Rau Ite Imin Ru Tau Yoan Iboode
2 Jon—2 John
1
Yau ŋginiiŋ to lupuuŋ to Krisi. Nabood rau tane pa yo olman tinazi tau Maaron isiigh ghom umin le na, tomania natumŋa. * Ziiri tane isaav tauvene: Yoan ibood rau tane pa livaa ee tomania natŋa. Ve ziiri 13 isavia livaa tawe tazliva. Yes ŋgara tigham ŋgar tighe Yoan isavia saveeŋ palelaaŋ: Zilivaa ru tane tizaa to lupuuŋ ru to Krisi. Ve natuzŋa, ene tamtamon to lupuuŋ ru tawe.
Saveeŋ onoon ilup ghiit, tauta lolog igheen tsiam kat. Ve yau mon mako. Tamtamon tisov tau tiwatagh saveeŋ onoon na, lolozi igheen tsiam paam. Pasaa aazne, saveeŋ onoon igheen tuŋia ila loloon. Ve saveeŋ tane pale igheen tomani ghiit tauvene taghon taghon gha ila. Yo 8:31+
Iit tau tataghon saveeŋ onoon, ve loloon pa Maaron ve tamtamon paam ne, poia to Tamaan Maaron yesuru Naatu Yesu Krisi pale izaa toit, ve lolozi isaghatin ghiit, ve tigham ghiit taleep poia toman loloon luuma. Onoon.
Tataghon saveeŋ onoon ve loloon pa tauun
4-5 O olman tinazi, yau naghita natumŋa siriv laghooŋ toozi iduduuŋ kat pa saveeŋ onoon. Yes titaghon duduŋai tutuuŋ tau Tamaan Maaron ighuru pait na. Tauta tigham ghau lolog poia kat. Aazne, nabood rau tane payo, leso napariaaŋ ghom muul pa ŋgar to loloon pa tauun ve tavaghamu poghani ghiit. Tutuuŋ tane, paaghu mako. Saawe imin maata tau taghur ila ve ilam, tutuuŋ tane igheen toit. Yo 13:34+
Eez to loloon pa Maaron ve tamtamon, ene vene: Laghooŋ toit, iit aat tataghon duduŋai tutuuŋ to Maaron. Ve tutuuŋ tooni tiina, ene vene: Iit aat loloon pa tauun ve tavaghamu poghani ghiit. Saawe imin maata ve ilam, yam aloŋlooŋ tutuuŋ tane. Yo 14:15, 21, 15:10
Yesu koiŋa
Yau nasaav payam tauvene pasaa, zeran karomŋa naol tila tirau taan, ve tipapaghau tamtamon pa eez to Maaron. Saveeŋ tau iit tavovotia taghe Yesu Krisi izilam taan ve imin tamtamon, ene yes tivotia mako. Pasaa, yes tighur ila tauvene mako. Tamtamon tau ighe igham tauvene, i ŋeer to karom, ve imin Yesu koia. 1Yo 2:18+, 4:1+
Tauvene ayamaan gham pa zeran karomŋa tawe. Mako pale tigherev gham gha apul eez to Maaron, ve uraat tau nighamu ila sosomim na, le anooŋa mako ve ileple. Tauvene ayooz ariaaŋ. Leso murei, na agham suvinia atuya tsiam. Ga 4:11
Tamtamon tisov tau tikis saveeŋ to Krisi tuŋia mako, ve tiseeŋga pa saveeŋ siriv itaghon tauzi ŋgar toozi na, Tamaan Maaron ileep tomani zi mako. Eemon isaav ighe tamtamon eta ikis saveeŋ to Krisi tuŋia ve itaghoni, ene itotoia ighe Tamaan Maaron ve Naatu Yesu Krisi tileep tomania, ve yesŋa tivalupu zi timin eemon. 1Yo 2:23
10-11 Isaav ighe tamtamon eta ilat tsiam, ve ivotia saveeŋ tau isapir pa saveeŋ to Krisi tane, yam aghamu ilat ileep tomani gham ila ruum tsiam sov. Ve agham aaz poia pani ve yamŋa asavsaav sov. Aleep soghan pani. Mako pale apaako pa uraat tooni saghati tawe ma vene. Ro 16:17; 2Tes 3:6; Tit 3:10
Yoan ipasov saveeŋ tooni
12 Yau leg saveeŋ naol tau naghe nasavia payam. Eemon lolog pa bodeeŋni ila rau mako. Yau naghe taug nalat naghit gham ve itiŋa tasavsaav. Tagham tauvene, o loloon poia kat.
13 Tazimliva tau Maaron isiigho imin le na natŋa tane tigham aaz poia payo.

*1:1: Ziiri tane isaav tauvene: Yoan ibood rau tane pa livaa ee tomania natŋa. Ve ziiri 13 isavia livaa tawe tazliva. Yes ŋgara tigham ŋgar tighe Yoan isavia saveeŋ palelaaŋ: Zilivaa ru tane tizaa to lupuuŋ ru to Krisi. Ve natuzŋa, ene tamtamon to lupuuŋ ru tawe.