Tesalonaika wali Leta Labuina
Pol wana Leleli
Baaba Houwan
Tesalonaika wali leta houwan Pol i ginol enaa, nige sauga i yayapu inoke wali leta labuina al i ginol.
Ana awa i ola bolo leta houwan hi noahe hi sikal Kolinita elana ge Pol wana wasa hi pek toekelesiya Tesalonaika
kaiweliya. Inoke Pol leta labuina ya i ginol.
Tesalonaika iyoho ya palopalomwan hi pwapwawa, inoke Pol i ba pagasisel (1:4-10). Etega al, gamagalau
enuna hi baek Tesalonaika elal tage Babala wana lan sikalim iyaka i mowasi, yaka Tesalonaika nuwaliya
i gewagewa. Inoke Pol i ba pasapu elal (2:1-12). Mowamowasena, i ba pagasisel nihi talmilil gagasisi
ge nihi tuwalali totoliya nihi matahikagil ali labe kaiwena (2:13—3:15).
1
1 Nau Pol alowau Sailasa ge Timoti leta ya ha leli ge ha patuna i nowa ekelesiya Tesalonaika eliyamiu,
komiu ku minaa Yehoba Tamala ge Babala Yeisu Keliso eliyalil.
2 Ha awanun Yehoba Tamala ge Babala Yeisu Keliso nihi muloluagimiu ge wali nuwa laumwal atemiu ni pakalaopop.
-
1:2
Loma 1:7
Pol I Ba Tobal ge I Awanun Tesalonaika kaiweliya
3 Talimeyau ge numeyau, sauga gegewena kaiwemiu ha ba mulolu Yehoba elana. Bosowaima hot naha ginol ola,
kaiwena wami abulilek i siun iyaka i gasisi hot, ge komiu maisena ge maisena wami nunuwana alomiyau elal
i bwatabwata ya.
4 Inoke ha ba heyagimiu Yehoba wana ekelesiya elal. Wali wasa ha pek te bwagana hi apapanak-agimiu ge palopalomwan
ku pwawa, yaa ku palahikan ge wami abulilek i gasisi.
-
1:4
2Kol 7:4; 1Tes 2:19
5 Wami palahikan ge wami abulilek i pankitela te bwaliga Yehoba gamagalau wali pagan ni hile paolaolaek.
He komiu Yehoba ni awa wawaisi-agimiu ge ni ba nuku ulutuk wana abaloguguiya, kaiwena lomwan ku pwawa
abalogugui o kaiwena.
6 Yehoba iya toyatala sasapona: bolo hi palomwanagimiu lahena lomwan ni pek elal,
-
1:6
Loma 12:197 ge komiu bolo ku lomwan ni paveyaho-agimiu, ge i ola al ama ni paveyaho-agima. Yehoba ni ginol ola o,
sauga ebo Babala Yeisu ni masalem labulabumwa alonau ge wana aneloseyau gasigasisel.
-
1:7
1Tes 3:138 Ginebi ge ginaha tautauina ni nem, ge bolo Yehoba hi towani ge wala Babala Yeisu Wasana Waiwaisana nige
hi hehenapu-an ali lahi ni pek.
-
1:8
Ais 66:159 Ali lahi te apapanak mihomihotina nihi pwawa. Ali bwaga ni gan Babala manininaa ge wana gasisi wawasana
mwananalina elana.
-
1:9
Ais 2:1010 Bugul bolo ya nihi gan lan toto Babala ni sikalim, inoke wana gamagalau bwabwalel, heliya gamagalau gegewel
bolo hi abulilek elana, nihi awa wasawasa-an ge nihi awatauwan. He komiu al ge iyoho to boda o gamwanaa,
kaiwena wasa toto ha wasaan eliyamiu ku abulilek-an.
-
1:10
Kols 3:4
11 Bugul bolo o ha nuwatuagil inoke sauga gegewena ha awaawanun kaiwemiu. Ha awanun te Yehoba ni labemiu
ge bosowaimiu yawal toto kaiwena ge i yogaagimiu, elana nuku nanawaa. Ha awanun te wana gasisi eliyana
ni labemiu, inoke waisi toto nuwamiu nuku ginol ge tuwalali waiwaisana toto i neem wami abulilek elana
nuku awaawaginol.
-
1:11
Kols 1:9; 1Tes 1:2-312 Ha awanun ola to, inoke komiu kaiwemiu gamagalau wala Babala Yeisu alana nihi awa wasawasa-an, ge iya
ni pawasawasa-agimiu. Toto ya i neem wala Yabowaine ge wala Babala Yeisu Keliso wali mulolu elana.