Misima-Paneati TUWALALI 1

Apostolowau wali

Tuwalali

Baaba Houwan

Buki ya Luke i leleli. Houwan ga buki toto “Yeisu Wasana Waiwaisana Luke wana Leleli” i leli, yaka abwe ana etulan al i ginol buki ya. He buki labui i patunal gamagal maisena elana, alana Tiyopilo. Inoke buki ya gamwanaa i liwanan Yeisu wana sikal labulabumwa ge toekelesiya houhouwel wali tuwalali. I pamasal Yeisu ana tototoulil Yayaluwa Bwabwalena wana gasisi elana inoke Yeisu wasana hi wasaan i telipunaa Yelusalema, yaka abwe hi nok hi na Yudiya bwalibwaligena ge Sameliya ge panayawi labena gegewel elal, i ola awalehina 1 puna 8 ana baaba.

Gamagalau hi gewi liwaniliya ta pwawa buki ya elana. Yaa maisena liwanina i bwata heiya Pol. I telipunaa awalehina 13 elana, Pol wana nopain eton ge wana nok Loma wasaliya ta vasili. Sauga enuna Luke alona Pol hi nawanawa, yaka liwan enuna elal Luke i leleli i ba, “Ama” (16:10-17 ge 20:5-21:18 ge 27:1-28:16). Luke liwan i pwamowasiya Pol iyoho Loma i matamatan wana kot kaiwena.

Buki ya gamwanaa Yayaluwa Bwabwalena wana gasisi ge wana nul toekelesiya houhouwel elal ta kite. Yeisu ana tototoulil wali pagan ta kite ge papaatena enuna bolo hi papaatena-an ta vasili.

1 Ateu owa Tiyopilo. Buki toto ya leli houwan gamwanaa, Yeisu wana tuwalali ge wana panpankiti gegewena ya wasaan, ya telipunaa sauga toto wana tuwalali i telipuna 2 ana siga lan toto i ha labulabumwa. Mulaa abwe i ha labulabumwa, Yayaluwa Bwabwalena wana gasisi elana inoke ba pagasisi i pek gamagalau tobolo i hilel wana apostolowau elal. 3 Wana yaomal enaa, lan poti gamwanaa i masamasal wana tohago elal, inoke hi atena tunahot Yeisu iyaka i lut al. Hi kite inoke i liwaliwan elal Yehoba wana abalogugui kaiwena. 4 Sauga hi migogo, inoke logugui ya i baunanik elal i ba, “Bahi ga Yelusalema nuku eeguluwan, yaa nuku matamatan Nam wana bateli, toto iyaka ya baunan eliyamiu. 5 Diyon i pababitaisomiu wewel elana, yaa lan nige ni gegewi inoke Nam ni pababitaisomiu Yayaluwa Bwabwalena elana.”

Yeisu wana Sikal Labulabumwa

6 Sauga apostolowau hi migogo avaliya ge Yeisu inoke hi neli hi ba, “Babala, tab sauga ya ama Isileli wama abalogugui nu pem pasikal eliyama ge totoma naha logugui-agima?”

7 Inoke i baek elal i ba, “Nam totona i logugui, lan ge sauga totona i teli, inoke komiu nige bosowaimiu ana sauga nuku atena. 8 Yaa sauga ebo Yayaluwa Bwabwalena ni lau eliyamiu yaka gasisi nuku kalaopopwi, inoke komiu nuku tabwa no towasa Yelusalema, labi Yudiya bwalibwaligena ge Sameliya ge panayawi labena gegewel elal.” 9 Wana baaba o i pwamowasi, inoke mataliyaa Yeisu i ha labulabumwa, ge yaluyalu i kaus nige al hi kikite.

10 Mataliya hi lihikan labulabumwa toto Yeisu i nonoek, inoke sauga o elana aneloseyau labui ali kaliko yayanana hi talmilil labeliyaa 11 ge hi ba, “Gamagalau Galili, hauna kaiwena ku talmilil ge matamiu i haha labulabumwa? Yeisu toto i egona elamiu ge i ha labulabumwa, abwe ni sikalim al ni ola to ku kite i ha labulabumwa.”

Yudasa Lahena Hi Hile

12 Apostolowau hi sikalem Oya Olibe inoke hi na Yelusalema, hawawal o ana yapu i ola kilomita maisena ya.*13 Sauga hi vin Yelusalema, inoke hi na hi ha limi gamwana natiya toto hi miminaa. Bolo hi miminaa o, heliya Pita, Diyon, Yemesa ge Andulu, Pilipi ge Tomas, Batolomiu ge Mataiyo, Yemesa Alipiyos natuna, Saimon toto i neem boda Seloti elal, ge Yudasa Yemesa natuna. 14 Bolo ya gegewel hi boda pamaisena hi mimi awaawanun, avaliyau yowau ge Meli toto Yeisu hinana ge Yeisu talinau.

15 Lan bolo o elal, sauga etega Pita i milil toabulilek gamwaliyaa, ali gewi i ola wan handeled ge tuwenti. 16 Yaka i ba, “Taliwau ge nuwau, Buki Bwabwalena ana baaba iyaka i tabwa tunahot, toto Yayaluwa Bwabwalena i pamasal Deibid elana ge i lelelian Yudasa kaiwena. Iya te gamagalau i nulil yaka hi na Yeisu hi lib ge hi yowan. 17 Iya valila wama boda ana gamagal etegana ge Yeisu i hile aloma ha tuwalali toyawa.”

18 (He Yudasa wana tuwalali nanakina molana mani hi pek, yaka i ahe ge bilibili etega i pwamolaya, inoke eliyana i gaisoguwa i tal aliga, tinena i maleli ge elokena i tagil. 19 Yelusalema ana tomina gegewel wasa ya hi hago, inoke heliya analiya elana bilibili o alana hi tun Akeldama, ana sapu heiya “Panasasaliya.”)

20 Pita i ba, “Toto Deibid i lelelian Yudasa kaiwena, iyaka i tabwa tunahot, kaiwena buki Same elana i leli i ba,

‘Wana limi ni ola galaluwan limena,

bahi gamagal etega ni hoholave.’

I ola al i leli i ba,

‘Gamagal getoga abamina toto i minaa ni milahe.’

21-22 Inoke gamagal etega ta hile ge Yudasa abana ni milahe, ni tabwa aloma etega yaka aloma Yeisu wana lut al wasana ana patunahot naha wasawasa-an. Gamagal o ta hileya gamagalau gamwaliyaa bolo alomeyau ya sauga bwalibwaligena, sauga toto Babala Yeisu aloma ha nawanawa, i telipunaa Diyon gamagalau i pababitaisoil ana siga lan toto Yeisu i egona eliyala ge i ha labulabumwa.”

23 Inoke bolau labui alaliya hi latahin: Yosepa, toto alana hi ba Basabas (i ola al hi ba Diyastas), ge Mataiyas. 24 Inoke hi awanun hi ba, “Babala, gamagalau gegewel wali nuwatu u atena. Inoke nu pankitema gamagalau labui ya henala toto iyaka u hile 25 ge Yudasa abana ni milahe ni tabwa apostolo, kaiwena Yudasa tuwalali toto ya i eguluwan, i aliga ge i nok i na Gehena.” 26 Yaka bolau labui alaliya hi leli pat labui elal ge pat maisena hi ahe tagilan. Pat toto Mataiyas alana i miminaa te hi ahe, inoke iya i tabwa apostolowau ali toto elulutega maisena avaliya etegana al.

1:1: - 1:1 Luke 1:3

1:2: - 1:2 Mak 16:19; Luke 24:49-51

1:3: - 1:3 Luke 24:36-49; Tuw 10:41

1:4: - 1:4 Luke 24:49; Diyo 14:16-17; Tuw 2:33

1:5: - 1:5 Mat 3:11

1:6: - 1:6 Luke 24:21

1:7: - 1:7 Mak 13:32

1:8: - 1:8 Mat 28:19; Luke 24:48

1:11: - 1:11 Mat 26:64; Luke 21:27

*1:12: 1:12 Ta ba “kilomita maisena” o ebo ta ba “mael awalehina ge kekeisi al.”

1:12: - 1:12 Luke 24:50-53

1:13: - 1:13 Mat 10:2-4

1:16: - 1:16 Same 41:9

1:18: - 1:18 Mat 27:3-8

1:20: - 1:20 Same 69:25; 109:8

1:21: - 1:21-22 Mat 16:19; Mak 1:9; Diyo 15:27