Habo nalolene bi gahenge lo winigo ogo IBA GANA 1
Iba Gana
Mbuga ogoha gilibu ngarunaga nemandi ogo
Isaraele wali agalime Ngode Datagaliwabe mitangi bialu iba gana lolenebi ibuhondo bi lolenebi mbuga ogoniha gilibu winigo nga. Tigua Yarusalemeha ngoai holene wiangi harigani pialu howa iba gana lagabi Anduane Homogonaga andaha lotu lalu howa iba gana lagabi hene. Wali agalime turu howabi genda howabi iba gana lalu haga hene. Mali mbiraore ndo mali dewaore howa wali agali maru hearume iba gana gilibu yu ngoai howa mbuga mbiraoreni gilibu winigo nga. Iba gana tara tara gilibu ngaru Ngode Datagaliwabehondo iba gana lolenebi ibuhondo bi lolenebi uru.
Ngode Datagaliwabenaga mini yaraga halu lolenebi
Ko birimaru lapani halu domabe lolenebi
Kini gahenge dabobagi helolene horongi bi lolenebi
Ina gi ho kamangi mamage holenagabi mini dunubia holenenagabi bi lolenebi
Turu howa ka̱i̱ lolenebi
Waitigi ibiragola pani mulenaga bi lolenebi
Wali agalime mana bayaleore mo tene holenaga bi lolenebi uruni nga.
Iba gana uruni ina dindi holene hariga baya gibiore walia halu mo hongo haga nga. Yasuhanda iba gana mbuga ogoniha howa mana lawai haga hene. Keriso hamewaneigini pigane henerumebi hama ibalu áyu kamarumebi iba gana mbuga ogoni mo tene halu laga henego kama.
Ngode Datagaliwabehondo iba gana lolenebi bi lolenebi gilibu ngaruni ina wali agalime lolenenaga lo nga. Ina kamagoria horo marungi keba holene wialu horo marungi turu holene wiaga. Horo marungi wandari igiri bayale hongohe holene wialu horo marungi wali agali wahe holene horo wigi biaga. Iba gana mbugani howabi gilibu ngago wali agali holene áyu kamagoria ngolo be lo nga. Iba gana urunime Ngode Datagaliwabenaga wali agali bamba heneru biamogo bialu mini mo hongo hama ibaho winigo áyu inabi ogonidagua dege biaga.
Bu̱lu̱ baga buwa kuni gilibu ngago
Mbuga ogoniha iba gana mbira mbira lamaga halu handari mbirani pira duria (150) gilibu nga. Uruni tale buwa wabuni duria tu urubi wigi bida.
Mbuga Mbira
Iba Gana 1-41
Mbuga Mende
Iba Gana 42-72
Mbuga Tebone
Iba Gana 73-89
Mbuga Mane
Iba Gana 90-106
Mbuga Dauni
Iba Gana 107-150
Mbuga Mbira
1
(Iba Gana 1-41)
Turu henene holenenaga ogo
Mbirali mana ko biaga karume ko bia larago hale halu nabiagabi Iba 26.4, Min 14.15, Yar 15.17
tigua ko biradagua nabiagabi
Ngode Datagaliwabe deni habane nabuleneme mege bialu bedagoria nabiragabi kago
ibu turu ho ka.
Ani nabi ibugua Anduane Homogohanda bi ledadagua bulenegoha
turu holene ngaria handa walia howa
mbiraga horombebi daga lalu mitangi biaabo haga ka. Yos 1.8, Iba 119.1, 119.35, 119.47, 119.92
Ira iba angeni bu karu anda halu
lini dolenengi dalu
yuniru gau nalagadagua
ibugua mbirale bigi birago bayale haga bulebira. Ais 3.10, Yar 17.8, Ese 47.12
 
Ai ko biaga kago ibu ogonibi ndo ka.
Ibu puyabume abalu hilu yalu piaganego ale ka.
Ani bidago Ngode Datagaliwabehanda godi larangi
ko biaga karu tí koore biaga kamigoni lalu
ibuninaga wali agali karu heba mandagi habe nahedagola
ti dabo bagi holebira.
Mini tigabiwi karu Anduane Homogohanda ti haru howa mamage haga. Nah 1.7, Yo 10.14, 2 Ti 2.19
Ko biaga karume hariga pialu karu homoleneni tagira pole pora.

1:1: Iba 26.4, Min 14.15, Yar 15.17

1:2: Yos 1.8, Iba 119.1, 119.35, 119.47, 119.92

1:3: Ais 3.10, Yar 17.8, Ese 47.12

1:6: Nah 1.7, Yo 10.14, 2 Ti 2.19