RIBA HARIHARIUNA IOANE 1
IOANE ENA, EVANELIA
1
Iesu Keriso ia Eaubada ede
Heb. 1.5-13
Huia bagabaguna eai wa Riba ede, eo Riba wa Eaubada maena, eo Riba wa ia ede Eaubada. Ia ede huia bagubaguna eai wa Eaubada maena.
Ana paisoa, sora nige i hemalatau
Heb. 1
Ginauri gamagaridi ia tauginauridi ede; ginauri gamagaridi se hetubudi iabom mo tauhetubudi ede. Mauri ia aloboeana eai; na mauri wa tatao edi mara ede. Marana ie sina masigiri boeana eai; masigirina mara wa i heasaasaei.
Ioane Bapatiso ana paisoa
Mt. 3.1-17; Mk. 1.1-11; Lk. 3.1-23
Tau esau i laoma, Eaubada i hetamariama: ia esana ede Ioane. Ia i loama, tauribahemasarahana, marana wa i hemasaraha, ia arinai abo tatao gamagaridi se nuatudidini. Wau marana ia nige’e; i laoma mo bena marana i riba hemasaraha.
Iesu Keriso Marana mamohoi
Io. 8.12; 9.5; 12.46
Mara tahunuana i laolaoma ede, ia ede tatao gamagaridi tanoubu eai ta i hemaradi. 10 Ia tanoubu eai ta ie mia; ia tanoubu tauginaurina ede; tanoubu hinage ia nige se nuatui.
Pei labui: nanatunayao eo tauawayagara
1Io. 3.1, 2; 5.11, 12
11 Ia i laoma enanayao mamohoi aridi eai, enanayao mamohoi ia se otaotaei. 12 Headi ia se awaabiei, arinai i hegigiboridi isi se hemala Eaubada nanatunayao; isi wa ia se sogohididini; 13 isi osina eai nige se hetubudi, hinage buluma dobilana eai nige’e; hinage tau nuana eai nige’e; Eaubada iabom i hetubudi.
I hemalatau
Mt. 1.18-23; Lk. 1.30-35; Rom. 1.4
14 Riba wa abo i hemala buluma, maeda ta miaesega, (ena lolo ai itayao doha Tamana natueseesegana ena lolo), ainauia, eo riba mamohoina i monau.
Ioane Bapatiso ena ribahemasaraha
Mt. 3.1-17; Mk. 1.1-11; Lk. 3.1-18
15 Ioane ia i ribahemasaraha, i eogayoga, i ene, “Ia ede nei lahinae ea ribaei wa, ‘Esau murigu eai i laoma, ia abo i bagubagunaegu: ia taubagunaegu mamohoina ede.’ ” 16 Ia nuana gigibori i monau, arinai ai gamagarimai enamai ai abi, i ainauia to i ainauia. 17 Mose laugagaeo i ledima: na ainauia eo riba mamohoina Iesu Keriso i ledima. 18 Nige sora huia esau tau esau Eaubada ie ita; Natueseesegana Tamana nuapouna eai ie mia, ia mo i hemasaraha.
19 Ioane ena riba ede ina, Iudea tataodi Ierusalema eai, kohena eo Levi tataodi headi se hetamaridi ia arinai, se hesio, si ene, “Oa ede eai?” 20 Ia abo i ribahemasaraha, nige i harere: i ribamasaraha mo, “Eau ta nige Keriso.” 21 Se oimuri arinai, si ene, “Oa ede saha? Oa Elia ede?” I ene “Nige’e.” “Oa peroveta wa?” I ene “Nige’e.” 22 Abo se ribalau ia arinai, si ene, “Oa ede eai? tauhetamarimai se hesio wa abo ai lau ai heribadi. Oa edoha u ribaeuioim?” 23 I ene, “Eau esau arinana barabara eai i eogayoga, ‘Guiau ena eda au hedudurai,’ doha Isaia peroveta i ribaei.”
24 Tauhetamaridi wa, isi ede Parisea peledi. 25 Isi se hesiolau ia arinai, si ene, “U ene oa nige Keriso, oa nige Elia, oa nige peroveta esau, ue saha u hebahebapatiso?” 26 Ioane i heribadi i ene, “Eau goila eai ea hebapatiso: esau boeamiu eai i totoro omi nige au ita. 27 Ia ede teina wa murigu eai i laoma, eau nige ea lolo ia aena umna mainana ea eairi.” 28 Ina ginauri ta se tubutubu Betania eai, Ioridana hari tehana eai, Ioane ena aba hebahebapatiso.
29 Mara‐ie‐tom Ioane Iesu i italaei i laoma ia hesabana, i ene, “Au ita, Eaubada ena * Mamoe natuna, English: Lamb. Arenio tanoubu edi baaea i abihaidi. 30 Ia ede lahinae ea ribaei wa, ea ene, ‘Esau murigu eai i laoma, ia i bagunaegu, ia taubagunaegu mamohoina ede.’ 31 Eau hinage ia nige ea ita: egu nuatu mo Isaraela eai abo i taumasaraha, paana ede ea laoma ta, goila eai ea hebahebapatiso.” 32 Ioane i wasawasaei, i ene, “Eau Earua ea iita galewa eai i dobidobima doha bunebune, i mia ia potana eai. 33 Ia nige ea nuatui: goila eai ea hebapatisoi ta tauhetamariguma i heribagu i ene, ‘Ena Earua u ita i dobima, i taru tau esau potana eai, ia ede Earua Tabuna arinai abo i hebahebapatiso.’ 34 Ea itayao, eo ea ribahemasaraha, teina ia Eaubada Natuna ede.”
Iesu Keriso ana paisoa i hetubu tatao matadi eai
Io. 1.35-12.50
35 Mara‐ie‐tom abo hinage Ioane eo ena heaheata labui maena se totoro. 36 I itaitalau Iesu i laulau, i ene, “Au ita, Eaubada ena Arenio!” 37 Heaheata labui wa ena riba se ataiei, Iesu se hemuriwatai. 38 Iesu abo i torobui, i itadi se hemuriwataiyama, ie ribalau isi aridi eai i ene, “Saha au eooi?” Si ene, “Rabi e, (heaheasonina ede doha si ene, Tauheata e), haedi ue mia?” 39 I ribalau isi aridi eai, i ene, “Au laoma au ita.” Se lau ena aba mia se ita, nei asubenana ne maedi se mia: paana mahana hesaudoudoina eai. 40 Wau taudi labui wa Ioane ena riba se ataiei, eo ia se hemuriwatai wa, esau Anederea, Simona Petero ena tau. 41 Ia ena tau mamohoi Simona i lobai bagunai, i ribalau ia arinai i ene, “Mesia ai lobaiyao” (heaheasonina ede Keriso). 42 Ia i woealaei Iesu arinai. Iesu ia i ita abo i ene, “Oa Simona, Iona natuna? esam abo se torebui Kipasi, heaheasonina ede we’u‐tau Petero.”
43 Mara‐ie‐tom Iesu bena i lau Galilaia eai, ia Pilipo i lobai, i ribalau ia arinai i ene, “U hemuriwataiguma.” 44 Pilipo Betesaida tauna, Anederea eo Petero edi eanua ede. 45 Pilipo Natanaela i lobai, i ribalau ia arinai, i ene, “Ia Mose ena laugagaeo eai, eo peroveta se uriuriyao wa, ai lobaiyao, Iesu Nasareta, Iosepa natuna.” 46 Natanaela i ribalau ia arinai i ene, “Ginauri lolona saha Nasareta eai abo i masaraha wa?” Pilipo i ene, “Hage u laoma u ita.” 47 Iesu Natanaela ie ita i laolaoma ia arinai, i ene, “Au ita, Isaraela tauna tahunuana nei, ia arinai nige borabora!” 48 Natanaela ia i heriba i ene, “Oa haedi u itagu?” Iesu i ribalau ia arinai, i ene, “Pilipo sora nige i eogaim, oa kuhou paana eai wa, ea itamo.” 49 Natanaela i ribalau ia arinai, i ene, “Rabi e, Oa Eaubada natuna ede; oa Isaraela wasawasana ede.” 50 Iesu ie ribalau ia arinai, i ene, “Wau ea ’ne kuhou paana eai ea itam wa, arinai u awamamohoiegu ede? Sora ginauri tahutahunuadi abo u itadi.” 51 Ia i ribalau ia arinai, i ene, “Mamohoi, mamohoi, ea heribam ta, sora abo u ita galewa i taigari, Eaubada ena aneru se sae eo se dobima Tau Natuna potana eai.”

*1:29: Mamoe natuna, English: Lamb.

1:42: we’u‐tau