Kara New Testament Hibru 1
Mu Hibru
A Lagasai Xe Sina Mu Hibru
A Ferawaian Paamua
A lagasai aanabeꞌ a xaleian xena xavang a saxano Kristian aava rao ri taꞌulan a namkaian siri senaso saxano rabuna ri xalum fadui nari e ri tavai nari pana lagafan. A lagasai aanabeꞌ ve xena fagut a namkaian siri, e voxo a mataa aava xaleie a xuus nari pana maana faisok lava a Piran fo vesane se Krais Yesus. Na Krais mon a faxalit netaara pana vilaana tuuna sina Piran. A lagasai aanabeꞌ a kuusan a mo molava talatul:
1) Na Yesus ve a lak tuuna sina Piran. Layaan na Yesus i taxa waan lunai nabeꞌ la xavala, nane yaas a lagafan e maasaxan e pana vilaana naang, a Piran a siak fati na Yesus e nane savat mataa tuuna marasaxa xena xavang a mu rabuna xapiak. (2:10) E voxo na Yesus a pelalava sena mu rabuna ina kuus fatuxai ti lumua e sena mu angelo e nane a pelalava se Moses vaxa.
2) A Piran fatak a siak fati na Yesus talo i taa waan priis vulai e nane xasliu a mu priis sina mu Juda.
3) Na Yesus a waan memai priis ti la xunavata e nane a fexaxaas tuuna sena fakaxup a rabuna layaan ri namkai sena. A maana vilaana ina naangusan e mu vuputkai aava na Moses a kuus pana, ri malaan mon sena xaxaalua ina faisok molava aava na Yesus a vile.
A mataa tafuna lagasai aanabeꞌ a vubuk faagut o a namkaian sina mu rabuna i taa malaan e a ferawai faaxaxaves pana namkaian tateak sina mu rabuna Israel ti kavai. (Palagasai 11) Nane kuus o naapalaan a so ta buk lagafan i taa savat siri, ri taa tao fatateak a namkaian siri fefexaxaas ri maat. E ri taa kaalum xe si Yesus e usi a vilaana sina e tisui a lagafan e maasaxan aava ri taa siaxe.
A Namkaian Se Krais A Mo Pelalava Marasaxa
1
A Ferawaian Sina Piran I Taxa Waan Lana Natuna
Lana maana yaan xaves e pana maana vilaana xaves la mu yaan ti kavai a Piran fo ferawai xe sina mu butaara la ngusuna mu rabuna ina kuus fatuxai. Taasaxa lana mu yaan aanabeꞌ xo taxa falet, nane fo ferawai xuvul pataara la ngusu Natuna. Se Natuna aave mon, a maana mo xapiak la xavala e la finavata fo vesanan pana gutan sina Piran. E a Piran a siak fatie vaxa xena tavaie pana maana mo xapiak. Nane sang mon i taxa faxalit a miridingan sina Piran; a maana mo xapiak sina e maana mo sina Piran ri fexaxaas. E pana gutan ina ferawaian sina nane taxa lo tao fanei fatateak a maana mo aava nane fo vesane. E lamina yaan nane fo siak a lamon tapinan sena vilaana saat xana mu rabuna xapiak, nane laak xe la xunavata e fe nai la pamuaan sina Piran pana Maana Gutan Xapiak.
A Isi Natuna A Pelalava Sena Mu Angelo
Na Natuna a pelalava seri mu angelo malaan sena isin aava Piran fo faꞌisine pana, a molava seri. Xe siseꞌ ta angelo ve a Piran fo xuuse:
“Nano, no Lak Tomexaan siak.
Tanin nenia, ne Tamaam.” Yng 2:7
E a Piran a pife ferawai sena saxa angelo o:
“Nenia, ne taa Tamana e nane, i taa Natuk.” 1 Xks 17:13, 2 Sml 7:14
Piau! Taasaxa layaan a Piran rao i feng a Lak Tuaan sina xe nabeꞌ la xavala nane ferawai malaan:
“A maana angelo sina Piran ri taa nanguse.” Vpt 32:43
E sena mu angelo a Piran fo kuus malaan:
“A mu angelo sina Piran ve, ri mu sisiak sina e ri fexaxaas malaan sena reref, ri malaan sena radaam ina fata.” Yng 104:4
Taasaxa se Natuna naboxo, a Piran fo kuus:
“A fatataganan siim Piran, i taa waan vulai xe vulai.
No taa paamuian a mu rabuna siim pana roxoyan.
No fuuna vubuxan a maana mo xapiak aava roxo
e no baian a maana mo xapiak aava saat.
E voxo Piran, a Piran siim, fo siak fati nano
e nane tavai nano pana faamamaasan
senaso nane fo bur nano pana ngavuk aava pelalava sena ngavuk aava nane tavai a xasanofuna pana.” Yng 45:6-7
10 E nane kuus fulaa:
“Nano Memai, la tangpat no fo vesan a xavala e maana mo xapiak xuluna
e pana maam no fo vesan a finavata e maana mo xapiak lana.
11 E a maana mo aave ri tafe malit, taasaxa nano xo, no taa waan.
Nari, ri tafe xavai malaan sena mu marapi.
12 Nano Piran, no taa pulum nari malaan sena marapi xavai o
no taa xul nari malaan sena mataa taa xul a marapi sina.
Taasaxa no pi xuxul, no taxa waan fatak vulai e
a toyan siim i taa pife taxapus.” Yng 102:25-27
13 A Piran pife xuus ta saxa angelo o:
“No maa nai nabeꞌ faasilak la pamuaan iga
fefexaxaas sena yaan ne taa timin
a maana xaiyaas siim lapaana kaam malaan sena mo ina vaapaas.” Yng 110:1
14 A so ta mo ve mu angelo? Nari ve ri mu vovau aava ri sisiak sina Piran. E nane taxa feng nari xena xavang a mu rabuna aava ri taa siak a fakaaxupan sina.