Yeni yoac homac osoma negeung nga ubakpekpe amma ubasebinginaac songo modacandae. Ifi modacma ngicngac
yeni gombunga ayemmegecdeac, yeni sebingina meemma dekerec ayemmeandae.
17 Songo tosofocna, Kebunina Yesu Kristoac aposoro yeneng wiac fingerudeac warac degec, ngeni imoc negenggec
febeso.
18 Yoac yofi edengunugec, “Naso wisic wisickeau desusuicngic hania hania kecgecde, yeneng bangecac wiacsac
negensima yenang ubasebiac songo modacgecde.”
19 Yenennoc kpebung hendzicyunuma uba eseango garengyunuu Tiri Asugoc mi kecgecde.
20 Anu songo tosofocna, ngeni negen negensingngina kpetiac ande, imoc negemma yadiseri anggecdeac nanggeemebisia.
Nga Tiri Asungo ngenearu ua meu ngeni nunumu ua mekecma
21 Anutuac heresongou kecgecdeac ua mekecbisia. Nga ifi kecmagec Kebunina Yesu Kristongo ubamangang angemmema
kekec wisic wisickea kpac ngemmeudeac tomai kecbisia.
22 Ngicngac negengyohoc angkecdae, ngeni yeneac ubamangang negemma
23 goa gerecfunac meicyunubisia. Nga yeni uba eseango wambangina meu wonong angande, yeneac ifingoc ubamangang
negembisia. Ifi amma yeneac kopocsicac kengecngunuu uba eseaac wambangina wonongagoc ngadehebisia.
24 Anutu yengenaoc garengngunuudeac kuc femide, imocac ngeni naric mi mangunuude. Yeng ngeni hesicngunuma
yengena kuc nga kibikperagiaac kicfu faingunuu ngeni kopocsicngina kpac sufu sufugoc imohai nanggecde.
25 Memengerecnina Anutu mocgungo kecde. Kebunina Yesu Kristo yeac amma eweheimima dengereni, yeng engenatoanina
nga kuc mingina amma wiac sasawa fede, imocac buma ande. Ye wiac mi fingecmanu kefec nga yaguc kecde
amma kecbesande, imoc fora.