KAYAKNU NAI Tituanak Bau Pilipai 1
PILIPAI DILAG NAI PAULUS YOM
1
PAULUS KAYAKNU ENA HEME AUM
Da Paulus amu Timotius ele, i oh am Kristus Jesusnu uḏat danab, i uḏug imu Kayaknu danab Jesus Kristus ele ou qena, Pilipai daaṯeb amu ahilḵad gumak iḵi danab amu ahilḵad toliak danab oh ele, ahilagnu yaaṯep. Kayak ig Mamenig amu ihinig Naḏi Jesus Kristus ele, ahilah ehaniṯak oḵai hamu megṯep amu ahilah maḏoḏ ele ahilagp̱a hanhan daaglahnu oonih daaṯe.
Da hanhan ahilagnu dab mein, dahil Kayak amegp̱a, “Ena heme,” awe aṯem. Da ahilagnu unuqiṯeṯe, da hanhan oo gamag ahak doyeye unuqidṯem. Aḏinu? Ag i ele oh Nai Enanu uḏat laip̱u dig makp̱anu heut, otala uḵe, gemu ele ig iiḵu anam daaṯem amunu unuqiṯak dahilp̱a amu da ool gamag huan ahehe, da Kayak ag ehanadḵunu unuqiṯeṯe, da inam genab dooṯem. Kayak Nug ahilagp̱a uḏat enanag dig meum amu Nug uḏat amu heeb uḵeb uḵeb, Kristus Jesusnu deḏp̱a gog teḵu.
Amu haen laa da mani guiṯakp̱a dayeye, haen laa da dimiṯim dayeye, da danab laala Jesusnu nai tabap̱eg neḵunu hep̱ig amu nuhig nai nemanu da wagai mein, da ele nai g̱agaṯag qedeṯe, Jesusnu Nai Ena ele maṯimi, haen amu oh amu da ag ele, ig oh Kayaknu ehaniṯak oḵai hamu megṯe ele amu aomut amunu da ahilagnu enanag dooṯem am ham bup̱uak iiṯa. Am keeke diig ele. Kayak Nug dooṯe, da genabnab aṯem. Kristus Jesus Nug ihinignu oo mauhak dooṯe, amubia da ahilagnu amu ool mauhak oḵai doyeye, ag am dahiladnab ele dooṯem.
Amu da hanhan ahilag oo mauhak kobol amu oḵai meebeb, amu ahilag doyak amu ahilag dab mak ele oḵai mepeḏ daanna, 10 ag amup̱a geha kobol aṯen am enanagnab daaṯe epeḏidḵulagnu elele daaglag. Ag anam hep̱eg uḵeb uḵeb, Kristusnu deḏp̱a ag tutuḵu op̱ia awakib daaglag. 11 Oo mauhak kobol ahilag amu oḵai dayebeb, haen ag wan imup̱a oiṯeb ele amu, kobol tutuḵu, Jesus Kristus he beṯeb ele amu, kobol amu oh ahilagp̱a naḏi daaglag. Amup̱a ag Kayak Nug onig oḵai mep̱eg, Nug binag naḏi ele daaḵu.
BAU DAYAK ENANU DIIG AM KRISTUS
12 O lailad, da ag tutuḵu dooglagnu ool daaṯe. Kobol da beḏulp̱a beum ele amu Nai Ena ii tap̱e neṯe. Iiṯa. Amu he, Kristusnu nai naḏi meṯe. 13 Amunu daup oh, Kaisa laug gumaṯeb ele amu, danab laala oh ele, ag da Kristus onignu hip̱aliḏak daaṯem amu ag aaḵu dooṯeb. 14 Amu da lailad kuḏum, ag Naḏinu oolagp̱a genab dooṯeb ele, ag da hip̱alakp̱a daaṯem amunu dab mena, oolag g̱agaṯag qeṯan amu ag baḏak iiṯa Kayak nai mehuqḵulagnu wagainab meṯeb.
15 Amu genab, laala ag da onil ele, ag amunu oo aeg bak doona, da onil qep̱eg neeb, ag onilag aṯan teḵunu heṯeb. Dab mak amup̱a ag Kristusnu nai mehuqṯeb. Laala ag amu dab mak ena ele nai mehuqṯeb. 16 Danab dab mak ena ele amu, ag am da Nai Ena g̱agaṯag qedaḵulnu ip̱a daaṯem amu ag dooṯeb amunu ag dahilnu oolag mauhe, ag nai mehuqṯeb. 17 Amge laala, ag dab mak ahilag tutuḵu iiṯa, ag onilag naḏi daaḵunu henana, ag Kristusnu nai mehuqna, ag da hip̱alakp̱a daaṯem, ug amu ag tuḏidḵulagnu heṯeb. 18 Amge amunu nai iiṯa. Kobol ohp̱a, ham bup̱uak kobolp̱a, kobol genabp̱a ele, ag Kristusnu nai mehuqṯeb amunu amu da ool gamag ahaṯe. Yo, da geha ool gamag ahak eleib daaḵul. 19 Aḏinu? Da dooṯem, ag Pilipai daaṯeb amu unuqiṯak ahilag amu Jesus Kristusnu Ouḏi, nuhig ehaniṯak ele, keeke aḏit amu a hepeḏ, da mani guiṯakp̱anu uhuqak aoḵulnu dooṯem. 20 Amu da keeke laa g̱agaṯag dab medeṯe aḏe daaṯem am da uḏat, Kayak Nug da heḵulnu meḏom amu da uḏat amu heḵulnab. Yo, da geha iiḵunab am haen oh ele, da ii baḏeḏe, da aḏi keeke heinne amu da amup̱a Kristus Nug binag oḵai meḵulnu ool naḏi daaṯe. Da bau daaḵulte, iiṯa da mauhḵulte, amuam keeke oḵai iiṯa amge da beḏulp̱a keeke oh beḵu ele amu, da keeke amu ohp̱a am Kristus binag oḵai meḵulnu ool daaṯe. 21 Dab mak dahil amu inam. Da bau dayeye amu da Kristus Nugib dim lamidḵulnu ool oḵai daaṯe, o iiṯa da mauhe amu geha da keeke ena aoḵul. 22 Da bau dayeye amu da geha danab kuḏumnab ehanadḵul amge da mauhḵul amu da Kristus ele, Nug daaṯep̱a ou qeḏa daagnih amunu da aḏi ib dim lamidḵulnu am ena? Da ii dooṯem; ib aḏit oh am ena. 23 Da keeke amunu ool aḏit ele daaṯem. Amu da gop̱i, Kristus ele daagnih amuam keeke enanagnab. 24 Amge da wanp̱a dayeye, ag ehanadḵulnu am keeke oḵainab. 25 Da anam genab dooṯem amunu da dooṯem, geha da daaḵul. Da geha dayeye, ahilagp̱a uḏat hebip̱i amu ag oolagp̱a genab g̱agaṯag doonna, ag oop̱a genab doyak ahilagnu ele oolag gamag ahaḵu. 26 Amunu da eḏue ag gumaṯe wap̱i, Kayak Nug ehaniḏom, ag amunu oolag gamag aheb, ag Kristus onig humaglagnu elelenab daaglag.
27 Aḏi kobol beḵu amu ag oiyak ahilagp̱a, ag Kristusnu Nai Ena tutuḵu dim lamidna oiyeg! Ag anam hep̱eg amu da ag anadḵulnu goḵultai, iiṯa da naip̱ulagib dooḵultai am keeke oḵai iiṯa amge da ag oolag laip̱u ele daanna amu ag dab mak laip̱u tamanin, ag nug ehanidnana, Jesusnu oop̱a genab doyak ahilag aḏan daaṯeb dooḵul. 28-29 Amu Kayak Nug ag Kristusnu oolagp̱a genab dooglagnu ehah maṯom amge Nug ag Kristusnu oolagp̱a genab dooglagnu ehah amu aaḵuib ii maṯom. Iiṯa. Ag Nug onignu ug maoglagnu ele ehah maṯom amunu kekeḏ ahilḵad dilagnu aib baḏap̱ig. Ag ii baḏaglag amu, amup̱a kekeḏ ahilag ag geha padal meḵulagnu daaṯeb doonna, Kayak Nug nuḵa ag Pilipai daaṯeb amu Nug geha ag eḏua diiḵunu daaṯeb ele dooglag. 30 Amu ag ug da haen matu matu maomi anidp̱ig amu gemu ele da ug amuib mawewe daaiyi, ag dooṯeb amunu ag da ele layam ena daat, ug amuib maotu!