Habo nalolene bi gahenge lo winigo ogo YAREMAIA 1
Yaremaia
Mbuga ogoha gilibu ngarunaga nemandi ogo
Anduane Homogonaga bi mana latagi haga agali mbira mini Yaremaia henego ogoni ibu Babilono dindinaga Kini Nebugadenesa ibugua Yuda hameigini baba wai bulene kaware dege ngelowa Yaremaia ibu Yarusaleme tanoha haga hene. Yaremaia ibugua Yarusalemehabi Yuda dindi bibahendehabi de hondowa mamage halu halimu laga bialu hene. Ibugua lalu, Wali agali tígua damanaga biabe biagaru yu wahalu Anduane Homogo ibuni kagoha hole dai nabi haabo harimiyagua nde ibugua tí mana lalu pani ngulebira, lalu lamini. Ani lamiyago lelowa tigua ibunaga bi layago hale nahe ti biyago ale bialu haabo howa dama tara hearunaga mini yaraga halu bi pupu wialu hemiria bulebira layago henene tagira ibini. Ani biyago Yaremaia ibuni de hendene.
Yaremaia ibugua bi maru mbiwia halu lenego Anduane Homogohanda ti mani lone dara halu haru dai bulenaga lowini. Ibugua lalu, Anduane Homogohanda tí dara halu haru dai bialu Yuda wali agali bibahende tíninaga dindi wiyagoria lone haru dai bulebira, lenego gilibu nga. Yaremaianaga mbuga ogo agali Anduane Homogonaga mana latagi halu mbiwia haga maru hearunaga mbuga wiaruni ale ndo ibu mende ale nga. Ibugua ibuninaga bite dewa lo nga. Yaremaia ibunime biabe ogoni bua nahe howa dege harugo lowa ibuninaga hame winigo mo wahalu Anduane Homogonaga bi hale halu ibugua bia layago talialu bini.
Anduane Homogohanda la layago mbirago mo wanahe bibahende latagi hai henego mbuga ogoha gilibu nga. Horo dewangiore ibu genda yu howa ibuni daraho haga hene. Anigo ibuninaga genda uruni mo do nahaga hene. Ibugua bidagobi tigatigaore latagi haga binidaruni mbuga ogoha wiai ka. Yaremaia ibugua Yuda wali agaliru gubalini timbuni ho howa Ngode Datagaliwabehanda wali agali urunihondo bi hongohe mbira lamule pu layagola ibu bu miniha genda halu lamua nahe howa dege lamialu hene. Ani lamiyago hale howa wali agalime ibu bo wahole biyagola ibugua Ngode Datagaliwabehondo gomogomo lowa bi dewa lalu haga hene. Be 20.9 handabe.
Yaremaiahanda bi bayale mbira latagi henego. Bi ogoni Be 31.31-34 ogoriani gilibu nga. Be hobane liruniha howa Ngode Datagaliwabehanda ibunaga wali agali baba habo nalolene bi gahenge lowinigo ogoni latagi hene. Habo nalolene bi gahenge ogoni beba mbuganibi ege to̱le̱nibi ndo gilibu wulebira. Bi ogoni ibu wali agali tininaga bu miniha hongowa tigua talialu bule turu holebira lene. Ina Keriso hamewaneigini kamarume habo nalolene bi gahenge ogoni Ngode Datagaliwabenaga Dinini ibunime walia haragola henene lenedane handaramali.
Bu̱lu̱ baga buwa kuni gilibu ngago (1.1-19)
Anduane Homogohanda Yaremaia olo helenego 2.1–25.38
Yaremaiahanda mbiwia halu bi latagi henego 26.1–45.5
Yaremaia Anduane Homogonaga manani howa tandaga nalu henego 46.1–51.64
Hameigini tara tara mitangi bialu Yaremaiahanda mbiwia henego 52.1-34
Yaruseleme tano karulalu bo heda henego
1
Anduane Homogohanda ibunaga bi mana latagi haga helo Yaremaia olenego ogo
Mbuga ogoha Hiligaia igini Yaremaianaga bi lenego nga. Hiligaia ibu hameigini loma binigo mo miaga hearu aria howa Beniyamini hameiginirunaga dindi mbira Anadodo winigoha haga hene. Kini Yosaia ibu Amono igini howa Yudanaga kini mali haleria (13) heagola horo ogoningi Anduane Homogohanda ibunaga bi mana Yaremaiahondo lamini. 2 Kin 22.3–23.27, 2 Bit 34.8–35.19 Mani Yosaia igini Yahoiagimi ibu kini heangi Anduane Homogo ibugua bi maru Yaremaia lamia dege bini. Horo ogoningi howa Anduane Homogohanda ibunaga bi Yaremaiahondo lamiaabo halu heane dege Yosaia igini Sedegaia ibu kini heane mali bearia (11) pene. Mali beanegonaga ege dauni hayagola waitigime Yuda wali agaliru dindi taraha tinaga garabaya biabe ale bialu helo minu garabayabu yalu pene. 2 Kin 23.36–24.7, 24.18–25.21, 2 Bit 36.5-8, 36.11-21
Yaremaia olenego ogo
Anduane Homogohanda Yaremaia i̱hondo bi ogodagua langiya. Í̠ ai̱ya tombeha í̠ nabereha i̱na í̠ ala bamba dabenego kegoni. Mani í̠ ai̱yahanda í̠ taba nahe ibu tombeha berengi i̱na í̠ dindi bibahendeni i̱naga bi mana latagi haga habelo dabaru. Iba 139.15-16, Ais 49.1, 49.5
Anduane Homogohanda bi ogoni layago hale howa i̱na ladai bialu lalu, Anduane Homogo Bibahende Haru Haame Ho Haga-o i̱na bi mana ogoni latagi holene manda nawi igiri emene dege kogonidago agua loliyadabe, laru. Har 4.10, 1 Kin 3.7 Ani larugola Anduane Homogohanda ladai bialu lalu, I̱ igiri emene kogoni, nalabe. I̱nime wali agali maru karuhondo i̱na bi lamule pu larugoha polene nga. Ani bialu bi lamibe larogo lamiaiore holene nga. Í̠na ti hondowa gi holene nawi. I̱na í̠ biamogo bulebero. I̱ Anduane Homogo i̱na bi o ledogoniore, laya.
Ani lai howa ibunaga gi i̱ha dogola ede halu i̱naga ne hambuni ela howa ogodagua laya. Hale ha. Áyu i̱naga bi í̠naga ne hambuni wia harogo ogoni latagi habe. 10 Áyu howa í̠na wali agali hameigini dindi tara tarani bu karuni haru habelonaga i̱na hongo ngerogoni. Í̠na mbirale ngaru handayaho habelonaga hongobi bo gialo bagabu wahabelonaga hongobi bope halu mo ko habelonaga hongobi bulene ngaru bialu habelonaga hongobi hongolene ngaru hangabelonaga hongobi bibahende karulapeore ngerogoni, lalu Anduane Homogohanda laya, lene.
Yaremaiahondo de gandeba kira walia henego ogo
11 Anduane Homogohanda i̱hondo hale halu lalu, Yaremaia-o ogoni agile hendedebe, laya. Ani layagola i̱na ladai bialu lalu, Ira mini amononaga magane hendedogoni, laru. 12 Ani larugola ibugua ladai bialu lalu, Tigatiga larigoni. I̱naga bi lo wirugo bibahende tagira piai helo de hondo holebero, laya.* Ogoniha howa ira amono layadago inanaga bi lalu, De hondo haga, laga.
13 Ani lowa ibugua lone i̱hondo hale halu lalu, Ai lone mbira agi dege hendedebe, layagola i̱na ladai bialu lalu, Todobene be mbira uyugohayagi iba mbolia balu kane hendedogo ai orayagi odo dai bibehedane hendedo, laru.
14 Ani larugola Anduane Homogo ibugua i̱hondo lalu, Mo ko holene timbuniore mbira uyugoniha howa ibalu wali agali dindi ogoha karu bibahende mo ko hai holebira. 15 Anduane Homogo i̱nime kini uyuruniha bu karu ibilarogo tigua tinaga ami agali dewaore haru ibulebira. Ibuwa kini uruni tinaga biragane dagiaru Yarusaleme tanonaga panga harabani wia paraho ngelo bedagola wali agali tagira pobe naheore wara andaho birulebira. Wara anda howa ho mabubupe halu Yuda dindiha tano ngaru bibahendebi ani dege biai holebira. 16 Irane i̱naga wali agaliru tigua i̱naga bi mo wahowa mana ko ngaru hangu bialu i̱ni erembira ngialu tigua dama karuhondo bi pupu wialu uruninaga mini yaraga halu lomaru miaga kamigonaga ani ibilolebero. 17 Anigo ai heyalu í̠na wali agaliru bi ogoni lamule pu nabere. Abale puwa gi nahe bi langiruruni bibahende lamiai habe. Í̠ áyu ogoni gi hariyagua uruninaga deni howa í̠ mogo lalu gi timbuniore habelo i̱na í̠ mo gi bia holebero. 18 Yaremaia-o hale ha. I̱na í̠ mo hongo halu tano mbira pabe hongoheore bu mabubi ngaligobi howa aeaneme anda gene hene howa to̱le̱ boronosime pabe bini hongoheore kaligobi í̠ heledo. Ani bidogome Yudanaga kini karumebi agali haguane karumebi loma binigo mo miaga karumebi wali agali bibahende karumebi í̠ bope naholebira. 19 Agali uruni tigua í̠ baba waitigi bu hinu haho holebirago í̠ bope habe nahe holebira. I̱nime baya hangu handayaho í̠la mandagi howa biamogo bialu holebero. I̱ Anduane Homogo i̱na bi o ledogoniore, laya.

1:2: 2 Kin 22.323.27, 2 Bit 34.835.19

1:3: 2 Kin 23.3624.7, 24.1825.21, 2 Bit 36.5-8, 36.11-21

1:5: Iba 139.15-16, Ais 49.1, 49.5

1:6: Har 4.10, 1 Kin 3.7

*1:12: Ogoniha howa ira amono layadago inanaga bi lalu, De hondo haga, laga.