Anumayamo'a Haegafa Alino Hagelafilatenea Kea 3 Yoni 1
3 Yoni
Yonia Yisasiene vaiyatete huno tuelufua (12) anagapi maineno Yisasifena ala avopi kae-malene. Haenagaa kosuna leteno mani tagufa (3) avona kae-malene. Yisasia faliteno hetino ikapinagama haigenoa Yonia sikisitia (60) kafu agava maineno mani 3 Yoni kea kae-malene. Mani avona afuaganaa Kaiyusife huno kae-malene.
1
Nagaya Yoninae Yisasina amakuama aminaya veate kava vayatamamonae Kaiyusiga nafunaganagae tamagelafa huna kagaifena nahau nayamopafi nenahaiye huna mani avona negaove.
Nahau-mainea nafunaganaga kagaila kagu kamemoa kanaleya huno nemaiya kava huka mukia kaugafaene aliyama alisana yamoene kanaleya hisie huna nunamuna nehue. Nagoa tafutaganaya kagayama Anumaya Kotina kelamage keama akave malekama kama vaiyana yafena Tamage huno fatago huno vai neaye. huya me nahapaigena havitena tusiya huna musekasena hu negatoe. Nafaneyaganimoya fatago huya vai yesayana tusia musekase nehuanagi mani musema hua yamona nagola alu muse yama nehua yamona oagasene.
Nenahaiya nafunaga kanale kava nehuka katega oagenana kafukagana-gamina neageka amayama hu-mainana kavala kanale kava hu-mainane. Nagoama amaya hu-mainana veamoya eteya mono nopi hetiya kagayama amakaima kayone humatenana kavafena me lahapaigeta haviteta tusia musekaa hugi menia Anumaya Kotina haisia kava huka katema visaya veala amaya huo. 7-8 Amakaya Yisasi kea hamapaigahe ayanagi Yisasi kema ohavinaya vayapitila nagola monema oalinaya yafena tagaya aniama hu-mainaya vaya amaya hinuta amakaiene tokaeta Anumaya Kotina kelamage kea ali lokaeta hamapai-mainone.
Tiotalefesia kefo kava humaine.
Nagaya nago kea ago kaena mono nopi vayate ago atalogeno umaineanagi nago kanoa Tiotalefesia uhagoteno maisia yafe nehaigeno Yonini kea ohavine. 10 Ohavianagina nagaya tamakaitega visuaamona ani kavama hia kavala mono nopima mainaya vaya mo hamapaigahue. Nagaifena havige huno Havi kava nehie. huno nehuno ani kavaagela nohigi tafuta-ganayama neayana amavaleno falu fala hu oamateno amatalegeya nagoa veamoya amavaleyama falu fala humategahema nehayana Ania ohiho. huno nehuno mono nopitila amavayu hu neamataleno nehie.
Temitaliusia kanale auava kava humaine.
11 Nenahaiya nafuna-ganaga kefo kavala akave omalo. Kanalema humainesia kavaage akave malo. Kanale kavaage huge hugema nehaya veamoya Anumaya Kotina nafanea mainagi kefo kavaage huge hugema nehaya veamoya Anumaya Kotina oagenae.
12 Mukia veamoya Temitaliusifena Kanale kano maine. huya hageno Anumaya Koti kelamage kemoa Kanale kava nehie. huno higena nagaienena Kanale kava nehie. huna nehue. Kagaya nagayama kelamage keage kanoma mainoa yafena ago havimainane.
Yonia kava kanomoa Kaiyusina agegahe humaine.
13-14 Nagaya kasagoya kea kaegahe huanagi ani kea nagoke omanafina okaegahue. Kagaila aupa kanafi mo kagesugetaa kea kea hugahue.
15 Kaipamoa falu huno maisie. Male mainaya kafuka-ganaya kagaifena Felugae. huya hu falu fala hu negatagena nagaya nalegama mainaya nafunagana-gamina ania huna Felugae. huna hu neamatogi amahaote amahaote amaki ayeka hamapaiyo.
 
Kenia male hano hie.
 
Nagaini nagia Yoninae.