Habo nalolene bi gahenge lo winigo ogo YAMESE 1
Yamese
Yamesehanda Ngode Datagaliwabenaga wali agali dindi bibahendeni hearuhondo beba ogo gilibu wia hene
Mbuga ogoha gilibu ngarunaga nemandi ogo
Yamesehanda beba ogo gilibu wia henedagoni Ngode Datagaliwabenaga wali agali dindi bibahendeni purogo lo hearuhondo gilibu wia hene. Beba ogoniha bi gilibu ngarume Ngode Datagaliwabe mana inanaga miniha anda ibilo mini mo giga bia helo lalu bi dewa gilibu nga. Keriso hameiginime wali agali heba howa mana tigabi bia tagi holene nga.
Bi maru gilibu ngago uru. Dindini kama tambu homogo yagibanola holenebi ko mo bia holenebi bayale bulenebi talebu ki bulenebi mini mbiraore wulenebi biabe bulenebi hége haru holenebi lo guraga guraga nabi holenebi mini mo dindiha holenebi mine nahe holenebi ema nabi howa hibu lalu holenebi Ngode Datagaliwabehondo bi lolenebi urunidagua bialu holene nga, lalu gilibu nga.
Beba ogoniha bi galone duniniore gilibu ngago Ngode Datagaliwabehondo mini mbiraorewi karu tigua mana bayale biragome mini mbiraore wiyago mo walia haga ka, lalu gilibu nga.
Bu̱lu̱ baga buwa kuni gilibu ngago
1.1
Yamesehanda bi ala lenego 1.2-8
Mini mbiraore wulenebi mini gigabiwi holenebi 1.9-11
Homogo yagibanola holene 1.12-18
Ba hondolenebi mo pila holenebi 1.19-27
Bi mana hale halu bulenego 2.1-13
Wali agali talebu ki bulene nawigo 2.14-26
Mini mbiraore wulenebi biabe bia tagi holenebi 3.1-18
Keriso hameiginime tinaga hége haru holenego 4.1–5.6
Keriso hameiginime dindi mana ko hame lolene nawigo 5.7-20
Mana mbira mbira bulenego
1
I̱ Yamese Ngode Datagaliwabenagabi Anduane Homogo Yasu Kerisonagabi biabe bia haga kogo howa Ngode Datagaliwabenaga wali agali dindi bibahendeni purogo lo kamiru tí mitangi bialu beba ogo gilibu wia haro. Md 13.55, Mg 6.3, Ab 15.13, Ga 1.19, 1 Pi 1.1
Mini mbiraore wulenebi mini gigabi wulenebi ogo
I̱ hamene mbaliniru-o mo tandaga holene tara tara tí kamigoria íbu ngagola turuho halimu. Ab 5.41, Lm 5.3-5, Hi 10.34, 1 Pi 1.6, 4.13, 4.16 Mo tandaga holene tara tara urunibi íbu ngagola tí agi mitangi beramibe hondolenaga ngago manda buwa Ngode Datagaliwabehondo mini mbiraore wirimigome bolangua ho halimulonaga nga. Genda dewa urunibi íbu ngagola yu howa hongo ho haabo holeberami. 1 Pi 1.7 Hongo haabo howa hibulo kamigome mini bogabi baya buruguleorebi karulapeorebi holeberami. Anigo agi buabe toba ho harimiyagua Ngode Datagaliwabehondo bi lolene nga. Bi lalu howa mini gigabi wulene ngi lalu kagohondo ibugua nangule nale turu howa mo tago halu mulebira. 1 Kin 3.9-12, Min 2.3-6, Yo 15.7, 1 Yo 5.14-15 Anigo ngi lalu kamigo howa Ngode Datagaliwabehondo mini mbiraore wuwa ngulebiraore manda bialu bi lalimu. Mbiralime ibuhondo bi lalu howa mini dewa wuwa bi layagua ibu puyabu pu laragola iba yaribu bialu pu íbu dai bu biagagobi ka. Mg 11.24, 1 Ti 2.8 7-8 Ibugua mini dewa wuwa hariga mbiraoreni polene manda nabi hariga dewani polene manda bialu kagoni. Ogonibime Anduane Homogohondo mini mbiraore nawi howa mbira ngi laragola ngulebira mitangi bulene nawi. Ya 4.8
Yagibano karunagabi homogo karunagabi te ogo
Mbirali ibu Keriso hameigini howa yagibano kayagua Ngode Datagaliwabehanda ibu mo yaraga haragola turu holene nga. Ya 2.5 10 Mendeali ibu Keriso hameigini howa homogo kayagua Ngode Datagaliwabehanda ibunaga mbirale ngaru mitangi nabi ibu mo dindi haragola turu holene nga. Irane balawaya minane anda hararu gau lalu ereba hagadagua mbirale dewawi karu homolebira. Iba 37.2, 90.5-6, 1 Ko 7.31, 1 Pi 1.24, 1 Yo 2.17 Ais 40.6-7 11 Balawaya dedago nime da ba haragola gau lalu dogolope hagadagua homogo karu uruninaga biabe bialu kaore homalu bibahende ngelalu polebira.
Ba hondolenebi ko mo bia holenebi ogo
12 Mo tandaga holene tara tara ngagola tígua ema nabi hongo howa hibu lalu haabo howa Ngode Datagaliwabehondo gubalini ho karuhondo holene gahenge Ngode Datagaliwabehanda, Ngulebero, layadagua ngulebiraore manda buwa tí turu holene nga. Min 3.11-12, 2 Ti 4.8, Hi 12.5, Ya 2.5, 1 Pi 5.4, Mo 2.10 13 Mo tandaga holene ngagome mbirali ko mo bia haragola ibugua lalu, Ngode Datagaliwabehanda i̱ ko mo bia halu ka, lolene nawi. Ko ngagome Ngode Datagaliwabe ko mo bia habe nahe nga. Ngode Datagaliwabe ibugua mbirali ko mo bia nahaga ka. 14 Mbirali ibuni dimagoli haragome ko mo bia holene tene nga. Lm 7.7-10 15 Ibuni dimagoli howa ko biaga. Ko biyago anda howa homolene wulebira. Iba 7.14, Lm 5.19-21
16 I̱ hamene mbalini turubiru-o tíni mo hondo nahalimu. 17 Ngode Datagaliwabe ibunime mbirale bibahende baya buruguleore ngaru turu halu bame ngiaga ka. Ngode Datagaliwabehanda hariha wá haga bibahende karu Wabiaga ibu ka. Ngode Datagaliwabe ibu tara nahagabi de handa tara nahagabi mo aruma nahabehebi kagoni. Mal 3.6, Md 7.11, Yo 3.27, Lm 11.29, 1 Ko 4.7 18 Ngode Datagaliwabehanda bibahende wabuwa ina dunini holoma̱ya hame lowa ibunaga bi mana henene lolene ngagome mo gahenge ho helenego kama. Yo 1.13, Eb 1.12, Ya 2.3, 1 Pi 1.23, Mo 14.4
Bi mana hale halu bulene ngago ogo
19 I̱ hamene mbalini turubiru-o mbira ogo mitangi bulene nga. Bibahendeme bi bayuwa hale hai hami̱ya. Anigo bi abale la nabi kebabi abale nahe hami̱ya. 20 Wali agalinaga keba holene ngagome Ngode Datagaliwabenaga tigabi bulene ngago mo bia nahaga. Min 10.19, 17.27, Aga 5.1-2, 7.9
21 Anigo ko bulene bibahende ngaru wahai halimu. Ngode Datagaliwabehanda bi mana tínaga bu habaneha hangayago manga nahe howa bayuwa yu tigabu halimu. Ani birimiyagua Ngode Datagaliwabenaga pele mulene yu holeberami. 1 Ko 15.2, Kl 3.8, Hi 2.3, 1 Pi 1.9, 2.1
22 Bi mana ogoni hale dege harimiyagua tíni mo hondo harami. Hale halu bulene nga manda bilimu. Md 7.21, 7.26, Lg 6.46, Lm 2.13, 1 Yo 3.7 23-24 Mbiralime iba wa̱yu̱ handalu puwa mani ibunaga dengui abi kobe toba halu embeda haga. Ogonidagua mbiralime bi mana hale howa bia nabiyagua ibu ogonibi ka. Lg 6.47, Ya 2.14 25 Ngode Datagaliwabe bi mana baya buruguleore lowini ngagome wali agali golope haga. Mana ogoni mbiralime bayuwa mitangi bu haabo hayagua bi mana embeda nahe bulene ngadagua bialu ibugua Ngode Datagaliwabenaga turu holene handa walia holebira. Yo 13.17, Lm 8.2, 2 Ko 3.18, Ya 2.12
26 Mbiralime, I̱ Keriso hameigini ko, lowa ibunaga hége haru nahaga kayagua ibuni mo hondo hara. Mana yu kogo bamedago lowa ani laga ka. Iba 34.13, 39.1, 141.3, 1 Pi 3.10 27 Aba Ngode Datagaliwabehanda Keriso hameigini henemanebi tigabibi kayagua ti ogobiore holebira manda bu ka. Wali dalo bedarubi waneigini hono wahene karubi ti genda yu kagola biamogo bia holene nga. Ani bialu howa dindi mana ko ngarume tí mo pila holigo hondo wandialu halimu. Ais 1.16-17, 58.6-7, Md 25.36, Lm 12.2, 1 Yo 5.18

1:1: Md 13.55, Mg 6.3, Ab 15.13, Ga 1.19, 1 Pi 1.1

1:2: Ab 5.41, Lm 5.3-5, Hi 10.34, 1 Pi 1.6, 4.13, 4.16

1:3: 1 Pi 1.7

1:5: 1 Kin 3.9-12, Min 2.3-6, Yo 15.7, 1 Yo 5.14-15

1:6: Mg 11.24, 1 Ti 2.8

1:7-8: Ya 4.8

1:9: Ya 2.5

1:10: Iba 37.2, 90.5-6, 1 Ko 7.31, 1 Pi 1.24, 1 Yo 2.17

1:10: Ais 40.6-7

1:12: Min 3.11-12, 2 Ti 4.8, Hi 12.5, Ya 2.5, 1 Pi 5.4, Mo 2.10

1:14: Lm 7.7-10

1:15: Iba 7.14, Lm 5.19-21

1:17: Mal 3.6, Md 7.11, Yo 3.27, Lm 11.29, 1 Ko 4.7

1:18: Yo 1.13, Eb 1.12, Ya 2.3, 1 Pi 1.23, Mo 14.4

1:20: Min 10.19, 17.27, Aga 5.1-2, 7.9

1:21: 1 Ko 15.2, Kl 3.8, Hi 2.3, 1 Pi 1.9, 2.1

1:22: Md 7.21, 7.26, Lg 6.46, Lm 2.13, 1 Yo 3.7

1:23-24: Lg 6.47, Ya 2.14

1:25: Yo 13.17, Lm 8.2, 2 Ko 3.18, Ya 2.12

1:26: Iba 34.13, 39.1, 141.3, 1 Pi 3.10

1:27: Ais 1.16-17, 58.6-7, Md 25.36, Lm 12.2, 1 Yo 5.18