Rau Ite Imin Ru Tau Petrus Iboode
2 Pita—2 Peter
1
Yau Simon Petrus, besooŋa ve mbaŋooŋa to Yesu Krisi.
Nabood rau tane ilat pa yam tamtamon tau aghur ila to Yesu Krisi, i Maaron toit ve Uleeŋa toit. I itaghon ŋgar tooni duduuŋa ve saveeŋ mbuaaŋ tooni, tauta igham gham aghur ila tooni, ve aazne lemim ghuruuŋ ila tauu ta poia ve raraate imin yei tsiei.
Maaron pale igham ŋgar tsiam ivot le awatagh katin i tauu ve Tiina toit Yesu. Leso poia tomania luuma tooni tiina izaa tsiam ve aleep poia.
Maaron ipoi ghiit tamin i le wa. Eemon iit aat tagham ŋgar siriv, leso taghita poiŋ tooni anooŋa ivot
Maaron toit, i eeza tiina pa tapiri ve poia tooni. Poia tooni, tiina le tiina kat. Aghita. I ipoi ghiit tamin le, ve itotoi tauu pait, leso tawatagh katini ve tapiri izaa toit. Ila tauu tapiri, i irau ghiit pa ŋgar isov tau tambool pani na, leso tataghon eez tooni, ve tagham lepoogh poia ila tooni. Ve i igham gabua tintiina ve popoia kat pait itaghon saveeŋ mbuaaŋ tooni. Saveeŋ tawe irau itoor gham. Leso Maaron ŋgar tooni igheen tsiam, ve apaghau taumim pa ŋgar sasaghati to taan tau loloon ighaar pani ve ivavaghamun ghiit ne. 2Kor 3:8, 7:1; Ep 4:24
Maaron igham ŋgar popoia naol tana pait, tauvene yau nasaav payam: Yam irau azuari gham le aseeŋ ghuruuŋ ila tsiam pa ŋgar tau poia ila Maaron maata ve poia ila tamtamon matazi paam. Ve aseeŋ ŋgar poia tana pa ŋgar to tawatagh katin Maaron. Ve ŋgar tana, aseeŋga pa ŋgar to taŋgin tauun poi. Ve ŋgar tana, aseeŋga pa ŋgar to tayooz ariaaŋ pa badooŋ pataŋani. Ve ŋgar tana, aseeŋga pa ŋgar to mataan iŋgal Maaron ve tataghon eez tooni. 1Kor 9:25; 1Tim 6:6; Hib 10:36
Ve ŋgar tana, aseeŋga pa ŋgar to loloon pa toŋvetaz toit to Krisi. Ve ŋgar tana, aseeŋga pa ŋgar to loloon pa tamtamon tisov ve tagham poghani zi. 1Tes 3:12; 1Yo 4:21
Pa ighe azuari gham pa ŋgar naol tane ila ila le tigheen ariaaŋ ilat tsiam, ene irau ŋgar to awatagh Tiina toit Yesu Krisi, igheen sorok mako. Pale agham anooŋa tooni ivot. Yo 15:5; Tit 3:14
Eemon isaav ighe tamtamon eta, ŋgar tauvene igheen tooni mako, ene itotoia ighe i maata kumkuuma, ma maata mako. I igham ŋgar pa gabua to nugh sambam mako ve maata ilala pa gabua to taan mon. Ve uraat to Krisi tau ireu sosor tooni, ve ighamu iŋgalaaŋ ila Maaron maata na, i loolo iveegh pani wa. 1Yo 1:7, 2:9+
10 Tauvene yam toŋvetaz, azuari gham le ataghon duduŋai ŋgar isov tana. Leso taumim awatagh kat aghe Maaron isiigh gham, ve ipoi gham amin le wa. Ve irau atap ve aghur murimim pani ne mako. Mako le mako kat. Hib 3:12-14; 2Pe 3:17
11 Ve murei, saawe tau aloŋ ala nugh sambam, ene pale tiyaŋin payam, ve tigham gham toman lolozi poia kat. Nugh tawe, Tiina toit Yesu Krisi tau Uleeŋa toit na, pale igham pooz pani le alok.
Petrus ipaes ighe saawe tooni ilam igharau wa
12 Onoon, saveeŋ tau aazne naboode payam, ene paaghu payam mako. Yam awataghi wa. Pasaa, yam agham saveeŋ onoon, ve akisi tuŋia wa. Eemon naghe napeipei ŋgar tsiam pani, leso matamim iŋgalŋgali. 13-14 Pasaa, Tiina toit Yesu Krisi ipaghazoŋai ghau gha nawatagh wa: Dur tsiau * Dur tau Petrus isavia, ene i tauu anooŋa. I igham ŋgar ighe malau mako pale tiravu imaat.
to taan tane, malau mako pale napuli izi. Tauvene matag iŋgal naghe saawe tau nalepleep soone, ene poia to napei ŋgar tsiam pa saveeŋ tane. Yo 21:18+; 2Kor 5:1+
15 Ve yau aat nail eez siriv. Leso saawe tau ighe napul gham ma vene, yam irau matamim kisin saveeŋ tau nasavia payam ne. Saawe tau Petrus ileep izi Rom, Markus ileep tomania ve iloŋlooŋ Krisi vaaru ila Petrus aavo. Tauta iboode ila rau ve ipaduduuŋa. Buk tawe, ta aazne tawaato taghe Vaaru Poia Tau Markus Iboode. Ene eez ee tau Petrus iuul iit Kristen to mataan kisin saveeŋ tooni.
Muuŋ, Petrus ighit katin Krisi tapiri. Tauta ipariaaŋ saveeŋ tooni
16 Saawe tau nisaav payam pa Tiina toit Yesu Krisi tapiri ve muleeŋ tooni, yei nitaghon sisiiŋ soroksorok tau zeran ŋgara siriv to taan titombaan tamtamon pani ne mako. Yei nighit katin Krisi tapiri ve mbonari pa matamai. Tauta nipariaaŋ saveeŋ tooni. Mt 17:1+; Yo 1:14
17 Aghita. Muuŋ, yeŋa Krisi nilepleep, ve nighita Tamaan Maaron tau tapiri ve mbonari tiina na ipakuru ve igham Krisi mbonari isul tiina. Ve nilooŋ Maaron aliiŋa isaav pani ighe: “Ena yau taug natug tau lolog igheen tooni, ve igham ghau lolog poia kat.” 18 Onoon kat. Yeŋa Krisi nileep izi loloz patabuyaaŋ, ve taumai nilooŋ katin Maaron aliiŋa tawe sambam ve izilam.
Saveeŋ tau muuŋ propet to Maaron tiboode na, mataan kisini ve tataghoni
19 Gabua naol tau ivot pa Yesu na, ene ipariaaŋ ghei le nighur ila kat nighe: Saveeŋ isov tau muuŋ propet to Maaron tiboode na, ene onoon. Isaav ighe yam matamim kisin saveeŋ toozi tawe ve ataghoni, ene pale poia. Pasaa, ene imin lam tau isul ila ndoroom loolo ila ila lee nughizau, mako ghazooŋa tauu to Krisi isul ila lolomim, imin pitum Zauŋa to mboŋoozo mbonari. Pitum zauŋa to mboŋoozo, ene izaa to Krisi ve muleeŋ tooni. Aghita Syg 22:16 ve Nam 24:17. Mbo 119:105; 2Kor 4:6; Syg 22:16
20 Ve alooŋ. Gabua tiina ee tau yam irau agham ŋgar pani poi, ene vene: Maaron aliiŋa tau muuŋ propet tooni tivotia ve tiboode na, irau tavotia puughu itaghon tauun ŋgar toit mako. 21 Pasaa, propet eta itaghon tauu loolo ve isavia saveeŋ tana mako. Avuvu Patabuyaaŋ ipaburigin tamtamon ve igham pooz pazi, tauta tisavia. 2Tim 3:16; 1Pe 1:10+

*1:13-14: Dur tau Petrus isavia, ene i tauu anooŋa. I igham ŋgar ighe malau mako pale tiravu imaat.

1:15: Saawe tau Petrus ileep izi Rom, Markus ileep tomania ve iloŋlooŋ Krisi vaaru ila Petrus aavo. Tauta iboode ila rau ve ipaduduuŋa. Buk tawe, ta aazne tawaato taghe Vaaru Poia Tau Markus Iboode. Ene eez ee tau Petrus iuul iit Kristen to mataan kisin saveeŋ tooni.

1:19: Pitum zauŋa to mboŋoozo, ene izaa to Krisi ve muleeŋ tooni. Aghita Syg 22:16 ve Nam 24:17.