Habo nalolene bi gahenge lo winigo ogo KOLOSI 1
Kolosi
Polohanda Keriso hameigini Kolosini hearuhondo beba ogo gilibu wia hene
Mbuga ogoha gilibu ngarunaga nemandi ogo
Kolosi tano ogoni Esia dindi haguane tano mini Ebesa howa uyura ni tagira ibiragohayagi wini. Polo ibugua ndo agali marume Kolosi wali agalihondo Bi Mana Debene lawai hayagola wali agali maru hearume mini beregedalu Yasuhondo mini mbiraore wini. Ani biyagola howa Keriso hameigini Kolosini hearuhondo, Agali marume Ngode Datagaliwabe mana henene ngadagua ndo lawai halu ka, layagola Polohanda hale howa beba ogo gilibu wia hene. Ngode Datagaliwabe mana henene ngadagua ndo lawai haga hearume lalu, Ngode Datagaliwabe kago bayuwaore manda bialu ibunaga pele mulene yu hai halimulo hari daligaha haru haga karubi haguane karubi mitangi bialu mini yaraga holene nga, lene. Tigua ogoni hangu ndo mana tara tara bulene nabulene lalubi dongone podo mabu bulene nga lalubi uruni ale dewa lawai haga hene. Bi ogoni layagola hale howa Polohanda o biarume ti Ngode Datagaliwabe mana henene ngadagua ndo lawai hayada manda buwa Ngode Datagaliwabe mana henene ngadaguaore bebani gili bialu tihondo wia hene.
Polohanda beba ogoni gilibu wia hayagola agali mini Tiyigasa ibugua Kolosi yu pene. Tiyigasa ibu Onisimasi heba pialu libu pene. Onisimasi ibu garabaya biabe ale biaga henego ibunaga anduane mini Pilimonohondo beba mende Polohanda gilibu wia henego ngagoni.
Bu̱lu̱ baga buwa kuni gilibu ngago
1.1-8
Polohanda ka̱i̱ lalu lenegonaga nga 1.9–2.19
Keriso ibuni kagobi ibu biabe binigonagabi nga 2.20–4.6
Kerisoha howa gahenge holenenaga nga 4.7-18
Lamaro bialu lenego nga
1
I̱ Polo Ngode Datagaliwabe ibuni hame leagome Keriso Yasunaga abosolo kogoni. I̱bi ina hamene Timodi ibubi iyame Eb 1.1 Ngode Datagaliwabenaga wali agali tí ina hameigini Kerisoha howa mini bilinahe haabo howa Kolosini kamiru tíhondo beba ogo gilibu wia haraba. Ina Aba Ngode Datagaliwabe ibugua biamogo bulene nawi howa biamogo bia holenebi mo palia holenebi tíhondo ngilo hame ledo. Lm 1.7
Ngode Datagaliwabehondo ka̱i̱ lalu bi lenego ogo
Iyame inanaga Anduane Homogo Yasu Kerisonaga Aba Ngode Datagaliwabe ibuhondo tínaga bi la halu howa ka̱i̱ laabo harabali. Eb 1.16, Pb 1.3 Tí kamirume Keriso Yasuhondo mini mbiraore wiaabo howa kamigobi Ngode Datagaliwabenaga wali agali bibahende karuhondo gubalini ho haramiligobi iyame hale howa ka̱i̱ lalu harabali. Eb 1.15, Hi 6.10 Bi lamulene heneneore ogoni Bi Mana Debene tí hemiria pigane ibiyagola mana ogoniha tígua mini dunu bia ho holene wiago hale harimi. Ani buwa tígua mini mbiraore wirimigobi gubalini harimigobi tene tínaga mini dunu bia ho kamigo dahuliya andagaha do ho ngane hendedamigo ogoni. 2 Ti 4.8, 1 Pi 1.4 Bi mana debene ogonime turu holene lini dewa mo da halubi wali agali dindi bibahendeni kagoha anda halubi ka. Tígua Ngode Datagaliwabehanda biamogo bulene nawi howa biamogo bia holene ngiyago pigane hale howa heneneoreyane handa walia ho harimingi howa bi mana debene ogoni anda haabo halu ka. Yo 15.16, Eb 3.2, 1 Pi 5.12 Ebaborasa inanaga biabe biamogo biaga turubiore kago ibugua Ngode Datagaliwabehanda biamogo bulene nawi howa biamogo bia hayago mana ogoni tíhondo lawai hayagoni. Ibugua mini bilinahe howa Kerisonaga biabe bialu iyanaga bia haga ka. Kl 4.12, Pm 23 Ngode Datagaliwabe Dinini ibugua tíhondo gubalini holene ngiyagoni Ebaborasahanda iyahondo langiya.
Tí ogonibi kami lalu pigane hale haribangi howa iyame Ngode Datagaliwabehondo tínaga bi la haabo halu henego kaba. Ngode Datagaliwabehanda hame ledago manda bulene tíha to̱lai helobi mini gigabi wulenebi mitangi bulenebi bibahende ibunaga Dinini ibugua ngiaga ngaru tíha wilobi iyame Ngode Datagaliwabehondo bi la halu kaba. Lm 12.2, 1 Ko 1.5, Eb 1.8-9, 1.15-17, 5.10, 5.17, Pb 1.9 10 Ani larabago ibugua biragola tígua Anduane Homogohanda tí halimulo hame ledadagua halubi ibu turu helo bulene ngadagua bialubi holeberami. Ani bialu kamigola tíha howa lini bayale dewa datagi halu tígua biabe bayale tara tararu bialubi Ngode Datagaliwabe ogobi kagolo manda bulene anda halubi holeberami. Yo 15.16, Eb 2.10, 4.1, Pb 1.27, 1 Te 4.1, Hi 13.21 11-12 Tínaga gendabiru ngagola ta nabi howa tí ema nabi hongo haabo halimulo Ngode Datagaliwabenaga hongo holene baya taraore kagome ibugua tí mo hongo helo laro. Ngode Datagaliwabehanda ibunaga wali agali wá holene kagoria kagola howa tihondo mule manda bu wini ngago Abahanda tí kamirubi ta halu ngule lowa tí mo karulape henego manda bialu tígua turu howa ibuhondo ka̱i̱ lalimu. Eb 1.11, 1.18, 1.19, 3.16, 4.2 13 Aruma holenenaga hongome ina dariba ho wiaria hondowa Ngode Datagaliwabehanda ina gini mialu ibu Igini gubaliniore ho kagome handame ho kagoria ina bayuwa haru anda ibuwa heleda. Lg 22.53, Eb 2.2, 1 Te 2.12, 2 Pi 1.11 14 Igini ogoni ibugua iname ko birimago domo wahalu ina golope ho helene kama. Eb 1.6-7
Keriso ibunibi ibugua biabe biagagobi ogo
15 Keriso ibu Ngode Datagaliwabe iname de nahandabehe kagobi howa ibugua ina walia halu ka. Ibu Ngode Datagaliwabe Igini wahene howa mbirale bibahende wabini karunagabi ngarunagabi ibu haguaneore ka. Yo 1.18, 2 Ko 4.4, Hi 1.3 16 Ngode Datagaliwabehanda ibu Iginiha howa hariha karubi ngarubi dindini karubi ngarubi bibahende wabini. Deme handabehe karubi ngarubi nahandabehe karubi ngarubi hari daligaha hongo tara tarahe karubi homogo karubi haru haga karubi hondo haga karubi bibahendeore ibuha howa wabini. Ngode Datagaliwabehanda ibu Iginiha howa uruni bibahendeore ibu Igininaga helo wabiai hene. Yo 1.3, 1.10, Lm 8.38, 11.36, Hi 1.2, 2.10, 1 Pi 3.22 17 Uruni bibahendeore ala hene ndo Keriso ibu alaore howa bibahendeore karubi ngarubi ti Kerisoha ho gimbu bu halu ibugua tinaga holene yamaga hai howa ka. Yo 1.1-3, 8.58, 17.5, 1 Ko 8.6 18 Keriso hameigini bibahende karu ibunaga tingini howa ibuni haguane ka. Tingini ogoninaga holene tene ibuni ka. Bibahende karubi ngarubinaga haguane ibuni hanguore helo ibu Ngode Datagaliwabe Igini wahene henego homalu tongolo miyagola mo heya hene. Ab 26.23, 1 Ko 15.20, 15.23, Eb 1.10, 1.22-23, Mo 1.5 19 Ngode Datagaliwabehanda ibuni manda binidagua ibu Igini ibuni kagobiore kagoni. Yo 1.16, 3.34, Kl 2.9 20 Ani binigo Ngode Datagaliwabehanda ibu Iginiha howa mbirale bibahendeore karubi ngarubi ibu kagoria haru dai bule manda bini. Ibu Igini ira bangani homayagome Ngode Datagaliwabehanda dindini karubi ngarubi hari daligaha karubi ngarubi bibahendeore mo palia hai howa ibuni kagoria haru dai biai hene. Lm 5.1, 2 Ko 5.18, Eb 1.7, 1.10, 2.13, 2.16, 1 Yo 2.2
21 Ala tígua Ngode Datagaliwabe erembira mialu kaundiaore pu harimi. Ogoni tígua mana ko bialu harimigomebi mini ko wialu harimigomebi Ngode Datagaliwabela waitigi ho harimigoni. Lm 5.10, Eb 2.12, 4.18, Ta 1.15-16 22 Áyu nde ibu Igini ibugua tandaga nalu homayagome Ngode Datagaliwabehanda tí ibunaga mo nenege helene kami. Ani binigo irane tíni ibuhondo loma bia hene howabi mini gahenge karulo howabi ko mbira tíha para nahebi kamigola ibunaga deni haru ibulenaga ani bini. Eb 2.14-16, 5.27, 1 Te 4.7, Ta 2.14 23 Tígua nde Ngode Datagaliwabehondo mini mbiraore wirimigo ema nabi wiaabo ho halimu. Bi mana debene hale harimigome mini dunubiahe holene ngiyago yu wa nahe yani ho halimu. Bi mana debene ogoni wali agali dindi bibahendeni karuhondo lamiai henego ogoninaga biabe bia haga mo hela henego i̱ Polo kogoni. Mg 16.15, Eb 3.17, 1 Ti 3.16, Hi 3.14
Polohanda Keriso hameiginirunaga biabe bia haga henego ogo
24 I̱na tínaga tandaga na harogonaga turu ho ko. Keriso hameigini bibahende karu Kerisonaga tingini kago i̱na i̱ninaga tinginiha tínaga tandaga na harogome Keriso ibugua tandaga ala nala ho winigo i̱na na tago halu namaro bero. Lm 5.3, 2 Ko 1.5-6, Eb 1.23, 3.13, Pb 3.10, 2 Ti 1.8
25 Keriso hameigini bibahende karunaga biabe bia haga holiya Ngode Datagaliwabe ibugua i̱ dabo helenego kogoni. Tí bayale halimulonaga ibugua biabe ogoni i̱na buliya i̱hondo ngini. Biabe ogoni Kerisonaga bi mana galone ngaru lamiai holene i̱ ngiya. Eb 3.2, 3.7-8 26 Kerisonaga bi mana ogoni Ngode Datagaliwabehanda bambaore wali agali bibahende hearuhondo mo pani nahe ngelenego áyu ogoni ibunaga wali agaliruhondoore walia halu ka. Lm 16.25-26, 1 Ko 2.7, Eb 3.3-5, 3.9-10, 2 Ti 1.10 27 Ngode Datagaliwabehanda bamba manda bu winigo ngago ogoni mana ala mo pani nahe ngelenego ibunaga wali agalihondo walia holene manda bu hene. Wá holene bi mana baya burugule ogoni wali agali taratara bibahendeore karunaga nga. Bi ala mo pani nahe ngelenedagoni Keriso ibu tíha kagoni. Ani bidagome Ngode Datagaliwabenaga baya taraore holene tínagabi wulebirago mini dunubia ho holene nga. Lm 9.23, 2 Ko 2.14, Eb 1.18, 3.8, 1 Ti 1.1 28 Ani bidago iname Kerisonaga mana galone wali agali bibahendeore karu ta nabihondo lamiai haramali. Iname wali agali bibahendeore Kerisoha ho gimbu bu howa mini bogabiore helo ibuhondo mule ti hangu hangu Ngode Datagaliwabe deni haru poramali. Ani bulenaga iname Ngode Datagaliwabenaga mini gigabi wulene ngiyarume wali agali bibahendeore mana nakarulape bialu holigo lowa ti lawai halu haramali. Eb 4.13, 5.27 29 Biabe ogoni biai holenaga Kerisonaga hongo tara i̱ha howa biabe bialu kagome i̱ mo hongo halu kagola i̱na hibu lalu biabe erekuibi bialu kogoni. Ab 20.20, 20.27, Eb 3.7, 3.20, Pb 4.13

1:1: Eb 1.1

1:2: Lm 1.7

1:3: Eb 1.16, Pb 1.3

1:4: Eb 1.15, Hi 6.10

1:5: 2 Ti 4.8, 1 Pi 1.4

1:6: Yo 15.16, Eb 3.2, 1 Pi 5.12

1:7: Kl 4.12, Pm 23

1:9: Lm 12.2, 1 Ko 1.5, Eb 1.8-9, 1.15-17, 5.10, 5.17, Pb 1.9

1:10: Yo 15.16, Eb 2.10, 4.1, Pb 1.27, 1 Te 4.1, Hi 13.21

1:11-12: Eb 1.11, 1.18, 1.19, 3.16, 4.2

1:13: Lg 22.53, Eb 2.2, 1 Te 2.12, 2 Pi 1.11

1:14: Eb 1.6-7

1:15: Yo 1.18, 2 Ko 4.4, Hi 1.3

1:16: Yo 1.3, 1.10, Lm 8.38, 11.36, Hi 1.2, 2.10, 1 Pi 3.22

1:17: Yo 1.1-3, 8.58, 17.5, 1 Ko 8.6

1:18: Ab 26.23, 1 Ko 15.20, 15.23, Eb 1.10, 1.22-23, Mo 1.5

1:19: Yo 1.16, 3.34, Kl 2.9

1:20: Lm 5.1, 2 Ko 5.18, Eb 1.7, 1.10, 2.13, 2.16, 1 Yo 2.2

1:21: Lm 5.10, Eb 2.12, 4.18, Ta 1.15-16

1:22: Eb 2.14-16, 5.27, 1 Te 4.7, Ta 2.14

1:23: Mg 16.15, Eb 3.17, 1 Ti 3.16, Hi 3.14

1:24: Lm 5.3, 2 Ko 1.5-6, Eb 1.23, 3.13, Pb 3.10, 2 Ti 1.8

1:25: Eb 3.2, 3.7-8

1:26: Lm 16.25-26, 1 Ko 2.7, Eb 3.3-5, 3.9-10, 2 Ti 1.10

1:27: Lm 9.23, 2 Ko 2.14, Eb 1.18, 3.8, 1 Ti 1.1

1:28: Eb 4.13, 5.27

1:29: Ab 20.20, 20.27, Eb 3.7, 3.20, Pb 4.13