RIBA HARIHARIUNA SALAMO 1
SALAMO HEADI BUKANA
1
Laulau dudurai tauna eo laulau baaea tauna
Tau wa ie kode
ia laulau gewagewa tataodi edi ribahesanapu nige i laulauedi,
baaea tataodi edi dobila eai nige i totoro,
eo Eaubada tau‐alaliuliuwaena edi oigogo eai nige i patulau;
na GUIAU ena laugagaeo i kodei mo,
eo i hasihasiri asubena to maiona.
Ia doha oeagi esau
saga gegesina eai se umai,
ena huia ua eai aiaina abo ie tore,
eo luguna taba nige se wowoea.
Ginauri gamagaridi i ginauridi abo se lau lolo.
 
Laulau gewagewa tataodi isi nige meta doha,
isi doha sitona wenudi mana i eoho’eohoedi.
Arinai ede laulau gewagewa tataodi hedudurai asubenana eai taba nige se toro,
eo baaea tataodi taulaulau dudurai edi oigogo eai taba nige se toro.
Paana GUIAU laulau dudurai tataodi i abi komakomanidi,
na laulau gewagewa tataodi abo se tauyamui.