ITOU NOMO HILOU BEELE Kolosi 1
Kolosi
1
Ji Pol, ji Yesus Kristus nomo aposel. No nogo nomo gauwou langa, Itou no ji aposel dorofe hangada hiyai. Ji baabo Timoti ngare, ere pas beha, tere Itou nomo fai-aita Kolosi taon langa yafaya waha bagu, tere baabo gane, ogoge gane Yesus Kristus boya huwanyatege ngalengana waha yerege tagiyare. Ere ebere Jijei Itou no edo tere bona aau waronga, tebere huwanyatege ono tagonga foinga inyonbona.
Kolosi nere Yesus bode huwanyanege ngalenga dewai.
Saini ere hauya boyare, ere gai-gai tere boya ninare isi boyare Itou hilobainga tutuyare, no ere ebere Anyakaro Yesus Kristus nomo Umamu. 4-6 Ere tere boya beele benou isere, saini beele ngalenga nomo hilou beele tere langa heigainga isidu boya, tere Itou no dada hilobainga ha laluwa langa hangada tagidu tafai waha boya huwanyatege ngalengawai boya, tere waha tei nomo itariya. Ono boya, tere Yesus Kristus boya huwanyatege ngalengade ganga, tebere huwanyatege nere Itou nomo fai-aita oruwa nigiya. Ha-ha oruwa langa nere hilou beele waha malalamudu legane, nere fai-aita baingaro huwanyanege ngalengadu oojo ganenga, nebere onowou hilobainga heige-heigena. Onodu onowou onouhanga tere gamatege langa heigai, fati amugou langa hugu waridu, tere Itou nomo aau warou nomo hilou beele waha agudu tere isi dewei. Ariya, Epafras no hilou beele waha nomo beele isisiwou tigainga, tere waha iseye. Epafras no Kristus nomo haruwe fai hilobainga. No ere ebere haruwe etenga, onodu ere no gaude tu‑tuya. No tere hoyo tigidu bona, Kristus nomo haruwe te de‑dena. No Itou nomo fai-aita gaude nigei nomo fanyimu, Hauri Guuni tere tigai waha lehirai.
Pol no Kolosi dangamu nigei nomo bona Itou hauya tuwai.
Onou bona fati amugou langa hugu waridu, ere tebere fanyitege hilobainga waha boyare isere, onodu ere gai-gai hauya boyare, Itou no tere hoyo tigei nomo isoki tu‑tuyare, ono wonga tere edo nomo gauwou waha isi dewagu ganga. Ono wonga Hauri Guuni no edo ninatege isou hilobainga hogo fere-fere baingaro tigonga, waha no edo tere langa bolo dewona. 10 Ono wonga, tere edo Anyakaro nomo fai-aita tigini waha nebere fanyinege langa golo wadenga, no tebere onowou oruwanga gau tuwonbona. Ono wonga tere haruwe hilobainga hogo fere-fere baingaro taagu ganga. Onodu, tere Itou bonade isi gadenga isou waha no gai‑gai anyakaro wonbona. 11 Ariya ere benou hauya-hauya yare, no nogo nomo danga anyakaro hilobainga waha langa, Itou no edo danga hogo fere-fere oruwa tigonga, tere edo danga bagu oto bonade, ou oruwanga auledu foinga yafa bonade, ou waha usuwei nomo saini itari wagu ganga. Onodu tere edega bonade, 12 Jijei hilobainga tuwagu ganga. No tere ono tigainga, tere onowou hilobainga oojo weye, tere edo langa no dada hilou-hilou elegei nomo hangada tagai waha elegagu ganga. Tere Itou nomo fai‑aita oruwanga gaara elegagu ganga, wa nere fai-aita no nomo lala langa yafade waha. 13 Ere agugu nomo danga huuna langa yafa geyenga, no ere ege gidu haigedu no nomo Idau nomo fai‑aita yafade langa logosi higai, wa Idau no gaude tuna waha. 14 Itou nomo Idau no ere ege gidu ejiya higidu bona, no ere ebere une uulu hagai.
Pol no Kristus nomo haruwe, fanyimu bagu bona lena.
15 Ere Itou urei nomo edo uwa, onou wa Itou Idau no Itou no nogo dorofenga. No Itou Idau motuwa, onodu no Itou dada oruwanga tafainga heigane waha nebere mora tigini yafana. 16 Itou no Magana waha nomo owo langa, dada oruwanga ha laluwa langa bagu oula langa bagu tafainga heigane. No dada oruwanga ere nerigeya waha bagu, ere nerigei nomo edo uwa waha bagu, nere ensel danga bagu hogo fere‑fere, nere hauri danga bagu-bagu, onodu dada danga bagu hogo fere-fere onou waha oruwanga. No dada oruwanga tafainga heigane waha, no nogo nomo. 17 Saini dada waha oruwanga heigegu uwa inyi gainga, no yafai. Onodu no dada oruwanga ono nigi ganga hilobainga inyide bode, gaara haruwe te de‑dede. 18 No sios nomo mora, onodu sios no nomo gogala. Ariya, no nogo no sios ago auma inyei nomo mora. No matmat langa ege gidu jayou fai amugou, onou waha bona no nogo edo dada oruwanga nebere mora yafonbona. 19 Itou no nogo nomo auma yafou nomo onowou bagu oruwanga Magana waha langa inyei nomo gau tuna. Onou waha bona, Itou no nogo no langa bolo dewou. 20 Onodu Itou no dada oruwanga ono nigonga, no bagu huwanyanege etengawei nomo gau tuna, wa nere oula nomo dada bagu, ha laluwa nomo dada bagu. Onou waha bona, no Kristus awa tuwainga nauge abalakawou langa umai, onodu ganemu feuwai, onowou waha langa Itou no honggoro guruwou fanyimu ilei hagai.
21 Amina tere Kristus bae tudu yafeye, tere tebere ninatege langa no honggoro fai tafa tudu boya, tere fanyimu inyaba onowou haruwe tei. 22 Onou wa, Kristus no nauge abalakawou langa umainga, onowou waha langa, Itou no tere ono tigainga, tere no ngate huwanyatege etenga heigeye. No tere hatigedu no bagu maidu, tere edo guuni yafa bonade, no ago langa jijiga uwau, nyabuluwou uwau yafagu ganga bona no onou onowai. 23 Onou wa, tere huwanyatege ngalengawou yaasu bonade, danga bagu tigini oto wagu. Gamaji dada ete kuse tigoga, ono wonga tere hilou beele iseye waha nomo huwanyatege ngalengawou awagu ganga. Ji Pol, ji hilou beele beha nomo haruwe fai heigenenga, ere fai-aita oruwanga oula langa yafade waha, malalamudu lenigeye.
Pol no Kolosi hoyo nigai.
24 Ariya, ji elebe tere hoyo tigei nomo ou auleni waha boni ji edegani. Onodu ji Kristus nomo sios hoyo tuwoni ononi, wa nogo nomo gogala. Kristus no sios hoyo tuwei nomo jimiri aulai waha usuwei uwa. Onodu ou ji yage gefe gala langa auloni wa, ji Kristus nomo jimiri waha edomuwei nomo bona. 25 Itou nogo we ji sios nomo haruwe fai hangada hiyainga heigene, tere hoyo tigei nomo bona. Onodu ji Itou nomo beele oruwanga tigini malalamudu lewei nomo haruwe bagu. 26 Amina saini oruwa langa beele beha huwari inyigai, nere fai-aita oruwanga ada isi gane. Onou wa elebe nere Itou nomo fai-aita agenege langa amina malala heigaha. 27 Itou no nogo nomo gauwou langa, huwari beele beha, ere nomo fai-aita bagu abitimu higaha, ere edo iso boya, beele beha no hilobainga tigini, onodu no edo nomo fai‑aita oruwa hoyo nigonbona. Ariya huwari beele waha no benou. Kristus no tere bagu yafana, no tere hatigonga mani no ngate yafa bonade, tere no nomo dada hilou‑hilou ha laluwa langa otode waha elegagu ganga boya itari tuya. 28 Ere Kristus nomo hilou beele nere fai etenga-etenga oruwa malalamudu lenigi-nigiya. Ere ninage isou hilobainga oojo boya, nere isisiwou nigi boya, beele danga bagu lenigi-nigiya, taate bona, nere Kristen danga bagu heigogunga, ere hanigedu Itou bagu goyei nomo gau higina. 29 Onou waha bona, danga anyakaro Kristus hina waha langa, ji haruwe waha tei nomo ababi de‑deni.