Agedu Dimodi
Neala olelo oboba
Foloea Dimodima beba elö gowe dëdëla ï amoda, Dimodi e malïsä geloi nea, hedabi hamosa namolö mala dawadigimäia dëdëla ï. Ado geloi säida, fologola made nea, aso madela, hamosa namolö dialeamelëla säla ï. Foloea Dimodima sähalea, Së molö diëgige, odoaea dima bimolö habobasegige, Yesu Gelesoma asigi afädë negei nebegoda, gelola nea, Yesu Gelesoïe Ado Mala Hedabi dibe amoge, Godeïe asialo made ado siiba säla negei dibe amoge, amoli gaula sisiläfülahilä, daidola säsäla nawesamu namialola säla ï. Foloea Dimodima sähalea, Udia dolöea asigi made gäwila gagaoi gadoi nea gëgëmolömelë. Ili neebea ami aligila made, di nafolala näiadodi namialola gelola säsi.
Foloea säla wagahalea sähalea, Na hamoi amoge, mala hamosa nelo amoge, dia sulubadela dawadigisa maadei neagomelë. Amai, dia amo gadola hamosa namolö dialeamelëla säla dëdëla ï.
1
Neda Folo, Gode hïle hamelo dibe amea, Geleso Yesuïe abosolo neawe. Nilïa Geleso Yesuma aligila, namolö gähe gaula namiäia, Godea dafidi ïmolömelëla säla negei amea, dia ïmolö mosalola säsio. Nïe malö obeägïlo Dimodie, na dima beba gowe dëdëla ïasisago.
Nado Godemadilage, nilïle Dafidilo Geloi Geleso Yesumadilage ugila negelasiloge, bobasëloge, dalulasiloge diamolöi diamiäia hamesa neawe.
Ado Mala Hedabi amo helësëlahilä hewamolö made amo
Na Godema nesegesa. Nïe mäuea Godeïe hamoi hamosa nelo amo gadola, nage asigi gagadelai nea, Godeïe hamoi hamosa neawe. Amaimo, yoba gasigige na Godema adosaleada, di helësësamu nea, Godema adosa aligilo. Dïe siahalö digai amo helësëlahilä, obeägïlo nema nobamäia na gelola di bimolöila helësësa neamelë. Dia Godema asigi afädë negei amoda dofä gelola neebe amo na dawadigi neamelë. Dïe diaye Oloisilea, dieme Yunisilea Godema asigi afädë negei amo gadola, diage amala negei neebela helësësamelë. Mi amoïeda, nïe naabo dima negesebegi, Godea Gesamiïe galu ï amo bäumäia, nulo fulabesegi söa fedalo amo gadola, söa fedamäiala helësësa namialo. Mida, Godea nilïma ïe galu ï ameada bedälasilo made. Eada gelomolöge, boba hamomolöge, asigi sigi namolöge galu amoli ïmelë. Amaimo, nilïle Dafidilo Geloiïe Ado Mala Hedabi olelemolöda, dia hewala made namialo. Neda Dafidilo Geloiïe galabaia dolö neawela helësëla, dia hewala made namialo. Hewala made nea, Godea geloi ïase amo gadola, Ado Mala Hedabi säla ïmolöïe na yöi gaula neebewe gadola gaula namialo. Godea nilï damula awäla ïe udia dolö mogola namiäia, ea nilï wei. Amala hamoi amoda, nilïa hamoi afädë hamosebegi made, amoda Godea ïe hameloeage, ugila negeloeage amala hamoi. Siiba Godea sege föi hamola made nea, Geleso Yesumadila aligila ïe ugila negelo amo nilïma ï. 10 Siiba ï amo, walio nilïle damula aulo Geleso Yesu hï e ulufala misi amea, Godea ïe ugila negelo amo ulufala olei. Gelesoea baagomolöïe geloi damula sadia galahilä, ïe Ado Mala Hedabi amea, namolöi namolö amo ulufala olei. 11 Neda Ado Mala Hedabi amoïe uuala säla ïloge, abosologe, säla oleleloge namiäia, Godea ne memelela ifosimelë. 12 Ne së naha neebeweda mi amoïe së naha neawe. Na Geleso Yesuma asigi afädë negei nea, e dawadigi amea, na hewala made nea. Godea segeyo afädë daiala negei amo gausiala digamäia, ea nelebo nema gausi amo hedabola sigi namolöila helësësa. 13 Na dima säla ï amo gadola, dia säla olelesamu namolöïe gelola gaula namialo. Amala gaula nea, Geleso Yesuma dila nea, asigi afädë negemolöge, boba hamomolöge, amoleda nilïle dialeamelë. 14 Godeïe Gesami nilïma neebe amoïe geloia, nelebo hedabi dima gausi amo hedabola sigi namialo.
15 Bolobinisi Esia ami fii udia dolö sulubadelaea ne dïgïla awäha maadei amoda, dia dawadigi nebegomelë. Amoligida Figelusile Hemogenisile nea.
16 Onesifolusia ne neala obeägïla ugila negesamu nelo amo eege, ea mosöa aligilo amolige, Dafidilo Geloia bobasëla ugila negemäia hamesa neawe. Ne igi ëfëa begela negei amobalä, ea hewala bedäla made aligisio. 17 E Olomo gaamugi beselagalalahilä, ne beagolemolöila hogosamu nea, giso ne hä beagolesio. 18 Segeyo afädë daiala negei dibe amo gausiala digasolo amo gala, Dafidilo Geloia ïe bobasëlo amo ema ïmäia hamesa neawe. Ebesa nebegi, ea ugila negesamu nelo amoda, dia dofä dawadigi nebegomelë.