Foloea Daidasama Dëdëla Ï
Neala olelo oboba
Daidasada Yu dolö made nelo. Ea Gelesoma asigi afädë negelahilä, Folobalä Ado Mala Hedabi säla olelela aligi nawesa aligilo. Gilidi södöloïe sege dibe amo sulubadelamadi, Geleso sosogo nefolalebe amoli beaha namiäia, Foloea Daidasama, dia beaha namialola sälahilä, e ami dïgïla asi. Dïgïla awälahilä, oböla hobeala Foloea Daidasa ugila negela beba we dëdëla ï.
Foloea beba we dëdëla ï amoïe mida, ohodoa dibe beala amo ulufala dëdëla ï.
1. Geleso sosogo neebe amoli sigi namiäia afädë memelesaleada, mala gowe gadoi hamoloea namolöi galeala helësëlahilä, memelemalola säla dëdëla ï.
2. Udia dolö fädäimage, gafodo gähemage, hamoi hamolasilo nefolalebe amolimage, gomalä hamosa namialolage, gomalä säha namialolage, säla dëdëla ï.
3. Asigi sigi namialolage, hamoi hedabi hamosa namialolage säla dëdëla ï.
Daidasaea Geleso sosogo Gilidi södölogi nefolalebe amoli gelolasila, Geleso sosogoea hamolo malada gomalämelëla säla dëdëi
1
Foloea Daidasama beba dëdëla ï amo
Neda Folo, Godeïe hamoi hamolasiloge, Yesu Gelesoïe abosologe, neawe. Udia dolö Godea memelei amolia ema asigi bogia adogolamu nefolamiäiaïege, amase, ilia ado mala dofä amo dawadigimäiaïege, Godea ne memelela ifosimelë. Mala dofä amo dawadigi amolia mala mogoi hamosa nefolamolömelë. Amala hamolo amolia namolöi namolö amo gaumolöïe asigia sisiläfüsa nefolalea. Godea wäfalï sälo made ameada, sulubadela made hamola nea, namolöi namolö dofä ïmolömelëla säla negei. Ea segeyo hï daiala negei amogi, ïe ado mala hï ulufala olesio. Nilïle damula aulo Godea na ado amo säla olelemäia, hamoi amo nema ïasio.
Daidasao, na dima beba gowe dëdëla ïasisago. Alïa Godema asigi afädë negei ameada, dida nïe malöfalï gadoi neagomelë. Nado Godeage, nilïle damula aulo Geleso Yesueage elele ugila negelasiloge, neala dalulasiloge dima diamiäia hamesa neawe.
Daidasaea Gilidi södölogi ami hamoi hamomalai amo
Na di Gilidi södölogi ami namialola säsiä asi amoda, hamogimolö odoa ami dibe amo dia hamogisa maademäiage, amase, gaamu sulubadelagi, dolö dafidi nelo nefolalebe amolia Geleso sosogo nefolalebe amoli sigi aligimäia memelela ifosimäiage. Na hamomalai amo gadola dia hamomäiaïe, di dïgïla asimelë. Dolö dafidi nelo gowe gadoia namolö dialea. Udia dolöïe siigi nafade made baaiage, udia afädë goaeage*1.6 Udia afädë goaeala säi amoïe mida, udia äudä niiage, udia elö fa neloeage, made namolö dialeala säi., amase, ïe malölali asigi afädë negeiage, odoaea malö amolia gagaola mala nafade elö elöla hamolo, ado made nabelola sälo made. Amo gadoi neebe amoligi memelemolö dialeamelë. Sigi aligilo Godeïe hamoi hamolo neebe ameada, udia dolöïe siigi nafade made baaia namolö dialea. Mala goweli hamoloeada made namolö dialea. Udia dolö emosala eegela beaha aligiloeage, fodolofalï habobaloeage, gagaomolöïe gagaolo ödä edefade nulöeage, amase, nudumolöïe fodolofalï abadigiloeage, muni aba adogola neloeage, made namolö dialea. Amase, mala goweli hamoloeada namolö dialea. Udia dolö söfë mase amoli hedabola aealoeage, hedabi hamolo dibe sulubadela amo hameloeage, asigi sigi aligiloeage, asigi falagaseiage, hï e Godema odala ïala mala mogoimu hamoloeage, domaloea hamelo dibe amoli sulubadela sigi aligiloeage, sigi aligilo namolö dialea. Ea ado mala dofä amo fëdöla gaula namolö dialea. Ema olelei amo gadola, bedefala made, gaula namolö dialea. Amo gadola namolö dibe amoïe mida gomalä. Ea ado mala dofä hedabola säla olelesebe amea udia dolöïe asigi gelolasimäiage, amase, udia dolö odoaea, Ai, amala madela sälo amolia asiala sälo gabula helësëmäiage, ado mala fëdöla gaula namolö dialea.
Gilidi segea ami wäfalï säla olelelo yafie nefolalo amo
10 Amala säsebe amoïe mida, ado neadigilo yafie amoli ami nefolaleamelë. Amoliada ado yafie memalä säla dabolahilä, udia dolöïe asigi balalëlasila gadiabola säla olelelo nefolalea. Amala sälo amoligi yafieda, gafodo damumolö dialeala sälo amoli nefolaleamelë. 11 Ado neadigilo ilia muni gesami awäla, mala nafade dofea made dibe amoli säla olelesebe amea udia dolö odoage, amase, ilile sosogo sulubadela nefolalebe amolige, asigi neala balalëlasilo nefolaleamelë. Dolö amoli gadoia amo gadola made säla olelemäia, dia ili dofogamalo. 12 Siiba Gilidi fii hili iligi bea sälo nelo afädëa sähalea,
Gilidi fii iliada
wäfalïmu säloge,
nafadefalï nafade sugua ilaba gadoi nafadege,
molö badoia nalahilä, hamoi made hamolo, habobame nefolaleala
säi. 13 Ado amoda dofä säimelë. Amai ameada, ilia Godeïe ado malamu gaula mogosamu namiäia, dia ilima gelola nemomalo. 14 Amase, Yu fii ilile mäuïe sibalo awalo amo made nabuäiage, ado dofä amo memalä gadoi hamolo amolia hamomalala säla negelo amo made nabala hamomäiage, ilima amala nemomalo. 15 Godeïe siigi nigime baai made neebe amolimada, nelebo sulubadela nigime baai made, hedabimu dialea. Be, Yesuma asigi afädë made negela, asigi halowei nefolalebe amolimada, nelebo sulubadela nigime baai, nafademu dialea. Amase, ilile helësëloge iso asigige helegela nafadesa maadei nefolaleamelë. 16 Ilia adoeamu, Nilïa Gode dawa neala sälo. Gasoda, mala ilia hamosebe amea, Gode made dawa neala ulufadigilo. Odoaea ilima bimolö habobala, ilia mala mogoi dibe amoli sulubadela fisila, ado nabelo made nea, hedabi hamomolö amo ulï neamelë.

*1:6: 1.6 Udia afädë goaeala säi amoïe mida, udia äudä niiage, udia elö fa neloeage, made namolö dialeala säi.