Habo nalolene bi gahenge lo winigo ogo ABOSOLO 1
Abosolo
Abosolo hearume biabe bialu henego ogo
Mbuga ogoha gilibu ngarunaga nemandi ogo
Luguhanda Bi Mana Debene ala gili binigo gili biai howa mani mbuga mende Ngode Datagaliwabe Dinini ibugua abosolo agaliruha howa bialu henegonaga tebi gili bini.
Yasuhanda bi mbira lenego ogo, Ngode Datagaliwabe Dinini ibu tí kamigoha ibiragola ibunaga hongo holene tíha to̱lai holebira. Ani biragola tí Yarusalemehabi Yudia bibahendehabi Samariahabi dindi bibahende gibuni gibunihabi Yasuhanda agua laya agua biya lalu i̱ mo walia hagane tí holeberami, lene. Be 1.8 Yasuhanda ani layadagua ibunaga talima piaga biarume Bi Mana Debene loyogo lalu lamima ibaga bialu hene. Ani lamiyagola ala Yu wali agali hangume Keriso hameigini hene. Mani dindi bibahendeoreni Keriso hameigini ho dame bini.
Mbuga ogoni Keriso hameiginirume Bi Mana Debene loyogo lalu hayagonaga tagalene tebira ngago uru.
Mbira
Yasu dahuliya andaga daibu heha Keriso hameigini hayarume Yarusaleme howa bi mana loyogo lalu lamiyagola wali agali dewa hearume Yasuhondo mini mbiraore winigonaga lo nga.
Mende
Tigua Yu wali agalinaga dindi bibahendehabi Samariahabi loyogo lalu lamima penegonaga lo nga.
Tebone
Tigua dindi kaundia maru wiaruhabi Lomohabi loyogo lalu lamima ibaga biai hayagonaga te gilibu nga.
Abosolo hayarume biabe bialu hayagonaga te gilibu ngago Ngode Datagaliwabe Dinini ibugua Keriso hameigini hearuha karulai howa ti haru hayagobi mo hongo hayagobi ogoni dunini timbuniore manda buwa gilibu nga.
Bu̱lu̱ baga buwa kuni gili bu ngago
1.1-26
Yasunaga bi mana loyogo lelo manda manda binigo nga
1-14
Yasuhanda lalu, I̱ Abahanda ibu Dinini ngulebira, lenego.
15-26
Yudasanaga pani ha aribia helo dabenego. 2.1–8.3
Yarusalemeni Yasunaga bi mana loyogo lenegonaga nga 8.4–12.25
Yudiahabi Samariahabi Yasunaga bi mana loyogo lenegonaga nga 13.1–28.31
Polohanda Yasu manani howa bialu henegonaga nga
13.1–14.28
Yasunaga bi mana wali agali tara tara hearuhondo halu mbira lamima penego
15.1-35
Keriso hameiginirume lo mbiraore hole Yarusalemeni ngoai henego.
15.36–18.22
Yasunaga bi mana wali agali tara tara hearuhondo halu mende lamima penego.
18.23–21.16
Yasunaga bi mana wali agali tara tara hearuhondo halu tebone lamima penego.
21.17–28.31
Yarusaleme howa Polo dariba halu Lomo haru penego.
1
Ngode Datagaliwabehanda ibu Dinini ngulebero lenego ogo
1-2 Tiobilasa-o Yasu ibunaga biabe pigane teniyagoria howa ibu dahuliya andaga iraga holene tu helo howa ibugua biabe biyagobi bi mana lawai hayagobi bibahende i̱na i̱naga mbuga mbira ala gili birugoriani gilibu wiai harugoni. Yasu ibu iraga nahe howa ibugua Ngode Datagaliwabe Dinininaga hongome agali abosolo helo dabayaruhondo, Ogodagua bilimu ogodagua lalimu, laga bialu lalu lamiai hene. Lg 1.1-4 Mg 16.19, Lg 24.49-51 Yasu homalu mo heya howa horo pira mariani (40) halu dewaore ibuni walia hayagola tigua Yasu de handalu ibu heba haabo hene. Ibu heba halu tigua Yasu ibuniore heyu kagoni lowa manda biaiore hene. Yasu ti heba howa ibugua Ngode Datagaliwabehanda Handame Ho Kagonaga mana lamialu hene. Md 28.17, Mg 16.12, Lg 24.36-49, Ab 10.41, 1 Ko 15.5-7 Ibugua tihondo hongo howa lalu, I̱ Abahanda mbirali ngulebero lalu lo ngago ngulebira lalu abale langirudagua ogoni ngilo Yarusaleme wahalu napilimu. Lg 24.49, Yo 14.16-17, Ab 2.33 Yonehanda wali agali ibame baboraya binigo horo marudaru mbira howa Ngode Datagaliwabehanda ibu Dininime tí baboraya bia holebira, lene. Md 3.11, Mg 1.8, Lg 3.16, Yo 1.33, Ab 11.16
Yasu Dahuliya andaga iraga henego ogo
Abosolo biaru Yasu heba mandagi ngoai ho biruwa tigua Yasuhondo lalu, Anduane Homogo-o Isaraele wali agali inaneme handame ho holoma̱ya í̠na handame holene inahondo ngia dai bulenengi áyu ogonibe, lene. Ais 1.26, Dan 7.17, Amo 9.11, Md 24.3, Lg 24.21
Ani layagola Yasuhanda tihondo lalu, Maha tara tara bulenenaga horo i̱ Aba ibuni hangume ala manda manda buwa pongo bo wini ngago tínaga biabe ndo. Md 24.36, Mg 13.32, 1 Te 5.1 Ngode Datagaliwabe Dinini ibu tí kamigoha ibiragola ibunaga hongo holene tíha to̱lai holebira. Ani biragola tí Yarusalemehabi Yudia bibahendehabi Samariahabi dindi timbuni ogo gibuni gibunihabi Yasuhanda agua laya agua biya lalu i̱ mo walia hagane tí holeberami, lene. Md 28.19, Mg 16.15, Lg 24.47-48, Yo 15.27, Ab 2.32, 3.15, 5.32 Yasuhanda bi ogoni lai hayagola tigua handaya ho hearia ibu dahuliya andaga yaraga hayagola beralibame ibu ge hayagome ti Yasu lone handabe nahe hene. Mg 16.19, Lg 24.50-51, Yo 6.62, 20.17
10 Ibu piyagola tigua hari daligaha handa daga ho hearia aguabe tobane buwa agali kira aga peleorebi ogobi labolabo ti heagoria abale ha pani hene. Md 28.3, Mg 16.5, Lg 24.4, Yo 20.12, Ab 10.3, 10.30 11 Ani ha pani howa agali biago labome lalu, Galilialiru-o tí hari daligaha handa daga ho kamigo aginagabe. Yasu tí heba mandagi hemira howa Ngode Datagaliwabehanda ibu dahuliya andaga helo mo yaraga hayago de handarimigo Yasu o piyagonidaguaore dai bulebira, lene. Md 24.30, 26.64, Lg 21.27, Yo 14.3, 1 Te 1.10, 4.16, Mo 1.7
Mbirali Yudasa pani ho aribia helo dabenego ogo
12 Ani laya handala abosolo biaru Hari Olibe heagoria howa Yarusaleme dai bini. Hari Olibe weagoria heagoria howa Yarusaleme polene emene kaware dege wini. Lg 24.50 13 Ti Yarusaleme anda puwa tamu hobane daligani tini hagaha iraga halu anda pene. Pidabi Yonebi Yamesebi Andurubi Pilibibi Tomasabi Badolomiubi Madiubi Alibiasa igini Yamesebi Saimono ka̱i̱ mini mende Paidoro ibubi Yamese igini Yudasabi Md 10.2-4, Mg 3.16-19, Lg 6.14-16 14 agali urunime Ngode Datagaliwabehondo bi lole mandagi ngoai haga hene. Wali marubi Yasu ai̱ya Meribi Yasu hamenerubi abosolo biaru heba ngoai howa Ngode Datagaliwabehondo bi laga hene. Md 13.55, Lg 23.49, 23.55, 24.10, Yo 6.42, 7.5
15 Horo maru howa Yasu mana yu tiga biaga hearu bibahende lamaga howa handari mbirani pira kira (120) agima ngoai ho heagola Pidahanda heyuwa tihondo lalu, 16 Hamene mbaliniru-o Ngode Datagaliwabe Dinini ibugua Debidiha howa lalu Yudasahanda bulebiragonaga mbiwia ho wini. Ani binigo agali hearume Yasu minilo Yudasahanda walia hayagola Anduane Homogonaga mbugani lo winidagua lola haya. Iba 41.9 17 Ina heba biabe mandagi buluma̱ya Yasuhanda Yudasa dabayagola ibu ina aria hene, lalu Pidahanda lene. Md 10.4, Lg 6.16, Ab 1.25
18 Yudasa ibu ko biyagonaga muni yolo miyagome dindi mbira tu wini. Ani buwa dindi ogoriani ibuni homo ibira howa tombe tula lowa tini tagira ibiyagola tongo lene. Md 26.15, 2 Pi 2.15 Md 27.3-8 19 Wali agali Yarusalemeni hearu bibahendeme ogonidagua biya layago hale howa tigua tininaga bi lalu dindi ogoni mini Ageledama wini. Inanaga bi lalu Darama Dindi.
20 Pidahanda lalu, Iba Gana mbugani bi mbira lo ngago ogo,
Ibunaga anda tabuanda helobi
ibu anda ogoniha mbirali napalelobi,
lalu gilibu nga. Bi mendebi lo ngago ogo,
Biabe ibugua biaga wiyago mendealime bilo aribia holene nga,
lalu gilibu nga, lene. Iba 69.25, 109.8
21-22 Bi ogoni gilibu ngago mitangi bialu agali mbira ogobi dabami̱ya. Ngode Datagaliwabehanda Yasu mo heya hayago de hendenego helolene nga. Agali ogoni ibu Anduane Homogo Yasu heba ibaga bialu mandagi harimangi howa henegobi Yonehanda baboraya bialu hayangi howa Yasu hari daligaha Ngode Datagaliwabehanda mo yaraga hayangi howa henegobi bibahende biyago handai henego agali ogonibi mbira ina heba helo dabami̱ya, lene. Md 3.16, Mg 1.9, 16.19, Lg 3.21, 24.51, Yo 15.27, Ab 4.33
23 Pidahanda ani layagola tigua agali kiranaga mini mo wini. Agali mendego mini Yosebe maru hearume ibu mini Basabasa lalu marume Yasadasa laga hene. Mendego ibu mini Madaiasa. 24-25 Ani mo wuwa ti Ngode Datagaliwabehondo bi lene. Tigua lalu, Anduane Homogo-o wali agali bibahendenaga bu habaneha í̠ handai ho kegoni. Agali ogo labo dabarimago mendealigome Yudasahanda abosolo biabe biala ho ngelayago bu yolo mialu helo í̠na mbira dabarigo ina walia habe. Yudasa ibuni pole heneyagoha pole abosolo biabe ogoni wahalu piyago, lene. 1 Sml 16.7, Yar 11.20, Yo 2.25, Mo 2.23 26 Ngode Datagaliwabehondo bi lowa tigua o biago labonaga mini gilibu gambiruwa mo ema biyagola Madaiasa mini ala tagira ibiyagola ibu helene. Ani bialu abosolo beriali (11) biaruha ibu hombeane (12) ha tago hene.

1:1-2: Lg 1.1-4

1:1-2: Mg 16.19, Lg 24.49-51

1:3: Md 28.17, Mg 16.12, Lg 24.36-49, Ab 10.41, 1 Ko 15.5-7

1:4: Lg 24.49, Yo 14.16-17, Ab 2.33

1:5: Md 3.11, Mg 1.8, Lg 3.16, Yo 1.33, Ab 11.16

1:6: Ais 1.26, Dan 7.17, Amo 9.11, Md 24.3, Lg 24.21

1:7: Md 24.36, Mg 13.32, 1 Te 5.1

1:8: Md 28.19, Mg 16.15, Lg 24.47-48, Yo 15.27, Ab 2.32, 3.15, 5.32

1:9: Mg 16.19, Lg 24.50-51, Yo 6.62, 20.17

1:10: Md 28.3, Mg 16.5, Lg 24.4, Yo 20.12, Ab 10.3, 10.30

1:11: Md 24.30, 26.64, Lg 21.27, Yo 14.3, 1 Te 1.10, 4.16, Mo 1.7

1:12: Lg 24.50

1:13: Md 10.2-4, Mg 3.16-19, Lg 6.14-16

1:14: Md 13.55, Lg 23.49, 23.55, 24.10, Yo 6.42, 7.5

1:16: Iba 41.9

1:17: Md 10.4, Lg 6.16, Ab 1.25

1:18: Md 26.15, 2 Pi 2.15

1:18: Md 27.3-8

1:20: Iba 69.25, 109.8

1:21-22: Md 3.16, Mg 1.9, 16.19, Lg 3.21, 24.51, Yo 15.27, Ab 4.33

1:24-25: 1 Sml 16.7, Yar 11.20, Yo 2.25, Mo 2.23