3 Jon
Jon Ina Giruma Viarobina
(3 John)
Vonaviakova
Aposol Jon ina giruma viarobina kamonai na iteregavu meyei. Tuna kubiine igiruma bo, “Taku na kami magura.” Ma igiruma ekalesiya kana koyakoyagha Gayas kurina ma ivi ghegheni, iyamna Keresiyana peyarisi ivitesi. Ma ivonei da tomowa kana vava Diyotrepes ita kitaruvai.
Jon ina nota weni nakanani irereghi.
Vesis 1-4 Vikiikiiwa.
Vesis 5-8 Gayas ivi ghegheni.
Vesis 9-10 Ivonakiiyaragha da Diyotrepes na wawaya berona.
Vesis 11-12 Ivonakiiyaragha da Dimitriyas na wawaya biibiina.
Vesis 13-15 Nota turina.
1
Taku na kami magura. Apos 19:29; Rom 16:23; 1Kor 1:14
Agirugiruma tam varesiku Gayas kurim. Tam nuwanuwaku, ma vonavaghata tepanai aku nuwaviina kurim irakata kirakai.
Kwinaku, tam nuwanuwaku. Akovi da kanumim na yawayawana ma aniponipowana da tupuwim na yawayawana ma am yawasa na vaghina kavakava. Ainuwabiibii kirakai da Keresiyana varevaresita viya ipisi ma ivonavereku da tam kuvi patutu kirakai da vonavaghata kamonai kemiimiiri, ma bade ikikava vonavaghata ketana mara nonowa kekivikivini. Mara nonowa ainuwabiibii kirakai maranai Keresiyana varasi aiyanei da ti na vonavaghata yawasina kamonai emakamakai. Ti na nakanani ma natunatuku.
Gayas ighegheni.
Kwinaku, tam nuwanuwaku. Tam kuvi patutu kirakai da Keresiyana varevaresita mara nonowa kekoyakoyagha bubunisi. Ti na iyavo kava Keriso* Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’ kubiine ebababa ma ibeyebeyena. Namanaki da ke kutakovisi ma kegha da kivitesi. Nani wawayisi viya ibaba ipisi da am nuwaviina ivi sisiyei vitumaghana wawayikai kurikai. Ma ainowi da maranai ita wawaya viya kurim ina nekiibau na berana sago kuna berai ma i vomiiri kana ku mara na kevi tamiinesi ma kevonatawe bubunisi da God ini nuwabiibai. Nani wawayisi Yesu Keriso avanai ikiibau ebababa ma i baba kamonai na ke meyani ita nae iyavo kava ke iti tumaghana kurisi da iti nowi da iti vitesi.
Tuna kubiine tota vitumaghana wawayita tivitesi. Nakanani taberai da nani wawayisi yavata tabiga patapata da vonavaghata tarereghi.
Diyotrepes ma Dimitriyas.
Rorova agiruma ekalesiya am dobuwai kurisi, ma kegha da Diyotrepes aku sisiya ke ita viiya, iyamna ina kayowana da tuna iti bada.
10 Ma maranai ana pisi na ikikava Diyotrepes ivi avaberoweku na peyarina ani debei kurimi. Ma ke tuna kava, varevaresita Keriso kubiine ebababa na ke ita vivikiikiiwesi. Ma bade ekalesiya kamomiyai iyavo kava i kayowana da varevaresita iti kiikiiwesi na egudugudusi. Ma bade ikiibunisi da ke ami vokavakavara ku kamona ina rui.
11 Kwinaku, tam nuwanuwaku. Ke berabero wawayisi kuni bonebonesi, kegha da bera biibiisi kava keberai. Meni wawayina bera maninisi kava ina beraberai, tuna na God natuna. Meni wawayina bera beroberosi ina beraberai, tuna na God ke itakovi.
12 Wawaya peyarisi Dimitriyas ekawakawabiibiiyei ma bade vonavaghata idebei da tuna na wawaya biibiina. Ma tokai bade kavonavonem da tuna na wawaya biibiina ma kuakovi da aviyavisina kaisisiyei na vonavaghata.
Vikiikiiwa damona.
13 Aku nota ipeyari kirakai da ata vonem ma ke ata kayokayowei da wekarakava nani notasi ata giruma. 14 Anotanotai da ke mara gurina ma ana kitim da yavata tisisiya patapata.
15 God ina nuwanuba gwabimuwai ina makai.
Ma turaturata weni dobunai i vikiikiiwa evonavonatawei kurim. Turaturata sago sago duma am dobuwai kevonesi da avi kiikiiwesi.

1:1: Apos 19:29; Rom 16:23; 1Kor 1:14

*1:5: Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’