Habo nalolene bi gahenge lo winigo ogo 2 KORINDI 1
2 Korindi
Polohanda Keriso hameigini Korindini hearuhondo beba mende ogo gilibu wia hene
Mbuga ogoha gilibu ngarunaga nemandi ogo
Polohanda Keriso wali agali Korindini hearuhondo beba mende ogo gilibu wia henego ibu genda timbuni ho howa gili bini. Genda henedagoni Keriso hameigini maru Korindini hearume Polo guralu henego genda ogoni Polohanda abale lo tiga bialu lone dai bu hami̱yaore hame ledo lalu gili bini.
Ani gili buwa lalu, Keriso hameigini maru burupale Yudiani karu biamogo bialu mbirale wia hole manda bilimu, lene.
Ani lowa Polohanda la maro bialu ibuni abosolo heneneore henedagonaga te lene. Ogoni lenedagoni irane Korindiali dege maru hearume lalu, Polo ibu abosolo henene ndo ke̱ haga ka. Ai abosolo heneneore ina kama, lalu hene. Polo abosolo harudagoni agalime dabalu, I̱ ha, lene ndo. Ngode Datagaliwabehanda i̱ dabo helenego ko, lalu lene.
Bu̱lu̱ baga buwa kuni gilibu ngago
1.1-11
Gili binigonaga irane lo ngago 1.12–7.16
Polobi Keriso hameigini Korindini henerubi te ngago 8.1–9.15
Keriso hameigini maru burupale Yudiani hearunaga mbirale wia holene lenego 10.1–13.10
Polo ibu abosolo heneneore ko, lalu lenego 13.11-14
Lamaro bialu lenego
1
I̱ Polo Ngode Datagaliwabe ibuni hame leagome Keriso Yasunaga abosolo kogoni. I̱bi ina hamene Timodibi iyame beba ogo tíhondo gilibu wia haraba.
Keriso hameigini Korindini kamirubi Ngode Datagaliwabenaga wali agali bibahende Agaia dindini kamirubi tíhondo beba gilibu wia haraba. Ab 18.1, 1 Ko 1.1
Ngode Datagaliwabe ina Aba ibubi Anduane Homogo Yasu Kerisobi libugua biamogo bia holenebi mo palia holenebi tíhondo ngilo hamelo kaba. 1 Ko 1.3
Polohanda Ngode Datagaliwabehondo turu halu ka̱i̱ lenego ogo
Ina Anduane Homogo Yasu Kerisonaga Aba Ngode Datagaliwabe ibu ina Aba howa dara halu biamogo biagabi biamogo bulene bibahende ibuha howa ibai hagabi kago ibuhondo iname turu halu ka̱i̱ lami̱ya. Lm 15.5, Eb 1.3, 1 Pi 1.3 Genda bibahende ina kamagoria íbu ngagola ibugua ina biamogo biaga ka. Ani biradagua wali agali marunaga gendabi tara tara yu kagola Ngode Datagaliwabehanda inahondo biamogo biyadagua iname nde ti biamogo bibehe kama. Keriso ibugua tandaga dewa nayadagua inamebi ibuha howa tandaga noloma̱ya ngeleda. Ogonidagua ibunaga biamogo bulene timbuniore ngago inamebi ibuha howa yu kama. Iba 34.19, 94.19, Kl 1.24 Iname tandaga narimayagua Ngode Datagaliwabehanda tí biamogo bilonagabi pele ngilonagabi naramali. Ogonidagua Ngode Datagaliwabehanda ina biamogo biyagua nde tíbi biamogo bulebira. Biamogo bialu howa tandaga iname nalu ema nabi hibu lalu haramadagua tíguabi ema nabi hibu lalu hongo haabo halimulo hongo holene ngulebira. Anigo iname tíhondo mini dunu bia ho wiaabo haramali. Iname tandaga naramadagua tíguabi nalu howa biamogo bulene yu kamadagua tíguabi yu kamidalo manda bu kama. Lm 8.17, 2 Ti 2.12
I̱ hamene mbaliniru-o ina Esia dindini howa tandaga nalu harimago tí manda bu halimulo langerama. Gendabi gibi timbunioreme ina mo genda bia hayagola ina homolene hangu nga manda birima. Ab 19.23, 1 Ko 15.32 Ani manda bialu godi hale haganeme lalu, Tí homalimulo bolene nga, lagadagua layagola ina miniha gi ho hagadagua harima. Anidagua birimadagoni irane Ngode Datagaliwabe ibugua wali agali homeneru mo heya haga biago ka manda bialu ibunihondo hangu mini dunubia ho holoma̱yanaga ani bini. 10-11 Ina homolene gibi taraore wiagoria hemagola ina nahomoloma̱yanaga Ngode Datagaliwabehanda pele ngiyadagua lone pele ngulebira. Tígua Ngode Datagaliwabehondo inanaga bi la haramigome ina biamogo beramigo ibugua ina pele ngiyadagua ngiaabo holebira manda buwa ibuhondo mini dunu bia ho wiaabo kama. Ani buwa wali agali dewalime inanaga bi la hararu Ngode Datagaliwabehanda hale howa ina biamogo bulebira. Ani biragola hondowa tigua bi laraga halu ibuhondo turu halu ka̱i̱ lolebira. 2 Ti 4.18, 2 Pi 2.9
Polo ibu bi kira nalaga henego ogo
12 Iname dindini tí heba howa bialu harimagonaga bi tiga tiga lolenebi mini do nahe howa bulenebi Ngode Datagaliwabehanda nginigome ina haru hayagonaga ina miniha mitangi bialu turu ho kama. Dindinaga mini gigabi wuleneme ndo biamogo bia holene hongo Ngode Datagaliwabeha howa ibiyagonaga ina haru hene. 1 Ko 1.17, 2.4, 2.13, 2 Ko 2.17, Hi 13.18 13-14 Iyame tígua bi dagalabehegobi manda bibehegobi hangu gilibu wia haraba. Tígua áyu manda biai nahe kamigo manda biaiore halimulo hamelo ko. Ani manda buwa Anduane Homogo Yasunaga Horo ibirangi iname tí mitangi bialu turu timbuniore holeberamadagua tíguabi ina mitangi bialu turu timbuniore holeberami. 2 Ko 5.12, Pb 2.16
15 Aniore manda buwa tí halu ki mo turu halu biamogo bulenaga tí hemiria ala ibule manda manda bu haru. Ab 19.21, 1 Ko 16.5-6 16 I̱ Yudia dindi mani polenaga tígua biamogo bilimulo mitangi buwa i̱ Masedonia dindi pialu howabi dai bialu howabi tí kamiria ibule manda manda biru. 17 Aguani manda birudagoni i̱ kudaga howa layadalo manda birimibe. I̱na ibule manda bialu howa i̱ni hangu mitangi bialu e̱bi ndobi lamaga halu larulibe. 18 Ngode Datagaliwabe ibu heneneore kadagua i̱na tíhondo bi lo wirugo e̱bi ndobi lamaga halu ndo lo wiru. 19 Ogonigo Sailasabi Timodibi i̱bi iname Ngode Datagaliwabe Igini Yasu Keriso ibuore ka lalu tíhondo langialu harimago ibu e̱bi ndobi laga ndo ka. Ani ndo ibu e̱ dege laga ka. Ab 9.20, 18.5 20 Irane Ngode Datagaliwabehanda bi lowini ngaru bibahendenaga e̱ore laga ibu kagoni. Irane ogoninaga ibu mini yaraga hole iname Yasu Keriso minini howa, Ani bibe, laramali. Lm 15.8-9, Mo 3.14 21 Iyabi tíbi Kerisoha mini bilinahe holoma̱ya Ngode Datagaliwabehanda ina mo bia haga ka. Ibunime ina daba bagi ho helene kama. 1 Yo 2.20, 2.27 22 Ngode Datagaliwabe ibunime ina ibunaga kamago walia helobi ibugua yidaru bibahende inahondo ngulebiraore manda buluma̱yabi manane ibu Dinini inanaga bu habaneha heleda. Lm 8.16-17, 2 Ko 5.5, Eb 1.13-14, 2 Ti 2.19, 1 Yo 2.27, Mo 2.17
23 Ngode Datagaliwabe ibu i̱naga miniha manda biai kago ibu i̱naga la hagane helaro. I̱ tí hemiria Korindi naibirugoni irane i̱na bi larogome tí mo tandaga holeyane naibi harugoni. Lm 1.9, 2 Ko 11.31 24 Tígua Ngode Datagaliwabehondo mini mbiraore wuwa hongo ho haabo kamigo iname tíhondo, Mana ogobi yu tiga bidaba, lalu haru hole ndo kama. Ani biradagua iname tí turu halimulo tí heba biabe bialu kamagoni. 1 Pi 5.3

1:1: Ab 18.1, 1 Ko 1.1

1:2: 1 Ko 1.3

1:3: Lm 15.5, Eb 1.3, 1 Pi 1.3

1:5: Iba 34.19, 94.19, Kl 1.24

1:7: Lm 8.17, 2 Ti 2.12

1:8: Ab 19.23, 1 Ko 15.32

1:10-11: 2 Ti 4.18, 2 Pi 2.9

1:12: 1 Ko 1.17, 2.4, 2.13, 2 Ko 2.17, Hi 13.18

1:13-14: 2 Ko 5.12, Pb 2.16

1:15: Ab 19.21, 1 Ko 16.5-6

1:19: Ab 9.20, 18.5

1:20: Lm 15.8-9, Mo 3.14

1:21: 1 Yo 2.20, 2.27

1:22: Lm 8.16-17, 2 Ko 5.5, Eb 1.13-14, 2 Ti 2.19, 1 Yo 2.27, Mo 2.17

1:23: Lm 1.9, 2 Ko 11.31

1:24: 1 Pi 5.3