28
Yesu'a he ti'niya gemae
(Mak 16:1-10; Luk 24:1-10; Yon 20:1-18)
Sapati afina'mo ago hano hutegeno hogote afina'mo afole ai'nige'anae'mo kotilamiyapi'mo Maliya'a Maganala kotega a'e mago hamo'amo Maliya'e'mo kanolule'mo agesa'afe'mo u'na'ae. Ala kava ne'mo enisole veka'amo koku'napati'mo emineno avayale yafa'mo alino heleve hulinuno maleteno ani yafate'mo fai mai'niya'mofe'mo lusi imima ali'niye. U'ana aga'ana alino alave nehiya yakana agufa vekamo fai mai'nigeno kukena'aleti'mo yaveyave'age hu'nige'ana age'na'ae. Kanolule'mo yagai'a mai'naya ati vaya'mogimo agete'apae'mo lusi kava hu'a koli hute'a atete hute'apae'mo mopafi'mo apago'ya faite'a fali'naya vayakana hu'a mai'nae.
Enisole vekamo'a lole atalafe'mo, koli osi'ao. Malipu yosale'mo nili aite'a ali'a he ti'a ate'naya vekamo Yesu'mo agesa'afe'mo ne'a'ae, hu'na lanake'nove. Manifi'mo o'mai'nifa ago he tino u'niye. Hogoteno ofalino afa'a mai'neno'ae'mo, alino he tino nategaiye, huno lapa pai'niya gemo ago afole ai'niyanagi etana havae'niya ya'age'mo age'ao. Agetetana malage hutana utana ge'amo ne'afiya vaya'aife'mo, kanolufati'mo ago alino he tino ate'niyanageno Galeliya kotegamo uno hogo netegaiyanagetapa muganilega agegae, hutana hapa pai'ao. Alagi lama gemo lahana nepauve, huno hana pai'niye. Inagi kanolulegati'mo malage hu'ana atale'ana koli nehu'anae'mo anamogaga aime aime ne'u'anae'mo ge'amo ne'afiya vaya'aife'mo hapa paisa'afe'mo nagu nagu hu'ana u'na'ae. U'anae'mo malage hu'ana Yesu'e'mo katega fotu hute'apae'mo Yesu'a ge anamamae'niye. Agaetegamo u'ana aiyafi'mo anago'ya faite'ana aiyale'mo atafau'ne'ana mono hu'na'ae. 10 Yesu'a, utana nagana'nimogife'mo, muga Galeliya kotegamo viyo. Muganilegamo nagegae, hutana hapa pai'ao, huno hana pai'niye.
Ati vaya'mogimo faigoko gemo hu'naya gemae
11 Lole atala'mo ne'va'age'apae'mo kanolu'ale'mo yagai'a mai'naya ati vayapati'mo mago vaya'mogimo Yulusalemu taonimo alopa taonifi'mo u'a mono hu'a ne'apataya vaya'aite'mo yagai'a ne'apataya vaya'aife'mo muki afole ai'niya kavafe'mo faigoko gemo hu'a hapa pai'nae. 12 Ani gemo afite'apae'mo vayatama vaya'aife'mo ge hu'nage'a e'a ali'a anupa hu'a mai'ne'apae'mo mago gemo hu male'nae. 13 Apakaemo ati vaya'mo alopa monimo apamite'a hapa pai'apae'mo, ago lau kale'nonage'apae'mo ge'amo ne'afiya vaya'mogimo e'a alini'a u'nae, hutapa hapa paiyo. 14 Yagaino ne'apateya gamani vekamo'a ani faigoko gemo afiteno'ae'mo aipamo'mo falu hisiya agufa gemo ha paisunageno hanageke ya'mo olapamigiye, hu'a hapa pai'nae. 15 Inagi ati vaya'mogimo monimo alite'apae'mo u'a ina gemo hiyo, hu'a hu'naya agufa gemo hu'nae. Mani faigoko gemo'a Yu vaya'aitegati'mo aino atagu faeno uneno hume hume eno hemeni'e'mo hane'niye.
Yesu'a ge'amo ne'afiya vaya'ai apaulagale'mo afole ai'niya gemae
(Mak 16:14-18; Luk 24:36-49; Yon 20:19-23)
16 Leveni'a vaya'mo ge'amo ne'afiya vaya'mogimo Yesu'a viyo, huno hapa pai'niya avelegamo Galeliya kotega u'nae. 17 Agete'apae'mo apago'ya fai'ne'a mono hu'naya'monanafa mago vaya'amogimo lole apakesa afi'nae. 18 Yesu'a apakaetegamo eno'ae'mo, muki himamu'amo koku'napinagi ma mopafi kavatenagi vaya'aitenagi hu'na yagaisuva himamu'amo ago alino nami'niye. 19 Nami'niya'mofe'mo utapa muki alu nofi alu nofi vaya'mo alitapa apaya malege'apao ge'nimo afisaya vaya'mo hamaleyo. Hamalesagetapae'mo Afo'nimo agi'aletinagi mafa'ne'amo'na nagi'niletinagi aote Auneme'amo agi'aletinagi hutapa ani faletapa apateyo. 20 Ani faletapa apatetetapae'mo muki ma kava'mo hiyo ina kava'mo hiyo, hu'na lapa pai'nova gemo akame hiyo, hutapa alita apaya maleyo. Lama ge lapa nepauve, huno, nagaemo lapakae'e'mo magokepi lokae'na maime maime ne'visugeno'ae'mo ma mopa'e koku'na'e'mo hano hisiya afina'mo afole aigiye, huno hapa pai'niye. He, lama ge.