Misima-Paneati MATAIYO 1

Yeisu Wasana Waiwaisana

Mataiyo

wana Leleli

Baaba Houwan

Mataiyo iya Yeisu wana tohago etegana, alana etegana al heiya Libai. Valila Mataiyo wana tuwalali takis i ahiahi gamagalau elal, inoke abwe Yeisu i nem ge i yogaan (9:9). Ana awa i ola Mataiyo buki ya i ginol Yudiya gamagaliliyau kaiweliya.

Mataiyo wana buki elana i pankitela Yeisu iya Topankite bwabwatana, iya i bosowaina gamagalau ni pankitel Yehoba wana abalogugui kaiwena. Wana panpankiti enuna ta pwawa awalehina 5 ana siga 7, awalehina 10, awalehina 13, awalehina 18 ge awalehina 24 ana siga 25.

I ola al, Mataiyo i pankitela Yeisu iya Mesaiya toto Bateli Houhouwena ana palopitau hi ba abwe ni nem. I pamasal palopitau wali baaba i tabwa tunahot Yeisu wana ginol elana. Vilan “Mesaiya” iya pana Hibilu vilanina, lahena pana Gilik elana heiya “Keliso.” “Mesaiya” ana sapu heiya “toto enonu hi hol pwatanaa.” Gamagal toto ebo enonu hi hol pwatanaa iya hilihili gamagalina. Inoke Mataiyo i pankitela Yeisu iya Mesaiya. Yaa Yudiya hi nuwatu tage ebo Mesaiya ni nem inoke wana abalogugui ni pamilil panayawiya ge Yudiya ali topihigelgel ni pakokovel. He Yeisu wana sauga elana Loma gamagaliliyau Yudiya wali panuwa hi logugui-an.

Yudiya Yeisu nige hi abulilek-an inoke hi towani ge hi lokolosan. Mataiyo awalehina 21 ana siga 27 i liwanan hauna i masal wik toto o ge abwe Yeisu hi lokolosan. Awalehina 28 Yeisu wana lut al i wasaan.

He Mataiyo wana buki i pwamowasiya te Yeisu wana tohago i patunal alana nihi wasaan gamagalau labi gegewena elal.

Yeisu ana Lihu

(Luke 3:23-38)

1 Yeisu Keliso ana lihu i ola hiwe. Yeisu Keliso iya Deibid tubutubunina, Deibid iya Abalahama tubutubunina.

2 Abalahama natuna Aisake,

Aisake natuna Yakobo,

Yakobo natunau Yuda ge talinau,

3 Yuda natunau Peles ge Sela, hinaliya Tama,

Peles natuna Hesiloni,

Hesiloni natuna Lama,

4 Lama natuna Aminadaba,

Aminadaba natuna Nason,

Nason natuna Salimon,

5 Salimon natuna Bowasa, hinana heiya Leyabi,

Bowasa natuna Obedi, hinana heiya Ludi,

Obedi natuna Diyesi,

6 Diyesi natuna Kin Deibid.

Deibid natuna Solomon, hinana heiya toto valila Ulaiya lagona,

7 Solomon natuna Lehobowam,

Lehobowam natuna Abaidiya,

Abaidiya natuna Asa,

8 Asa natuna Yehosepat,

Yehosepat natuna Yolama,

Yolama natuna Usaiya,

9 Usaiya natuna Yotami,

Yotami natuna Ehasi,

Ehasi natuna Hesekaiya,

10 Hesekaiya natuna Manasa,

Manasa natuna Eimon,

Eimon natuna Yosaiya,

11 Yosaiya natunau Yehoyasin ge talinau,

sauga toto Babiloni hi nem

Isileli hi ahel ge hi na hi telel Babiloni.

12 Isileli hi ahel ge hi na hi telel Babiloni inoke enaa:

Yehoyasin natuna Seyaltiyel,

Seyaltiyel natuna Selababel,

13 Selababel natuna Abiuda,

Abiuda natuna Elayakim,

Elayakim natuna Eiso,

14 Eiso natuna Seidok,

Seidok natuna Asim,

Asim natuna Eliuda,

15 Eliuda natuna Eliyesa,

Eliyesa natuna Meitan,

Meitan natuna Yakobo,

16 ge Yakobo natuna Yosepa, Meli lagona.

Meli i ab Yeisu, heiya te ta ba Mesaiya.

17 He inoke Abalahama ana siga Deibid ta pwawa heyan ali gewi potin, Deibid ana siga sauga toto Isileli hi telel Babiloni heyan ali gewi potin, ge sauga toto o ana siga Mesaiya i masal heyan ali gewi potin.

Yeisu Keliso wana Masal

(Luke 2:1-7)

18 Yeisu Keliso wana masal i ola hiwe. Hinana Meli alona ge Yosepa hi kawakawalolu. Nigeya ga hi aalolon, hi pwawa Meli iyaka i liyan Yayaluwa Bwabwalena wana gasisi eliyana. 19 Yosepa wana pagan i sapu ge nige nuwana Meli ni papuluwawi-an boda mataliyaa, inoke i nuwatu tage wali kawakawalolu ni leke sume. 20 I nuwanuwatu ola o, yaka ana kenonou elana Yehoba wana anelose i masala elana ge i ba, “Yosepa, Deibid tubuna, bahi nu lolovakun te Meli nu ahe lagom, kaiwena wana liyan i neem Yayaluwa Bwabwalena elana. 21 Abwe ni ab natuna melutau, inoke alana nu tun Yeisu,* kaiwena wana gamagalau ni pwamwalil wali gegi elana.”

22 He i masal i ola to, inoke Yehoba wana baaba toto palopita etega i pamasal i tabwa tunahot, 23 i ba, “Gamaina matabubuwa ni liyan ge ni ab natuna melutau, inoke alana nihi tun Imanuwela.” Imanuwela ana sapu heiya “Yehoba avala.”

24 Sauga Yosepa i kenu lut, inoke Meli i alolonan i ola Yehoba wana anelose wana baaba eliyana. 25 Yaa nige alona hi kekenu toyawa ana siga i ab natuna melutau. Inoke Yosepa wawaya alana i tun Yeisu.

1:1: - 1:1 1Liw 17:11; Aba 22:18

1:3: - 1:3 Aba 38:29-30; Ludi 4:18-22

1:5: - 1:5 Ludi 4:13-17

1:6: - 1:6 2Sam 12:24

1:11: - 1:11 2Kin 24:14-15; 2Liw 36:10; Yel 27:20

1:12: - 1:12 Esil 3:2

1:18: - 1:18 Luke 1:27,35

*1:21: 1:21 Alan “Yeisu” ana sapu i gan heiya “Yehoba ni pwamwal.”

1:21: - 1:21 Luke 1:31, 2:21

1:23: - 1:23 Ais 7:14

1:25: - 1:25 Luke 2:21