Maaron Saveeŋ Toni Patabuaŋ Maaron Igham Mulin Yes Israela 1
Maaron Igham Mulin Yes Israela Pa Pataŋani Todi
Kisim Bek—Eksodus
1
Yes Israela to tizila Isip ne izadi
1-5 Yes Israela to yesŋa tamandi Yakop, ve ndizwadi ve ndinatudi tizila pa Isip ne izadi tovene: Ruben, Simeon, Levi, Yuda, Isakar, Zebulun, Benyamin, Dan, Naptali, Gat ve Aser. Yakop iza ite Israel. Papaghu toni to yesŋa tizila Isip, yes irau tamoot tol saaŋgul (70). Ve natu Yosep, ye imuuŋ ila ineep pataghaaŋ wa. Mbnp 46:8+
Yosep imaat, ve tazi toman nditogha ve tamtoghon todi pida to yesŋa tizila Isip pa sawa tonenen, tineep tonowe le tisob timatmaat paam. Eemoghon yes Israela tipopoop, ve papaghu todi timasa le tinim ival kat ve taan to yes Isipa ivon padi. Tovenen tapiridi ighaze ilib padi. Mbaŋ 7:17
Kinik paghu to Isip ighur pataŋani pa yes Israela
Yes Israela tineep tonowe irau ndaman ndaman, ghoro kinik paghu eez ivot ve igham pooz izi Isip. Kinik paghu tonowen, ye iwatag Yosep uraat toni rita maau. Mbaŋ 7:18
Tovenen isaav pa yes Isipa ighaze: “O, aghita ghiit wa? Aazne, yes Israela timasa tinim naol ve paam tapiridi ilib pait. 10 Tovenen iit irau tagham ŋgar pooi, ve takaal ataam eta pa tatatan tapiridi. Pa vene, tivot tinim ival kat ve tilib pait. Ve ighaze malmal eta imundig, nene pale tila toman koiaad, ve tiparab toman ghiit ve tilib pait, ghoro tipul taan toit ve tighau tila.” Mbaŋ 7:19
11 Tovenen yes Isipa tigham yes Israela tinim mbesooŋa sorok padi, ve tighur ŋginiiŋa ariaŋadi pa tiŋgin di. Yes ŋginiiŋa tonowen tighur uraat pataŋani kat padi, leso titatan di. Tigham di tipamundigin ndug papaghu ru, leso tilup aniiŋ toman mbeb pida to kinik tila tonowe. Ndug eez, iza Pitom, ve ite iza Ramses. 12 Yes Isipa tigham samin yes Israela ve tighur uraat pataŋani naol padi. Leso titatan di ve tapiridi isob. Eemoghon tiraua maau. Yes Israela tivotvot tinim naol le naol kat, ve tila tineep irau taan isob to yes Isipa. Tovenen yes Isipa timatughez padi. 13 Tauto tiŋgal matadi pa uraat pida paam to pataŋani le pataŋani kat. Lolodi isamin di rita maau. Mbnp 15:13
14 Tigham le yes Israela nepooŋadi isami kat. Pasa, tighurghur uraat pataŋani kat padi. Tigham di tigharaat brik ve tirei ruum, ve tigham uraat ariaŋa pa uum paam. Ve sawa isob to yes Israela tighamgham uraat, yes Isipa lolodi isamin di rita maau.
15-16 Ghoro kinik to Isip ipoi Hibru tidi ru tinim. Eez iza Sipra, ve ite iza Pua. Yesuru uraat todi to tipapopan ndiliva to yes Hibrua. Kinik isaav padi ighaze: “Alooŋ. Sawa to apapopan Hibru tidi, aghita ndinatudi. Ighaze nditamoot, arab di timaat. Ve ighaze ndiliva, ghoro apul di tineep.” 17 Eemoghon ndiliva ru tonowen timatughez pa Maaron. Tovenen titaghon kinik aliŋa maau, ve tipul ndipain nditamoot tineep. Mbaŋ 5:29
18 Tovenen kinik ipoi yesuru timuul tinim, ve ighason di ighaze: “Pughu vena to yamru azoor aliŋag, ve apulpul ndipain nditamoot to yes Hibrua tineep?”
19 Yesuru tipamuul aliŋa tighaze: “Wai, Hibru tidi, popaaŋ todi, inimale Isip tidi maau. Pasa, yes ndiliva ariaŋadi, ve tipopoop rikia moghon. Sawa to yeru nilaghlaagh sone, yes tipoop wa!” 20-21 Ndiliva ru tonenen timatughez pa Maaron ve titaghon ŋgar toni. Tovenen ye igham poian di, le anadi tipoop ledi ndinatudi paam. Ve yes Israela tivotvot le tinim ival le ival kat. Ve tapiridi paam ivot inim tiina kat.
22 Tovenen kinik * Yes Isipa tiwatwaat saveeŋ ‘kinik’ ila taudi aliŋadi tighaze ‘Paro.’ Tauto Baibol pida tiwaat kinik to Isip ‘Paro.’ ‘Paro’ nene kinik to Isip iza maau. Nene isavia uraat toni to ye kinik. Ŋgara katindi matadi iŋgal tighaze kinik to igham samin yes Israela ne, ye iza Ramses.
isaav ariaŋa pa ival tiina to Isip ighaze: “Ndipain nditamoot to Hibru tidi tipoop di, yam apiyaav di tisob tila ya Nil. Ve ighaze ndiliva, ghoro apul di tineep.” Mbaŋ 7:19

*1:22: Yes Isipa tiwatwaat saveeŋ ‘kinik’ ila taudi aliŋadi tighaze ‘Paro.’ Tauto Baibol pida tiwaat kinik to Isip ‘Paro.’ ‘Paro’ nene kinik to Isip iza maau. Nene isavia uraat toni to ye kinik. Ŋgara katindi matadi iŋgal tighaze kinik to igham samin yes Israela ne, ye iza Ramses.