Numanggang Hibulu 1

Me niŋdi Hibulu metamdok mede youyemguk

Yodakale Mede

Pepa yoŋ adi metam kayoŋbop niŋ adi nadisukilitihik gweheyeune kadakane tigiŋ doktiŋa yehitubulodaaŋ pepa i youyemiŋa yehitubukilitigiŋ. Pepa yendi Bepaŋ ne’walaŋ saŋiniŋ eŋ titiŋ Jesu maaneŋ tiulidokooŋ kameune fooŋ kwanai dediŋ tuguk uku yohautalak. Ala pepa yendok maaneŋ nemek wapmuhi lufomkulitiniŋ (3) yohautalak.

1. Jesu adi aŋelo hekibe, be Moses, be polofete heki koom hatigiŋ u yalakamedapmaaŋ loloŋnit hatibekdok yoŋa Bepaŋ negoŋ nindapmaguk. Maŋgoŋde Jesu adi Bepaŋ ne’walaŋ mihiŋiŋ hinek, kunumneniŋ foguk, fooŋ metamdi kedeba-utumba tineŋdok yoŋa malabumuŋ eŋ folofigita gineŋ loguk.

2. Bepaŋ negoŋ mihiŋiŋ Jesudi Siloŋyot Folooŋ Hinek diniŋ Talitimeŋ Wapum hatibekdok nindapmaguk.

3. Jesu adi metam nediyeŋ adi nadisukilitimiiŋ u yanagitdok adi saŋiniŋ wapum halimilak, maŋgoŋde adi yadi Siloŋyot diniŋ Talitimeŋ Wapum folooŋ hinek hatilak.

Moses’walaŋ Yodoko Mede keleeŋ titiŋ noli tigiŋ woŋ adi nemek Jesu’walaŋkade maŋgoŋ mintawaak wendiniŋ woliniŋ hogok, ala folooŋ e Jesu ne foloŋ mintaguk. Unduŋ doktiŋa gawaŋbop pepa i youyemgiŋ adi maaŋ nadisukiliti gineŋ fafaŋeeŋ hatibune naihik dapmawaak. Adi malabumuŋ be folofigita u be u mintayembune daudiwe Jesu’walaŋkade hogok tiŋa fafaŋeeŋ yakaneeŋ.

Bepaŋ adi mihiŋiŋdi nemenemek hogohogok molom titiŋdok nindapmaguk

1 Biyagoŋ hinek kuyoŋ, Bepaŋ adi koomkwaha medeŋiŋ polofet heki yenimbune adibo mamaŋ-papaŋ heki nai fee mede talii mebimebi gineŋ hati yeniŋtalabulune 2 mindaŋ nai dapmawe tulune uŋaniŋgoŋ hinek, mihiŋiŋ nimbune mede niniŋguk. Mihiŋiŋ ne yadi nemenemek hogohogok wondiniŋ molom hatidok nindapmaguk. Biyagoŋ kuyoŋ, adi nehigoŋ nemenemek yehitubu-mintagumuk. 3 Kaŋ Bepaŋ ne’walaŋ saŋiniŋ be hautaŋiŋ diniŋ folooŋ mihiŋiŋ foloŋ hatak, eŋ Bepaŋ ne hatilak wendok tuwolit hinek hatilak doktiŋa medeŋiŋ saŋiniŋnitdi nemenemek hogohogok kasop fafaŋeniŋ ulihikilitiune hatak. Tiŋa adigoŋ kadakaniŋ diniŋ geŋgeŋ youtewalanda-dapmaaŋ loguk, wahiŋ Mapme Wapum loloŋnit hinek adi’walaŋ kohoŋ didimeniŋneŋkade itak. 4 Aŋelo heki yalakapme-dapmaguk hatilak, tiŋa undugoŋ wougigit loloŋnit hinek kahileguk wondi aŋelo heki’walaŋ wohigigit yalakapmedapmaŋ tilak.

Bepaŋ mihiŋiŋ adi aŋelo heki yalakapmedapmaaŋ loloŋnit hinek tilak

5 Bepaŋ adi aŋelo niŋ mede indiŋ nemu niŋguk,

“Du biyagoŋ hinek na’walaŋ mihine.

Nu kamiŋ tububihila du’walaŋ baha tilat.”

Be aŋelo niŋdok indiŋ nemu yoguk,

“Nu adi’walaŋ beu tiŋa hatiluwaat.

Kaŋ adi nu’walaŋ mihine tiŋa hatiluwaak.”

6 Eŋ niŋ adi kougoŋ hatigene tuwo biyeniŋ kwetfoloŋ kameune foguk wondok mede indiŋ yoguk,

“Bepaŋ’walaŋ aŋelo heki adi wanakaŋ hogohogok mulelem timiŋa welehikdi niutumbaneeŋ.”

7 Aŋelo hekidok indiŋ yoŋit:

“Adi aŋeloŋiye nadiyembune sububa wele mintaiŋ eŋ tipilapilayeŋiye nadiyembune kudupmebem wele mintaiŋ.”

8 Mihiŋiŋdok adi indiŋ yoŋit.

“Bepaŋ, du mapme hatihatigedi fafaŋeniŋ haliwooŋ halaak, eŋ titiŋ didimeniŋ foloŋ hogok metamgeye yabudokoluwaaŋ. 9 Du yadi titiŋ didimeniŋdok momooŋ yolaŋ eŋ hogolidok adi nadiune tuwot mu tilak. Unduŋ doktiŋa Bepaŋ, da’walaŋ Bepaŋdi welemomooŋ diniŋ wel munduŋ momooŋnitdi gomgamguk, uyadi nokeye’walaŋ tuwolit u kalakapmedapmaŋ hinek gomgamguk.”

10 Niŋ indiŋ yoŋit,

“Wapum, du mebineŋ tububihila kwet wapum diniŋ daŋiniŋ kameguŋ. Eŋ kunum tiŋa nemenemek kunum gineŋ ikiiŋ adi du’walaŋ kohokudi. 11 Adi yadi liwe tineeŋ, eŋ da yadi fafaŋeniŋ hatiŋa wooŋ hatiluwaaŋ. Adi yadi dahidahi dabugoŋ buba tineeŋ. 12 Undiniŋ tubune da yehililiwenekudapmaaŋ folonamandap gitipmuŋ yehitubu-mintawaaŋ. Da yadi hatilaŋ undiniŋgoŋ hatiluwaaŋ eŋ gulet naige nemu dapmawaak.”

13 Bepaŋ adi aŋelo niŋ indiŋ nemu niŋguk,

“Buŋa kohone didimeniŋneŋkade itune memikgeye yehimoŋgofowe kayogedi yehiyalitifowaaŋ.”

14 Aŋelo hogohogok adi yadi tipilapilaye kwanai titiŋdok yapmeguk, ala meeniŋ hatihati momooŋ kahileneeŋ adi yehitubu-lodadok kwetkwet yeniŋkuliŋit.