Habo nalolene bi gahenge lo winigo ogo NAHUMU 1
Nahumu
Mbuga ogoniha gilibu ngarunaga nemandi ogo
Anduane Homogonaga bi mana latagi haga agali Nahumu ibugua bialu henedarunaga te iname dewa manda nabidama. Ibugua mbuga ogoni gilibu winidago irane Niniba tano timbuni wiago mo ko hayagonaga turu howa gili bini. Niniba tano ogoni Asiria dindinaga tano duniniore timbuni wini. Asirianaga ami hongoheore howa dindi bibahende wiaruha wai biai halu tigua wali agali dindi uruniha hearu bope hai halu ti wayali hene. Tigua dege lone ibalu Isaraele wali agali dindi abene uyurayagi palearu bo garabayabu yalu piai howa dindi tara tara wiaruha purogo lelene.
Ani pu henego ai Isaraele wali agali tigua Niniba tano dunini wiago tinaga waitigi maru hearume ibalu bo gialo baga bialu mo labu hai hayagola ti ogoninaga turu timbuni ho hene. Asirialirume mine halu mana ko dewa bialu ti mo ko halu bo wahai hayagonaga Anduane Homogo ibunime Niniba pani mialu bo gialahole biyada lalu Nahumu ibugua mbuga ogo gili bini.
Bu̱lu̱ baga buwa kuni gilibu ngago (1.1-15)
Anduane Homogohanda Niniba wali agalihondo keba henego 2.1–3.19
Niniba tano bo labu henego
1
Anduane Homogohanda Niniba wali agalihondo keba henego ogo
Anduane Homogonaga bi mana haga agali Nahumu ibugua de gandeba handalu hearia Anduane Homogohanda bi lamini. Nahumu ibu Elegosoali henego howa tano dunini timbuni Niniba wiagonaga de gandeba hendene. Ais 10.5-34, 14.24-27, Seb 2.13-15
 
Anduane Homogo ibuni Ngode Datagaliwabeore howa wali agalime mbirale dama mitangi bialu gime wabini bu ngaruhondo bi pupu wialu helo ibugua henge namiaga ka. Har 20.5, Man 32.35, 32.41, Iba 94.1
Ibugua wali agali ibuhondo mine haga karu pani mialu minu bagaore ka.
Ibugua uruni biaga karuhondo keba howa tini ko biyagonaga yolo miaga ka.
Anduane Homogo ibu keba abale tongolope nahaga ka. Har 34.6-7, Iba 104.3, Ais 29.6, Amo 1.14
Anigo ibu hongoheore howa ibugua wali agali mana ko biaga karu pani nelo miagaore ka.
 
Anduane Homogo ibu poragoha iba dalubi puyabu dalu dindigunibi ti haru piaga.
Beraliba ibunaga geha be abalu tau laradagua biaga.
Ibugua iba solowara bedagohondo hundia laragola bibahende hundu tegelaga.
Iba timbuni pedarubi hundiai helaga ka.
Mabu bayale Basana dindini ngarubi Hari Kameloha ira bayale karubi palawaya bayaleru Lebanono dindini anda ho karubi uruni bibahende Anduane Homogohanda mo gaula hai helaga.
Anduane Homogonaga deni howa hari timbuni wedarume ema biai halu hari emene ngaru do elai halu iba poradagua biaga. Anduane Homogo ha pani haga birangi dindi bibahende ema biagimbu bialu wali agali bibahendeore mogo lalu duru lai haga.
Anduane Homogohanda keba ho kangi mbirali ai ibu bayale habehebe.
Ibugua mo ko holene ibilarangi mbirali ai ibu yo pobehebe.
Ibugua keba howa ibunaga de daramabi ira hungu ale kagola ege to̱le̱ ngaru dodahole bialu be abalu haga.
 
Anduane Homogohanda inahondo bayaleore biaga ka. Iba 25.8, 28.8, 37.39-40
Genda tagira ibirangi ibunaga wali agali bu karunaga ha do anda ibuni kagoni.
Wali agali ibuni karia poraru ibugua ti biamogo biaga ka.
Ibu iba li hongohe poraligobi howa ibugua Niniba tano bo gialahole bialu mo ko hai holebira.
Mbirali ibunaga bi mo wahaga karu homelo bo wahai haga ka.
Waitigi kamiru tígua Anduane Homogohondo agile bulene paraho bi lalu kamibe.
Tí bibahende bo wahai holenego dege manda bu halimu.
Mbiralime ibuhondo ko haluki bulene nawiore.
 
10 Tí lulu iba nowa luluyu haradagua kamiria ibugua tí bibahende mbirale anihe kenda polene ale ngaru irani delagadagua delalu dangi yobi ngaru delaradagua bialu tí bo delai holebira. 11 Ninibali kamiru aria mbirame mini ko wu howa ibugua Anduane Homogo mo ko hole lowa bi lalu hea. 12 Ani layagoyu Anduane Homogohanda ibunaga Isaraele wali agaliruhondo lalu, Asiria wali agali áyu hongohe dewaore ha kagonigo mani i̱na ti bo biba halu erebahai helolebero. I̱naga wali agaliru tíha genda timbuni i̱nime mo wia harugo ai uruni bibahende mani lone nawulebira. 13 Asirialime tí handayaho ha hayagonigo ainde áyu i̱na tinaga hongo bope harogola tigua tí lone garabaya nabulebira, laya.
14 Anduane Homogohanda Asirialiruhondo bi hongohe mbira lo wialu lalu, Tínaga aguaneneru yu wahene mbiraore hangubi mani naholebiraore. Tínaga bi pupu wiaga anda bu karuha mbirale dama mitangi bialu bi pupu wule gime wabu ngamiruni bibahende bo gingirulo bagabu wahaiore holebero. Tí koorene ko dindini habe nahedago tínaga homali ina manda manda bu wia kogoni.
15 De handadaba. Agali mbira bi bayale galoneore mbira yalu amu hari nene ngagoria howa dalipe halu ibiragoni. Ibugua lalu, Iname wai biai halu wayali harimagoni, lalu lama ibiragoni. Anigo Yuda wali agali tígua horo dunini mbira íbu ngoai haga wirangi ngoai halu Ngode Datagaliwabe ibunihondo mitangi bialu lotu lalu halimu. Ani bialu mbirale maru ibuhondo mule lalu lo wirimiruni ibuhondo milimu. Ani beramigola agali ko biaga karume tínaga dindi lone karulole naibulebira. Ngode Datagaliwabehanda ti bo wahaiore haya. Ais 52.7, Lm 10.15

1:1: Ais 10.5-34, 14.24-27, Seb 2.13-15

1:2: Har 20.5, Man 32.35, 32.41, Iba 94.1

1:3: Har 34.6-7, Iba 104.3, Ais 29.6, Amo 1.14

1:7: Iba 25.8, 28.8, 37.39-40

1:15: Ais 52.7, Lm 10.15