Habo nalolene bi gahenge lo winigo ogo 2 PIDA 1
2 Pida
Pidahanda Keriso hameigini dindi tara tarani hearuhondo beba mende ogo gilibu wia hene
Mbuga ogoha gilibu ngarunaga nemandi ogo
Pidahanda beba mende ogo gili binigo Keriso hameigini dindi tara tarani hagahaga bu hearuhondo gilibu wia hene. Gilibu wia henego irane Ngode Datagaliwabe mana henene ngadagua ndo lawai haga hearume mo hondo halu wali agali kayu biagane mana lawai halu ka layago Pida ibu hale howa mana ko ogoni wahai helo gili bini. Ani gili bialu lalu, Abosolo agali Yasu Keriso heba harimago iname Ngode Datagaliwabe ogobi ka lalu langirimago mana henene ogoni hangu yu tiga bulene nga, lalu gili bini. Ngode Datagaliwabe mana henene ngadagua ndo lawai haga hearume, Keriso dai nabulebira, layagola Pidahanda lalu, Ngode Datagaliwabehanda wali agali bibahendeore bo wahai hole hame nale howabi mini beregedai helo hame lowabi ibu ti mitangi bialu hondo haabo haga ka, lalu gilibu winigo nga.
Bu̱lu̱ baga buwa kuni gilibu ngago
1.1-2
Pidahanda bi pigane lenego 1.3-21
Ngode Datagaliwabehanda ina dabowa olayago 2.1-22
Ngode Datagaliwabe mana henene ngadagua ndo lawai haga henego 3.1-18
Keriso ibuni dai bulebiragonaga lenego
1
I̱ Saimono Pida Yasu Kerisonaga biabe bia hagabi abosolobi kogoni. Yasu Keriso inanaga Ngode Datagaliwabebi Pele Ngiagabi kago mini tigabiwi howa inahondo mini mbiraore wulene ngiaga. Mini mbiraore wulene ogoni baya gibiore ngiyago yu kamadagua tí maru yu kamiruhondo beba ogo gilibu wia haro. 2 Ko 4.13, Eb 4.5, Ta 1.4 Tígua Ngode Datagaliwabebi Yasu inanaga Anduane Homogobi manda bu kamigo howa biamogo bia holenebi mo palia holenebi tíha to̱laiore helo hamelo kogoni. Yu 2
Ngode Datagaliwabehanda ina dabowa olenego ogo
Keriso ibu Ngode Datagaliwabe howa ibunaga holene hongo taraore wialu wigome mbirale bibahende iname tigabiore bialu holoma̱yanaga ngiai haya. Ibunaga wá taraore holenebi bayale holenebi ina ngule olayago iname ibu manda bidamago togoni howa ibugua uruni ngiya. Yo 17.3, 2 Te 2.14, 2 Ti 1.9, 1 Pi 2.9 Ngode Datagaliwabehanda inahondo mbirale turu halu bame ngulebero leneru baya buruguleorebi dunini gibiorebi lowinigo ngulenaga tehinalu uruni ngiya. Tígua uruni mo yai howa wali agali bibahende mo ko helonaga dimagoli holene mana dindi bibahendeni wini ngaru wandialu bolangua halu pilimulobi Ngode Datagaliwabe ibunaga mini ngago tíha wilobi ibugua uruni ngiya. 2 Ko 7.1, Eb 4.24, 2 Pi 2.18-20, 1 Yo 3.2 Irane ogonigo tígua hongo halu mini mbiraore wirimigoriani bayale holene mo tago halu bayale holene yu kamigoriani manda bulene mo tago halu yu halimu. 1 Pi 3.7, 2 Pi 3.18 Ani buwa manda bulene yu kamigoriani mini haru holene mo tago halu mini haru holene yu kamigoriani hibu lalu hongo holene mo tago halu yu halimu. Ani buwa hibu lalu hongo holene yu kamigoriani tigabiore holene mo tago halu yu halimu. Ga 5.22-23 Ani buwa tigabiore holene yu kamigoriani Keriso ariago nenege hinulene mo tago halu yu halimu. Ani buwa Keriso ariago nenege hinulene yu kamigoriani gubalini holene mo tago halu yu halimu. Ga 6.10, 1 Te 5.15, 1 Yo 4.21 Mugube uruni yu holene ngago tígua yu yanga lowa yu kamiyagua tí bame nahe biabe bialu holeberami. Ani bialu howa inanaga Anduane Homogo Yasu Keriso bayuwaore manda buwa biabe biaabo hagabi lini bayale dagabi holeberami. Yo 15.2, Ta 3.14 Mbirali mana uruni nayi kago ibu mininaga de auhe mbirale kaundia ngago handabe nahe ka. Ibugua ko ala biyaru Ngode Datagaliwabehanda domo wahai hayago manda bibehegoyu ibu ogoni embeda holebira. Hi 9.14, 1 Yo 1.7, 2.9-11
10 Anigo hamene mbaliniru-o Ngode Datagaliwabehanda tí dabowa olene kamigo walia hoa haabo halu bayale bialu halimu. Tígua ani bialu harimiyagua mini mbiraore ala wirimigo wahalu hope howa naholeberami. 2 Pi 3.17, 1 Yo 3.19 11 Ani bialu Yasu Keriso inanaga Anduane Homogobi Pele Ngiagabi kago ibugua Handame Ho Haabo Kagoria anda polene tínaga ngagonigo anda poleberamiore.
12 Ani buleberamigo tí bi uruni langiyago manda biai howa bi ogoriani pini puwa hongo ho kamigonigoyu i̱na tí lone mo mitangi bia ho wiaabo holebero. Pb 3.1, 1 Pi 5.12, 2 Pi 3.1, 3.17, 1 Yo 2.21, Yu 5 13 I̱ nahome koore howa tígua uruni mitangi bu dai bilimulo langiaabo holebero. 2 Pi 3.1 14 Inanaga Anduane Homogo Yasu Keriso ibunime i̱hondo tigatiga langiyago i̱na i̱naga tingini togo biaga ogoni golo wahalu polene tu kaware ngago manda bido. Yo 21.18-19, 2 Ko 5.1, 2 Ti 4.6 15 Anigo tígua i̱ homedohabi i̱na bi o laroruni mitangi bu dai biaabo halimulonaga áyu i̱ nahome kongi bi uruni bayuwa hongo howa langiaabo holebero.
Kerisonaga wá taraore holene deme hendenego ogo
16 Inanaga Anduane Homogo Yasu Keriso ibu hongo gibiorehe howa dai bulebirago langirimagoni bame agali mbirame bi te lenego ilu yuwa ndo langirimagoni. Ina inanenaga deoreme ibunaga wá taraore holene baya burugule heagola de handarimagoni. 1 Ko 1.17, 1 Yo 1.1 17 Iname de handalu hemaria Wá Taraore Holene Tene Ngode Datagaliwabe Ibuniore kagoria howa bi ladali halu lalu. I̱ Iginiore ogoni gubalini ho ko. Ibuhondo turu timbuni ho kogoni, lowa Aba Ngode Datagaliwabehanda Yasu mini mo yaraga halu ibuhondo wá taraore holene miya. Ani miyagola ina handarima. Md 3.17 Md 17.1-5, Mg 9.2-7, Lg 9.28-35 18 Ina Yasu heba Ngode Datagaliwabenaga hari loma bia hene heagoriani hemaria bi ogoni dahuliya andagaha howa la dali hayago inanemeore hale harima.
19 Ani hale harimago Ngode Datagaliwabenaga bi mana latagi haga henerume mbiwia halu bi mana leneyaru heneneore leneya lowa iname yu tiga bu kamagoni. Ira hale arumaha wá hatagi hagadagua bi mana ogoni mo wála haga nga. Egabi naledaha yakundi mbira huririle tagira ibagadagua Horo Mbira pongo bo winigo tagira ibulebira. Tagira ibilobi Kerisonaga wá holeneme tínaga bu miniha wá hatagi helobi bi mana ogoni mo wála hagago yu tiga biaabo halimu. Iba 119.105, Yo 5.35, Mo 2.28 20 Ala manda bulene ngago ogo. Mbirali ibuninaga manda hangume Anduane Homogonaga mbugani bi gilibu ngago garealo mibe nahe kago manda bilimu. Lm 12.6 21 Bamba Ngode Datagaliwabenaga bi mana latagi haga henedaruni bi latagi halu howa mbira ibunime mbiwia hoa biyadagua mbiwia halu lene ndo. Agali henedarume Ngode Datagaliwabenaga bi mana latagi helo Ngode Datagaliwabe Dinini ibugua ti haru howa mo la hayagola tigua latagi haga bialu hene. Ab 1.16, 3.18, 2 Ti 3.16, 1 Pi 1.11

1:1: 2 Ko 4.13, Eb 4.5, Ta 1.4

1:2: Yu 2

1:3: Yo 17.3, 2 Te 2.14, 2 Ti 1.9, 1 Pi 2.9

1:4: 2 Ko 7.1, Eb 4.24, 2 Pi 2.18-20, 1 Yo 3.2

1:5: 1 Pi 3.7, 2 Pi 3.18

1:6: Ga 5.22-23

1:7: Ga 6.10, 1 Te 5.15, 1 Yo 4.21

1:8: Yo 15.2, Ta 3.14

1:9: Hi 9.14, 1 Yo 1.7, 2.9-11

1:10: 2 Pi 3.17, 1 Yo 3.19

1:12: Pb 3.1, 1 Pi 5.12, 2 Pi 3.1, 3.17, 1 Yo 2.21, Yu 5

1:13: 2 Pi 3.1

1:14: Yo 21.18-19, 2 Ko 5.1, 2 Ti 4.6

1:16: 1 Ko 1.17, 1 Yo 1.1

1:17: Md 3.17

1:17: Md 17.1-5, Mg 9.2-7, Lg 9.28-35

1:19: Iba 119.105, Yo 5.35, Mo 2.28

1:20: Lm 12.6

1:21: Ab 1.16, 3.18, 2 Ti 3.16, 1 Pi 1.11