Maaron Saveeŋ Toni Patabuaŋ Lukas 1
Varu Poia to Lukas Imbooda
Luk—Luke
1
Paesiiŋ to Lukas
1-2 O tiina tiou Teopilus, Maaron igham uraat tiina ivot ila iit lolood itaghon saveeŋ mbuaaŋ toni. Sawa to uraat tonowen ivot muuŋ ve inim, ndiran pida tinepneep, ve tighita pa matadi. Tauto tipariaaŋ uraat tonenen saveeŋa ve tigham uraata. Ndiran tonowen tisaav pooi payei pa uraat tonenen. Leso niwatagi paam. Ve tamtoghon katindi titoova pa timbood poian kamos tonenen ila rau. Mbaŋ 1:1+; Hib 2:3; 1Yo 1:1
3-4 You tovene paam. Sawa mala ris, nazuari ghou, leso nawatag katin uraat naol tonenen ila to pughu ve inim. Ve nambood kamos tonenen ila rau itaghon katin mbeb to ivot. Tauto aazne, nasaŋgoora ilat payom. Leso uwatag ughaze saveeŋ to tipatoot ghom pani, nene onoon moghon. 2Tim 3:14; 2Pe 1:16
Aŋela ivot to Sakaria
Sawa to kinik Erod iŋgin taan suruvu to Yudea, ŋgeu eez to watooŋrau inepneep, iza Sakaria. Ye ineep ila rouŋ to Abia pa uraat to watooŋrau. Azuwa iza Elisabet. Ye paam siŋ to Aron. Yesuru tamtoghon deŋiadi. Ledi sosor eta ila Maaron mata maau. Sawa isob, matadi kisin tutuuŋ to Ŋgeu Tiina toman tutuuŋ ŋgara, ve titaghoni kat. Eemoghon yesuru ledi natudi eta maau. Pasa, Elisabet ye uupa. Ve yesuru tinim ndolman watwaat wa.
8-9 Sawa eez, Sakaria toman ndita pida to tineep ila rouŋ to Abia, anadi tila tigham uraat ila Maaron nagho ila Rumai Tiina lolo. Ndiran to watooŋrau, gabuadi tovene: Sawa todi to uraat ighaze ivot, ghoro tiŋgozŋgooz. Leso ipatooŋ sei to pale ila itun naunauŋ to vuzi poia ila Maaron nagho. Sawa tonenen, tiŋgozŋgooz le Sakaria iza ivot. 10 Tovenen sawa to tunuuŋ naunauŋ, ye ineep ila Rumai Tiina lolo, ve igham uraat tonenen, ve ival tiina tineep pumuri ve tisuŋsuŋ.
11 Sakaria ighamgham uraat, ve mala maau, aŋela eez to Ŋgeu Tiina ivot toni, ve iyoon ila artaal dige to ila pa nima waan. 12 Sakaria ighita aŋela tonowen le ruŋa iza ve matughezaaŋ tiina ighami.
13 Eemoghon aŋela isaav pani ighaze: “Sakaria, umatughez malep. Suŋuuŋ tiom, Maaron ilooŋa wa. Azuwam Elisabet pale apo ve ipoop tamoot. Pain tonowen, yom uwaat iza Yoan. 14 Ye pale igham ghom tinim iza ve lolom poia kat. Ve yom moghon maau. Sawa to tina ipoopa, ival tiina pale tinidi iza ve lolodi poia pani paam. 15 Pasa, ye pale iza tiina ila Maaron mata. Ye irau ighun vaen, ma ya ariaŋa maau. Ve sawa to ye inepneep ila tiina apo lolo ve ila, Avuvu Patabuaŋ pale izeeva. Nam 6:1+
16 Ye pale igham tamtoghon katindi to Israel titoor ŋgar todi imuul ila pa Tiina todi Maaron. 17 Ŋgar toni ve tapiri pale inimale propet Ilia. Ve ye pale imuuŋ pa Ŋgeu Tiina, ve igharaat ataam pani. Pale itoor ndolman ŋgar todi imuul ila pa ndinatudi, leso tilup lolodi inim ee moghon. Ve igham yes ndiran to didiaaŋ titoor ŋgar todi, ve titaghon ŋgar poia tinimale tamtoghon deŋiadi. Leso igham tamtoghon tigharaat taudi ve tisaŋan sawa to Ŋgeu Tiina igham mulin di.” Mal 3:1, 4:5+; Mt 3:3; Mk 9:12
18 Sakaria ilooŋ saveeŋ tonene, ve ighason aŋela ighaze: “Sa mbeb pale inim ghilalooŋ payou leso nawatag naghaze saveeŋ tiom pale ighur anoŋa? Ughita, you nanim olman waat ve azuwag inim liva waat paam.” Mbnp 18:11
19 Aŋela ipamuul aliŋa ighaze: “You Gabriel. Moghon moghon nayondyood ila Maaron nagho. Ye imbaaŋ ghou nanim pa nasavia mbeb poia tonene varu payom. Dan 8:16, 9:21; Hib 1:14
20 Ve ulooŋ. Saveeŋ tiou tonene pale ighur anoŋa ivot itaghon sawa to Maaron ighuri. Eemoghon yom ughur ila maau. Tovenen avom pale ivool, ve irau usaav maau, lee saveeŋ tonene anoŋa ivot.”
21 Sakaria ineep mala ila Rumai Tiina lolo. Tovenen ival tiina to tineep pumuri tisaŋani le maau, ve tigham ŋgar naol pani. 22 Sawa to ivot ila todi, ye irau isavia saveeŋ eta padi maau. Ipartoghon pa nima moghon. Pasa, avo ivool. Tauto tighilaal tighaze mbeb eta avaat ivot pani ila rumai lolo.
23 Sakaria inepneep le sawa toni to uraat isob, ve imuul ila pa ndug toni. 24 Muri ghoro, azuwa Elisabet apo. Ye ineep ila ruum lolo irau kaiyo liim inim ŋgozaaŋ tau. 25 Ve mata iŋgal ighaze: “Ŋgeu Tiina ighita pataŋani tiou, tauto lolo isamin ghou ve iuul ghou le aazne mayag ila tamtoghon matadi muul maau.” Mbnp 30:23
Maaron imbaaŋ aŋela Gabriel ila ivot to Maria
26 Elisabet kaiyo toni irau liim ve eez, ghoro Maaron imbaaŋ aŋela Gabriel ila ndug Nasaret to ineep taan suruvu to Galilaia. 27 Ye ila ivot to liva paghu eez, iza Maria. Ye, tisia pa ŋgeu eez wa, iza Yosep. Yosep tonene, ye siŋ to kinik David. Mt 1:6+; Lu 2:5
28 Gabriel ila ivot to Maria, ve isaav pani ighaze: “Maria, ndag poia! Ŋgeu Tiina lolo payom, ve ipakur ghom. Ve ye ineep toman ghom.”
29 Maria ilooŋ saveeŋ tonene le ruŋa iza ve igham ŋgar naol ighaze saveeŋ poia to aŋela isavia pani, nene pughu vena?
30 Tovenen aŋela isaav pani muul ighaze: “Maria, umatughez malep. Pasa, Maaron lolo payom ve igham poian ghom. 31 Ulooŋ. Yom pale apom, ve upoop natum tamoot. Pain tonenen, yom uwaat iza Yesu. Is 7:14; Mt 1:21; Lu 2:21
32 Ye pale iza tiina kat, ve tiwaata tighaze Maaron Tiina To Ilib Pa Ndimaronŋa Tisob Ne Natu. Tiina toit Maaron pale ighuri pa igham pooz inimale timbu David. Mbo 2:6+, 132:11; Is 9:6+
33 Ve pooz toni irau isob ne maau. Ye pale iŋgin Yakop papaghu toni itaghoni taghoni gha ila.” Dan 2:44, 7:14; Hib 1:8
34 Aŋela isavsaav le isob, ghoro Maria ighasoni ighaze: “Saveeŋ tiom tonene pale anoŋa ivot vena? Pasa, you liva paghu. Yeru ŋgeu eta nilup ghei sone.”
35 Aŋela ipamuul aliŋa ighaze: “Avuvu Patabuaŋ toman Maaron Tiina To Ilib Pa Ndimaronŋa Tisob Ne tapiri pale iza tiom. Tovenen pain to yom upoopa, ye pale patabuaŋ, ve tiwaata tighaze ‘Maaron Natu.’ Mt 1:18+; Mk 15:39
36 Ve ulooŋ. Waghamliva Elisabet to inim liva waat ve muuŋ tiwatwaata tighaze uupa, ye paam apo, ve kaiyo toni liim ve eez wa. 37 Pasa, Maaron, mbeb eta ila muri maau.” Mbnp 18:14; Mt 19:26; Ro 4:21
38 Tovenen Maria isaav pani muul ighaze: “Poia. You liva mbesooŋa to Ŋgeu Tiina. Ye irau igham mbeb ivot payou itaghon aliŋam.” Maria isavia saveeŋ tonene le isob, ghoro aŋela ipuli, ve ila.
Maria ila ighita Elisabet
39 Sawa tonenen, Maria imundig ve ilaagh rikia moghon ila ivot Sakaria yesuru Elisabet ndug todi. Ndug tonowen ineep ila taan suruvu to Yudea izala lolooz. 40 Ila peria, ve malmali ilooŋ ila ruum to Sakaria, ve igham ‘ndag poia’ pa Elisabet.
41-42 Elisabet ilooŋ Maria aliŋa, ve natu ipuul ve ivazag ila tina apo lolo. Ghoro Avuvu Patabuaŋ izeev Elisabet, ve ipamundigini ve isaav aliŋa tiina ighaze: “Maria, Maaron ipakur ghom, ve ighur poia toni tiina iza tiom le ulib pa ndiliva tisob. Ve natum to apom pani ne, Maaron pale ipakuri ve ighur poia toni iza toni paam. Lu 1:15
43 You sei, to Maaron tiou tina inim iŋgig ghou? 44 Sawa kat to nalooŋ ugham ‘ndag poia’ payou, natug to ineep ila apog lolo ne, ipuul toman tini iza. 45 Poia to Ŋgeu Tiina pale iza tiom. Pasa, yom ughur ila ughaze saveeŋ to ye isavia payom, nene pale anoŋa ivot.”
Mbouŋ to Maria
(1Sam 2:1-10)
46-47 Ghoro Maria ipait Maaron iza tovene:
“You napait Ŋgeu Tiina toman lolog. Pasa, ye iza tiina kat.
Maaron, ye Volaaŋa tiou to igham mulin ghou. Tovenen lolog poia kat pani. Mbo 34:2+; 1Tim 4:10
 
48 You liva mbesooŋa toni sorok. Leg izag maau.
Eemoghon ye mata iŋgalŋgal ghou ve igham poian ghou.
Tovenen aazne ve ila, tamtoghon pale tisavia poia to Maaron to iza tiou. Mbo 138:6; Lu 11:27
 
49 Pasa, Maaron ariaŋa igham uraat tintina payou.
Ye iza patabuaŋ. Mbo 71:19, 111:9, 126:2+
 
50 Tamtoghon to timatughez pani ve titaghon ŋgar toni, ye lolo isamin di, ve iuluul di. Ighamgham tovene pa tamtoghon to aazne, ve itaghoni taghoni gha ila. Igham 20:6; Mbo 103:13-18
 
51 Maaron nima ighamgham uraat tintina, leso ipatooŋ tapiri ivot ighazooŋ.
Tamtoghon to tipapait taudi izadi tighaze yes tiraua, ye ireu di tiwaghaughau. Lu 18:9+; 1Pe 5:5
 
52 Ve yes daba to tapiridi tintina, ye indirndiir di pa inadi to ghamuuŋ pooz, ve itatan di tizi tinim mbeb sorok.
Eemoghon tamtoghon to ledi izadi maau, ye ipakur di. Mbo 113:7; Mt 23:12; Kol 2:15
 
53 Ve yes to pitool di, ye igham mbeb popoia padi, ve tighan le isooŋ di.
Eemoghon mbaliiŋ taudi, ye indiir di tighau tila toman nimadi ŋginiŋa moghon. Mbo 34:10, 107:9; Lu 6:21
 
54-55 Muuŋ, ye imbua saveeŋ toman nditimbuud tovene: Ye pale lolo isamin Abaram ve papaghu toni, ve iuul di itaghoni taghoni gha ila.
Tauto aazne, mata iŋgal mbesooŋa toni Israel, ve iuul di.” Mbnp 17:7; Mbo 98:3; Mika 7:20; Ro 11:28
56 Maria ineep toman Elisabet irau kaiyo tol ma venen, ghoro imundig imuul ila pa ndug toni.
Elisabet ipoop Yoan
57 Elisabet sawa toni to popaaŋ ivot, ve ipoop tamoot. 58 Siŋwaaro toni toman ndita pida to ruum todi igharau, tilooŋ Elisabet varu tighaze Ŋgeu Tiina lolo isamini ve igham ulaaŋ tiina pani. Tauto yesŋa Elisabet lolodi poia.
59 Tineep le mboŋ inim liim ve tol, ghoro nditadi tinim pa uraat to zirooŋ pain kainaŋen tonenen. Ve tighaze tiwaat pisis to tama Sakaria pani. Mbnp 17:12
60 Eemoghon tina isaav padi ighaze: “Maau! Tawaat iza Yoan.”
61 Yes tipamuul aliŋa tighaze: “Nene poia. Eemoghon siŋ tiom eta iza tovene maau.” 62 Tauto tipartoghon pa tama tighaze tighita pale iwaat iza sei?
63 Sakaria ipartoghon padi ve tigham rau inim, ve imbood saveeŋ tovene: “Ye iza Yoan.” Yes to tineep toman di, tighita mbeb tonenen le tisob ruŋadi iza. 64 Rikia moghon Sakaria avo pakia, yama imbees, ve ipait Maaron iza pa poia toni.
65 Tauto matughezaaŋ tiina igham tamtoghon tisob to tineep tigharau di. Ve tisavia mbeb tisob tonenen varu irau lolooz to taan suruvu to Yudea. 66 Tamtoghon tisob to tilooŋ mbeb tonenen varu, tigham ŋgar naol, ve tiwasavon di tighaze: “Wai, pain tonowen, muri pale igham sa?” Pasa, tighilaal tighaze ye ineep ila Ŋgeu Tiina nima wa.
Mbouŋ to Sakaria
67 Ghoro Avuvu Patabuaŋ izeev Yoan tama Sakaria, ve ye ivotia Maaron aliŋa inim propet ighaze:
68 “Iit tapait Maaron pa poia toni! Ye Tiina to iit Israela.
Pasa, ye inim pa ulaaŋ tamtoghon toni, leso igham mulin di pa pataŋani todi. Mbo 72:18, 111:9; Lu 7:16
 
69-70 Ye ighur leed Volaaŋa ariaŋa eez. Leso igham mulin ghiit pa pataŋani toit, itaghon saveeŋ to muuŋ ivotia ila yes propeta toni patabuaŋa avodi.
Volaaŋa tonowen ivot ila siŋ to mbesooŋa toni David. Mt 1:1; Ro 1:1-3
 
71 Ye pale igham mulin ghiit ila koiaadŋa nimadi.
Leso taneep ila yes to tighur koi pait ne sambadi muul sob.
 
72-73 Muuŋ, Maaron imbua saveeŋ toman timbuud Abaram, ve ipariaaŋa le iyaryaaŋ kat. Ighaze:
Yesuru pale tilup di tinim ee moghon. Ve ye pale lolo isamin Abaram toman papaghu toni, ve iuul di pa pataŋani todi itaghoni taghoni gha ila.
Tauto mata iŋgal saveeŋ mbuaaŋ toni patabuaŋ tonowen, Mbnp 17:1+, 22:16+
 
74 ve igham mulin ghiit ila koiaadŋa nimadi.
Leso tamatughez muul sob, ve tambees pani toman lolood poia, Ro 6:18,22; 1Yo 4:17+; Hib 9:14
 
75 ve tataghon ŋgar to patabuaŋ ve deŋia moghon ila mata, le irau sawa toit to taan isob.” Ep 4:24; Tit 2:12; 1Pe 1:15
76 Ghoro Sakaria isaav pa natu ighaze:
“Natug, yom pale tiwaat ghom tighaze propet to Maaron Tiina To Ilib Pa Ndimaronŋa Tisob.
Pasa, yom pale umuuŋ pa Ŋgeu Tiina, ve ugharaat ataam pani. Is 40:3; Mal 3:1; Mt 3:3, 11:9
 
77 Yom pale upatoot Maaron tamtoghon toni, leso tiwatag ataam to ye pale igham mulin di ve ireu sosor todi. Yer 31:34; Mt 1:21; Lu 3:3
 
78 Pasa, Maaron toit, ye lolo pait, ve lolo isamin ghiit kat.
Tovenen ghazooŋa to sambam pale izi inim pait inimale ndag ighan ndug ve iza.
 
79 Yes to ndoroom ikau di, ve tineep ila mateeŋ yavyaava, ghazooŋa tonowen pale isul di, ve ipaghazoŋan di.
Ve ye pale igham pooz pait, leso tataghon ataam to taneep poia toman lolood luuma.” Is 9:1+; Mt 4:16; Yo 8:12; Mbaŋ 26:18
80 Yoan itub inim olman, ve Maaron Avuvu tapiri ineep toni ve ipaloti. Ye ila ineep izi ndug balim le irau sawa to ipamundigin uraat toni ila yes Israela matadi. Lu 2:40,52