Jesu’walaŋ Mede Momooŋ Lukdi youkuk
Yodakale Mede
Lukdi Jesu’walaŋ Mede Momooŋ youlene metam Jesu keleyaugiŋ baigoŋ hinek yeninadiune mede kahat momooŋ
hinek timimbune nadiŋa youkuk. Medeŋiŋ daŋiniŋ indiŋ kameeŋ youkuk. “Jesu adi Isilaehi’walaniŋ Tubuloda
niŋ mintadok Bepaŋdi yofolok tubune halibuguk wondiniŋ folooŋ.” Ala Jesu adi Isilae metam hogok yehitubulodadok
mu buguk. Adi yadi metam kwetkwet hatiyam indi maaŋ nihitubulodadok nadiŋa buguk. Ale Mede Momooŋ yohautaluguk
adi Isilaehi metam fofoŋnitdok hogok moŋ. Mede Momooŋ uyadi noli indi’walaŋ baniŋnikdok maaŋ nadiŋa yoluguk.
Tiŋa yonadifo mede fe youkuk. Tububihila Jesu minta tugukneniŋgoŋ nadifo mede youla uge uge kumuŋ gineniŋ
kaikaaŋ pilali hatigene kunum gineŋ logukneŋ uŋgoŋ youdapmaguk. Tiŋa undugoŋ Uŋgoniŋ Munabulidi fooŋ
Jesu’walaŋ kayoŋbop nadisukilitihik tubukilitiguk. Ala me mede iŋoŋ youkukdigoŋ Aposel heki’walaŋ pepa
maaŋ undiniŋgoŋ youkuk kayam.
Fiye 1, 2 eŋ 10 wooŋ 19 gineŋ mede hakiiŋ uye Lukdi pepa youkukneŋ hogok youkuk. Matiyu dut Makdi mede
u mu youkumuk. Kahat uye indihi. Aŋelo hekidi Jesu mihi mintagukneŋ kap tonadifo tigiŋ. Dompa yabudoko
hekidi Jesu mihi mintaaŋ hakuk u kane ugiŋ. Jesu mekuya-kabe gineŋ Siloŋyotneŋ hatiguk. Samalianiŋ me
momooŋ diniŋ yoyout mede. Me wapum niŋ’walaŋ mihiŋiŋ mone kadakaaŋ fiile tuguk diniŋ yoyout mede. Agaŋ
ninadidok mede adi gigine hinek tiŋa youla uguk.
Lukdi mede daŋiniŋ lufomkulitniŋ nimaaŋ indiŋ youkuk. Uŋgoniŋ Munabuli diniŋ mede, tamwoidi Jesu’walaŋ
kwanai gineŋ tubulodagiŋ diniŋ mede, agaŋ Bepaŋdi yomnik tumolokutnimulak diniŋ mede.
Luk’walaŋ Mede diniŋ yohebet
1.1—4 Yodakale
1.5—2.52 Jon dut Jesu’walaŋ mintaminta eŋ kuyahi gineŋ hatigumuk
3.1—20 Jon Imeyout Tububihit’walaŋ mede kahat
3.21—4.13 Jesu Imeyout tuguk eŋ tikamanda mintamiŋguk
4.14—9.50 Jesudi Galili kwetneŋ mintadakaleeŋ kwanai tuguk
9.51—19.27 Galiliniŋ Jelusalemde uguk
19.28—23.56 Jelusalem eŋ yokwet magimagi gineŋ kwanai tuguk
24.1-53 Jesu kaikaaŋ pilakuk, agaŋ mintahebi tuguk, agaŋ kunum gineŋ loguk
1
Lukdi Jesu’walaŋ kahat noliŋiŋ Teopilodok youlimiŋguk
1 O notne Teopilo, mehinek feedi nemek indi’walaŋ iŋoŋ mintaguk wondiniŋ mede kahat youkiŋ.
2 Tiŋa adi nemek koom tububihit gineŋ mintaune me noli adi dauhikdi kaŋ gigitŋiŋ yohautaune nadiŋa youkiŋ.
3 Kaŋ nu maaŋ nemenemek tububihila mintagukneniŋgoŋ nadinadi kwanai baigoŋ hinek tiŋa didimeniŋgoŋ youkamulat.
4 Unduŋ tibe nemenemek ganindidimegiŋ u biyagoŋ hinek unduŋ nadiweŋ.
Aŋelodi Sakaliya Siloŋyot maaneŋ mintamiŋguk
5 Helot adi Judiyahi’walaŋ mapme hatiguk nai uŋaniŋ me niŋ Siloŋyot diniŋ talitimeŋ hatiluguk wou Sakaliya.
(Adi Abaisa diniŋ bop gineniŋ). Tamŋiŋ wou Elisabet, adi maaŋ Alon’walaŋ yalakiŋiŋ.
6 Memalam adi Bepaŋ’walaŋ Yodoko Mede didimeŋgoŋ hinek keleeŋ hatiyagumuk.
7 Tiŋa adi wapmihi nemu yehitubu-mintaaŋ hogok hatiŋa metam gawada hinek tugumuk.
8 Ala heleniŋ Sakaliya adi me Siloŋyot diniŋ talitimeŋ hekidi Siloŋyotneŋ fooŋ tagiŋ unduŋ titiŋdok naiŋiŋ
dulaguk.
9 Ala nai uŋaniŋ Siloŋyot diniŋ talitimeŋ adi titiŋhik keleeŋ Sakaliya adi Siloŋyot maaneŋ fooŋ wahu munduŋ
hemundumunduŋe kwanai tibek nindapmagiŋ. Kaŋ adi unduŋ tibe Wapum’walaŋ Siloŋyotneŋ folune
10 metam bop wapum adi ninadi kwanai fakaŋ ila tigiŋ.
11 Kaŋ Sakaliya adi hemundumunduŋe ha-tulu Wapum’walaŋ aŋelo niŋdi mintamiŋa alta gagayeŋ Sakaliya’walaŋ
kohoŋ didimeniŋneŋkade yakuk.
12 Yalune Sakaliya adi aŋelo kaŋ nadibedi tiŋa munta tuguk.
13 Unduŋ tubune niŋguk, “Sakaliya, du munta mu tibeŋ, Bepaŋ adi yonadige agaŋ nadiguk, ala tamge Elisabet
adi mihi niŋ tubumintagambaak. Kaŋ wou Jon youlaaŋ.
14-15 Adi Wapum’walaŋkade me loloŋnit tibaak doktiŋa mintaune du nadifo wapum hinek tibaaŋ kaŋ metam nolidi
maaŋ nadifo undugoŋ tineeŋ. Mihi mintaune nai uŋaniŋgoŋ Uŋgoniŋ Munabulidi weleŋ maaneŋ fotokowaak tiŋa
wain be ime fafaŋeniŋ nemu nawaak, moŋ hinek.
16 Adi Judahi metam fee kotigoŋ yanagilune Bepaŋ’walaŋkade uneeŋ.
17 Tiŋa adi timeŋ wooŋ saŋiniŋnit hinek polofet Ilaija dabugoŋ Wapum baakdok talik dobui timimbaak. Adi
baŋ heki eŋ wapmihihiye tubukulamaune welekubugoŋ tineeŋ, eŋ metam mede wobu tiiŋ yanagila talik didimeniŋ
keledok yenindidimewaak, tiŋa Wapum metamŋiye u Wapum ne buŋa yabudok yehitiulidokowaak.”
18 Unduŋ yoguk kaŋ Sakaliyadibo niŋguk, “Nu tiŋa tamne indi agaŋ metam gawadahi hinek tamut doktiŋa nemek
i biyagoŋ nobu mintawaak u deti nadiwene folooŋ tibek?”
19 Unduŋ yobu aŋelodibo niŋguk, “Nu wotnene Gabiliye. Nu Bepaŋ’walaŋ namanda foloŋ yatat ale adigoŋ naniŋkulune
gigitmede fofooŋ i tiŋa bu ganilat.
20 Iŋgoŋ du nemek naiŋiŋ foloŋ biyagoŋ mintawaak u ganimbe medene mu nadisukilitilaŋ doktiŋa du mage tehep
tubune mede mu yoŋa hatibune wooŋ gigitmede ganiŋat wondi folooŋ mintaune mede kedem yobaaŋ.”
21 Sakaliya adi unduŋ ha-tulu metam adi dediŋ tiŋa Siloŋyotneŋ fooŋ yagigi hinek hatak yoŋa nadibedi tiŋa
hakiŋ.
22 Ala fooŋ buŋa metam mede mu yeniŋa kohoŋdi welewele hogok tiyembune metam adi kaŋ yogiŋ, adi Siloŋyotneŋ
uŋgoŋ kudi niŋ binek kaŋak doktiŋa tilak.
23 Unduŋ tiŋa kwanai uŋoŋ titiŋdok naiŋiŋ dapmaune yopmaŋde uguk.
24 Wooŋ muniniŋ hatilune tamŋiŋ Elisabet adi mihiwele ikuk. Unduŋ tiŋa muyakip 5 yopmaŋkadegoŋ kabup hebihatiluguk.
25 Yopmaŋ hali indiŋ yoguk, “Kobuk agaŋ Wapumdi tali indiŋ gineŋ nehitubu-lodalak. Tiŋa Bepaŋ adi metam
namandahik gineŋ mekaŋgoŋ hatilat u agaŋ nolom moŋgokutnamulak.”
Aŋelodi Maliya mintamiŋguk
26 Elisabet adi mihiwele ila muyakip 6 hatilu Bepaŋdi Gabiliye niŋkulune Galili kwetneŋ uŋoŋ yokwet wapum
niŋ hatak, wou Nasalet, uŋoŋ foguk.
27 Uŋoŋ waabihem niŋ hatuguk, wou Maliya, adi Josepdok gigit nimbune hatiguk. Josep adi mapme Dewit’walaŋ
yalaki.
28 Ala aŋelodi Maliya hakukneŋ fooŋ indiŋ niŋguk, “Du kulemaŋgoŋ hatibeŋ. Wapumdi dukut hatilak doktiŋa
kahaŋ tigamulak.”
29 Unduŋ yobu Maliya adi nadibedi wapum hinek tiŋa mede u mebi dediŋdok unduŋ nilak yo nadiguk.
30 Kaŋ aŋelodi niŋguk, “Maliya, du Bepaŋdi momooŋ hinek tigamulak doktiŋa munta mu tibeŋ.
31 Du mihiwele ila mihi tubumintaaŋ wou Jesu youlaaŋ.
32 Adi loloŋnit hinek tibaak kaŋ Bepaŋ Loloŋnit mihiŋiŋ nineeŋ. Kaŋ Bepaŋ Wapumdi papaŋ Dewit dabugoŋ mapme
wapum kameu ilaak.
33 Tiŋa adigoŋ Jekop yalakiŋiye’walaŋ mapme wapum fafaŋeniŋ hinek hatibaak, adi’walaŋ mapme kwanaiŋiŋ adi
mu dapmawaak.”
35 Unduŋ yoguk kaŋ aŋelodibo niŋguk, “Uŋgoniŋ Munabulidi welege maaneŋ fotokoune Bepaŋ’walaŋ saŋiniŋdi gehikufulawaak.
Unduŋ doktiŋa Mihi Uŋgoniŋ u mintaune Bepaŋ Mihiŋiŋ nineeŋ.
36 Elisabet namage u nadiweŋ, adi wapmihi tuwot mu nagitdok iŋgoŋ mihiwele ilu muyakip 6 agaŋ tilak, tam
gawadaŋ hinek iŋgoŋ unduŋ tilak.
37 Bepaŋ adi nemenemek tuwot mu tibek nemu hatak.”
38 Unduŋ yobu Maliyadibo yoguk, “Nu adi Wapum’walaŋ tipilapilaye tam doktiŋa yolaŋ undugoŋ hinek mintanambaak.”
Unduŋ yobu aŋelodi bikabuŋa uguk.
Maliyadi Elisabet nadifo mede niŋguk
39 Aŋelo uune Maliya adi tiulidoko tiŋa Nasalet bikabu wooŋ Judiyahi’walaŋ guyaŋneŋ uguk.
40 Wooŋ yokwet Sakaliya malam itowagumukneŋ wosuwaaŋ yohineŋ fooŋ Elisabet niutumba tuguk.
41 Kaŋ Elisabet adi Maliya’walaŋ youtumba mede ya-nadilune nai uŋaniŋgoŋ eyaŋ weleŋ maaneŋ hakuk u kayoŋ
pilaŋ tuguk. Unduŋ tubune Elisabet adi Uŋgoniŋ Munabulidi fotokomimbune
42 mede wapum indiŋ yoguk, “Du Bepaŋdi tamwoi noli yalakapmeeŋ kahaŋ wapum tigamulak, tiŋa mihi tubumintawaaŋ
u maaŋ kahaŋ wapum timilak.”
43 Unduŋ yoŋa yoguk, “Nu nedigoŋ hinek doktiŋa Wapumne’walaŋ miŋdi nabene bulak?
44 Nu du’walaŋ youtumba mede nadiwene eyaŋ welene maaneŋ hatakdi nadifo tiŋa kayoŋ pilaŋ tiŋak doktiŋa ganilat.
45 Bepaŋ adi nemek titiŋdok yoŋak wondok biyagoŋ nadisukilitilaŋ doktiŋa kahaŋ momooŋ hinek tigamulak.”
Maliyadi Bepaŋ wou nintilooŋ niutumbaguk
“Welenedi Wapum niutumbalak,
47 Bepaŋ adi nu’walaŋ Tubuloda me doktiŋa munabulinedi nadifo tilak.
48 Tipilapilaye waabiŋiŋ fofoŋnit nu kaule mu tinamulak doktiŋa kamiŋ tububihila kougoŋ kougoŋ bunit metam
hogohogok adi Bepaŋdi kahaŋ tinamguk u nadineeŋ.
49 Bepaŋ saŋiniŋ molom adi nemek wapum i tinamuŋak doktiŋa wou adi uŋgoniŋ hinek.
50 Metam bebet hatitalabiiŋ tomboyoula hatitaloneeŋ indigoŋ Bepaŋ kaŋ gikiŋgoŋ timiiŋ adi kulema yemuluwaak.
51 Adi kohoŋ wapuhidi kihiwali metam sigitiŋalo tiiŋ adi nadihebethik bunit yehitubu-fiitak.
52 Adi me mapme wapuhi iithik foloŋ yanagi fooŋ yapmeeŋ metam fofoŋhinit yanagi loloŋ tilak.
53 Adi metam nemenemek lohi tiiŋ yemiŋa metam bomboŋhinit yeniŋkulu hogok wiiŋ.
54 Adi mamani-papaniye mede yofafaŋe tiyemguk u agaŋ yehitubu-lodalak.
55 Adi Abalaham tiŋa yalakiŋiye kulema fafaŋeniŋ tubumintayemdok yeniŋguk u kaule mu tuguk.”
Mihi Jon mintaguk
57 Kaŋ Elisabetdi eyaŋŋiŋ mintamindok nai tubune mihi nagikuk.
58 Metam noliŋiye adi Wapumdi nemek momooŋ timiŋguk u kaŋ nadifo noŋgoŋ tigiŋ.
59 Tiŋa melenai 8 dapmaune sigiŋ gitnem diki foloŋ Judahi’walaŋ fek timiŋa wou Sakaliya youtnim yogiŋ.
60 Kaŋ miŋdi moŋ yoguk, “Mihi wou adi Jon.”
62 Unduŋ yoŋa metam adi Sakaliyadi mihi wou dediŋ yobek yoŋa welewele timiŋgiŋ.
63 Kaŋ Sakaliyadi tafedok yenimbu mimbune wou “Jon” youkuk. Unduŋ youlu metam adi u kaŋ boho tigiŋ.
64 Unduŋ tiŋa nai uŋaniŋgoŋ hinek Sakaliya maŋiŋ dilitombune mede yoŋa Bepaŋ niutumbaguk.
65 Unduŋ tuguk kaŋ meŋimeŋiye uŋoŋ yakiŋ adi u kaŋ muntaaŋ gigitŋiŋ yohautaune Judiya diniŋ kwet haŋgihaŋgi
indigoŋ udapmaguk.
66 Kaŋ metam u nadigiŋ heki adi mihi u bedinaditomuŋa kougoŋ dediniŋgoŋ hinek hatibaak yoŋa nadigiŋ. Tiŋa
undugoŋ mihi u Wapum’walaŋ saŋiniŋ adut hatak u miŋgoŋ dakalelak yo kagiŋ.
Sakaliyadi kigili mede yoŋa Bepaŋ niutumbaguk
68 “Indi Isilaehi’walaŋ Bepaŋ Wapum u niutumbayam. Adi metamŋiye buŋa yehitubu-lodaguk.
69 Adi Dewit’walaŋ yalaki niŋ inditok Tubuloda me kamenimiŋak.
70 Koomkwaha polofet uŋgoniŋiye yenimbu undugoŋ yogiŋ.
71 Adi metam momooŋ mu tinimiiŋ be memiknik fiyeŋ yoŋa nibudoko tibe yofafaŋe tuguk.
72 Mamani-papaniye dut yofolok tuguk u kaule mu titiŋdok yoŋa kulema tubumintayemguk.
73 Adi papanik Abalahamdok mede yofafaŋe tiŋa indiŋ niŋguk,
74 ‘Hidi memik fiyeŋ doktiŋa nu habudokowene muntanit mokit nu naniutumbayaneeŋ.’
75 Unduŋ tiŋa helemahelemaŋ adi namanda foloŋ uŋgoniŋ eŋ didimeŋgoŋ yayatdok nadiŋa yoguk.
76 “Mihine, du adi Wapum baakdok talik dobui timimbaaŋ doktiŋa du adi Bepaŋ Loloŋnit Hinek’walaŋ polofet
ganiŋdok.
77 Tiŋa talik dobui tiŋa metamŋiye kadakaniŋhik biyemiŋa yehitubu-lodadok gigit yohautawaaŋ.
78 Bepaŋnik’walaŋ kulemadi nibudokoune kunum diniŋ hautaŋiŋdi indi nihitubu-hautawaak,
79 tiŋa metam kumuŋ diniŋ mambip gineŋ hatiiŋ hogohogok yehitubu-hautaune kulema diniŋ talik didimeniŋgoŋ
keleneeŋ.”