Habo nalolene bi gahenge lo winigo ogo HAGAI 1
Hagai
Mbuga ogoha gilibu ngarunaga nemandi ogo
Hagai ibugua Anduane Homogonaga bi mana latagi henedagoni Yuda wali agali Babilono dindiha garabaya heneru golalu dai buwa Yarusalemeha heagola latagi halu hene. Ti dai buwa mali maru Yarusalemeha heane dege Anduane Homogonaga anda biago biadai nabi dege haabo hene. Ani howa bi mana latagi haga agali Hagai Segaraialame Serubabele Yosualanaga mini mo hongo halu libugua Anduane Homogonaga anda bo gialo wahene biago lone biadai bialu lotu lalu howa mana ko biaga wiaru mo wahai helonaga lene.
Hagaihanda lalu, Yuda wali agalime biabe ogoni birimiyagua nde biabe ogonime tíni baya hanguore mo mbiraore ho holeberemi. Ani beremigome Anduane Homogonaga bi mana latagi halu mbiwia haga ala heneruha howa bulebero lalu Anduane Homogo ibunime laga biniru heneneore tagira pugu bilonaga, lalu hene. Anduane Homogohanda tí mo bayale helaragola tíni holene bayale winidane handa walia holeberemi, lalu latagi halu hene.
Bu̱lu̱ baga buwa kuni gilibu ngago (1.1-15)
Anduane Homogohanda ibunaga anda bia halimu lenego 2.1-23
Biamogo bulenebi mini mo dunu bia holenebi lalu laminigo
1
Anduane Homogohanda ibunaga anda abaleore bia halimu lenego ogo
Kini Dariusi ibu Pesia dindiha kini heane mali mendegonaga ege waraganenaga horo mbira layagola Anduane Homogohanda ibunaga bi mana latagi haga agali Hagaiha howa bi ogo lamini.* Ogoniha gilibu ngagoni Yasu ibu dindini ibulenego mali handari duriani pira kira (520) ngelo howa lene. Ogoni mali inanaga dagalalu howa ege halininaga horo pira kirani dira (Ogasa 29) hayagola lene. Esr 4.24–5.2, 6.14 Ibugua bi ogoni agali Yudanaga gabumane haguane Serubabelebi agali loma binigo mo miaga haguane timbuni Yosuabi libuhondo lamini. Serubabele ibu Sealadiele igini hene. Yosua ibu Yahosadaga igini hene.
Ani heagola Anduane Homogo Hongo Haiheore kago ibugua Hagaihondo bi lamialu lalu, Wali agalime bi ogodagua laga, Anduane Homogonaga anda biago lone bulene wene dege nga, lagaya lamini.
Ani lamialu Anduane Homogo Hongo Haiheore kago ibugua wali agalihondo ibunaga bi mana latagi haga agali Hagaiha howa bi latagi hene. Ibugua ogodagua lene. I̱naga wali agaliru-o tíni andaga bayaleruha paluwa i̱naga anda mo ko hene ngelo kamigo aginagabe. Tíha ko tara tara tagira ibulene ngaru mitangi bialu holene nga. Tígua tomo dewa hangarimi tiraga emene hangu anda haya. Tí tomo maru ngami tiraga tí no karulapu nabulebira. Tínaga waini ibabi nalu holene wia ngami tiraga tígua naramigola no karulapu nabuleberemi. Tínaga aga bu holene dewa wu kamigo ai dagare birangi tínaga aga urunime tí bu karulapu nabulebira. Muni biabe biaga maru karume muni dewa yu ka tiraga tinaga muni yaga paudi nu diriwiha hanaragola tagu wahai haradagua bialu abale ereba haga biaga. Man 28.38-40, Hos 8.7, Hag 2.16 Anduane Homogo i̱ Hongo Haiheore kogome tíhondo bi ogodagua laro. Mbirale wali agali tíha ibirarunaga irane agidabe manda bulene nga. Ai bi ogo hale hadaba. Tígua hari ngaruha puwa i̱naga anda lone biadai bule irabuha ira dibu pilimu. I̱ turuho holiya i̱naga anda ogoni lone bia halimu. Ani bialu i̱naga mini yaraga hene howa mini leneore holiya tígua i̱nihondo lotu lalu holeberemi.
Tígua mabuha howa tomo dewa bu yalu íbu wulene manda bu kamiria tomo dewa nawiya. Tí tomo andaga bu yu íbu ngamiria i̱naga puyabume pulo wahai harugola tomo abale biba hayiya. Anidagua birudagoni irane tígua i̱naga anda giala holebu ngelo wahowa tigua tíninaga anda hangu hangu kamidagua bigibigi bialu kamigoni. 10 Irane ogonidagua beremigome iba dalu naibi gaea biaho wiaabo haya. Ani biyagome mabuha tomo dewa anda nahe ngagoni ndobe. 11 I̱nime iba dalu naibilonaga minu yu kogoni. Hari bare ngaruhabi widi mabu ngamiruhabi gerebi mabu ngamiruhabi ira olibe mabu ngamiruhabi iba dalu naibilonaga i̱na hapai ho ko. Dindini tomo tara tara hengedamigohabi wali agali bu kamiruhabi nogo bulumaga bu karuhabi tínaga tomo tara tara hengedamiru bibahendehabi iba dalu naibilonaga henemane i̱nime hapai ho kogoni, laya lene.
Wali agalime Anduane Homogonaga bi hale halu binigo ogo
12 Yuda wali agali ti Serubabele Yosuala heba mandagi heagola bi ogo lamiyago ti bibahendeme hale hai hene. Ani hale howa Anduane Homogo tinaga Ngode Datagaliwabehanda bi layago hale howa gi timbuni halu ibuninaga bi mana latagi haga agali dabo helene Hagaihanda bi layago hale howa talialu bialu hene. 13 Ani heagola Hagai ibugua wali agali bu hearuhondo Anduane Homogonaga bi mana lamialu lalu, Anduane Homogohanda bi ogodagua leda. I̱ Anduane Homogo i̱ni tí heba mandagi haabo holebero, laya. 14 Ani layagola Anduane Homogohanda wali agali bibahendenaga mini mo heya hayagola tigua Anduane Homogonaga anda bialu hene. Serubabele Yosualabi wali agali libu heba mandagi bu hearu tigua Anduane Homogo Hongo Haiheore kagonaga anda ogoni bule bialu hene. 15 Tigua anda pigane tenialu binidagoni Dariusi ibu kini henego mali mendenaga ege waraganegonaga horo pira kirani maria (24) heagola tigua anda ogoni pigane bialu hene. Mali ogoni Yasu Keriso dindini ibulenego mali handari duriani pira kira (520) ngelowa bini. Áyu kamangi manda bialu ege dini mini Sebedembanaga horo pira kirani mbira (21) hayagola pigane bialu hene.

*1:1: Ogoniha gilibu ngagoni Yasu ibu dindini ibulenego mali handari duriani pira kira (520) ngelo howa lene. Ogoni mali inanaga dagalalu howa ege halininaga horo pira kirani dira (Ogasa 29) hayagola lene.

1:1: Esr 4.245.2, 6.14

1:6: Man 28.38-40, Hos 8.7, Hag 2.16

1:15: Mali ogoni Yasu Keriso dindini ibulenego mali handari duriani pira kira (520) ngelowa bini. Áyu kamangi manda bialu ege dini mini Sebedembanaga horo pira kirani mbira (21) hayagola pigane bialu hene.