Maaron Saveeŋ Toni Patabuaŋ Mbouŋ to Yes Israela 1
Mbouŋ To Yes Israela
Buk Song—Psalms
1
Ataam to ndiran deŋiadi ve ataam to ndiran samsamiadi
Sei to poia to Maaron izaza toni ve tini iza?
Nene ŋgeu to izorzoor ndiran samsamiadi ŋgar todi.
Ve yes to tiyel pa ataam to Maaron, ye itaghon ŋgar todi maau.
Ve ndiran to tiveveleg Maaron paam, ye ilup toman di maau. Mbo 26:4+
 
Saveeŋ to Maaron toman tutuuŋ toni, nene ighami lolo poia le poia kat.
Ve ighamgham ŋgar pani irau mboŋ ve ndag. Mbo 112:1, 119:1
 
Tamtoghon tovene, ye inimale ai to tivazogi igharau ya to ireer.
Sawa to anoŋa ivot, nene pale ighur anoŋa popoiadi.
Ve sawa to ndag tiina, raua irau imalai maau.
Tamtoghon tovene, uraat toni isob ilaan poia moghon. Mbo 52:8, 92:12
Eemoghon ndiran samsamiadi, nepooŋadi tovene maau.
Yes tinimale buzbuz to ighaze yaghur imundig, ghoro iviviira ilale.
 
Tovenen sawa to Maaron iŋgabiiz tamtoghon ve ighur atia padi,
ndiran samsamiadi pale ledi saveeŋ maau, ve titud moghon.
Ndiran to ghamuuŋ sosor irau tineep toman tamtoghon deŋiadi ila lupuuŋ todi ne maau. Mt 13:41+; Syg 22:14
Tovenen tamtoghon deŋiadi, Maaron mata padi, ve iŋginŋgin di pa laghooŋ todi.
Eemoghon ndiran to titaghon ataam samia, yes pale tilaledi.