Kolosai
1
Anutuac ewa siŋiguc Kristo Yesuac Méliméli ic wawaŋa ni Paulo ʒéma ninʒéŋ ninʒéŋac munana Timoteo niri Kolosai ama yandaiguc ic embac téréya Kristoac qeriaiguc keŋhéi hahéi qahac* Hénia méŋ imi ninʒéŋgéma. kecanʒu onac muru kiwi yomi oénécmizic. Anutu Maŋgocnina iwarunec* Kiwi méraginanéŋ ooya tosaraiguc; Maŋgocnina ʒéma Miŋ Kewu Yesu Kristo iorac. ewa hia ʒéma luaenéŋ he énécmimac.
Ewa hia ac ʒéma ʒéwelec ac.
Nereŋ onac niŋ wamma ʒéwelec waŋanʒic séc neŋaŋ Miŋ Kewunina Yesu Kristoac Maŋgocya Anutu ewa hia ac ézéanʒic. Imi mia Kristo Yesu ninʒéŋgé mizu imuac buŋa ʒéma ic embac téréya ionac muru ala siŋgina hezac imuac buŋa niŋanʒic imuac niŋac imuhuc waŋanʒic. Waŋu ninʒéŋ ninʒéŋ ʒéma siŋgina imi mia onac wamma kurumeŋiguc niŋkinʒéŋ gina kumugic hezac imuacnec mia hicŋianʒac. Waŋu niŋkinʒéŋ imi suruc hélawac buŋa hiabia becnec niŋgic imi mia. Buŋa suruc hiabia imi onac muru haréyu ini nimma hélacnec Anutuac ewa hia niŋtegicgic nalé imuarunec sucginaiguc hicŋiyec ésécnec baera baera sécgéma kemma hélaguc wamma yandianʒac. Imuhucyanec niniguc momacnec weleŋ qeqe icya wamma kecanʒac ala sorocnina Epafiranéŋ ku énécmiyu niŋgic. Ic imi onac Kristoac ai ic héla wamma kecʒac. Inéŋ mia Uŋa téréyawac qeriaiguc ala siŋ waŋamuanʒu imuac suruc nérézéyec.
Hénia imuac niŋac onac suruc niŋic nalé imuarunec éréma niri onac niŋ wamma ménda waima Anutu ʒéwelec mianʒic. Imi mia Uŋa téréyawac niŋtegic qiŋtegic ʒéma niŋ asac asariawac kuhaiguc niniŋ Anutuac ewa siŋac murunec hahaya imi kuaya qeqeya tiénécmimac niŋac ʒéwelec waŋanʒic. 10 Waŋu waŋgic séc Miŋ Kewuninanéŋ niŋu sécgéyu ewa hia nimmac. Waŋu ai hénia hénia eeyaguc memu séc héla mihicŋima Anutuac hénia niŋareŋgégic imuac niniŋa imi yandima kemmac. 11 Waŋu ʒérabéra horu horugia ségiségi wamma bisima keŋkecgic tecgémac niŋac iwac edamuyawac kuhanéŋ kucgina mocʒoŋ meseli énécmimac. 12 Imi mia edamuyaiguc ic embac téréyawac ai buŋa bakia késamuac séc mehiaru énécmiyec* Kiwi méraginanéŋ ooya tosaraiguc; mehiaru nénécmiyec. Maŋgocnina iwac mia ewa hia nimmimanec imuhuc wammu. 13 Inéŋ mia panamaŋac demiŋ totoŋ qeriya igunec nénépésima eŋeya naŋ sorocyawac héŋgaleŋ ama areŋa yandaiguc nonoporec. 14 Naŋa imi sawanéŋ mulu menénécmiyu képésicnina mocʒoŋ waiwaiya waŋec. 15 Inéŋ mia hémbiŋawac séc qahac Anutu iwac kic tanera wanʒac, iwawai méŋ ménda ʒéhicŋiyu kerec nalé imuaru bec walac walac hicŋima kerec. 16 Imi mia hénia yomuac niŋac; Iwawai mocʒoŋ imi iwac qeriaiguc ʒéyu hicŋidacgic. Iwawai kurumeŋiguc kekera ʒéma baeciguc kekera, kicnéŋ hémbiŋac séc ʒéma ménda hémbiŋac séc, tatac edamuyaguc me héŋgaleŋ wawaŋawac kuc buŋa, galeŋ me galeŋac qac buŋa imi mocʒoŋ iwac murunec ʒéma iwac buŋawac ʒéhicŋi énécmimia. 17 I eŋeyaoc imi iwawai tosara ménda hicŋima kecgicnec i bec kerecac kecʒac, waŋu iwawai mocʒoŋ imi iwac qeriaiguc qéhéréŋgé amuma nandarecac nanʒac. 18 Waŋu inéŋ ʒéyu hicŋidarec momac yanda ionac walac walacgina kecmac niŋac, hénaoriŋ neŋaŋ orucnina ʒéma kekecac hénihénia wamma humuc ic ionac sucgina igucnec walac walac ɋelima yarec. 19 Imi mia Anutunéŋ iwawai mocʒoŋ Yesuac qeriaguc kuaya qema sécgémima kecmuac ʒé niŋu sécgéyu imuhuc hicŋidarec. 20 Iwac murunec iwawai kurumeŋiguc ʒéma baeciguc hedacʒac imi mocʒoŋ eŋeyaguc ewa momac wammu niŋac Yesuac sawanéŋ ic héŋgeŋa wéndaraiguc luae qenénécmiyec.
21 Becnec ini, elicgé énécmiyu kecgic. Kecma ewa qerigina ʒéma wawaŋ memeginaguc haʒéra kecgic. 22 Waŋu deguc imi aciguc ménda emmu néŋ képésic solaŋ wamma Anutuac kiwaiguc ic embac téréyawac buŋa nammu niŋac séwiya wai nénécmima humuma Anutu ʒéma neŋaŋ sucninaiguc ewa momac mihicŋi nénécmiyec. 23 Ini ninʒéŋ ninʒéŋiguc kumuselima keŋqe haqegina qahac kecmu. Kecma buŋa suruc hiabia nindacgic imuac niŋkinʒéŋ wamma imuacnec ménda néŋgacma kemmu. Waŋu buŋa suruc hiabia imi mia ʒéau énécmimia waŋu, kurumeŋ bawaiguc kekec yanda Anutunéŋ ʒéyu hicŋima kecʒu imi mocʒoŋ nindacgic. Waŋu Ni Paulo imi buŋa surucya imuac weleŋ qeqe ic waŋiac kecʒua.
Pauloac weleŋqeqe ai.
24 Deguc ni onac wamma qenʒeŋ manʒeŋiguc kecma imuac mia ségiségi wanʒua. Imuhuc wamma Kristoac qenʒeŋ manʒeŋ kitiwa hezac imi iwac héna méria wamma kekera hénaoriŋ onac niŋ wamma séwinanéŋ bisiwa sécgénénʒac. 25 Ni imi Anutunéŋ onac niŋ wamma ai ara nézéyec imi tohoma Anutuac ackuaʒéc imi énézédacba sécgé énécmimac niŋac hénaoriŋ héra ionac weleŋ qeqe ic waŋi. 26 Ac saŋa imi nalé hénihénia qahac hama keŋec imuarunec ʒéma baec yomuac hicŋisaiya hicŋisaiya ionac murunec musaŋgéyu heyec néŋ deguc imi ic embachéra téréya ionac muru énézéyu wininiyec. 27 Imi mia Anutunéŋ ac musaŋ musaŋgia imuac edamuyanéŋ baera baera ic embac ionac muru dimuhuc kindindiŋa sécgé énécmizac imi énézéyu nimmu niŋac imuhuc waŋ énécmiyec. Waŋu ac musaŋ musaŋgia imi mia Kristo sucginaiguc kecʒac inéŋ mia wanʒac. Edamu asaha miŋina iwac mia neŋaŋ niŋkumuma kic hihi wammianʒiŋ. 28 Nini imi icya icya Kristoac qeriaiguc solaŋani énécmima onopocni nammu niŋac iwac buŋaya ʒésaima icya icya meme seli ac énézéma niŋtegic qiŋtegic ac mocʒoŋnec ku énécmianʒiŋ. 29 Ai imuac mia ni acguc nuac qerinaiguc kuhaguc ai meanʒac iwac ai hakaya méndacma kucna mocʒoŋnec ai meanʒua.

*1:2: Hénia méŋ imi ninʒéŋgéma.

*1:2: Kiwi méraginanéŋ ooya tosaraiguc; Maŋgocnina ʒéma Miŋ Kewu Yesu Kristo iorac.

*1:12: Kiwi méraginanéŋ ooya tosaraiguc; mehiaru nénécmiyec.